“கொள்ளிடத்தின் கதிதான் மற்ற அணைகளுக்கும்!” - எச்சரிக்கும் என்ஜினீயர்கள்

‘‘ந மக்கு திடீர்க் காய்ச்சல் வருவதுபோல, முக்கொம்பு அணையும் திடீரென உடைந்துள்ளது’’ என்று பொதுப்பணித் துறையின் அமைச்சரும் தமிழக முதல்வருமான எடப்பாடி பழனிசாமி முக்கொம்பு தடுப்பணை உடைந்ததற்குக் காரணம் சொல்லியிருக்கிறார்.

திருச்சியில் முக்கொம்பு மேலணையின் மதகுகள் உடைந்ததைத் தொடர்ந்து, தமிழகத்தில் உள்ள அணைகளின் பராமரிப்பு மற்றும் பாதுகாப்பு குறித்துப் பல்வேறு கேள்விகள் எழுப்பப்படுகின்றன. திருச்சியில் கொள்ளிடம் ஆற்றில் குறுக்கே கட்டப்பட்ட மேலணையின் ஒன்பது மதகுகள் உடைந்து, தண்ணீரில் அடித்துச்செல்லப்பட்டன. அணையில் இருந்து இரும்பு உத்தரங்களைத் திருடியதாலும், அளவுக்கு அதிகமாகக் காவிரி ஆற்றில் மணல் அள்ளப்பட்டதாலும் இச்சம்பவம் நிகழ்ந்ததாகக் குற்றச்சாட்டு எழுந்தது.

இச்சம்பவம் நிகழ்ந்து இரண்டு நாள்கள் கழித்து உடைந்த அணையைப் பார்வையிட வந்த முதல்வர் எடப்பாடி பழனிசாமி, “அதிக அழுத்தத்தின் காரணமாகவே அணை உடைந்திருக்கிறது. மணல் அள்ளுவதால் அணை உடையவில்லை’’ என்றார்.

. கிருஷ்ணகிரி மாவட்டத்தில் தென்பெண்ணை ஆற்றின் குறுக்கே கெலவரப்பள்ளி அணையின் முதல் மதகு கடந்த வருடத்தில் உடைந்தது. கடந்த மாதம், நெல்லை மாவட்டம் கடையம் அருகே ராமநதி அணையின் தடுப்புச்சுவர் இடிந்தது. தற்போது, 182 ஆண்டுகள் பழைமையான முக்கொம்பு தடுப்பணையில் ஒன்பது மதகுகள் ஆகஸ்ட் 22-ம் தேதி திடீரென உடைந்தன. ‘‘அனைத்து அணைகளையும் ஆண்டுதோறும் பராமரிக்கிறோம்’’ என்கிறார் முதல்வர் எடப்பாடி பழனிசாமி. முதல்வர் சொல்வது போல அனைத்து அணைகளும் பாதுகாப்பாக உள்ளனவா, முறையாகப் பராமரிக்கப்படுகின்றனவா?

. ‘‘ஏதாவது ஓர் அணை உடைந்தபிறகுதான் அதற்கான காரணத்தையே கண்டுபிடிக்கிறோம். முன்னெச்சரிக்கை நடவடிக்கை எடுக்கப் படவில்லை; முறையான பராமரிப்பும் இல்லை. தமிழகத்தில் அனைத்து அணைகளின் பாதுகாப்பும் கேள்விக்குறியாகத்தான் உள்ளது’’ என்கிறார் பொதுப்பணித் துறையின் ஓய்வுபெற்ற உதவிச் செயற்பொறியாளர் திருநாவுக்கரசு.

‘‘கோதாவரி ஆற்றில் கட்டப்பட்டுள்ள தவளேஸ்வர் அணைக்கட்டு, முக்கொம்பு அணையைவிட பழைமையானது. எப்போதும் நீர் நிரம்பி இருக்கும் கோதாவரி அணையில், இதுவரை எந்தப் பிரச்னையும் இல்லை. இந்திய நீர்ப் பாசனத்தின் தந்தை என அறியப்படும் சர் ஆர்தர் காட்டன் என்ற ஆங்கிலப் பொறியாளர் கட்டியதுதான் முக்கொம்பு தடுப்பணையும் கோதாவரி தடுப்பணையும். அவர் கட்டிய அணைகளில் ஒன்று இப்போது உடைந்து போயுள்ளது. மற்றொன்று பலமாக உள்ளது. பராமரிப்புதான் வித்தியாசம். உரிய பராமரிப்பு இல்லாததால்தான், ஒன்பது மதகுகள் உடைந்தன. அணைக்கட்டுப் பகுதியில் பல கிலோமீட்டர் தூரத்துக்கு மணல் அள்ளப்பட்டுவிட்டது. அதனால்தான் தடுப்பணை பலவீனமாகிவிட்டது. கொள்ளிடத்தில் பல சிறிய அணைக்கட்டுகள் உள்ளன. முக்கொம்பு அணையின் நிலைதான் இந்த அணைக்கட்டுகளுக்கும்.

1856-க்குப் பிறகு தமிழகத்தில் ஆங்கிலேயர்களால் 16 அணைகள் கட்டப்பட்டுள்ளன. இவை எல்லாமே கட்டி முடிக்கப்பட்டு, சுமார் 150 ஆண்டுகள் ஆகிவிட்டன. இவற்றைச் சேதப்படுத்தாமல், உறுதித்தன்மையை ஆராய்ந்து பார்த்து அதற்கேற்ப பராமரிப்புச் செய்ய வேண்டும். இதைச் செய்யாவிட்டால், அணைகளின் பாதுகாப்பு கேள்விக்குறிதான். அணைகளைப் பாதுகாக்க வேண்டிய பொதுப்பணித் துறை, இதில் அலட்சியம் காட்டுகிறது. முக்கொம்பு தடுப்பணை நிலையில்தான், அனைத்து அணைகளும் உள்ளன. மணல்

. அள்ளுவதும் எல்லா ஆறுகளிலும் தொடர்கிறது. மழைக்காலம் வருகிறது. ஆற்றில் தண்ணீர் அதிக வேகத்தில் வந்தால் தடுப்பணை உடைய அதிக வாய்ப்பு இருக்கிறது.

மேட்டூரில் தண்ணீர் திறந்துவிடுவதற்கு முன்புதான் அணைக் கதவுகளை சரி செய்கிறார்கள். ஒவ்வொரு மாதமும் அணைக் கதவுகளுக்குப் பராமரிப்புப் பணி செய்ய வேண்டும். இப்போது எந்த அணைக்கும் அதுமாதிரி செய்வதில்லை. பொதுப்பணித்துறையில் எத்தனை என்ஜினீயர்கள் நேரடியாகக் கள ஆய்வுக்குச் செல்கிறார்கள் என்பது தெரியவில்லை’’ என்றார்.

இதுகுறித்து கருத்து தெரிவித்துள்ள விவசாயிகள் அமைப்பினர், ‘‘உடைந்த அணையின் கிழக்கே 100 மீட்டர் தொலைவில் புதிய கதவணை கட்ட ரூ.410 கோடி ஒதுக்கப்படுவதாக முதல்வர் அறிவித்துள்ளார். புதிய அணை கட்டுவதுடன், தமிழகத்தில் இருக்கும் மற்ற அணைகளிலும் ஆய்வு மேற்கொள்ளப்பட வேண்டும். தமிழகத்தில் சிறியதும் பெரியதுமாக 1,399 தடுப்பணைகள் உள்ளன. அவற்றைப் பராமரித்து, அனைத்து நீர்நிலைகளுடனும் அவற்றை இணைக்க வேண்டும். அப்போதுதான், கடைக்கோடி வரை தண்ணீர் சென்றடையும். முதலில், நீர்நிலைகள் குறித்த தெளிவான பார்வை அரசுக்கு இருக்க வேண்டும்” என்றனர். - இ.லோகேஸ்வரி படம்: கே.ஜி.மணிகண்டன்

“கொள்ளிடத்தின் கதிதான் மற்ற அணைகளுக்கும்!” - எச்சரிக்கும் என்ஜினீயர்கள்

இ.லோகேஷ்வரி