Published:Updated:

`இதுவரை இல்லாத உச்சம்; தமிழகத்தில் ஒரே நாளில் 938 பேருக்கு கொரோனா தொற்று!’ -சுகாதாரத்துறை #NowAtVikatan

கொரோனா
கொரோனா

30-5-2020 | இன்றைய முக்கிய நிகழ்வுகளின் தொகுப்பு...!

30 May 2020 6 PM

புளியந்தோப்பில் கொரோனா சிகிச்சை மையம்!

சென்னை புளியந்தோப்பில் புதிதாக கட்டப்பட்டுள்ள அரசு அடுக்குமாடி குடியிருப்பில் 1,400 படுக்கைகள் கொண்ட கொரோனா சிகிச்சை மையம் அமைக்கப்பட்டுள்ளது. சென்னையில் லேசான தொற்று உள்ளவர்களுக்கு இங்கு சிகிச்சை அளிக்கப்படவுள்ளது.

படங்கள்:வி.ஸ்ரீனிவாசுலு

30 May 2020 6 PM

தமிழகத்தில் கொரோனா!

தமிழகத்தில் இதுவரை இல்லாத அளவாக 938 பேருக்கு கொரோனா பாதிப்பு கண்டறியப்பட்டுள்ளது. இதனால் தமிழகத்தில் கொரோனாவால் பாதிக்கப்பட்டவர்களின் எண்ணிக்கை 21,184 ஆக அதிகரித்துள்ளது. இன்று ஒரே நாளில் மாநிலத்தில் 6 பேர் கொரோனா காரணமாக பலியாகியுள்ளனர். மேலும், ஒரே நாளில் 687 பேர் குணமடைந்துள்ளனர்.

தமிழகத்தில் அதிகபட்சமாக சென்னையில் 616 பேருக்கு கொரோனா பாதிப்பு உறுதி செய்யப்பட்டுள்ளது!

30 May 2020 2 PM

சென்னையில் கட்டுப்பாடு தொடர பரிந்துரை!

4-ம் கட்ட ஊரடங்கு முடியவுள்ள நிலையில் இன்று சென்னை தலைமைச் செயலகத்தில் முதல்வர் பழனிசாமி தலைமையில், மருத்துவ வல்லுநர்கள் குழு கலந்துகொண்ட ஆலோசனைக் கூட்டம் நடைபெற்றது. இதற்குப் பிறகு செய்தியாளர்களைச் சந்தித்த குழுவினர், ``சென்னை மற்றும் அதைச் சுற்றியுள்ள செங்கல்பட்டு, திருவள்ளூர், காஞ்சிபுரம் ஆகிய மாவட்டங்களில்தான் கொரோனா பரவல் மிக அதிகமாக உள்ளது. எனவே, இந்த மாவட்டங்களில் கட்டுப்பாடுகளை நீட்டிக்க வேண்டும், பிற மாவட்டங்களில் தளர்வுகளை அறிவிக்கலாம் எனப் பரிந்துரைக்கப்பட்டுள்ளது” என்று தெரிவித்துள்ளனர்.

30 May 2020 2 PM

சிறுமி எரித்துக் கொல்லப்பட்ட விவகாரம்! - இருவர் மீது குண்டர் சட்டம்!

விழுப்புரம் மாவட்டம் திருவெண்ணைநல்லூர் அடுத்த சிறுமதுரை கிராமத்தில் சிறுமி எரித்துக் கொல்லப்பட்ட வழக்கில், கைது செய்யப்பட்ட அ.தி.மு.க பிரமுகர் முருகன் மற்றும் கலியபெருமாள் ஆகியோரை குண்டர் சட்டத்தில் சிறையில் அடைக்க விழுப்புரம் மாவட்ட ஆட்சியர் உத்தரவு பிறப்பித்திருக்கிறார்.

30 May 2020 1 PM

கூட்டுறவு வங்கியில் கடன்!

மதுரை மாடக்குளம் பகுதியில் நலத்திட்ட உதவிகளை வழங்கிய பிறகு செய்தியாளர்களைச் சந்தித்த அமைச்சர் செல்லூர் ராஜு, ‘ குடும்ப அட்டை இருந்தால் போதும் கூட்டுறவு வங்கிகளில் கடன் பெறலாம். முதல்வர் எடப்பாடி பழனிசாமியின் உத்தரவின் படி கூட்டுறவு வங்கிகளில் கடன் வசதிகள் பெறுவது எளிமையாக்கப்பட்டுள்ளது” எனத் தெரிவித்துள்ளார்.

செல்லூர் ராஜு
செல்லூர் ராஜு
30 May 2020 11 AM

சேமித்து வைக்கப்படும் வைகை தண்ணீர்!

மதுரை மக்களின் குடிநீர் தேவைக்காக வைகை அணையிலிருந்து திறக்கப்பட்ட நீர் தற்போது மதுரை தெப்பக்குளத்தில் சேமித்து வைக்கப்பட்டு வருகிறது Live by E.j.nandhakumar

Posted by Vikatan EMagazine on Friday, May 29, 2020

மதுரை மக்களின் குடிநீர் தேவைக்காக வைகை அணையிலிருந்து திறக்கப்பட்ட நீர் தற்போது மதுரை தெப்பக்குளத்தில் சேமித்து வைக்கப்பட்டு வருகிறது.

30 May 2020 11 AM

பள்ளிகள் திறப்பு எப்போது?

பள்ளி மாணவிகள்
பள்ளி மாணவிகள்
Representational Image

இன்று செய்தியாளர்களிடம் பேசிய பள்ளி கல்வித்துறை அமைச்சர் செங்கோட்டையன், ``விடைத்தாள் திருத்தும் பணிகள் தொடர்ந்து நடைபெற்று வருகிறது. 10, 12 -ம் வகுப்பு பொதுத்தேர்வு முடிவுகள் ஜூலை மாதத்தில் வெளியாகும். தமிழகத்தில் இப்போதைக்குப் பள்ளிகளைத் திறப்பதற்கான சாத்தியம் இல்லை” என்று தெரிவித்தார்.

30 May 2020 9 AM

5 ஆயிரத்தை நெருங்கும் பலி எண்ணிக்கை!

இந்தியாவில் கொரோனாவால் பாதிக்கப்பட்டவர்களின் எண்ணிக்கை 1,73,763 ஆக அதிகரித்துள்ளது. இதில் 82,370 பேர் குணமடைந்து வீடு திரும்பியுள்ளதாக மத்திய சுகாதாரத்துறை தெரிவிக்கிறது. மேலும் இந்தியாவில் 4,971 பேர் கொரோனா காரணமாகப் பாதிக்கப்பட்டு உயிரிழந்துள்ளனர்.

30 May 2020 9 AM

திருத்தணிகாசலத்தின் ஜாமீன் மனு தள்ளுபடி!

திருத்தணிகாசலம்
திருத்தணிகாசலம்

போலி சித்த மருத்துவர் திருத்தணிகாசலம் கொரோனா காலத்தில் வெளியிட்ட வீடியோ தொடர்பாகக் கைது செய்யப்பட்டார். அவர் மீது பல்வேறு வழக்குகள் பதியபட்டுள்ள நிலையில், அவர் ஜாமீன் கோரி மனுத்தாக்கல் செய்திருந்தார். குண்டாஸ் சட்டத்தில் கைது செய்யப்பட்டுள்ளதால் திருத்தணிகாசலத்துக்கு ஜாமீன் வழங்கக் கூடாது எனக் காவல்துறை தரப்பில் தெரிவிக்கப்பட்டது. இதனை ஏற்ற முதன்மை நீதிமன்றம் திருத்தணிகாசலத்தின் ஜாமீன் மனுவைத் தள்ளுபடி செய்தது!

30 May 2020 9 AM

புழல் சிறையில் கொரோனா வார்டு!

 புழல் சிறை
புழல் சிறை

புழல் சிறையில் தண்டனைக் கைதிகள், தூய்மைப் பணியாளர் என 30 பேருக்குக் கொரோனா தொற்று உறுதி செய்யப்பட்ட தகவல் வெளியான நிலையில், தற்போது அங்கு சிறப்பு வார்டு அமைக்கப்பட்டுள்ளது.

30 May 2020 8 AM

தொலைக்காட்சி ஷூட்டிங்: மேலும் சில தளர்வுகள்!

கொரோனா காரணமாகப் போடப்பட்டிருந்த ஊரடங்கில் தற்போது பல தளர்வுகள் வழங்கப்பட்டு வருகின்றன. முன்னதாக சின்னத்திரை படப்பிடிப்புகளுக்கு 20 பேர் வரை மட்டுமே அனுமதிக்கப்பட்ட நிலையில் தற்போது 60 பேர் வரை அனுமதிக்கப்படுவதாக தமிழக முதல்வர் அறிவித்திருக்கிறார். சென்னையில் படப்பிடிப்பு நடத்துவதற்கு மாநகர ஆணையரிடமும், மற்ற மாவட்டங்களில் படப்பிடிப்பு நடத்துவதற்கு மாவட்ட ஆட்சியர்களிடமும் அனுமதியைப் பெற வேண்டும் என முதல்வரின் உத்தரவில் தெரிவிக்கப்பட்டுள்ளது.

அடுத்த கட்டுரைக்கு