Published:Updated:

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

A to Z தகவல்கள்!
பிரீமியம் ஸ்டோரி
A to Z தகவல்கள்!

இந்த டிஜிட்டல் யுகத்தில் அதற்கான நடைமுறைகள் எல்லாம் மிகவும் எளிமையாக்கப் பட்டிருக்கின்றன.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

இந்த டிஜிட்டல் யுகத்தில் அதற்கான நடைமுறைகள் எல்லாம் மிகவும் எளிமையாக்கப் பட்டிருக்கின்றன.

Published:Updated:
A to Z தகவல்கள்!
பிரீமியம் ஸ்டோரி
A to Z தகவல்கள்!

ஒரு குடிமகனுக்கு அத்தியாவசியமான அடிப்படை அடையாள அட்டைகளைப் பெற எப்படி விண்ணப்பிப்பது என்பதை, அதன் தேவை ஏற்படும்வரை நாம் அறிந்துகொள்வதில்லை. அப்படியே தேவை ஏற்படும்போதும், அந்த நடைமுறைகளில் நமக்கு ஒருவித தடுமாற்றம் ஏற்படுகிறது. அது தேவையேயில்லை. இந்த டிஜிட்டல் யுகத்தில் அதற்கான நடைமுறைகள் எல்லாம் மிகவும் எளிமையாக்கப் பட்டிருக்கின்றன.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

‘வேற ஊருக்கு ஷிஃப்ட் ஆகுறோம்... காஸ் இணைப்பை மாற்றம் செய்றது எப்படினு தெரியல’, ‘என் குழந்தைக்கு ஒரு வயசு ஆகிடுச்சு... ஆதார் கார்டுக்கு அப்ளை செய்துடலாமா?’, ‘என் வங்கிக் கிளையை மாத்தணும்... ஆனா, அதே அக்கவுன்ட் நம்பர் வேணும்... கிடைக்குமா?’, ‘இப்போ ஆன்லைன்லேயே பாஸ்போர்ட்டுக்கு விண்ணப்பிக்கலாமாமே... எப்படினு தெரிஞ்சா நாமளும் பண்ண லாம்’, ‘நியூலி மேரிடு... புது ரேஷன் கார்டுக்கு சீக்கிரம் அப்ளை செய்யணும். என்னென்ன டாக்குமென்ட்ஸ் கேட்பாங்க?’ - இதுபோன்ற அத்தனை கேள்விகளுக்கும் சந்தேகங்களுக்கும் உங்களுக்கு விடையளிக்கும், வழிகாட்டும் இந்த இணைப்பிதழ். நீங்கள் பத்திரப்படுத்திக்கொள்ள அவள் விகடனின் மற்றொரு பரிசு!

விண்ணப்பிக்கும் முன்..!

ஆன்லைன் மூலம் புதிய ரேஷன் கார்டு (மின்னணு அட்டை)க்கு விண்ணப்பிப்பதற்கு முன்பு, உங்களது பெயரை ஏற்கெனவே உள்ள ரேஷன் கார்டிலிருந்து நீக்கம் செய்ய வேண்டும். எனவே, முதலில் உங்களது பெயரை பழைய ரேஷன் கார்டிலிருந்து எப்படி நீக்குவது என்பதைப் பார்த்துவிடலாம்.

ரேஷன் கார்டு (மின்னணு அட்டை)க்கு விண்ணப்பிப்பது எப்படி?

‘புதிய ரேஷன் கார்டு பெறுவது எப்படி?’ - புதிதாகத் திருமணமானவர்கள் மத்தியில் இந்தக் கேள்வி பிரதானமானதாக இருக்கும். முன்பு இருந்ததைப்போல, ரேஷன் கார்டு பெறுவது இப்போது கடினமான விஷயம் இல்லை. வீட்டிலிருந்தபடியே ஆன்லைனில் விண்ணப்பித்து புதிய ரேஷன் கார்டைப் பெற்று விடலாம். புதிய ரேஷன் கார்டு (மின்னணு அட்டை)க்கு விண்ணப்பிப்பது, பழைய ரேஷன் கார்டில் பெயர் சேர்ப்பது மற்றும் நீக்குவது ஆகியவை குறித்த நடைமுறைகளைப் பார்க்கலாம்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

ரேஷன் கார்டில் பெயரை நீக்குவது எப்படி?

தமிழ்நாடு அரசின் உணவுப் பொருள் வழங்கல் மற்றும் நுகர்வோர் பாதுகாப்புத்துறையின் அதிகாரபூர்வ இணையதளமான www.tnpds.gov.in என்ற இணையதள முகவரிக்குச் செல்லவும். ஆங்கிலம், தமிழ் ஆகிய இரு மொழிகளில் இந்த இணையதள சேவை வழங்கப்படுகிறது. தேவையான மொழியைத் தேர்வு செய்யவும். தமிழ் மொழியைத் தேர்ந்தெடுத்தால் இணையதளத்தில் முகப்புப் பக்கத்தில் ‘மின்னணு அட்டை தொடர்பான சேவைகள்’ என்ற ஒரு பகுதி இருக்கும். அதில், உறுப்பினரைச் சேர்க்க, முகவரி மாற்றம் செய்ய, குடும்பத் தலைவர் மாற்றம் செய்ய, குடும்ப உறுப்பினர் நீக்க, அட்டை தொடர்பான சேவை நிலை அறிய... என ஐந்து ஆப்ஷன்கள் கொடுக்கப் பட்டிருக்கும். அதில், `குடும்ப உறுப்பினர் நீக்க' என்பதை க்ளிக் செய்யவும்.

அதைத் தொடர்ந்து திறக்கும் புதிய பக்கத்தில் உங்களது பழைய ரேஷன் கார்டுக்காக நீங்கள் பதிவு செய்திருக்கும் மொபைல் எண்ணை பதிவு செய்யவும். கூடவே அதில் கொடுக்கப்பட்டிருக்கும் ‘கேப்ட்சா (CAPTCHA - Completely Automated Public Turing test to tell Computers and Humans Apart)’-வையும் உள்ளீடு செய்ய வேண்டும். `கேப்ட்சா' என்பது, கணினி பதிவுகளுக்கான ஒரு பொது நடைமுறை.

இதைத் தொடர்ந்து உங்களது மொபைல் எண் ணுக்கு ஒரு ஓடிபி (OTP - One Time Password) வரும். அதை உள்ளீடு செய்து ‘பதிவு செய்’ என்ற ஆப்ஷனை க்ளிக் செய்யவும். அதையடுத்து உங்கள் ரேஷன் கார்டின் விவரங்கள் திரையில் தோன்றும்.

தொடர்ந்து இடதுபுறத்தில் உள்ள ‘அட்டை பிறழ்வு’ என்பதை க்ளிக் செய்யவும். அதையடுத்து, புதிய கோரிக்கைகள் என்பதை க்ளிக் செய்யவும். அடுத்ததாகத் திறக்கும் பக்கத்தில் உங்களது ரேஷன் கார்டு எண் மற்றும் நியாய விலைக் கடையின் குறியீட்டு எண் ஆகியவை தோன்றும். அதற்குக் கீழே ‘சேவையைத் தேர்ந்தெடுக்கவும்’ என்ற ஒரு ஆப்ஷன் கொடுக்கப்பட்டிருக்கும். அதில் ‘குடும்ப உறுப்பினர் நீக்க’ என்ற ஆப்ஷனை க்ளிக் செய்யவும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
Nijar Mohamed N

பிறகு, தகுந்த ஆவணத்தை அப்லோடு செய்ய வேண்டும். திருமணமான பெண்ணின் பெயரையோ, ஆணின் பெயரையோ நீக்குவதற்கு திருமணச் சான்றிதழை அப்லோடு செய்ய வேண்டியிருக்கும் (இறந்தவர்களின் பெயரை நீக்குவதற்கு இறப்புச் சான்றிதழை அப்லோடு செய்ய வேண்டும்). நீங்கள் அப்லோடு செய்ய வேண்டிய ஆவணத்தின் புகைப்படம் 1MB அளவுக்கு இருக்க வேண்டும் என்பதை நினைவில் கொள்ளுங்கள்.

அடுத்ததாக ‘காரணம்’ தலைப்புக்குக் கீழே உள்ள கட்டத்தில், எதற்காகப் பெயரை நீக்குகிறீர்கள் என்பதை டைப் செய்யவும். தொடர்ந்து, நீக்க வேண்டிய உங்களது பெயரை டிக் செய்து, `உறுதிப்படுத்துதல்' என்பதை டிக் செய்யவும். கடைசியாக, ‘பதிவு செய்ய’ என்று ஒரு ஆப்ஷன் இருக்கும் அதை க்ளிக் செய்யவும். இதைத் தொடர்ந்து தங்களது கோரிக்கை வெற்றிகரமாகப் பதிவு செய்யப்பட்டதாகப் பச்சை நிறத்தில் `டிக்' மார்க் வரும். ‘விண்ணப்பம் பதிவிறக்கம்’ என்ற ஆப்ஷனை க்ளிக் செய்து உங்களது விண்ணப்பத்தை நீங்கள் டவுன்லோடு செய்து வைத்துக் கொள்ளலாம். உங்களது விண்ணப்பம் பரிசீலிக்கப்பட்டு ஓரிரு நாள்களில் உங்களது பெயர் நீக்கம் செய்யப்படும்.

ஓரிரு நாள்கள் கழித்து இந்த இணையதளத்துக்குச் சென்று ‘அட்டை தொடர்பான சேவை நிலை அறிய’ என்ற ஆப்ஷனை க்ளிக் செய்து உள்ளே நுழைந்து உங்களது விண்ணப்பத்தின் நிலையைப் பார்க்கலாம். உங்களது பெயர் நீக்கம் செய்யப்பட்டிருந்தால் ‘சான்றிதழ் பதிவிறக்கம்’ என்ற ஆப்ஷன் இருக்கும். அதை க்ளிக் செய்து உங்களது பெயர் நீக்கப் பட்டதற்கான சான்றிதழை டவுன்லோடு செய்து வைத்துக்கொள்ள வேண்டும். புதிய ரேஷன் கார்டு விண்ணப்பிப்பதற்கு அந்தச் சான்றிதழ் தேவைப்படும். ரேஷன் கார்டில் பெயரை சேர்ப்பதற்கும் இதே வழி முறைகள்தான். ‘குடும்ப உறுப்பினர் நீக்க’ என்ற ஆப்ஷனுக்குப் பதிலாக, `குடும்ப உறுப்பினர் சேர்க்க' என்ற ஆப்ஷனைத் தேர்ந்தெடுத்து அடுத்தடுத்த நடைமுறைகளை மேற்கொள்ள வேண்டும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
Nijar Mohamed N

ரேஷன் கார்டு (மின்னணு அட்டை) தொலைந்துவிட்டால்..?

தமிழ்நாடு அரசின் உணவுப் பொருள் வழங்கல் மற்றும் நுகர்வோர் பாதுகாப்புத் துறையின் அதிகாரபூர்வ இணையதளமான http://tnpds.gov.in/ இணைய தளத்துக்குச் செல்லவும். `நகல் மின்னணு குடும்ப அட்டை விண்ணப்பிக்க' என்பதைக் க்ளிக் செய்து, அதன் மூலமாக விண்ணப்பிக்கலாம். இதற்கு நீங்கள் ஏற்கெனவே உங்களுடைய மொபைல் எண்ணை பதிவு செய்திருக்க வேண்டும் (அட்டை வாங்கும்போதே கண்டிப்பாக உங்கள் மொபைல் எண்ணை பெற்றிருப் பார்கள்). அந்த மொபைல் எண்ணை உள்ளீடு செய்தால் அந்த எண்ணுக்கு ஓடிபி (OTP) வரும். அதை பதிவிட்ட பின், நகல் பெறுவதற்கான காரணம் என்கிற இடத்தில் ‘தொலைந்துவிட்டது’ என்பதை க்ளிக் செய்யவும். `20 ரூபாய் கட்டணம் செலுத்தி, வட்ட வழங்கல் அலுவலரிடத்தில் பெற்றுக்கொள்வேன்' என்பதை டிக் செய்யவும். பிறகு சமர்ப்பித்தால் நகல் அட்டை தயாராகிவிடும். அதில் குறிப்பிட்டிருக்கும் தேதியில் சென்று 20 ரூபாயைச் செலுத்தி உங்களது மின்னணு அட்டையின் நகலைப் பெற்றுக்கொள்ளலாம்.

புதிய ரேஷன் கார்டு (மின்னணு அட்டை)க்கு விண்ணப்பிப்பது எப்படி?

www.tnpds.gov.in என்ற இணையதளத்துக்குச் சென்று, ‘மின்னணு அட்டை சேவைகள்’ என்ற ஆப்ஷனை க்ளிக் செய்யவும். அதில், ‘மின்னணு அட்டை விண்ணப்பிக்க’ என்ற ஆப்ஷனைத் தேர்வு செய்யவும். குடும்பத் தலைவர் பெயர், தந்தை அல்லது கணவர் பெயர், முகவரி, எந்த மாவட்டம், எந்த மண்டலம் அல்லது வட்டம், எந்தக் கிராமம், அஞ்சல் குறியீடு, தொலைபேசி எண், கிராமம், கைபேசி எண், மின்னஞ்சல் முகவரி போன்ற விவரங்கள் கோரப்பட்டிருக்கும். அவற்றைத் தமிழ் மற்றும் ஆங்கிலம் இரு மொழிகளிலும் உள்ளீடு செய்ய வேண்டும்.

‘குடும்பத் தலைவர் புகைப்படம்’ என்ற இடத்தில், உங்களது குடும்பத் தலைவரின் புகைப்படத்தை jpeg, jpg, png ஆகிய ஏதாவது ஒரு ஃபார்மெட்டில் பதிவேற்றம் செய்ய வேண்டும். புகைப்படம் அதிகபட்சம் 5MB-க்கு மிகாமல் இருக்க வேண்டும்.

குடும்பத் தலைவர் மற்றும் உறுப்பினர் விவரங்களைச் சேர்ப்பதற்கு, `உறுப்பினரைச் சேர்க்க' என்ற ஆப்ஷனை க்ளிக் செய்ய வேண்டும். அதைத் தொடர்ந்து ஓப்பன் ஆகும் பக்கத்தில் முதலில் குடும்பத் தலைவரின் விவரங்களை உள்ளீடு செய்ய வேண்டும்.

தொடர்ந்து, கீழே குடும்ப உறுப்பினர்களின் விவரங்கள் (முதலில் குடும்பத் தலைவரின் விவரங்களைச் சேர்க்கவும்) என்ற குறிப்புக்கு அருகில் மஞ்சள் நிறத்தில் இருக்கும் ‘உறுப்பினர்களைச் சேர்க்க’ என்ற ஆப்ஷனை க்ளிக் செய்யவும். பிறகு, ஓப்பன் ஆகும் பக்கத்தில் குடும்பத் தலைவரின் பிறந்த தேதி, தொழில், மாத வருமானம், வாக்காளர் அடையாள அட்டை எண், ஆதார் அட்டை எண் உள்ளிட்ட விவரங்களை உள்ளீடு செய்யவும்.

‘மற்ற ஆவணங்கள்’ என்ற இடத்தில் குடும்பத் தலைவருடைய ஆதார் அட்டையின் இருபுறத்தையும் ஸ்கேன் செய்து (இருபுறமும் ஒரே பக்கத்தில் அருகருகில் இருப்பதைப் போல இருக்க வேண்டும்) பதிவேற்ற வேண்டும். அளவு 1MB-க்குள்ளாக இருக்க வேண்டும்.

அடுத்ததாக ‘அட்டை தேர்வு’ என்ற ஆப்ஷனை க்ளிக் செய்யவும். தொடர்ந்து பண்டகமில்லா அட்டை, அரிசி அட்டை, சர்க்கரை அட்டை, மற்றவை என நான்கு வகையான அட்டைகள் இருக்கும். அவற்றில் உங்களுக்கு எந்த வகை ரேஷன் அட்டை வேண்டுமோ அந்த அட்டையைத் தேர்வு செய்துகொள்ளவும்.

தற்போது குடும்பத் தலைவரின் விவரங்கள் அனைத்தும் உள்ளீடு செய்யப்பட்டிருக்கும். இந்த நடைமுறைகளெல்லாம் முடிந்த பிறகு, ‘உறுப்பினர் விவரம் சேமி’ என்ற ஆப்ஷனை க்ளிக் செய்யவும். தொடர்ந்து குடும்பத் தலைவரின் பெயர் மட்டும் ஓர் அட்டவணைக்குள் காட்டப்படும். அதன் மேலே உள்ள ‘உறுப்பினரைச் சேர்க்க’ என்ற ஆப்ஷனை க்ளிக் செய்து, குடும்பத் தலைவரை சேர்த்ததுபோலவே நீங்கள் சேர்க்க வேண்டிய உறுப்பினர்களையும் சேர்த்துக்கொள்ளலாம்.

`குடியிருப்புச் சான்று' எனக் கோரப்பட்டிருக்கும் இடத்தில் ஆதார் அட்டை, மின்சாரக் கட்டணம், வங்கிக் கணக்குப் புத்தகத்தின் முன்பக்கம், எரிவாயு நுகர்வேர் அட்டை, சொந்த வீடு இருந்தால் அதன் சொத்து வரி ரசீது, பாஸ்போர்ட் உள்ளிட்ட சில ஆப்ஷன்கள் கொடுக்கப்பட்டிருக்கும். அவற்றில் நீங்கள் சமர்ப்பிக்கும் வகையிலான ஏதாவதொரு சான்றைத் தேர்வு செய்துகொள்ளுங்கள். அதையடுத்து, நீங்கள் தேர்வு செய்த ஆவணத்தின் நகலைப் பதிவேற்ற வேண்டும். அந்த ஆவணத்தின் அளவு 1.0 MB அளவிலும், png, gif, jpeg, pdf ஆகியவற்றில் ஏதாவது ஒரு ஃபார்மட்டிலும் இருத்தல் வேண்டும்.

அடுத்தபடியாக உங்களின் எரிவாயு இணைப்பு விவரங்களைப் பதிவு செய்யவும். அதைத் தொடர்ந்து, ‘உறுதிப்படுத்துதல்’ என்ற ஆப்ஷனை டிக் செய்யவும். அதையடுத்து, ‘பதிவு செய்’ என்ற ஆப்ஷனை க்ளிக் செய்து பதிவு செய்துகொள்ளவும். அதையடுத்து, `உங்களது கோரிக்கை வெற்றிகரமாகப் பதிவு செய்யப்பட்டுவிட்டது' என்ற அறிவிப்புடன் உங்களுக்கான குறிப்பு எண் திரையில் தோன்றும். உங்கள் ரேஷன் கார்டு விண்ணப்பத்தின் நிலையை

சரி பார்க்க அந்த எண் அவசியம் என்பதால் அதைக் கவனமாகக் குறித்து வைத்துக்கொள்ள வேண்டும்.

ஓரிரு தினங்கள் கழித்து, உங்களது விண்ணப்பத்தின் நிலையை அறிய www.tnpds.gov.in இணையதளத்துக்குச் சென்று மின்னணு அட்டை சேவைகள் என்ற இடத்தில், ‘மின்னணு அட்டை விண்ணப்பத்தின் நிலை’ என்பதை க்ளிக் செய்யவும்.அதைத் தொடர்ந்து ஓப்பன் ஆகும் புதிய பக்கத்தில் உங்களின் குறிப்பு எண்ணை உள்ளீடு செய்து ‘பதிவு செய்ய’ என்பதை க்ளிக் செய்யவும்.

அதையடுத்து ஓப்பன் ஆகும் பக்கத்தில் உங்கள் விண்ணப்பம் தொடர்பான ‘கோரிக்கை சமர்ப்பிக்கப்பட்டது, கோரிக்கை அனுமதிக்கப்பட்டது’ என இரண்டு ஆப்ஷன்கள் இருக்கும். அதில் எதில் பச்சை வண்ணத்தில் டிக் மார்க்குடன் இருக்கிறதோ அதுதான் உங்கள் விண்ணப்பத்தின் நிலை. வலதுபுறத்தில் நீங்கள் சமர்ப்பித்த விண்ணப்பத்தைப் பதிவிறக்கம் செய்துகொள்வதற்கான ஆப்ஷன் கொடுக்கப்பட்டிருக்கும். அதை க்ளிக் செய்து உங்களது விண்ணப்பத்தை டவுன்லோடு செய்துகொள்ளலாம்.

உங்களது கோரிக்கை அனுமதிக்கப்பட்ட பிறகு, நிறைய நடைமுறைகள் இருக்கின்றன. அந்த நடைமுறைகளில் ஒன்றாக உங்களது வீட்டுக்கே விசாரணைக்கு வரலாம். அப்போது உங்கள் பெயர் பழைய ரேஷன் கார்டிலிருந்து நீக்கப்பட்டதற்கான சான்றை நீங்கள் வைத்திருக்க வேண்டும். தவிர, நீங்கள் குறிப்பிட்டிருக்க விவரங்கள் அனைத்தும் சரியாக இருக்க வேண்டும்.

அனைத்து நடைமுறைகளும் முடிந்த பிறகு உங்களது மொபைல் எண்ணுக்கு ஒரு பதிவு எண் அனுப்பப்படும். வட்ட வழங்கல் அலுவலகத்தில் உங்களுடைய புதிய ரேஷன் கார்டை பெற்றுக்கொள்ளலாம். இதுதொடர்பாக உங்களுக்கு ஏதேனும் சந்தேகங்கள் இருப்பின் (1967 or 1800-425-5901) என்ற எண்ணைத் தொடர்புகொள்ளவும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
MADHAN'S KALAI KUDAM

திருமணப் பதிவு... கவனிக்க வேண்டியவை!

திருமண பந்தத்தில் அடியெடுத்து வைக்கும் தம்பதியர், தங்களின் திருமணத்தைப் பதிவு செய்துகொள்வது 2009-ம் ஆண்டு முதல் தமிழகத்தில் கட்டாயமாக்கப்பட்டுள்ளது. எனவே, திருமணப் பதிவு குறித்த நடைமுறைகளைப் பார்க்கலாம்...

`தமிழ்நாடு திருமணப் பதிவுச் சட்டம் 2009'-ன்படி திருமணத்தைப் பதிவு செய்வது கட்டாயமாக்கப்பட்டுள்ளது. பாஸ்போர்ட், விசா பெறுவது முதல் பல்வேறு விஷயங்களுக்கும் திருமண பதிவுச் சான்றிதழ் அவசியம் என்பதால், திருமணமான ஒவ்வொருவரும் தங்கள் திருமணத்தைப் பதிவு செய்யத் தவறக் கூடாது. திருமணப் பதிவு குறித்து ஏற்கெனவே ஒவ்வொரு மதத்துக்கும் ஏற்றவாறு சட்டங்கள் இருக்கின்றன. அத்துடன் சிறப்புத் திருமணச் சட்டமும் இருக்கிறது. இந்தச் சட்டங்களின் அடிப்படையில்தான் திருமணங்கள் பதிவு செய்யப்படும். இந்தப் பதிவானது விருப்பத்தின் அடிப்படையில் இருந்ததை, தற்போதைய 2009-ம் ஆண்டு சட்டம் கட்டாயமாக்கியுள்ளது.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
Nijar Mohamed N

திருமணம் பதிவு செய்யும் முறை

திருமணம் முடிந்த தம்பதியர் https://tnreginet.gov.in/portal/ என்ற இணையதளத்தில், `பதிவு செய்தல்' என்ற ஆப்ஷனைத் தேர்ந்தெடுத்து, பயனர் பதிவை (அக்கவுன்ட்) உருவாக்க வேண்டும். பின்னர், `திருமணப் பதிவு' என்ற பகுதிக்குச் சென்று, அதில் உள்ள விண்ணப்பத்தை இணையத்திலேயே பூர்த்தி செய்ய வேண்டும். விண்ணப்பத்தைப் பூர்த்திசெய்யும்போது கேட்கப்படும் ஆவணங்களை ஸ்கேன் செய்து மணமக்களின் புகைப்படங்களுடன் சேர்த்து இணைக்க வேண்டும்.

விண்ணப்பித்து முடித்தவுடன் உங்கள் பகுதியில் உள்ள சார்பதிவாளர் அலுவலகத்திலிருந்து, சில மணி நேரத்தில் உங்கள் மொபைல் எண்ணுக்கு ஒரு குறுஞ்செய்தி அனுப்பி வைக்கப்படும். அதில் உங்கள் திருமணத்தைப் பதிவுசெய்துகொள்ள, நீங்கள் சார்பதிவாளர் அலுவலகத்துக்கு வர வேண்டிய தேதி மற்றும் நேரம் குறிப்பிடப்பட்டிருக்கும். குறிப்பிடப்பட்ட தேதியில் உங்களின் ஆன்லைன் விண்ணப்பத்தைப் பதிவிறக்கம் செய்து, ஒரிஜினல் ஆவணங்களுடன் உங்களின் இணையர் மற்றும் சாட்சி கையொப்பமிட மூன்று நபர்களுடன் சார்பதிவாளர் அலுவலகத் துக்குச் செல்ல வேண்டும்.

திருமணப் பதிவு சந்தேகங்களுக்கு...

சந்தேகங்களுக்கு 1800 102 5174 என்ற எண்ணைத் தொடர்புகொள்ளலாம் (அரசு விடுமுறை நாள்கள் தவிர்த்து திங்கள் முதல் வெள்ளி வரை காலை 8 மணி முதல் இரவு 8 மணி வரை, சனிக்கிழமை காலை 10 மணி முதல் மாலை 5 மணி வரை தொடர்புகொள்ளலாம்).

எந்தச் சட்டத்தின் கீழ் பதிவு செய்துகொள்ளலாம்?

திருமணம் நடந்து 90 நாள்களுக்குள் விண்ணப்பிக்க வேண்டும். அதைக் கடந்துவிட்டால், அதற்கான அபராதம் செலுத்த வேண்டியிருக்கும்.

உங்கள் மதச்சட்டத்தின்படி உங்கள் திருமணத்தைப் பதிவு செய்ய விரும்பினால், இந்துக்கள் எனில், இந்து திருமணச் சட்டத்தின் கீழும், கிறிஸ்துவர்கள் எனில், கிறிஸ்துவ திருமணச் சட்டத்தின் கீழும், இஸ்லாமியர்கள் எனில், இஸ்லாமிய திருமணச் சட்டத்தின்படியும் பதிவு செய்துகொள்ள முடியும். இதைத் தவிர்த்து சிறப்பு திருமணப் பதிவுச் சட்டம் என்ற ஒன்றும் இருக்கிறது. இருவேறு மதத்தைச் சேர்ந்தவர்கள் திருமணம் செய்துகொள்ளும்போது, அதைச் சிறப்பு திருமணப் பதிவுச் சட்டத்தின் கீழ் பதிவு செய்துகொள்ளலாம். மேலும், சாதி, மதம் உள்ளிட்ட எந்தவொரு சமூகப் பிரிவுகளையும் பொருட்படுத்தாமல், சடங்கு சம்பிரதாயங்கள் இன்றி திருமணம் செய்துகொள்கிறவர்களும் சிறப்பு திருமணச் சட்டத்தின் கீழ் பதிவு செய்துகொள்ளலாம்.

தேவையான ஆவணங்கள்

ஆன்லைன் விண்ணப்பம், திருமணம் நடந்ததற்கான ஆதாரங்கள் (திருமண அழைப்பிதழ், கோயில், பள்ளிவாசல், சர்ச் என எங்கு திருமணம் நடந்ததோ அதற்கான ரசீது), முகவரிச் சான்றுக்காக வாக்காளர் அட்டை, குடும்ப அட்டை, ஆதார் அட்டை இவற்றில் ஏதேனும் ஒன்றின் நகல், வயதுச் சான்றுக்காக பிறப்புச் சான்றிதழ், கல்விச் சான்றிதழ், ஓட்டுநர் உரிமம் அல்லது குடும்ப அட்டை இவற்றில் ஏதேனும் ஒன்றின் நகல், சாட்சி கையொப்பம் இடும் மூன்று நபர்களின் அடையாள அட்டை, மணமக்களின் நான்கு பாஸ்போர்ட் சைஸ் புகைப்படங்கள்.

திருமணச் சான்று தொலைந்தால் என்ன செய்வது?

2016-ம் ஆண்டுக்குப் பின் பதிவு செய்தவர்களின் திருமண சான்றுகள் அனைத்துமே இணையத்தில் உள்ளன. எனவே, எப்போது வேண்டுமானாலும் பதிவிறக்கம் செய்து, உங்கள் பகுதி சார்பதிவாளரிடம் கையொப்பம் பெற்று, அசல் சான்றிதழாக மாற்றிக்கொள்ளலாம். 2016-ம் ஆண்டுக்கு முன் திருமணத்தைப் பதிவு செய்தவர்கள் எனில், இதற்கு முன் உங்கள் திருமணத்தை எங்கு பதிவு செய்தீர்களோ, அதே அலுவலகத்தில் சார்பதிவாளரிடம் உரிய ஆவணங்களுடன் மனுக்கொடுத்து சான்றிதழ் பெற்றுக் கொள்ளலாம்.

சட்டத்திருத்தம்!

திருமணம் எந்த இடத்தில் நடந்ததோ அந்த சார் பதிவாளர் அலுவலகத்தின் எல்லை வரம்புக்கு உட்பட்ட அலுவலகத்தில் மட்டும்தான் பதிவு செய்ய வேண்டும் என்ற சட்டம் சமீபத்தில் திருத்தப்பட்டுள்ளது. திருமணம் நடைபெற்ற இடத்தில் உள்ள சார்பதிவு அலுவலகம் மற்றும் மணமக்கள் இருவரின் நிரந்தர வசிப்பிடம் அமைந்துள்ள சார்பதிவு அலுவலகம் ஆகியவற்றில் ஏதேனும் ஒன்றில் திருமணப்பதிவை மேற்கொள்ளலாம்.

கட்டாய திருமணப் பதிவு சட்டத்துக்கு முன்னதாகத் திருமணம் செய்து, இதுவரையில் பதிவு செய்யாமலிருப்பவர்களும் திருமணப் பதிவை மேற்கொள்ளலாம். இதற்கென உரிய கட்டணங்களைச் செலுத்த வேண்டியிருக்கும் என்பதைக் கவனத்தில் கொள்ளவும்.

புதிய காஸ் இணைப்பு... விண்ணப்பிப்பது எப்படி?

குடும்பத்தின் அடிப்படைத் தேவைகளில் மிக முக்கிய மானது காஸ் இணைப்பு. அத்தியாவசியமான தேவை என்றாலும் புதிய காஸ் இணைப்பு பெறுவது தொடர் பான தகவல்கள் பலருக்கும் தெரிவதில்லை. காஸ் இணைப்பு குறித்த நடை முறைகளைப் பார்க்கலாம்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
LEOcrafts

புதிய காஸ் இணைப்பு பெற தேவையான ஆவணங்கள் என்னென்ன?

அடையாள அட்டைக்காக ஓர் ஆவணம், வீட்டு முகவரிச் சான்றுக்காக ஓர் ஆவணம் என இரண்டு ஆவணங்கள் கட்டாயம் தேவை. வீட்டு முகவரியைப் பொறுத்தவரையில் குடும்ப அட்டையையோ, மின் கட்டண ரசீதையோ கொடுக்கலாம். வாடகை வீட்டில் குடியிருப்பவர்கள், வீட்டு உரிமையாளரிடம் ஏற்படுத்திக்கொண்ட வாடகை ஒப்பந்தப் பத்திரத்தில் நோட்டரி பப்ளிக்கின் கையெழுத்துப் பெற்று அதைச் சான்றாக சமர்ப்பிக்கலாம். அடையாள அட்டையாக ஆதார் அட்டை, வாக்காளர் அடையாள அட்டை, பான் கார்டு உள்ளிட்டவற்றில் ஏதாவதொன்றைச் சமர்ப்பிக்கலாம்.

எங்கு விண்ணப்பிக்க வேண்டும்?

எந்த எரிவாயு நிறுவனத்தின் காஸ் இணைப்பைப் பெற வேண்டுமோ, வீட்டுக்கு அருகில் உள்ள அந்த நிறுவனத்தின் ஏஜென்சிக்குச் சென்று ஆவண நகல்களை விண்ணப்பத்துடன் இணைத்து வழங்கவும். மானியம் பெற விரும்பினால் கட்டாயம் வங்கிக் கணக்குப் புத்தகத்தின் நகலையும் இணைக்கவும். வங்கிக் கணக்கில் ஆதார் எண்ணை இணைத்திருப்பது அவசியம்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
greenaperture

எவ்வளவு கட்டணம்?

வீட்டு உபயோக காஸ் இணைப்பைப் பொறுத்தவரையில் 14.2 Kg மற்றும் 5 Kg ஆகிய இரு எடைகளில் கிடைக்கின்றன.

14.2 Kg சிலிண்டர் வேண்டுமெனில் 1,450 ரூபாயும், 4.5 Kg சிலிண்டர் வேண்டுமெனில் 350 ரூபாயும் டெபாசிட் கட்டணமாகச் செலுத்த வேண்டும். தவிர, இணைப்புக் கட்டணமாக 50 ரூபாயும், ரெகுலேட்டருக்காக 150 ரூபாயும் செலுத்த வேண்டியிருக்கும். இதில் டெபாசிட் தொகையானது, காஸ் இணைப்பை ரத்து செய்யும்போது திரும்ப வழங்கப்படும்.

அந்த நிறுவனத்தில்தான் அடுப்பு வாங்க வேண்டுமா?

காஸ் இணைப்பு பெற வேண்டுமெனில், தங்களிடம்தான் காஸ் ஸ்டவ்வையும் வாங்க வேண்டும் எனச் சில ஏஜென்சிகள் வலியுறுத்துவதுண்டு. ஆனால், அவர்களிடம்தான் அடுப்பு வாங்க வேண்டும் என்று எந்தக் கட்டாயமும் கிடையாது. அதே நேரம், நீங்கள் வைத்திருக்கும் ஸ்டவ் மற்றும் ரப்பர் டியூப் ஆகிய இரண்டும் ISI தரச் சான்று பெற்றதாக இருக்க வேண்டும். விநியோகஸ்தர்களிடம் 100 ரூபாய் கட்டணமாகச் செலுத்தி ஏழு நாள்களுக்குள் அதைப் பரிசோதித்துக்கொள்ள வேண்டும்.

சிலிண்டர் டெலிவரிக்குப் பணம் கொடுப்பது கட்டாயமா?

சிலிண்டர் டெலிவரி செய்யும்போதும் டெலிவரி நபர், 30 ரூபாயில் ஆரம்பித்து 100 ரூபாய் வரை இடத்துக்கு தகுந்தாற்போல பணம் கேட்டுப் பெறுகின்றனர். கொடுக்கவில்லையெனில் `சிலிண்டர் வராதோ' என்ற அச்சத்திலேயே அதைக் கொடுப்பவர்கள் பலர். அது நாமாக விருப்பப்பட்டு வழங்கும் அன்பளிப்புதானே தவிர, கட்டாயமாகச் செலுத்த வேண்டிய தொகை கிடையாது. பில்லில் எவ்வளவு குறிப்பிடப்பட்டுள்ளதோ அந்தத் தொகையைக் கொடுத்தால் போதுமானது. பில் தொகையைவிட கூடுதலான தொகையை டெலிவரி செய்யும் நபர் கேட்டால் சம்பந்தப்பட்ட ஏஜென்சிக்கு புகார் அளிக்கலாம்.

காஸ் இணைப்புப் பரிசோதனை... எத்தனை வருடங்களுக்கு ஒருமுறை?

ஐந்து வருடங்களுக்கு ஒருமுறை காஸ் ஏஜென்சியிடம் 250 ரூபாய் செலுத்தி, வீட்டில் காஸ் இணைப்பு சரியாக இருக்கிறதா என்பதைப் பரிசோதித்துக்கொள்ள வேண்டும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

காஸ் இணைப்பை மாற்றம் செய்வது எப்படி?

உள்ளூரிலேயே ஒரு முகவரியில் இருந்து இன்னொரு முகவரிக்கு இடம் மாறும்போது, விநியோகஸ்தரிடம் புதிய முகவரிக்கான ஆவணத்தைக் கொடுத்து மாற்றம் செய்துகொள்ளலாம். வெளியூருக்கு மாறுதல் செய்யும்போது சிலிண்டர்கள் மற்றும் ரெகுலேட்டரை விநியோகஸ்தரிடம் ஒப்படைத்து டெபாசிட் தொகையைப் பெற்றுக் கொள்ள வேண்டும். பிறகு, செல்லும் ஊரில் உள்ள ஏஜென்சியிடம் காஸ் இணைப்பைப் பெற்றுக்கொள்ளலாம்.

ஆதார்... பதிவு நடைமுறைகள்!

டிஜிட்டல் இந்தியாவில் எல்லா விஷயங்களுக்கும் ஆதார் எண் முக்கியமான ஆவணமாக இருக்கிறது. ஆதார் அட்டைக்குப் பதிவு செய்வதிலும், திருத்தங்கள் மேற்கொள்வதிலும் பலருக்கும் நிறைய குழப்பங்கள். அவற்றைக் களையும் தகவல்கள் இங்கே...

எங்கு பதிவு செய்ய வேண்டும்?

ஆதார் அட்டைக்கு நீங்களாகவே ஆன்லைனில் பதிவு செய்ய முடியாது. ஆதாருக்காக உங்கள் விரல் ரேகை, விழித்திரை ஆகியவை பதிவு செய்யப்பட வேண்டும் என்பதால், ஆதாருக்கு விண்ணப்பிக்க பதிவு முகமையால் அமைக்கப்பட்ட பதிவு மையத்துக்கு நேரடியாகச் செல்ல வேண்டும். உங்களுக்கு அருகில் பதிவு மையம் எங்கு இருக்கிறது என்பதை https://appointments.uidai.gov.in/easearch.aspx என்ற இணைப்பில் சென்று அறியலாம்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
Nijar Mohamed N

என்னென்ன ஆவணங்கள் தேவை?

ஆதார் பதிவு செய்வதற்காகப் பதிவு மையத்தில் வழங்கப்படும் படிவத்தைப் பூர்த்தி செய்து தர வேண்டும். அத்துடன் அடையாளச் சான்று, முகவரிச் சான்று ஆகியவற்றை இணைக்க வேண்டும். வாக்காளர் அடையாள அட்டை, பாஸ்போர்ட் உள்ளிட்ட 18 வகையான அடையாளச் சான்றுகளில் ஏதேனும் ஒன்றையும், குடும்ப அட்டை, வீட்டுவரி ரசீது உள்ளிட்ட

35 வகையான முகவரிச் சான்றுகளில் ஏதேனும் ஒன்றையும் சமர்ப்பித்தால் போதுமானது. இந்தச் சான்றுகளின் ஒரிஜினலைப் பதிவு மையத்துக்குக் கொண்டு செல்ல வேண்டும். அதை ஸ்கேன் செய்துகொண்டு திருப்பித் தந்துவிடுவார்கள்.

உங்களுக்குத் தனியாக அடையாளச் சான்று/முகவரிச் சான்று இல்லாத நிலையில் குடும்ப அட்டை, வேலைவாய்ப்பு உறுதித் திட்ட பணி அட்டை ஆகியவை செல்லத்தக்க அடையாள/முகவரிச் சான்றாக ஏற்றுக்கொள்ளப்படும். அப்படி இருக்கும்பட்சத்தில், குடும்பத் தலைவர் உங்களின் அடையாளம் மற்றும் முகவரியை சரிபார்த்து உறுதி செய்ய வேண்டும். முகவரிச் சான்றில் குறிப்பிடப்பட்டுள்ள முகவரி அஞ்சல் மூலம் கடிதம் வழங்குவதற்கு போதுமான தாக இல்லை என்றால், முகவரிச் சான்றில் வீட்டு எண், சந்து எண், தெரு பெயர் போன்றவற்றைச் சேர்த்துக்கொள்ளலாம்.

எழுத்துப் பிழைகளை சரி செய்யவும், பின்கோடு போன்றவற்றைச் சேர்த்துக்கொள்ளவும் அனுமதி உண்டு. முகவரிச் சான்றில் உள்ள முகவரியின் அடிப்படையை மாற்றிவிடாத வகையிலான திருத்தங்கள் அனுமதிக்கப்படும்.

ஒருவேளை நீங்கள் கோரும் திருத்தம் பெரியதாகவும், அடிப்படை முகவரியை மாற்றக்கூடியதாகவும் இருந்தால், மாற்று முகவரிச் சான்றை வழங்கி பதிவு செய்துகொள்ள வேண்டியிருக்கும். இப்போது வசிக்கும் முகவரி, சொந்த ஊரின் முகவரி என ஒன்றுக்கும் மேற்பட்ட முகவரிச் சான்றுகள் இருக்கும்பட்சத்தில், அவற்றில் எந்த முகவரியில் ஆதார் கடிதம் அனுப்பப்பட வேண்டும் என்பதை நீங்கள் உறுதி செய்யலாம்.

ஒப்புகைச் சீட்டு/பதிவு ஆவணத்தில் குறிப்பிடப்பட்ட டிமோகிராபிக் தகவல்கள் தவறானதாக இருந்தால் என்ன செய்வது?

உங்கள் பெயர், முகவரி, பாலினம், பிறந்த தேதி உள்ளிட்ட டிமோகிராபிக் தகவல்களில் பதிவு ஆவணத்தில் ஏதேனும் தவறுகள் இருந்தால், பதிவு செய்த நேரத்திலிருந்து 96 மணி நேரம்வரை அதை நீங்கள் இ-சேவை மையத்தை அணுகி திருத்திக்கொள்ளலாம். இந்த 96 மணி நேரம் என்பது ஒப்புகைச் சீட்டு/ பதிவு ஆவணத்தில் குறிப்பிடப்பட்டுள்ள பதிவு நேரத்திலிருந்து தொடங்கும். 96 மணி நேரத்துக்குள் உங்களின் தகவல்களைத் திருத்திக்கொள்ளவில்லை என்றால், உங்களின் ஆதார் உருவாக்கப்பட்ட பிறகு, அதில் உள்ள தகவல்களைத் திருத்திக்கொள்ளலாம். அந்தத் தகவல்களைத் திருத்துவதற்கு நீங்கள் திருத்தும் தகவலின் சான்றுக்கான ஆவணத்தின் ஒரிஜினலை இ-சேவை மையத்துக்கு எடுத்துச் செல்ல வேண்டும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

எந்த வயதில் பதிவு செய்யலாம்?

ஆதார் பதிவு செய்துகொள்ள எந்த வயது வரம்பும் இல்லை. புதிதாகப் பிறந்த குழந்தைகூட ஆதாருக்குப் பதிவு செய்துகொள்ளலாம். பதிவு செய்யப்பட்ட நாளிலிருந்து அது உருவாக்கப்படுவதற்கு

90 நாள்கள் ஆகும். உங்களின் ஆதார் உருவாக்கப்பட்ட பின்னர், அதுகுறித்த தகவல் பதிவு செய்யப்பட்ட உங்கள் மொபைல் எண்ணுக்கு குறுஞ்செய்தியாக வரும். இல்லையெனில், https://resident.uidai.gov.in/check-aadhaar என்ற இணைப்பை க்ளிக் செய்வதன் மூலம் உங்கள் ஆதார் விண்ணப்பத்தின் நிலையை நீங்கள் அறிந்து கொள்ளலாம்.

உங்களின் ஆதார் எண் உருவாக்கப்பட்டவுடன் https://uidai.gov.in/ta/ என்ற இணையதளத்துக்குச் சென்று அதிலுள்ள ஆதார் பதிவு பகுதியில் உள்ள ‘டவுன்லோடு ஆதார்’ பட்டனை க்ளிக் செய்து மின்னணு ஆதாரைப் பதிவிறக்கம் செய்ய முடியும். ஒரிஜினல் ஆதாருக்கு உள்ள அதே மதிப்பு ஆன்லைனில் பதிவிறக்கம் செய்யப்பட்ட மின்னணு ஆதாருக்கும் உண்டு.

ஆதாருக்காகப் பதிவு செய்யப்பட்ட ஒப்புகைச் சீட்டு/ஆதார் கடிதம் தொலைந்துவிட்டால் என்ன செய்ய வேண்டும்?

உங்களின் மொபைல் எண் ஆதாரில் பதிவு செய்யப்பட்டிருந்தால், https://uidai.gov.in/ta/ என்ற இந்திய தனித்துவ அடையாள ஆணையத் தின் இணையதளத்தில் ஆதார் பதிவுப் பகுதியில் உள்ள ‘தவறவிட்ட ஆதார் அடையாளப் பதிவு எண்ணைத் திரும்பப் பெற’ என்ற இணைப்பை க்ளிக் செய்து ஆதார் பதிவு எண் அல்லது ஆதாரைக் கண்டுபிடிக்கலாம். பின்னர் உங்கள் பெயரையும், ஆதாரில் பதிவு செய்துள்ள செல்பேசி எண்ணையும் உள்ளிட்டால் உங்களின் ஆதார் பதிவு எண்/ஆதார் உங்களின் மொபைல் எண் அல்லது மின்னஞ்சல் முகவரிக்கு அனுப்பப்படும். நீங்கள் உங்கள் மொபைல் எண்ணை ஆதாரில் பதிவு செய்யவில்லையெனில், அருகிலுள்ள நிரந்தர ஆதார் பதிவு மையத்துக்குத்தான் செல்ல வேண்டும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

வங்கிக் கணக்கு ஆரம்பிப்பது எப்படி?

‘மூக்குத்தி அம்மன்’ திரைப்படத்தில் ஒரு காட்சி. ‘திருப்பதிக்குச் செல்ல பணம் உன்னிடம் இருக்கா?’ என ஆர்.ஜே பாலாஜி கேட்டதும், அஞ்சறைப் பெட்டி முதல் உண்டியல் வரை ஊர்வசி வீட்டில் பல இடங்களிலிருந்து தான் சேமித்து வைத்திருக்கும் பணத்தை எடுப்பார். பெண்களின் சேமிப்பு பல காலமாக இப்படித்தான் இருக்கிறது. இன்றைய காலத்தில் பெண்கள் வங்கியில் சேமிப்புக் கணக்கு வைத்திருப்பது அவசியம். அதற்கான நடைமுறைகள் எளிமையானவையே.

என்ன தகுதி?

வங்கிக் கணக்குத் தொடங்குவதற்கு 18 வயது பூர்த்தியடைந்தவராக இருக்க வேண்டும். 18 வயதுக்குக் கீழ் இருந்தாலும் வங்கிக் கணக்கு தொடங்க முடியும். ஆனால், உங்கள் சேமிப்புக் கணக்கில் வருடத் துக்கு ஒரு லட்சம் ரூபாய் வரை மட்டுமே வைத்திருக்க முடியும்.

என்னென்ன ஆவணங்கள் தேவை?

பூர்த்தி செய்யப்பட்ட விண்ணப்பத்துடன் இரண்டு புகைப் படங்கள் இணைக்க வேண்டும். அடையாளச் சான்று மற்றும் இருப்பிடச் சான்றுக்கான நகல்களை இணைக்க வேண்டும். இந்த இரண்டு சான்றுகளுக்கும் வெவ்வேறு ஆவணங்கள் தேவை. அதாவது, அடையாளச் சான்றுக்காக பாஸ்போர்ட், டிரைவிங் லைசென்ஸ், வாக்காளர் அடையாள அட்டை, பான் கார்டு உள்ளிட்டவற்றில் ஏதேனும் ஒன்றையும், இருப்பிடச் சான்றுக்காக ரேஷன் கார்டு, காஸ் ரசீது, வீட்டு வரி ரசீது உள்ளிட்டவற்றில் ஏதேனும் ஒன்றையும் சமர்ப்பிக்க வேண்டும்.

இவற்றுடன் மிக முக்கியமாக நீங்கள் கணக்குத் தொடங்கப் போகும் வங்கியில் ஏற்கெனவே கணக்கு வைத்துள்ள உங்களுக்குத் தெரிந்த நபர் ஒருவர் உங்களை அறிமுகப்படுத்திக் கையெழுத்திடுவது அவசியம். அப்படி அறிமுகக் கையெழுத்திடும் நபர் 18 வயது பூர்த்தியடைந்தவராக இருக்க வேண்டும். அவர் வங்கிக் கணக்குத் தொடங்கி குறைந்தபட்சம் ஆறு மாதங்களாகி இருக்க வேண்டும். அதுமட்டுமல்லாமல் அவர் தொடர்ந்து அந்த வங்கியில் வரவு, செலவு வைத்திருப்பவராக இருப்பதும் அவசியம்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

விண்ணப்பம் எங்கே கிடைக்கும்?

எந்த வங்கியில் கணக்குத் தொடங்க விரும்புகிறீர்களோ, உங்களுக்கு அருகில் உள்ள அந்த வங்கியின் கிளைக்குச் சென்று விண்ணப்பப் படிவத்தைப் பெறலாம். அரசு வங்கிகளில் கணக்குத் தொடங்க கட்டணமாக 500 ரூபாய் செலுத்த வேண்டும். அந்தத் தொகை உங்கள் சேமிப்புக் கணக்கின் குறைந்தபட்ச இருப்புத் தொகையாக இருக்கும். இந்த குறைந்தபட்ச இருப்புத் தொகையானது ஒவ்வொரு வங்கிக்கும் மாறுபடும்.

ஏடிஎம் கார்டு, செக் புக், ஆன்லைன் வசதி உள்ளிட்ட வசதிகள் வேண்டுமெனில் விண்ணப்பப் படிவத்திலேயே அதுகுறித்து டிக் செய்து கொடுக்க வேண்டும். இந்தக் கூடுதல் வசதிகளுக்குத் தனியாக கட்டணம் செலுத்த வேண்டியிருக்கும். இப்படியான கூடுதல் வசதிகளைப் பெற ஒரு சில வங்கிகளில் தனியாக விண்ணப்பிக்கச் சொல்வார்கள். ஆன்லைன் வசதி தேவையெனில், அதற்கும் விண்ணப்பித்துப் பெறலாம். அதற்கான பாஸ்வேர்டு பதிவுத் தபாலிலோ, கூரியரிலோ உங்கள் வீட்டுக்கே அனுப்பி வைக்கப்பட்டு விடும்.

தேசியமயமாக்கப்பட்ட வங்கிகளில் நீங்கள் கணக்கு ஆரம்பித்ததும் உங்களுக்கு வங்கிக் கணக்குப் புத்தகம் தந்துவிடுவார்கள். சில தனியார் வங்கிகளில் கணக்குப் புத்தகம் வழங்குவதில்லை. அதற்குப் பதிலாக ஒவ்வொரு மாதமும் உங்களது வரவு, செலவுகளை உங்களின் மின்னஞ்சல் முகவரிக்கே அனுப்பி வைத்துவிடுவார்கள்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

வங்கிக் கிளை மாற என்ன செய்ய வேண்டும்?

உங்களின் வங்கிக் கணக்கு எண் மாறாமல் வங்கிக் கிளையை மாற்றிக்கொள்ளும் வசதி உள்ளது. நீங்கள் கணக்கு வைத்திருக்கும் வங்கிக் கிளையிலிருந்து வேறொரு வங்கிக் கிளைக்கு மாற விரும்பினால் நீங்கள் கணக்கு வைத்திருக்கும் வங்கிக்குச் சென்று நீங்கள் மாற விரும்பும் கிளையையும், மாற்றுவதற்கான காரணத்தையும் குறிப்பிட்டு விண்ணப்பிக்க வேண்டும். அதைத் தொடர்ந்து உங்கள் வங்கிக் கணக்குப் புத்தகத்தில் அதைக் குறிப்பிட்டு தேதியிட்டுக் கொடுப்பார்கள். பின்னர், குறிப்பிட்ட கிளையில் உங்களுடைய புதிய முகவரிச் சான்றைச் சமர்ப்பித்து புதிய கிளையின் கணக்குப் புத்தகத்தைப் பெறலாம்.

ஏடிஎம் கார்டு... 15 நாள்கள்!

உங்கள் கைகளுக்கு ஏடிஎம் கார்டும், அதற்கான பாஸ்வேர்டும் கிடைத்ததும் உங்களின் ஏடிஎம் கார்டை ஆக்டிவேட் செய்துவிட வேண்டும். ஏனெனில், சில வங்கிச் சேவைகளில் 15 நாள்களில் உங்களுக்கு வழங்கப்பட்ட பாஸ்வேர்டு செயலிழந்துவிட வாய்ப்புள்ளது என்பதைக் கவனத்தில்கொள்ள வேண்டும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

ஆன்லைனில் பாஸ்போர்ட்டுக்கு எப்படி விண்ணப்பிப்பது?

முன்பெல்லாம் பாஸ்போர்ட் வாங்குவது பெரிய சாகசம்போல, கடினமான நடைமுறை யாக இருந்தது. ஆனால், தற்போது பாஸ்போர்ட் பெறுவது என்பது மிகவும் எளிதான விஷயமாகிவிட்டது. வீட்டில் இருந்தபடியே ஆன்லைனில் பாஸ்போர்ட்டுக்கு விண்ணப்பிக்க முடியும்.

எப்படிப் பதிவு செய்வது?

பாஸ்போர்ட் பெற விண்ணப்பிக்க http://passportindia.gov.in எனும் பாஸ்போர்ட் சேவா இணையத்தளத்துக்குச் செல்லவும். முகப்புத் திரையில் ‘New user Registration’ என்பதை க்ளிக் செய்யவும். அதையடுத்து தோன்றும் திரையில் கோரப்பட்டுள்ள உங்களுடைய விவரங்களை நிரப்பிவிட்டு பாஸ்வேர்டையும் பதிவுசெய்யவும். அதைச் செய்து முடித்ததும், உங்கள் இ-மெயில் ஐடி-க்கு ஒரு லிங்க் அனுப்பப்படும். அதை க்ளிக் செய்து நீங்கள்தான் அந்தப் பயனாளர் என்பதை உறுதி செய்ய வேண்டும். அதை அடுத்து, பாஸ்போர்ட் இணையதளத்தில் உங்களது கணக்கு ஆக்டிவேட் ஆகிவிடும்.

மீண்டும் முகப்புத் திரைக்குச் சென்று ‘Sign in’ என்பதை க்ளிக் செய்து உங்கள் கணக்கின் பயனாளர் பெயர் மற்றும் பாஸ்வேர்டை டைப் செய்து லாக்-இன் செய்யவும்.

லாக்-இன் செய்ததும் ‘Passport Application’ என ஒரு புதிய பக்கம் திறக்கும். அதில், ஏற்கெனவே நீங்கள் சமர்ப்பித்துள்ள விண்ணப்பத்தின் நிலையைக் காண்பதற்கான (Application Status) ஆப்ஷன் மற்றும் புதிதாக அப்ளை செய்வதற்கான ஆப்ஷன் (Apply for Fresh Passport/Reissue of Passport) என இரண்டு ஆப்ஷன்கள் கொடுக்கப்பட்டிருக்கும். அதில் ‘Apply for Fresh Passport/Reissue of Passport’ என்பதை க்ளிக் செய்யவும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

அடுத்ததாகத் தோன்றும் திரையில் ‘Type of application’ என்ற இடத்தில் ‘Normal’ என்பதை க்ளிக் செய்யவும். உங்களுக்கு மிக விரைவில் பாஸ்போர்ட் வேண்டும் என்றால் ‘Tatkal’ என்ற ஆப்ஷனைத் தேர்வு செய்யவும். ‘Type of passport booklet’ என்ற ஆப்ஷனில் உங்களுக்கு எத்தனை Pages வேண்டும் என்பதைத் தேர்வு செய்யவும். நீங்கள் அதிகமாக வெளிநாட்டுப் பயணம் மேற்கொள்பவராக இருந்தால், ‘60 pages’ என்பதை க்ளிக் செய்யவும். இல்லையெனில், ‘36 pages’ என்பதை க்ளிக் செய்துகொள்ளவும்.

விண்ணப்பத்தைப் பூர்த்தி செய்ய இரண்டு ஆப்ஷன்கள் காட்டப்படும். விண்ணப்பத்தை டவுன்லோடு செய்து நீங்கள் கைப்பட பூர்த்தி செய்து அப்லோடு செய்யலாம். அல்லது, ஆன்லைனிலேயே பூர்த்தி செய்யலாம்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

பூர்த்தி செய்த பிறகு, ‘Passport preview details’ பகுதியில், நீங்கள் பூர்த்தி செய்த தரவுகள் அனைத்தும் சரியாக இருக்கின்றனவா என்பதைப் பொறுமையாகப் படித்து சரிபார்த்துக்கொள்ளவும். இதைத் தொடர்ந்து ‘Next’ என்ற ஆப்ஷனை க்ளிக் செய்யவும். இறுதியாக, ‘I Agree’ என்பதை க்ளிக் செய்து ‘Submit’ என்பதை க்ளிக் செய்யவும்.

அடுத்த பக்கத்தில் உங்களுக்கான ரெஃபரன்ஸ் நம்பர் கொடுக்கப் பட்டிருக்கும். அதைக் குறித்து வைத்துக்கொள்ளவும்.

அந்தப் பக்கத்திலேயே ‘Pay and Schedule Appointment’ என்ற ஆப்ஷன் இருக்கும். அதை க்ளிக் செய்தால், அடுத்த பகுதி திறக்கும். அதில் எந்தெந்த பாஸ்போர்ட் சேவை மையங்களில் எந்தெந்த தேதிகளில் ‘Appointment’ உள்ளது என்று காண்பிக்கும். ஒவ்வொரு நாடாளுமன்றத் தொகுதிக்கும் ஒரு பாஸ்போர்ட் சேவை மையம் உள்ளது. உங்கள் நாடாளுமன்றத் தொகுதிக்குட்பட்ட பகுதியில் உள்ள பாஸ்போர்ட் சேவா மையத்தில் எந்தெந்த தேதிகளில் ‘Appointment’ உள்ளது என்பதைப் பார்த்து நீங்கள் விரும்பும் தேதியைத் தேர்வு செய்து கொள்ளவும். பின்பு Reference Number-ஐ உள்ளீடு செய்து உங்கள் லொகேஷனைத் தேர்வு செய்யவும். பின்னர் Next பட்டனை க்ளிக் செய்யவும்.

அடுத்ததாகத் திறக்கும் பக்கத்தில் உங்களுக்கான கட்டணம் கொடுக்கப்பட்டிருக்கும். அதை ஆன்லைன், ஆஃப்லைன் என்ற இரண்டு வழிகளில் செலுத்தலாம். ஆன்லைன் மூலம் செலுத்துவதாக இருந்தால் Next பட்டனை க்ளிக் செய்து கட்டணத்தைச் செலுத்தவும். பின்பு உங்களுடைய Payment Receipt & Appointment Sheet இரண்டும் வரும்... அவற்றை பிரின்ட் அவுட் எடுத்துக்கொள்ளவும்.

ஆன்லைனில் பணம் செலுத்தவில்லையெனில் Appointment Sheet-ஐ பிரின்ட் எடுத்துக்கொண்டு, உங்களுக்கு அப்பாயின்ட்மென்ட் வழங்கப்பட்ட தேதியில் விண்ணப்பக் கட்டணம் மற்றும் தேவை யான ஆணவங்களுடன் உங்களுடைய பாஸ்போர்ட் அலுவலகத்துக்குச் செல்லவும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!
Nikhil Patil

என்னென்ன ஆவணங்கள் தேவை?

முகவரிச் சான்றாக ஆதார் அட்டை, மின்சாரக் கட்டண ரசீது, சமையல் எரிவாயு இணைப்பு தொடர்பான சான்று, தொலைபேசி (தரைவழி / போஸ்ட்பெய்டு) கட்டண ரசீது, குடிநீர் கட்டண ரசீது, வாடகை ஒப்பந்தம், விண்ணப்பதாரரின் புகைப்படம் ஒட்டப்பட்ட வங்கி சேமிப்புக் கணக்கு (செயலில் உள்ள) புத்தகம்... இவற்றில் ஏதாவதோர் ஆவணத்தை முகவரி சான்றாக சமர்ப்பிக்கலாம்.

பிறந்த தேதிக்கான ஆவணமாக, பிறப்புச் சான்றிதழ், ஏதாவதொரு கல்வி வாரியத்தால் வழங்கப்பட்ட மாற்றுச் சான்றிதழ் (TC), பான் கார்டு, ஆதார் கார்டு, டிரைவிங் லைசென்ஸ், வாக்காளர் அடை யாள அட்டை ஆகியவற்றில் ஏதாவதொன்றை சமர்ப்பிக்கலாம்.

போலீஸ் சரிபார்ப்பு (Police Verification)

இந்ந நடைமுறைகளை நீங்கள் முடித்தவுடன் சில தினங்களில் போலீஸ் வெரிஃபிகேஷனுக்காக உங்களது வீட்டுக்கு காவல் துறையினர் வந்து உங்கள் விவரங்களைச் சரிபார்ப்பார்கள். அப்போது நீங்கள் வீட்டில் இருக்க வேண்டும்.

ரேஷன் கார்டு முதல் பாஸ்போர்ட் வரை - விண்ணப்பம், திருத்தங்கள், புகார்கள்... A to Z தகவல்கள்!

பாஸ்போர்ட்... சில நாள்களில் கைகளில்!

மேற்சொன்ன நடைமுறைகள் எல்லாம் முடிந்து சில நாள்களில் ‘உங்களது பாஸ்போர்ட் தயாராக உள்ளது’ என உங்கள் மொபைல் எண்ணுக்கு எஸ்.எம்.எஸ் அனுப்பப்படும். இந்தத் தகவல் உங்களது பாஸ்போர்ட் எண்ணுடன் சேர்த்து உங்கள் மெயில் ஐடி-க்கு மெயில் செய்யப்படும். சில நாள்களில் உங்கள் பாஸ்போர்ட் பதிவுத் தபாலில் உங்கள் வீட்டுக்கு வந்துவிடும்.

வாழ்வுக்கு அத்தியாவசியமான ஆவணங்கள் பெறுவதில் இனியும் வேண்டாம் அறியாமை!

முகவரி, பிறந்த தேதி... மாறுதல்கள் இருக்கக் கூடாது!

பாஸ்போர்ட் பெற விண்ணப்பிக்க நீங்கள் கொடுக்கும் அனைத்து ஆவணங்களிலும் முகவரி மற்றும் பிறந்த தேதி ஆகியவை ஒரே மாதிரி இருக்க வேண்டும். இல்லையெனில், அதைச் சரிசெய்த பிறகே உங்களால் பாஸ்போர்ட் விண்ணப்பிக்க இயலும் என்பதை நினைவில் கொள்ளுங்கள்.