Published:Updated:

மத்திய அமைச்சர் அமித் ஷாவுடன் முதல்வர், துணை முதல்வர் சந்திப்பு! #NowAtVikatan

எடப்பாடி பழனிசாமி - அமித் ஷா
எடப்பாடி பழனிசாமி - அமித் ஷா ( File photo2 )

21-11-2020 | இன்றைய முக்கிய நிகழ்வுகளின் தொகுப்பு..!

21 Nov 2020 7 PM

அமித் ஷாவை சந்தித்த முதல்வர், துணை முதல்வர்! 

அமித் ஷா
அமித் ஷா

சென்னை கலைவாணர் அரங்கில் நடைபெற்ற அரசு நிகழ்ச்சி முடிந்த பின்னர் மத்திய உள்துறை அமைச்சர் அமித் ஷா ஹோட்டலுக்கு சென்றார். அதனை தொடர்ந்து தமிழக முதல்வர் பழனிசாமி மற்றும் துணை முதல்வர் பன்னீர் செல்வம் ஆகியோர் அமித் ஷாவிடம் ஆலோசனை நடத்துவதற்காக ஹோட்டல் சென்றனர். இந்த சந்திப்பின் போது கூட்டணி குறித்தும், தேர்தல் வியூகம் குறித்தும் ஆலோசிக்கப்படலாம் என்று கூறப்படுகிறது.

`ரொம்ப நாளைக்கு அப்புறம் வந்திருக்கிறேன்; அரசியல் பேசாமல் எப்படி?!’ - அரசு விழாவில் அமித் ஷா அதிரடி
21 Nov 2020 5 PM

அ.தி.மு.க - பா.ஜ.க கூட்டணி தொடரும்! - துணை முதல்வர் 

சென்னை கலைவாணர் அரங்கில் இன்று பல்வேறு திட்டங்களின் அடிக்கல் நாட்டு நிகழ்ச்சியும், அர்பணிப்பு நிகழ்ச்சியும் நடைபெற்றது. மத்திய அமைச்சர் அமித் ஷா இந்த நிகழ்ச்சியில் கலந்து கொண்டு ரூ.61,843 கோடி மதிப்பீட்டில் சென்னை மெட்ரோ ரயில் திட்டத்தின் 2 -ம் கட்டம் உள்ளிட்ட பல்வேறு திட்டங்களுக்கு அடிக்கல் நாட்டினார்.

அமித் ஷா வருகை
அமித் ஷா வருகை

இந்த நிகழ்ச்சியில் முதலில் பேசிய துணை முதல்வர் பன்னீர் செல்வம், ``2021 -ம் ஆண்டு நடைபெறும் சட்டப்பேரவை தேர்தலில் அ.தி.மு.க தொடர்ந்து மூன்றாவது முறையாக ஆட்சி அமைக்கும். வெற்றி கூட்டணியான அ.தி.மு.க - பா.ஜ.க கூட்டணி தொடரும்” என அமித் ஷா முன்னிலையிலே அறிவித்தார்.

21 Nov 2020 5 PM

சென்னை மெட்ரோ ரயில் திட்டத்தின் 2 -ம் கட்டம்!

அரசு நிகழ்ச்சிகளில் பங்கேற்பதற்காக சென்னை வந்த மத்திய உள்துறை அமைச்சர் அமித் ஷா, கலைவாணர் அரங்கில் மறைந்த முதலமைச்சர்கள் எம்.ஜி.ஆர்., ஜெயலலிதாவின் உருவப்படங்களுக்கு மலர்தூவி மரியாதை செய்தார். முதல்வர் பழனிசாமி, துணை முதல்வர் பன்னீர்செல்வம் உள்ளிட்டோரும் மரியாதை செலுத்தினர்.

சென்னை மெட்ரோ
சென்னை மெட்ரோ
மாதிரிப் படம்

தொடர்ந்து, திருவள்ளூர் மாவட்டம் கண்ணன்கோட்டை தேர்வாய்கண்டிகையில் ரூ.380 கோடி மதிப்பீட்டில் புதிய நீர்த்தேக்க திட்டத்தை உள்துறை அமைச்சர் அமித் ஷா மக்கள் பயன்பாட்டிற்கு அர்ப்பணித்தார். மேலும் ரூ.61,843 கோடி மதிப்பீட்டில் சென்னை மெட்ரோ ரயில் திட்டத்தின் 2 -ம் கட்டத்திற்கு உள்துறை அமைச்சர் அமித் ஷா அடிக்கல் நாட்டினார்.

21 Nov 2020 3 PM

மாணவர்களின் கல்வி கட்டணத்தை அரசே ஏற்கும்!

``தனியார் மருத்துவக் கல்லூரியில் இடம் ஒதுக்கப்படும் அரசுப் பள்ளி மாணவர்களுக்கான கல்விக் கட்டணத்தை தி.மு.க ஏற்கும்” என தி.மு.க தலைவர் மு.க.ஸ்டாலின் இன்று காலை தெரிவித்திருந்தார். ஏழை மாணவர்களின் கல்விச்செலவை தி.மு.க ஏற்கும் என மு.க ஸ்டாலின் அறிவித்த சில மணி நேரத்தில், அதனை அரசே ஏற்கும் என எடப்பாடி பழனிசாமி அறிவித்திருக்கிறார்.

மத்திய அமைச்சர் அமித் ஷாவுடன் முதல்வர், துணை முதல்வர்  சந்திப்பு! #NowAtVikatan

இது தொடர்பாக முதல்வர் வெளியிட்டுள்ள அறிவிப்பில், ``தனியார் மருத்துவ கல்லூரிகளில் சேரும் அரசுப் பள்ளி மாணவர்களின் கல்வி கட்டணத்தை அரசே ஏற்கும். கல்வி கட்டணம், விடுதி கட்டணங்கள் போன்றவற்றை அரசே நேரடியாக கல்லூரி நிர்வாகத்துக்கு செலுத்தும். கல்வி உதவித்தொகைக்கு அனுமதி வரும்வரை காத்திருக்காமல் உடனடியாக செலுத்த சுழல் நிதியை உருவாக்கவும் உத்தரவு பிறப்பிக்கப்பட்டுள்ளது" எனத் தெரிவித்துள்ளார்.

மேலும், ``மாணவர்களுக்கு முழு அரசு உதவி கிடைக்கும் என தெரிந்த பின்பும் தி.மு.க. உதவுவதாக தெரிவித்திருப்பது அரசியல் நாடகம். தி.மு.க-வின் அரசியல் நாடகத்தை மக்கள் நன்கு அறிவார்கள்" என்று குறிப்பிட்டார்.

21 Nov 2020 2 PM

சென்னையில் அமித் ஷா!

அரசு மற்றும் கட்சி நிகழ்வுகளில் பங்கேற்க மத்திய உள்துறை அமைச்சரும், பா.ஜ.க-வின் மூத்த தலைவருமான அமித் ஷா இன்று தமிழகம் வந்தார். சென்னை விமான நிலையத்தில் தமிழக முதல்வர் எடப்பாடி பழனிசாமி, துணை முதல்வர் பன்னீர் செல்வம், அமைச்சர்கள் ஜெயக்குமார், செங்கோட்டையன், தங்கமணி உள்ளிட்டோர் அமித் ஷாவை வரவேற்றனர். இவர்களுடன் தமிழக பா.ஜ.க தலைவர் எல். முருகன், எம்.பி ரவீந்திரநாத் குமார் உள்ளிட்டோர் வரவேற்றனர்.

அமித் ஷா
அமித் ஷா

விமான நிலையத்தில் இருந்து ஹோட்டல் புறப்பட்ட அமித் ஷா சாலையில் இறங்கி, இருபுறமும் கூடி இருந்த தொண்டர்களை நோக்கி கையசைத்தார். சாலையில் சிறிது நேரம் நடந்து சென்ற அமித் ஷாவுடன் தமிழக பா.ஜ.க தலைவர் முருகன், தமிழக பா.ஜ.க பொறுப்பாளர் சி.டி ரவி ஆகியோரும் சாலையில் நடந்தனர்.

21 Nov 2020 12 PM

மருத்துவக் கல்விக் கட்டணத்தை தி.மு.க ஏற்கும்!

``தனியார் மருத்துவக் கல்லூரியில் இடம் ஒதுக்கப்படும் அரசுப் பள்ளி மாணவர்களுக்கான கல்விக் கட்டணத்தை தி.மு.க ஏற்கும்” என தி.மு.க தலைவர் மு.க.ஸ்டாலின் தெரிவித்திருக்கிறார்.

இது தொடர்பாக ஸ்டாலின் வெளியிட்டுள்ள அறிக்கையில், ``இந்தக் கல்வியாண்டில், தனியார் மருத்துவக் கல்லூரிகளில் இடம் ஒதுக்கப்பட்டுள்ள அரசுப் பள்ளி மாணவர்களுக்கான மருத்துவப் படிப்புக்குரிய கட்டணத்தை முழுமையாக ஏற்கும் என்பதைத் தெரிவித்துக் கொள்கிறேன்.

ஸ்டாலின்
ஸ்டாலின்

சட்டமன்றத் தேர்தலுக்குப் பிறகு அமையவிருக்கின்ற தி.மு.க ஆட்சியில், நீட் தேர்வை முழுமையாக ரத்து செய்வதற்குரிய சட்ட நடவடிக்கைகள் உறுதியாக மேற்கொள்ளப்பட்டு, அரசுப்பள்ளி, அரசு உதவிபெறும் பள்ளி, கிராமப்புற, ஏழை, பின்தங்கிய, ஒடுக்கப்பட்ட சமூகங்களைச் சேர்ந்த அனைத்து மாணவமணிகளின் மருத்துவக் கனவும் நிச்சயமாக நிறைவேறும் என்ற உறுதியினை இப்போதே வழங்குகிறேன்” எனக் குறிப்பிட்டுள்ளார்.

21 Nov 2020 12 PM

தி.மு.க முன்னாள் எம்.பி கே.பி.ராமலிங்கம் பா.ஜ.க-வில் இணைந்தார்!

மார்ச், ஏப்ரல் காலகட்டத்தில் கொரோனா தடுப்பு விவகாரத்தில் தி.மு.க தலைவர் மு.க.ஸ்டாலின் அனைத்துக் கட்சி கூட்டத்தை கூட்ட வேண்டும் என்று தமிழக அரசை வலியுறுத்தி வந்தார். இந்தநிலையில் `மத்திய, மாநில அரசுகள் கொரோனவைச் சிறப்பாகக் கையாண்டுவருகின்றன’ என்றும், `144 தடை இருக்கும்போது அனைத்துக் கட்சி கூட்டம் தேவையில்லை’ என்றும் கே.பி.ராமலிங்கம் கருத்து தெரிவித்தார். தலைமைக்கு எதிராகப் பேசியதாகக் கூறி, கடந்த ஏப்ரல் மாதம் கே.பி.ராமலிங்கம் தி.மு.க-விலிருந்து நீக்கப்பட்டார். தொடர்ந்து அவர் அ.தி.மு.க-வில் இணைவார் போன்ற தகவல்கள் வெளியாகிவந்த நிலையில், முன்னாள் எம்.பி கே.பி.ராமலிங்கம் இன்று சென்னை கமலாலயத்தில் பா.ஜ.க-வில் இணைந்தார். இன்று தமிழகம் வரும் அமித் ஷாவையும் கே.பி.ராமலிங்கம் சந்திக்கவிருப்பதாகத் தகவகள் வெளியாகியிருக்கின்றன.

21 Nov 2020 9 AM

இன்று தமிழகம் வருகிறார் அமித் ஷா!

மத்திய உள்துறை அமைச்சரும், பா.ஜ.க-வின் மூத்த தலைவருமான அமித் ஷா இன்று தமிழகம் வரவிருக்கும் நிலையில், அவருக்கு உற்சாக வரவேற்பு அளிக்க பா.ஜ.க-வினர் ஏற்பாடுகளை செய்துவருகின்றனர். சென்னையில் பல்வேறு திட்டங்களுக்கு அமித் ஷா அடிக்கல் நாட்டவிருக்கிறார். மேலும், தமிழகத்தில் அடுத்த ஆண்டில் தேர்தல் நடைபெறவிருக்கும் நிலையில், கூட்டணி தொடர்பாகவும், கட்சியின் செயல்பாடுகள் தொடர்பாகவும் தீவிர ஆலோசனை மேற்கொள்ளவும் இருக்கிறார்.

அமித் ஷா தமிழகம் வரும் நிலையில் ட்விட்டரில் GoBackAmitShah என்னும் ஹேஷ்டேக் டிரெண்ட் ஆனது. மறுபுறம் TNWelcomesAmitShah என்னும் ஹேஷ்டேகையும் பா.ஜ.க-வினர் பயன்படுத்திவருகிறனர். தமிழகம் வருவது தொடர்பாக நேற்று ட்வீட் செய்திருந்த அமித் ஷா, ``நாளை தமிழகத்துக்கான பல்வேறு வளர்ச்சி மற்றும் மேம்பாட்டுத் திட்டங்களுக்கு அடிக்கல் நாட்டித் தொடங்கிவைக்கவிருப்பதை மகிழ்ச்சியுடன் தெரிவித்துக்கொள்கிறேன்” எனக் குறிப்பிட்டிருக்கிறார்.

தமிழக பா.ஜ.க தேர்தல் பொறுப்பாளரான சி.டி.ரவி, ட்விட்டரில், ``எதிரிகள் அவர்தம் படை புகுந்து, நையப் புடைக்க எம் தலைவன் வருகிறார். தமிழ்நாட்டின் விதிமாறும். இனி காண்பீர். எதிர்ப்போர் யாவரும் விலகுவீரே...” எனப் பதிவிட்டிருக்கிறார்.

அடுத்த கட்டுரைக்கு