Published:Updated:

’தமிழகத்தில் இன்று மட்டும் 771 பேருக்கு கொரோனா நோய்த் தொற்று’ – சுகாதாரத்துறை தகவல் #NowAtVikatan

கொரோனா வைரஸ்
கொரோனா வைரஸ்

6-5-2020 | இன்றைய முக்கிய நிகழ்வுகளின் தொகுப்பு!

06 May 2020 8 AM

முன்னாள் மத்திய அமைச்சர் மரணம்!

முன்னாள் மத்திய அமைச்சர் தலித் எழில்மலை, மாரடைப்பால் சென்னையில் காலமானார். அவருக்கு வயது 74. இவர் வாஜ்பாய் அமைச்சரவரையில் நல்வாழ்துறை இணை அமைச்சராக பணியாற்றினார்.

06 May 2020 8 AM

யாருக்கும் எந்த பாதிப்பும் இல்லை!

சென்னை போயஸ் கார்டனில் உள்ள மறைந்த முன்னாள் முதல்வர் ஜெயலலிதாவின் வேதா இல்லத்தை நினைவு இல்லமாக்கும் பணியில் தீவிரம் காட்டிவருகிறது தமிழக அரசு. தற்போது, ஜெயலலிதா இடத்தை கையகப்படுத்துவதற்கான அறிவிப்பை வெளியிட்டுள்ளது. போயஸ் கார்டன் பகுதி மக்களின் கருத்தைக் கேட்டறிந்த நிலையில், நிலத்தைக் கையகப்படுத்த தமிழக அரசு நடவடிக்கை எடுத்துள்ளது என்று கூறப்படுகிறது. ஜெயலலிதாவின் இடத்தை கையகப்படுத்துவதால் யாருக்கும் எந்த பாதிப்பும் இல்லை என்றும் தமிழக அரசு சார்பில் தெரிவிக்கப்பட்டுள்ளது.

06 May 2020 8 AM

ஆயத்தீர்வை வரியை உயர்த்திய தமிழக அரசு!

தமிழகத்தில் நாளை டாஸ்மாக் கடைகள் திறக்கப்பட உள்ள நிலையில், மதுபானங்களின் விலையை ரூ.20 வரை உயர்த்தி அறிவிப்பு வெளியிட்டுள்ளது தமிழக அரசு. இந்தியத் தயாரிப்பு, அயல்நாட்டு மதுபானங்களின்மீது ஆயத்தீர்வை வரி 15% உயர்த்தப்பட்டுள்ளது. இதனால் மதுபானங்களின் விலை அதிகரித்துள்ளது. சாதாரண வகை 180 மி.லி. மதுபான பாட்டிலின் சில்லறை விற்பனை, ரூ.10 கூடுதல் விலை வைத்து விற்கப்படும்.

06 May 2020 11 AM

மேலும் 8 பேருக்கு கொரோனா!

சென்னை டிஜிபி அலுவலக காவல் தொழில்நுட்ப பிரிவில் மேலும் 8 பேருக்கு கொரோனா தொற்று உறுதி செய்யப்பட்டுள்ளது. ஏற்கனவே ஒருவருக்கு தொற்று உறுதி செய்யப்பட்ட நிலையில் பாதிப்பு எண்ணிக்கை 9 ஆக அதிகரித்துள்ளது. இதேபோல் சென்னை சூளைமேடு காவல் நிலைய உதவி ஆய்வாளருக்கு கொரோனா தொற்று உறுதி செய்யப்பட்டுள்ளது. சென்னை சவுக்கார்பேட்டை அண்ணா பிள்ளை தெருவில் அம்மா உணவக ஊழியர்கள் 2 பேருக்கு கொரோனா தொற்று உறுதி செய்யப்பட்டுள்ளது.

06 May 2020 12 PM

சித்த வைத்தியர் திருதணிகாச்சலம் கைது..!

பிரபல சித்த வைத்தியரும் இயற்கை மருத்துவருமான திருதணிகாச்சலத்தை இன்று அதிகாலை சென்னை குற்றப்பிரிவு போலீஸ் கைது செய்தது. கொரோனா நோய்க்கு மருந்து கண்டுபிடித்ததாக வலைதளங்களில் பேசி வந்த நிலையில் அவர்மீது இந்திய மருத்துவம் மற்றம் ஓமியோபதித் துறை சார்பில் போலீஸில் வழக்குத் தொடுக்கப்பட்டது. இந்தநிலையில் இன்று அதிகாலை அவர் கைது செய்யப்பட்டார்.

06 May 2020 6 PM

மதுக்கடைகளை திறப்பதற்கு தடை இல்லை!

கொரோனா ஊரடங்கு நேரத்தில் மதுக்கடைகளை திறப்பதற்கு தடை விதிக்க வேண்டும் என சென்னை உயர்நீதிமன்றத்தில் வழக்கு தொடரப்பட்டது. இந்த வழக்கு விசாரணை இன்று நடந்தது. தமிழக அரசு தரப்பில், ‘ டாஸ்மாக் மது விற்பனையை ஆன்லைனில் மேற்கொள்ள முடியாது. டோர் டெலிவரியும் செய்ய முடியாது. டாஸ்மாக் கடைகளில் சமூக இடைவெளி பின்பற்றப்படும் என தெரிவிக்கப்பட்டது. இதனையடுத்து தமிழகத்தில் நாளை மதுக்கடைகளை திறப்பதற்கு தடை இல்லை என சென்னை உயர்நீதிமன்றம் உத்தரவிட்டுள்ளது.

06 May 2020 8 PM

சென்னையில் மட்டும் இன்று 324 பேருக்கு கொரோனா பாதிப்பு

தமிழகத்தில் இன்று மட்டும் 771 பேருக்கு கொரோனா தொற்று உறுதிசெய்யப்பட்டுள்ளதாக தமிழக சுகாதாரத்துறை தரப்பில் தெரிவிக்கப்பட்டுள்ளது. இதனையடுத்து தமிழகத்தில் கொரோனா நோய்த் தொற்றால் பாதிக்கப்பட்டவர்களின் எண்ணிக்கை 4,829 -ஆக உயர்ந்துள்ளது. சென்னையில் மட்டும் இன்று 324 பேருக்கு பாதிப்பு உறுதிப்படுத்தப்பட்டுள்ளது. சென்னையில் கொரோனா நோய்த்தொற்றால் பாதிக்கப்பட்டவர்களின் எண்ணிக்கை 2,328 ஆக அதிகரித்துள்ளது. தமிழகத்தில் கோவிட்-19-னால் பாதித்தவர்களில் இதுவரை 1,516-பேர் குணமடைந்து வீடு திரும்பியுள்ளனர்

அடுத்த கட்டுரைக்கு