Published:Updated:

பத்திரிகையாளர்களின் குழந்தைகளுக்குப் பாராட்டு விழா -பரிசுகளை வழங்கிய முதன்மைச் செயலாளர் பாலச்சந்திரன்!

பத்திரிகையாளர்களின் குழந்தைகளுக்குப் பாராட்டு விழா -பரிசுகளை வழங்கிய முதன்மைச் செயலாளர் பாலச்சந்திரன்!
பத்திரிகையாளர்களின் குழந்தைகளுக்குப் பாராட்டு விழா -பரிசுகளை வழங்கிய முதன்மைச் செயலாளர் பாலச்சந்திரன்!

ஈரோடு மாவட்ட பத்திரிகையாளர்கள் நலச்சங்கத்தின் சார்பில் நேற்று நடந்த விழாவில், பொதுத்தேர்வில் அதிக மதிப்பெண் பெற்ற பத்திரிகையாளர்களின் குழந்தைகளுக்கு, அரசு முதன்மைச் செயலாளர் பாலச்சந்திரன் பரிசு வழங்கிப் பாராட்டு தெரிவித்தார். 

ஈரோடு மாவட்ட பத்திரிகையாளர்கள் நலச்சங்கத்தின் சார்பில், அரசு பொதுத்தேர்வுகளில் சாதனைப் படைத்த பத்திரிகையாளர்களின் குழந்தைகளுக்கு பரிசளிப்பு விழா மற்றும் பத்திரிகையாளர்கள் குடும்பப்பொங்கல் விழா ஈரோட்டில் நேற்று நடந்தது. விழாவினை, மக்கள் சிந்தனைப் பேரவைத் தலைவர் த. ஸ்டாலின் குணசேகரன் தொடங்கி வைத்தார்.

விழாவில் பத்திரிகையாளர்களின் குடும்பத்தைச் சேர்ந்த பொதுத்தேர்வில் அதிக மதிப்பெண் பெற்ற 17 மாணவ, மாணவிகளுக்கு ரூ. 1லட்சத்து ஐந்து ஆயிரம் ரொக்கப்பரிசு மற்றும் கேடயத்தை  தமிழக அரசின் முதன்மைச் செயலாளர் (வணிகவரி மற்றும் பதிவுத்துறை) கா.பாலச்சந்திரன் வழங்கின்னார். பின்னர் ஈரோடு செய்தி ஊடகங்கள் நேர்மறைச் சிந்தனை கொண்ட செய்திகளுக்கு முக்கியத்துவம் தர வேண்டும் என அவர் வேண்டுகோள் விடுத்தார்.

தொடர்ந்து பேசிய அவர்,  ``செய்தி ஊடகங்கள் தரமான, நேர்மறைச் சிந்தனை கொண்ட செய்திகளுக்கு முக்கியத்துவம் தந்து வெளியிட வேண்டும். தேர்தல் நேரங்களில் பணம் கொடுத்து செய்தி வெளியிடச் செய்வது, தரமற்ற புலனாய்வு செய்திகள் போன்றவற்றை தவிர்க்க வேண்டும். இனி வரக்கூடிய காலங்களில் சமுதாயத்திற்குப் பயன்தரும் செய்திகளை மக்கள் மனதில் புகுத்த வேண்டும்.

படிப்பு என்பது ஒரு சாலை போன்றது. எந்த இடத்திற்குச் செல்ல வேண்டும் என்பதைக் குழந்தைகளான நீங்கள்தான் முடிவு செய்ய வேண்டும். நீங்கள் கற்ற கல்வியை எந்த அளவுக்குப் பயன்படுத்துகிறீர்களோ, அந்த அளவுக்கு உயர முடியும். சமுதாயத்தில் ஒவ்வொருவரும் நல்லவர்களாக மாறி, நேர்மறை சிந்தனையோடு செயல்பட்டால், குற்றங்கள் நடக்க வாய்ப்பில்லை. சமுதாயத்தில் நடக்கும் தவறுகளை சுட்டிக்காட்ட மனு அனுப்புபவர்கள், என் பெயர் தெரியக்கூடாது என்கின்றனர். அங்குதான் நாம் தவறு செய்கிறோம். 
குற்றங்களைத் தட்டிக்கேட்கும் சமுதாயம் தற்போது இல்லை. நாம் செய்யும் தவறு யாருக்குத் தெரியப்போகிறது என்ற எண்ணம் சமுதாயத்தை ஒழுக்ககேடு உள்ளதாக மாற்றி விடுகிறது. தனிமனித ஒழுக்கத்தைக் கடைப்பிடிக்க வேண்டும் என்பதில் ஒவ்வொருவரும் உறுதியாக இருக்க வேண்டும். 

பத்திரிகையாளர்களின் பணி என்பது நிலையில்லாததாக இருக்கிறது. பணி ஓய்வுக்குப்பின் அவர்களுக்கு ஓய்வூதியம் கிடைக்காது. எனவே, பத்திரிகையாளர்களின் குழந்தைகள் கல்வியில் ஆர்வம் செலுத்தி, வாழ்வில் முன்னேற வேண்டும்” என்றார். 
 
இதனைத் தொடர்ந்து பத்திரிகையாளர்களுக்கு ரூ  2.50 லட்சம் மதிப்பிலான பொங்கல் பொருட்கள் வழங்கப்பட்டது. பத்திரிகையாளர் குடும்ப உறுப்பினர்கள் பங்கேற்ற பல்வேறு கலை நிகழ்ச்சிகள் விழாவில் நடந்தது. 

விழாவில், எம்.எல்.ஏ.க்கள் தோப்பு வெங்கடாசலம், தென்னரசு, ஈரோடு மாநகராட்சி ஆணையர் சீனி அஜ்மல்கான், கே.எம்.சி.எச். தலைமை மருத்துவர் மோகன்,  எம்எம்சிஹெச் டாக்டர் சதாசிவம், ஈரோடு அமைப்பு தலைவர் சுதாகர், அனைத்து வணிக சங்க முன்னாள் பொதுச்செயலாளர் ராஜமாணிக்கம், பாஜக மாநில பிரசார அணி செயலாளர் சரவணன் உள்ளிட்டோர் பங்கேற்றனர். 

முன்னதாக விழாவுக்கு ஈரோடு மாவட்ட பத்திரிகையாளர்கள் நலச்சங்கத் தலைவர் கோவிந்தராஜ் தலைமை வகித்தார். செயலாளர் ஜீவா தங்கவேல் வரவேற்றார். விழா முடிவில் சங்க பொருளாளர் ரவிச்சந்திரன் நன்றி கூறினார்.