Published:Updated:

தமிழகத்தில் 759 பேருக்கு கொரோனா பாசிட்டிவ்; மொத்த எண்ணிக்கை 15 ஆயிரத்தைக் கடந்தது! #NowAtVikatan

கொரோனா பாசிட்டிவ்
கொரோனா பாசிட்டிவ்

23-5-2020 | இன்றைய முக்கிய நிகழ்வுகளின் தொகுப்பு....!

23 May 2020 8 PM

தமிழகத்தில் 759 பேருக்கு கொரோனா பாசிட்டிவ்!

தமிழகத்தில் இன்று ஒரேநாளில் 759 பேருக்கு கொரோனா உறுதி செய்யப்பட்டுள்ளதாக சுகாதாரத் துறை தெரிவித்துள்ளது. இதன்மூலம் தமிழகத்தில் இதுவரை கொரோனா பாதிப்பு எண்ணிக்கை 15,512 ஆக அதிகரித்திருக்கிறது. சென்னையில் மட்டும் இன்று 625 பேருக்கு கொரோனா பாதிப்பு உறுதி செய்யப்பட்டுள்ளது.

கொரோனா
கொரோனா

தமிழகத்தில் ஒரே நாளில் 363 பேர் குணமடைந்துள்ளனர்; இதுவரை 7,491 பேர் குணமடைந்துள்ளனர். கொரோனாவால் தமிழகத்தில் மேலும் 5 பேர் உயிரிழந்துள்ளனர். இதன்மூலம் உயிரிழந்தோரின் மொத்த எண்ணிக்கை 103 ஆக உயர்ந்திருக்கிறது.

23 May 2020 11 AM

ஆர்.எஸ். பாரதிக்கு இடைக்கால ஜாமீன்!

ஆதித்தமிழர் மக்கள் கட்சித் தலைவர் கல்யாண்குமார் என்பவர் அளித்த புகாரின் பேரில் தி.மு.க அமைப்புச் செயலாளர் ஆர்.எஸ்.பாரதி இன்று அதிகாலை சென்னையில் கைது செய்யப்பட்டார். நீதிபதிகள், பட்டியலின மக்களை அவமதிக்கும் வகையில் பேசியதாக வந்த புகார்களின் அடிப்படையில் கைது நடவடிக்கை எடுக்கப்பட்டது. அவர் மீது தாழ்த்தப்பட்டோர் வன்கொடுமை தடுப்புச் சட்டத்தின் கீழ் 2 பிரிவுகளின் கீழ் வழக்கு பதிவு செய்யப்பட்டது.

ஆர்.எஸ் பாரதி
ஆர்.எஸ் பாரதி

கைது செய்யப்பட்ட ஆர்.எஸ்.பாரதியிடம் மத்திய குற்றப்பிரிவு போலீஸார் விசாரணையை நிறைவு செய்து, எழும்பூர் நீதிமன்ற நீதிபதி முன் ஆர்.எஸ்.பாரதியை ஆஜர்படுத்தினர். இதனிடையே ஆர்.எஸ்.பாரதியை ஜாமீனில் விடுவிக்க தி.மு.க வழக்கறிஞர் அணி நடவடிக்கை எடுத்து வந்தது. இந்த நிலையில், ஆர்.எஸ்.பாரதிக்கு ஜூன் மாதம் 1-ம் தேதி வரை இடைக்கால ஜாமீன் வழங்கப்பட்டுள்ளது. அவர் பேசியது தொடர்பான வழக்கு உயர்நீதிமன்றத்தில் விசாரணையில் இருப்பதால் இந்த இடைக்கால ஜாமீன் வழங்கப்பட்டுள்ளது.

23 May 2020 9 AM

இந்தியாவில் கொரோனா பாதிப்பு!

கொரோனா வைரஸ்
கொரோனா வைரஸ்

இந்தியாவில் கொரோனாவால் பாதிக்கப்பட்டவர்களின் எண்ணிக்கை 1.25 லட்சத்தை கடந்திருக்கிறது. கடந்த 24 மணி நேரத்தில் இதுவரை இல்லாத அளவில் 6,654 பேர் புதிதாக கொரோனாவால் பாதிக்கப்பட்டுள்ளனர். 137 பேர் கொரோனா காரணமாக பலியாகியுள்ளனர். இதன் மூலம் இந்தியாவில் கொரோனாவால் பாதிக்கப்பட்டவர்களின் எண்ணிக்கை 1,25,101 ஆக அதிகரித்திருக்கிறது. கொரோனாவால் பலியானவர்களின் எண்ணிக்கை 3,720 ஆக உள்ளது.

23 May 2020 9 AM

சலூன் கடைகளுக்கு கூடுதல் தளர்வு!

சலூன்
சலூன்
Representational Image

சென்னையை தவிர தமிழகத்தின் பிற மாவட்டங்களில் நகர் பகுதிகளிலும் நாளை முதல் சலூன் கடைகள், அழகு நிலையங்களை காலை 7 மணி முதல் மாலை 7 மணி வரை திறக்க தமிழக அரசு அனுமதி வழங்கியுள்ளது. முன்னதாக ஊரகப் பகுதிகளில் மட்டுமே சலூன் கடைகள் செயல்பட அனுமதி வழங்கப்பட்டிருந்தது.

அடுத்த கட்டுரைக்கு