Published:Updated:

உங்கள் நிதி ஆலோசகர் எப்படிப்பட்டவர்? ஒரு செக் லிஸ்ட்

நிதி ஆலோசகர்

பிரீமியம் ஸ்டோரி

முதலீட்டுக்காக நிதி ஆலோசகர் ஒருவரை நீங்கள் தேர்வு செய்வது முக்கியம்தான். அவர் சரியான நிதி ஆலோசகராக இருக்க வேண்டும் என்பது அதைவிட முக்கியம். சரியான நிதி ஆலோசகரை எப்படி அடையாளம் காண்பது..? ஒரு நிதி ஆலோசகரின் சில செயல்பாடுகளைக்கொண்டே நிதி ஆலோசனை தருவதற்கு அவர் தகுதி வாய்ந்தவரா என்பதைத் தெரிந்துகொண்டுவிட முடியும். உங்கள் நிதி ஆலோசகர் சரியான நபரா என்பதைத் தெரிந்து கொள்ள என்னென்ன விஷயங்களைக் கவனிக்க வேண்டும்..?

உங்கள் நிதி ஆலோசகர் எப்படிப்பட்டவர்? ஒரு செக் லிஸ்ட்

1. முதலீட்டாளரின் வயது, எதிர்கால தேவைகளைப் பொறுத்து நிதி ஆலோசனை வழங்குவார். பொதுவாக, சொந்த வீடு, பிள்ளைகள் உயர்கல்வி மற்றும் திருமணச் செலவு, ஓய்வுக்காலம், செல்வம் சேர்த்தல் போன்ற தேவைகளுக்கு ஆலோசனை வழங்குவார். கூடவே, வருமான வரியை மிச்சப்படுத்தவும் ஆலோசனை வழங்குவார்.

2. ஆலோசனை மற்றும் திட்டமிடல் முடிந்தபிறகு முதலீட்டாளரின் ரிஸ்க் எடுக்கும் திறனுக்கேற்ப முதலீட்டுத் திட்டங்கள் முடிவு செய்யப்பட்டு முதலீட்டுக் கலவையை (போர்ட்ஃபோலியோ) உருவாக்கித் தருவார். இந்த முதலீட்டுக் கலவை என்பது பலதரப்பட்ட முதலீட்டுத் திட்டங்களைக் கொண்டதாக இருக்கும்.

3. ஆறு மாதம் அல்லது ஆண்டுக்கு ஒருமுறை முதலீடுகளைப் பரிசீலனை செய்து முதலீட்டுக் கலவையைச் சீராக்குவது முதலீட்டு ஆலோசகரின் முக்கியப் பணியாக இருக்கும். தேவைப் பட்டால் சில முதலீடுகளை விலக்கிக்கொள்ளவும் சொல்வார்.

உங்கள் நிதி ஆலோசகர் எப்படிப்பட்டவர்? ஒரு செக் லிஸ்ட்

4. நிதி ஆலோசகர் என்பவர் மியூச்சுவல் ஃபண்ட் மட்டுமல்லாமல், ஆயுள் காப்பீடு, மருத்துவக் காப்பீடு, பங்குச் சந்தை, பாண்டுகள், ஃபிக்ஸட் டெபாசிட் எனப் பல விஷயங்களைத் தெரிந்துவைத்திருப்பவராக இருப்பார்.

நல்ல மருத்துவர் தன்னைத் தேடி வருபவருக்கு ஆரோக்கியத்தைத் தருபவராக இருப்பார்; ஒரு நல்ல நிதி ஆலோசகர் தன்னுடைய முதலீட்டாளரின் வருமானத்தைத் தொடர்ந்து அதிகரிக்கும்படி செய்பவராக இருப்பார்.

5. முதலீட்டாளரின் வயது, ரிஸ்க் எடுக்கும் திறனுக்கேற்ப, எந்த முதலீட்டில் எவ்வளவு முதலீடு செய்ய வேண்டும் எனக் கணக்கு போட்டுச் சொல்வதே முதலீட்டு ஆலோசகரின் முக்கியமான வேலை.

6 ஒரு நிதி ஆலோசகர் எந்த வகையில் கட்டணம் வாங்குகிறார் என்பதைக் கவனிக்க வேண்டும். நிரந்தரக் கட்டணமா, ஒரே மாதிரியான கட்டணமா அல்லது முதலீட்டின்மூலம் முதலீட்டாளருக்குக் கிடைக்கும் லாபத்தின் அடிப்படையில் கட்டணம் வசூலிக்கிறாரா என்பதைப் பார்க்க வேண்டும்.

நிதி ஆலோசனைக்கு முதலீட்டுத் தொகையில் சுமார் 1% கட்டணம் என்பது நியாயமானதாக இருக்கும். உதாரணத்துக்கு, ஆண்டுக் கட்டணம் ரூ.5,000 என்றால், ரூ.5 லட்சம் மதிப்புக்குமேல் முதலீட்டுக் கலவை இருக்க வேண்டும்.

7. நிதி ஆலோசகர்கள் தகுதியானவரா, நல்லவரா, சிறந்தவரா என்பதை நாமாகவே கண்டுபிடிப்பது சற்றுக் கடினமான காரியம்தான். எனவே, நமக்குத் தெரிந்த, நம்பத்தகுந்த யாராவது ஒருவர், நிதி ஆலோசகரைப் பரிந்துரை செய்தால், அவரைத் தேர்ந்தெடுக்கலாம். இல்லாத பட்சத்தில் நிதி ஆலோசகரின் கல்வி, அனுபவம் மற்றும் எந்த மாதிரியான முதலீட்டுத் திட்டங்களைப் பரிந்துரை செய்து வருகிறார் என விசாரித்து அதன் அடிப்படையில் தேர்வு செய்யலாம்.

சிலர் அனுபவத்தின் அடிப்படையில் பிரபலம் அடைந்திருப் பார்கள், அவர்களின்மீது ஏதாவது புகார் இருக்கிறதா என்பதை அறிந்துகொண்டு, அவர்களிடமும் ஆலோசனை பெற்று முதலீடு செய்யலாம். அனுபவத்துக்குமுன் பாடப் படிப்புகள் தோற்றுப்போகும் என்பது யதார்த்தமான உண்மை.

உங்கள் நிதி ஆலோசகர் எப்படிப்பட்டவர்? ஒரு செக் லிஸ்ட்

தகுதித் தேர்வு எழுதி வெற்றி பெற்ற மற்றும் பதிவு செய்யப்பட்ட முதலீட்டு ஆலோசகர்கள் பட்டியல் ஆஃம்பி மற்றும் செபி இணையதளத்தில் இருக்கிறது. அதில் ஆலோசகர் பெயர் மற்றும் அவர்கள் தொடர்பான பிற விவரங்கள் இருக்கும். அதில் உங்களின் ஆலோசகர் இடம்பெற்றிருக்கிறாரா என்பதை உறுதிசெய்து கொள்ளுங்கள்.

8. எதிர்காலத்துக்குத் தேவையான சரியான முதலீட்டுத் திட்டங்களைத் தேர்ந்தெடுத்து முதலீடு செய்து தருகிறாரா என்பதை அவசியம் பார்க்க வேண்டும். அப்படிப்பட்ட சரியான முதலீட்டுத் திட்டத்தை அவர் உங்களுக்குத் தரும்பட்சத்தில் அவர் கொஞ்சம் கூடுதல் தொகையைக் கட்டணமாகக் கேட்டாலும், அதைக் கொடுத்துவிட்டு, அவரிடமே நிதி ஆலோசனை பெறுங்கள். நல்ல மருத்துவருக்கு அதிகக் கட்டணம் கொடுக்க நாம் எப்போதும் தயங்குவதில்லை. அதேபோல, நல்ல நிதி ஆலோசகருக்கும் அதிகக் கட்டணம் கொடுக்கத் தயங்கக்கூடாது.

காரணம், நல்ல மருத்துவர் தன்னைத் தேடி வருபவருக்கு ஆரோக்கியத்தைத் தருபவராக இருப்பார்; ஒரு நல்ல நிதி ஆலோசகர் தன்னுடைய முதலீட்டாளரின் வருமானத்தைத் தொடர்ந்து அதிகரிக்கும்படி செய்பவராக இருப்பார்.

9. சந்தேகத்துக்கு அப்பாற்பட்ட நம்பகத்தன்மை, நல்ல அணுகுமுறை, நாம் கேட்கிற சந்தேகங்களுக்குச் சரியான வழிகாட்டல், எப்போதும் தொலைபேசி, எஸ்.எம்.எஸ், வாட்ஸ்அப், இ-மெயில் போன்ற தகவல்தொடர்பில் இருப்பது, முதலீட்டாளரின் தேவைக்கேற்ப திட்டங்களைப் பரிந்துரை செய்பவராக இருப்பது அவசியம்.

மேலே கூறப்பட்ட ஒன்பது விஷயங்களையும் அலசி ஆராய்ந்து உங்களுக்கேற்ற நிதி ஆலோசகரைத் தேர்வு செய்யுங்கள். சரியான மருத்துவர் நமக்கு வந்திருக்கும் நோயிலிருந்து நம்மை விடுவிப்பார். சரியான நிதி ஆலோசகர் நமது எதிர்காலத்துக்கான நமது நிதித் திட்டமிடலைச் சரியாக செய்துதந்து, நிதிச் சிக்கல்களிலிருந்து நம்மைக் காப்பார்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு