Published:Updated:

‘நம்மை பாதுகாப்பவர்களை நாம் பாதுகாக்க வேண்டும்!’- சசிகுமார் வேண்டுகோள் #NowAtVikatan

சசிகுமார்
சசிகுமார்

20.4.2020 | இன்றைய முக்கிய நிகழ்வுகளின் தொகுப்பு!

20 Apr 2020 3 PM

மே 3-ம் தேதி வரை தளர்வு இல்லை!

ஊரடங்கு
ஊரடங்கு

இந்தியாவில் மே மாதம் 3-ம் தேதி வரையில் ஊரடங்கு உத்தரவு தொடரும் என பிரதமர் மோடி அறிவித்திருந்தாலும், அந்த அறிவிப்புடன் சேர்த்து ஏப்ரல் 20-ம் தேதிக்குப் பின்னர் கொரோனாவால் பாதிக்கப்படாத பகுதிகளில் சிறிய அளவிலான கட்டுப்பாடுகள் தளர்வு இருக்கும் எனத் தெரிவித்திருந்தார். இந்நிலையில் இன்று அது தொடர்பான ஆலோசனை முதல்வர் பழனிசாமி தலைமையில் நடைபெற்றது.

அதன் பின்னர், தமிழக அரசு வெளியிட்டுள்ள செய்திக்குறிப்பில், மே மாதம் 3-ம் தேதி வரையில் தமிழகத்தில் எந்தத் தளர்வும் கிடையாது எனத் தெரிவிக்கப்பட்டுள்ளது. ஏற்கெனவே டெல்லி, தெலங்கானா உள்ளிட்ட சில மாநிலங்கள் இந்த முடிவை எடுத்துள்ளது குறிப்பிடத்தக்கது.

20 Apr 2020 8 PM

நம்மை பாதுகாப்பவர்களை நாம் பாதுகாக்க வேண்டும்!

கொரோனா விழிப்புணர்வு தொடர்பாக நடிகர் சசிகுமார் #மருத்துவர்களேகடவுள் என்ற ஹேஷ்டேக்குடன் ட்விட்டரில் வீடியோ ஒன்றைப் பதிவிட்டுள்ளார். அதில், “கொரோனா வைரஸ் எனும் கொடிய நோய் காரணமாக நம்மை வீட்டிற்குள் இருக்க அறிவுறுத்திவிட்டு மருத்துவர்களும், செவிலியர்களும் அவர்களின் உயிரை பணயம் வைத்து நம்முடைய உயிரை பாதுகாத்து வருகின்றனர். கடந்த சில நாள்களாக கேள்விப்படும் சம்பவங்கள் வருத்தம் அளிக்கிறது, நம்முடைய உயிரை காப்பாற்றுபவர்களை நாம்தான் மதிக்க வேண்டும்.

என்னுடைய வருத்தத்தை மருத்துவர்களுக்கும், செவிலியர்களுக்கும் மக்கள் சார்பில் தெரிவித்துக்கொள்கிறேன். இதுபோன்ற சம்பவங்கள் இனி நடக்கக்கூடாது. நாம் நடக்கவும்விடக்கூடாது. நம்மை பாதுகாக்கும் மருத்துவர்கள், செவிலியர்கள், காவலர்கள் மற்றும் தூய்மைப்பணியாளர்களை நாமும் பாதுகாக்க வேண்டும். அவர்களுக்கு நாம் ஆதரவு தெரிவிக்க வேண்டும் அதுதான் மனிதம். மனிதம் வளரவேண்டும் நன்றி” என உருக்கமாக பதிவிட்டுள்ளார்

அடுத்த கட்டுரைக்கு