நாங்க காமெடி கஜினி முகமது

வ தவதவென்று பெருகியிருக்கும் யூடியூப் சேனல்களில் தனித்துத் தெரிகிறது ‘ஃபைனலி’ டீம். பாரத், தேவதர்ஷினி, பாலகிருஷ்ணன், ராஜ் மற்றும் டைரக்டர் நிரஞ்சன் என ஃபைனலி சேனலின் தூண்களைச் சந்தித்தோம்!

. “அந்த கஜினி முகமது கதை உங்களுக்குத் தெரியும்ல... கிட்டத்தட்ட அதே கதைதான் நம்மளுடையதும். நிரஞ்சன் என் காலேஜ் ஜூனியர். அப்பவே, அவனை டைரக்டர்னுதான் கூப்பிடுவேன். அவனும் என்னை ஹீரோன்னுதான் கூப்பிடுவான். இப்படி நாங்களே எங்களுக்குள்ளே கூப்பிட்டுட்டுத் திரிஞ்சோம். அந்த நட்புதான் எங்களோட கலைப்பயணத்தின் ஆரம்பம்.

2014-ல் நானும் என் நண்பன் ராஜும் சேர்ந்து ஒரு யூடியூப் சேனல் ஆரம்பிச்சோம். அது சரியா போகலை. விரக்தியில சேனலை மூடிட்டு, பொட்டிபடுக்கையைத் தூக்கிட்டு கோயம்புத்தூருக்கே கிளம்பிட்டேன். சொந்தமா தொழில் தொடங்குற யோசனையில் சுத்திக்கிட்டு இருந்தேன். ஆனா, மறுபடியும் மீடியா ஆசை வர, திரும்பவும் சென்னைக்கு வந்துட்டேன். இன்னொரு சேனல் ஆரம்பிச்சேன். அதுவும் சரியா போகலை. மறுபடியும் கோயம்புத்தூருக்கு டிக்கெட்டைப் போட்டேன்.

. இப்படியே ஆரம்பிக்குறதும், ஊத்தி மூடுறதும், தொடர்கதையா போயிட்டே இருக்க, இதுக்கு ஃபைனலா ஒரு ஃபுல் ஸ்டாப் வெச்சிடுவோம்னு எங்க ஃபைனல் முயற்சியா சேனலுக்கு `ஃபைனலி’ன்னு பேர் வெச்சி ஆரம்பிச்சோம். அந்த ஃபைனலிதான் முற்றுப்புள்ளியை நோக்கிப் போயிட்டிருந்த எங்களுடைய கலைப்பயணத்துக்கு மூணு புள்ளி வெச்சி ‘தொடரும்’னு புது அத்தியாத்தைத் தொடங்கி வெச்சிருக்கு” என ஃபைனலி ஃபன்னைச் சொல்கிறார் பாரத்.

“ஃபைனலி சேனலுக்கு ஃபைனலா வந்து சேர்ந்தது தர்ஷினிதான். `கரகாட்டக்காரன்’ கோவை சரளா மாதிரி ‘என் கெரகம் இந்த கரகாட்ட கோஷ்டிகிட்ட வந்து மாட்டிக்கிட்டேன்’னு அடிக்கடி புலம்புவாங்க. அவங்க வாக்குமூலத்தையும் வாங்கிடுங்க” என தர்ஷினியை ராஜ் கோத்து விட, சிரித்தபடியே பேசத் தயாரானார் தர்ஷினி.

. “நான் மக்கள் தொலைக்காட்சியில தொகுப்பாளினியா இருந்தேன். நடிக்கணும்ங்கிற ஆசை உள்ளே இருக்கவே, அதுக்கு முயற்சி பண்ணுவோம்னு வலையை விரிச்சதுல `ஃபைனலி’ மாட்டுச்சு. ஆனா, `ஃபைனலி’ என்கிட்ட மாட்டலை, நான்தான் அதுகிட்ட மாட்டிக்கிட்டேன்’னு கடைசியாதான் புரிஞ்சது. ஸ்க்ரிப்ட்ல காமெடி பண்றதைவிட, என்னை வெச்சி காமெடி பண்றதுதான் இவங்க முழுநேர வேலை. ஷூட்டுக்கு மேக்கப் போட்டுட்டு வந்தா, `இந்த வீடியோவுக்கு மேக்கப் வேணாம் ரிமூவ் பண்ணு’ன்னு சொல்லுவாங்க; மேக்கப் போடாம வந்தா, `இந்த வீடியோவுக்கு மேக்கப் வேணும், போய் போட்டுட்டு வா’ன்னு சொல்லுவாங்க. இந்த நாலு பேரையும் சிங்கிளா சமாளிச்சுட்டிருக்கேன் ப்ரோ’’ என தர்ஷினி சொல்ல, ‘`சிங்கப்பெண்ணே... சிங்கப்பெண்ணே....’’ என கோரஸ் பாட ஆரம்பித்தது டீம்.

. ‘` `ஃபைனலி’ சேனலோட டி.ராஜேந்தராவே வாழ்றீங்களே பாஸ்’’ என ஆல் ரவுண்டர் பாலுவிடம் கேட்க, ‘‘நான் இந்தச் சேனலுக்கு வந்தப்போ, எடிட், மியூசிக், ஸ்க்ரிப்ட் பண்றதுக்கு ஆளே இல்லை. அதனால நானே எடிட், மியூசிக், ஸ்க்ரிப்ட், நடிப்புன்னு எல்லாத்தையும் பண்ண ஆரம்பிச்சேன். `மியூசிக் போடுவியா’ன்னு அதிர்ச்சியாகாதீங்க. எந்தெந்தப் படத்தோட மியூசிக், எந்தெந்த இடத்துக்கு சரியா இருக்கும்னு பார்த்து எடுத்துப்போடுவேன். இதுக்குப் பேர்தான் மியூசிக் போடுறது’’ என பாலு விளக்கவுரை கொடுத்து முடித்ததும் `ஃபைனலி’யின் முக்கியப்புள்ளி ராஜ் பக்கம் திரும்பினோம்.

“ஃபைனலி’ சேனலோட மேனேஜர் அடியேன்தான். `அடேங்கப்பா’ன்னு மட்டும் ஆச்சர்யப்படாதீங்க. ஒவ்வொரு வீடியோ பண்ணும்போதும் எனக்கு மட்டும் டயலாக்கே தர மாட்டானுங்க. `டயலாக் கொடுங்கடா’ன்னு கேட்டுக்கிட்டே இருப்பேன். `டயலாக்லாம் தர முடியாது; மேனேஜர் போஸ்ட் சும்மாதான் இருக்கு. அதை வேணா வெச்சிக்கோ’ன்னு கொடுத்துட்டானுங்க. இப்படித்தான் என்னை வெச்சி மங்களம் பாடுறானுங்க’’ என வருத்தத்தை வலுக்கட்டாயமாகப் பதிவு செய்தார் ராஜ்.

. ‘ஒவ்வொரு யூடியூப் சேனலும் விதவிதமா கான்செப்ட்களை எடுத்துக்கிட்டு புகுந்து விளையாடுறாங்க. இந்தச் சுறா மீனுங்க மத்தியில நாமளும் நீச்சல் அடிக்கணும்னா, புதுசாதானே ஏதாவது பண்ணியாகணும். நீங்க வீடியோக்கள்ல பாரத் பேசுறதைப் பார்த்திருக்கீங்க இல்ல, அப்படித்தான் நாங்க நார்மலாவே பேசிப்போம். அதையே ஒரு ஸ்க்ரிப்ட் பண்ணி ஒரு வீடியோ போட, மக்கள் ரொம்ப ரசிச்சாங்க. அதுக்கப்புறம் அப்படியே தொடர்ந்து பண்ண ஆரம்பிச்சோம்’’ என்றார் இந்த ஃபைனலி சங்கத்தின் இயக்குநர் நிரஞ்சன்.

. ‘`இந்த ‘ஒன்பது கோளும் ஒன்றாய்க் காண’ ரிங்டோன் ஐடியாவை எப்படிப் புடிச்சீங்க’’ என நிரஞ்சனிடம் கேட்க, ``பாரத்தை நாங்க அப்பாவியா காட்டணும்னு முடிவு பண்ணினோம். அதுக்கு ஒரு சாமி பாட்டை ரிங்டோனா வெச்சா சரியா இருக்கும்னு நாங்களே நம்பிக்கிட்டோம். இதைவிட ஒரு நியாயமான காரணம் சொல்லணும்னா, `ஃபைனலி’யைப் பொறுத்தவரை பாரத் ஒரு மொரட்டு சிங்கிள். இந்தப் பாட்டும் விநாயகருக்கானது; அவரும் சிங்கிள்தான். ரெண்டும் மேட்ச்சாகுதுல்ல... அவ்வளவுதான்’’ என நிரஞ்சன் சொல்ல, பாவமாய்ப் பார்க்கிறார் பாரத்.

. ‘நீங்க கஷ்டப்பட்டுப் பண்ணுன வீடியோ எது’ என பாரத்திடம் கேட்டபோது,``நிரஞ்சன்கிட்ட இருந்து ஒரு ஸ்க்ரிப்டை வாங்குறது, இச்சாதாரி நாகத்துக்கிட்ட இருந்து நாகரத்தினத்தை வாங்குறதைவிடக் கஷ்டம். எத்தனை முறை கேட்டாலும் கொடுக்கவே மாட்டான். ஒரு கட்டத்துக்கு மேல கடுப்பாகி, `இருந்தா கொடுக்க மாட்டேனா’ன்னு கடுப்புல கடிச்சு வெச்சிடுவான். இவனை விட்டா இலவசமா ஸ்க்ரிப்ட் பண்ணித்தரவும் எங்களுக்கு ஆள் இல்ல. ஒருவழியா போராடி இவன்கிட்ட ஸ்க்ரிப்ட்டை வாங்கினா, ‘இதுல என்னோட நடிப்புத்திறமையைக் காட்டுறதுக்கு ஸ்கோப்பே இல்லையே’ன்னு ஏதோ நாலு ஆஸ்கர் வாங்குன ரேஞ்சுக்கு தர்ஷினி ஒரு பக்கம் கோபப்படுவா. இன்னொரு பக்கம், ‘பாலுவுக்கு மட்டும் பக்கம் பக்கமா வசனம் கொடுக்குறீங்க. எனக்கு மட்டும் ஏன் `ஒரு வார்த்தை ஒரு லட்சம்’ டைப்புல வசனம் கொடுக்குறீங்க’ன்னு ராஜ் வருத்தப்படுவான். இதுபோக கேமராமேன், எடிட்டர்னு எல்லாரும் அவங்கவங்க பங்குக்கு சோதிப்பாங்க!’’ என பாரத் கண்ணீரைத் துடைக்க, ‘‘இந்த மில்லியன் வியூஸ், டிரெண்டிங் வீடியோஸ்னு சொல்றாங்களே, அதெல்லாம் உங்க வீடியோக்களுக்கு வரலைங்கிற வருத்தம் எப்போதாவது வருமா?’’ என மேற்கொண்டு கரியை அள்ளிப்போட்டோம்.

`‘நம்பர்ஸ்ல நாங்க பின்தங்கி இருக்கோம்தான்! ஆனா, `இவங்க நல்லா பண்றாங்கன்னு’ மக்கள்கிட்ட நல்ல பேரு இருக்கு! அது போதும். யூடியூபில் பல சேனல்கள் இருந்தாலும் நாங்க எடுக்குற கான்செப்ட்ல எங்களைவிட பெஸ்ட்டா வேற யாரும் வீடியோக்கள் பண்றதில்லைன்னு என்னால உறுதியாச் சொல்ல முடியும்” என்று பாரத் சீரியஸாக, “பாஸ், உங்க மூஞ்சிக்கு சீரியஸ் செட்டாகலை” என்று கைகொடுத்துக் கிளம்பினோம்.

நாங்க காமெடி கஜினி முகமது

ப.சூரியராஜ்

மா.பாண்டியராஜன்

பிரியங்கா.ப