Published:Updated:

ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z

தங்கத் தகவல்கள்
பிரீமியம் ஸ்டோரி
News
தங்கத் தகவல்கள்

200 ஆண்டுகளுக்கு முன்புவரை பணத்தை தங்கமாக மாற்றிதான் வைத்திருந்தார்கள். வீடுகளில், நிலங்களில்கூட தங்கத்தைப் புதைத்து வைத்திருந்த கதைகளை நாம் கேள்விப்பட்டிருக்கிறோம்.

எத்தனை விதமான ஆபரணங்கள் வந்தாலும் மஞ்சள் உலோகமான தங்கத்தின் மீதான மக்களின் மோகம் என்றைக்கும் குறைவதில்லை. அந்த அளவுக்கு தனிப்பட்ட முறையில் நமது செல்வநிலையில் மட்டுமன்றி, நாட்டின் பொருளாதாரத்திலும் பெரும்பங்கு வகிக்கிறது தங்கம்.

கொரோனா காலகட்டத்தில் நமக்கு, தங்கம் சில பாடங்களைக் கற்றுக் கொடுத்திருக்கிறது. அனைத்து முதலீடுகளும் சரிவைச் சந்தித்துக் கொண்டிருந்தபோது தங்கமும் தங்கம் சார்ந்த முதலீடுகளும் ஏற்றத்தைச் சந்தித்தன. கடந்த 2020-ம் ஆண்டு கொரோனா தொற்றுநோயால் பாதிக்கப்பட்டவர்களின் எண்ணிக்கை ஒருபக்கம் அதிகரிக்க, மறுபக்கம் தங்கம் விலை அதைவிட வேகமாக உயர்ந்தது.

கொரோனாவின் பாதிப்புகள் மெள்ள மெள்ள குறைந்து, அனைத்து நாடுகளின் பங்குச் சந்தை வர்த்தகம் பழைய நிலைக்குத் திரும்ப, 2020-ம் ஆண்டு ஜூன் 3-ம் தேதி ஒரு கிராம் தங்கம் 4,181 ரூபாய் வரை சரிந்தது. அதன் பிறகு, மீண்டும் தங்கத்தின் விலை ஏறத் தொடங்கி, தற்போது (24.06.2021) ஒரு கிராம் தங்கம் 4,440 ரூபாய்க்கு விற்பனையாகிறது.

200 ஆண்டுகளுக்கு முன்புவரை பணத்தை தங்கமாக மாற்றிதான் வைத்திருந்தார்கள். வீடுகளில், நிலங்களில்கூட தங்கத்தைப் புதைத்து வைத்திருந்த கதைகளை நாம் கேள்விப்பட்டிருக்கிறோம். ஆனால், இன்று தங்கத்தைத் தங்கமாக வைத்திருப்பதைவிட தங்க முதலீடுகளில் வைத்திருப்பதைப் பாதுகாப்பாகவும், பணத்தைப் பெருக்குவதாகவும் மக்கள் நினைக்க ஆரம்பித்திருக்கிறார்கள். ஆகையால், ஆபரணத் தங்கத்தை வாங்குவது முதல் தங்கம் சார்ந்த முதலீடுகள், தங்க நகைக்கடன், சீட்டு சேமிப்பு எனத் தங்கம் சார்ந்த அனைத்து விஷயங்களையும் இந்த இணைப்பு புத்தகத்தில் வழங்குகிறார்கள் சென்னையைச் சேர்ந்த தங்க நகை மற்றும் வைர வியாபாரிகள் சங்கத் தலைவர் ஜெயந்திலால் ஜலானி, முதலீட்டு ஆலோசகர் சுந்தரி ஜகதீசன், வங்கி சாரா நிதி நிறுவன முதன்மைச் செயல் அதிகாரி ஆர்.கணேசன் மற்றும் முதலீட்டு மேலாண்மை ஆலோசகர் வி.மாதவன்.

ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z

தங்கம் வாங்கும்போது கவனிக்க வேண்டியவை!

ஹால்மார்க் முத்திரை: இந்தியத் தரக்கட்டுப்பாட்டு நிறுவனம் (BIS – Bureau of Indian Standards) சுருக்கமாக ஆங்கிலத்தில் பி.ஐ.எஸ் என்று அழைக்கப்படுகிறது இந்த நிறுவனம் பலவிதமான பொருள்களுக்கும்

தரச் சான்றிதழ்களை வழங்குகிறது. அந்த வகையில், தங்கத்துக்கு ஹால் மார்க் முத்திரையையும் இந்த நிறுவனம் வழங்கிவருகிறது. முதலில் தங்க நகைகளைக் கையில் எடுத்ததும், பி.ஐ.எஸ் ஹால்மார்க் முத்திரை இருக்கிறதா என்பதைப் பார்க்க வேண்டியது அவசியம்.

ஏனெனில், இந்த முத்திரையானது, கடந்த ஜூன் 15-ம் தேதி முதல் அனைத்து தங்கம் மற்றும் தங்கம் சார்ந்த பொருள்களில் இருக்க வேண்டும் என மத்திய அரசு தெரிவித்துள்ளது. கூடவே, சில விதிமுறைகளையும் வகுத்துள்ளது. இதன்படி, தங்க நகை வியாபாரிகள் இனி 14 காரட் (தங்கத்தின் தரம் 58.5%), 18 காரட் (தங்கத்தின் தரம் 75%) மற்றும் 22 காரட் (தங்கத்தின் தரம் 91.6%) ஆகிய மூன்று தரங்களில் மட்டுமே தங்க நகைகளை விற்பனை செய்ய முடியும்.

இந்த ஹால்மார்க் முத்திரை கீழ்க்காணும் நான்கு அம்சங்களை உள்ளடக்கியது…

1. தங்கத்தின் தூய்மையைக் குறிக்கும் மூன்று இலக்க எண். உதாரணமாக, 916 என்றால், 91.6% தூய தங்கம் (22 காரட்). தங்கத்தின் தூய்மைக்கு ஏற்ப இந்த மூன்று இலக்க எண் மாறுபடும்.

2. பி.ஐ.எஸ் முத்திரை வழங்கிய ஹால்மார்க் சென்டரின் முத்திரை.

3. பி.ஐ.எஸ் முத்திரை வழங்கப்பட்ட ஆண்டைக் குறிக்கும் ஆங்கில எழுத்து. 2000-ம் வருடத்தில் இருந்து பி.ஐ.எஸ் முத்திரை வழங்கப்பட்டு வருகிறது. அந்த வருடம் முத்திரை வழங்கப்பட்ட நகைகளில் ‘A’ என்ற எழுத்தும், 2001-ம் வருடம் முத்திரை வழங்கப்பட்ட நகைகளில் `B’ என்ற எழுத்தும், 2002-ம் வருடத்துக்கு ‘C’ என்ற எழுத்தும்… என இப்படியே ஒவ்வோர் ஆண்டுக்கும் வரிசை நகர்ந்துகொண்டே வரும். நடப்பு ஆண்டுக்கு, அதாவது 2021-க்கு ‘U’ என்ற எழுத்து இருக்கும். 2026-ம் ஆண்டுக்குப் பிறகு, அதாவது ‘Z’ எழுத்துக்குப் பிறகு

2027-ம் ஆண்டிலிருந்து ‘A1’ என்கிற எழுத்து வழங்கப்படும். அதன் தொடர்ச்சியாக 2028-ல் B1, 2029-ல் C1... என்கிற எழுத்துகள் வழங்கப்படும்.

4. நகை விற்பனையாளரின் முத்திரை.

எடையில் கவனம்!

என்னதான் நகையில் `பார் கோடு' இருந்தாலும், அதில் குறிப்பிடப் பட்டிருக்கும் எடையைக் கண்மூடித்தனமாக நம்பக் கூடாது. கடைக்காரரை தராசில் நகைகளை வைத்துக் காட்டச் சொல்லி எடையை செக் செய்வது முக்கியம்.

பில்லில் கொடுக்கப்பட்டிருக்கும் தொகையை அப்படியே செலுத்திவிடக் கூடாது. செய்கூலி, சேதாரம், கற்களுக்கான விலை என்று ஒவ்வொன்றையும் நிதானமாகப் பார்த்து, சந்தேகம் இருந்தால் நகைக்கடையில் கேட்டுத் தெளிவு பெற வேண்டும்.

பழைய நகைகளை மாற்றும்போது...

பழைய நகையை மாற்றி புது நகை வாங்கும்போது, தரத்தை காரணம் காட்டி அல்லது வேறு கடைகளில் வாங்கிய நகை என்பதைச் சொல்லி பழைய நகையின் எடையில் அதிக கிராம்களை கழித்துவிடுவார்கள்.

எனவே, எப்போதும் இதற்கு வாய்ப்பில்லாத வகையில் `916' நகைகளை வாங்குவதுடன், வாங்கிய கடையிலேயே அதை மாற்ற வேண்டியதும் அவசியம். அப்போதுதான் அன்றைய தங்கத்தின் விலையிலேயே பழைய தங்கத்தையும் எடுத்துக் கொள்வார்கள்.

வாடிக்கையாளர்கள் விற்கும் தங்க நகையை உருக்கி அதன் எடைக்கு, அன்றைய தங்கம் விலை என்னவோ, அதைக் கணக்கிட்டு வாங்கிக் கொள்வார்கள். கற்கள் பதித்த அல்லது எனாமல் டிசைன் கொண்ட நகைகள் என்றால் அதை உருக்கி, தங்கத்தை மட்டும் தனியாக எடுத்து, அதற்கு உண்டான தொகையை வழங்குவார்கள். வாங்கும்போதுதான் செய்கூலி, சேதாரம் எல்லாம். விற்கும்போது கணக்கில் எடுத்துக்கொள்வதில்லை. தங்கத்தின் எடைக்கு நிகரான அன்றைய விலை மட்டுமே.

ரசீது வேண்டாமென சொல்லாதீர்கள்!

எந்தப் பொருள் வாங்கினாலும் ரசீது அவசியம் வாங்க வேண்டும். அதிலும் குறிப்பாக, தங்க நகைகளுக்கு அது மிக அவசியம். அப்போதுதான் நகையிலோ, அதன் தரத்திலோ ஏதேனும் பிரச்னை என்றால், சம்பந்தப்பட்ட நகைக்கடையில் அதைக் கேட்க முடியும். ‘வரி வேண்டாம், விலை குறையும்’ என சிலர் ரசீது வாங்காமல் விட்டுவிடுவார்கள். இன்னும் சில கடைகளில் மதிப்பீட்டு ரசீதை `பில்' என்று சொல்லிக் கொடுப்பார்கள். அதனால் தவறாமல் நகை வாங்கிய ரசீதைக் கேட்டு வாங்குவது நல்லது.

செய்கூலி, சேதாரம் சீக்ரெட்ஸ்!

தங்கத்தை உருக்கி, வேலைப்பாடுகள் நிறைந்த ஆரமாகவோ, மோதிரமாகவோ, அணியக்கூடிய ஆபரணங்களாகவோ செய்யும்போது அந்த நகையின் அளவைப் பொறுத்து சில மில்லி தங்கத்துகள்கள் சேதாரமடைய வாய்ப்புள்ளது. இதற்கான விலையும், நகையில் வேலைப்பாடுகள் செய்வதற்குரிய செய்கூலியும் சேர்ந்ததுதான் நகையின் முழு விலை.

அதுமட்டுமல்லாமல், நகைகளை கைகளில் செய்யும்போது சேதாரமாகும் சிறிய தங்கத்துகள்களை பொற்கொல்லர்களால் பொறுக்கி எடுக்க முடிவதில்லை. ஆனால், மெஷின் கட் முறையில் நகைகளைச் செய்யும் போது, தங்கம் சேதாரமாவது குறைகிறது. சிதறும் அந்த துகள்களும் பெரும்பாலும் சேகரிக்கப்பட்டு, உருக்கி மற்ற நகைகள் செய்வதற்கு பயன்படுத்தப்படுகின்றன. அதனால்தான், சேதாரம் மற்றும் செய்கூலி களில் பேரம் பேசினால் பெரும்பாலான நகைக்கடைகளில் தங்க நகைகளின் விலையைக் குறைக்கிறார்கள். நகைக் கடைக்காரர்களின் லாபமே இந்தச் சூட்சுமத்தில்தான் அடங்கியிருக்கிறது.

பொற்கொல்லருக்குக் குறிப்பிட்ட சேதாரம், செய்கூலி தொகையைக் கொடுத்து நகை வாங்கும் கடைக்காரர்கள், அவர்கள் கொடுத்ததைவிட மூன்று மடங்கு சேதாரம் வைத்து விற்பனை செய்கிறார்கள்.

இந்தச் சேதாரமானது சில கடைகளில் 2%-லிருந்து தொடங்கும். சில கடைகளில் குறைந்தபட்ச சேதாரமே 9%-லிருந்துதான் ஆரம்பிக்கும். இது கடைக்குக் கடை மாறுபடும்.

தினம்தோறும் விலை ஏறி இறங்கும் தங்கத்தில் செய்கூலி, சேதாரத்தில் மட்டுமே லாபம் காண முடியும் என்பதால், ஆபரணத்தின் வேலைப் பாடுகளைப் பொறுத்து இதற்கான தொகை அதிகமாக வாங்கப்படுகிறது. அதனால், நகைகளை வாங்குபவர்கள் சேதராம் குறைவாக உள்ள கடைகளைப் பரிசீலிக்கவும்.

காரட் என்றால் என்ன?

24 காரட் தங்கம் என்பது சுத்த தங்கம் அல்லது 100% தங்கம் ஆகும். அதாவது எந்த உலோகங்களின் கலப்பும் இல்லாமல் சுத்த தங்கமாக இருக்கும். இதை ‘சொக்கத்தங்கம்’ என்று கூறுவார்கள். இதன் விலை மற்ற தங்கங்களைவிட அதிகம்.

கடந்த 24.06.2021-ம் தேதி நிலவரப்படி 24 காரட் மதிப்பு கொண்ட 8 கிராம் தங்கத்தின் விலை ரூ.38,472. இதே 22 காரட் தங்கத்தின் விலை ரூ.35,520. விலை அதிகம் என்றாலும்கூட, தங்கக் கட்டிகள் பெரும்பாலும் 24 காரட் தூய தங்கத்திலேயே வாங்கப்படுகின்றன.

22 காரட் தங்கத்தில், 100 சதவிகிதத்தில் 91.67% மட்டுமே தங்கமாகும். மீதமுள்ள 8.33% வெள்ளி, துத்தநாகம், நிக்கல் மற்றும் பிற உலோகங்களின் கலவை ஆகும். இந்த உலோகங்களைச் சேர்ப்பதால்தான் தங்கத்தின் கட்டமைப்பு கடினமாகிறது. அதனால்தான் தங்க ஆபரணங் களைச் செய்ய முடிகிறது. சுத்த தங்கம் அடர்த்தி குறைவாக இருக்கும் என்பதால், அதை அப்படியே பயன்படுத்தி நகைகள் செய்ய முடியாது.

18 காரட் தங்கத்தில் 100 சதவிகிதத்தில் 75% மட்டுமே தங்கம். மீதமுள்ள 25% மற்ற உலோகங்களின் கலவை ஆகும். இது 24 காரட் மற்றும் 22 காரட் தங்கத்துடன் ஒப்பிடும்போது விலை குறைவாக இருக்கும். இந்த வகை நகைகளை அடையாளம் காண்பது மிகவும் எளிது. இவற்றில் 18K, 18Kt என்று முத்திரையிடப்பட்டிருக்கும்.

14 காரட் தங்கத்தில், 100 சதவிகிதத்தில் 58.3% மட்டுமே தங்கமாகும். மீதமுள்ள 41.7% மற்ற உலோகங்களின் கலவையாகும். இந்த வகை தங்கத்தை மக்கள் பெரும்பாலும் விரும்புவதில்லை.

தங்கத்தின் விலை தினமும் ஏன் மாறுகிறது?

தங்கத்தின் விலையை அரசு நிர்ணயிப்பதில்லை. லண்டன் உலோகச் சந்தையில்தான் இதற்கான தினசரி விலையை நிர்ணயம் செய்கிறார்கள். ஹெ.எஸ்.பி.சி பேங்க் (யு.எஸ்.ஏ), பேங்க் ஆஃப் சைனா உள்ளிட்ட 14 நிதி நிறுவனங்களின் பிரதிநிதிகள் மற்றும் சுரங்க அமைப்புகளின் பிரதிநிதிகள் இணைந்து இந்த விலையை நிர்ணயம் செய்கின்றனர். தங்கத்தின் தேவை, கச்சா எண்ணெயின் தேவை மற்றும் அமெரிக்க டாலரின் மதிப்பை அடிப்படையாகக்கொண்டே தங்கத்தின் விலை தினமும் மாறுபடுகிறது.

கல் வைத்த தங்க நகைகள் - கவனம்

கல் வைத்த நகைகளை வாங்கும்போது அவற்றுக்கான விலை மற்றும் சேதாரம், செய்கூலி அனைத்தையும் கொடுக்க வேண்டும். அவற்றை நீங்கள் விற்கும்போது நகையில் உள்ள கல்லின் எடைக்குப் பணம் கிடைக்காது. கல்லை எல்லாம் நீக்கிவிட்டு மீதமிருக்கும் தங்கத்தின் எடைக்கு மட்டுமே பணம் தருவார்கள். அதனால் கல் நகை வாங்குவதைத் தவிர்க்கவும். செய்கூலி, சேதாரம் போனால் பரவாயில்லை என்பவர்கள், கல் வைத்த நகை அணிய விரும்புவோர் மட்டுமே அந்த வகை நகைகளை வாங்கலாம்.

ஆன்லைனில் தங்கம் வாங்குகிறீர்களா?

முதலில், தங்க நகையை ஆர்டர் செய்வதற்கு முன்பாக, நகைக்கடை உரிமையாளர்கள் இன்றைய தங்கத்தின் விலையைத்தான் குறிப்பிட்டிருக் கிறார்களா அல்லது அதிகமான விலையைக் குறிப்பிட்டிருக்கிறார்களா என்பதைக் கவனிக்க வேண்டியது அவசியம்.

தங்கம் 24, 22, 18 மற்றும் 14 காரட் போன்ற பல வகைகளில் கிடைக்கிறது. நீங்கள் வாங்கப்போவது தங்க நாணயம் என்றால், ஆர்டர் செய்வதற்கு முன்னால் காரட் விஷயத்தில் தெளிவாக இருங்கள்.

நேரடியாகக் கடைக்குப்போய் வாங்கும்போது, ஹால்மார்க் முத்திரை, தங்கத்தின் தரம் மற்றும் எடை சரியாக இருக்கிறதா எனப் பல்வேறு விஷயங்களைப் பார்த்து வாங்குவோம். ஆன்லைனில் ஆர்டர் அல்லது ப்ரீ புக் செய்யும்போதும் அதே கவனம் இருக்கட்டும்.

நீங்கள் வாங்கப்போகும் தங்கம் சார்ந்த விவரங்களை முழுமையாகப் படித்துப் பார்த்து, அதன் பிறகே பணத்தைச் செலுத்துவது நல்லது.

ஒரு கிராம், 5 கிராம், 8 கிராம் எனத் தங்க நாணயங்கள் பல அளவுகளில் இருப்பதால், ஒரு கிராம் வாங்க நினைத்து 8 கிராம் தங்கத்தை மாற்றி `கிளிக்’ செய்யவும் வாய்ப்பு இருக்கிறது. பணத்தைச் செலுத்துவதற்கு முன்னர் ஒருமுறைக்கு, இரண்டு முறை சரிபார்த்துக் கொள்ளுங்கள்.

ஆன்லைனில் தங்கநகை வாங்குபவர்கள், உங்களுடைய பெயர், வீட்டு முகவரி, மெயில் முகவரி மற்றும் அலைபேசி எண் போன்றவற்றைப் பிழையின்றிக் கொடுக்கவும். நகைக்கடை உரிமையாளர்கள் தரக்கூடிய கூப்பன் அல்லது ரசீது எதுவாக இருந்தாலும் நீங்கள் கொடுக்கும் விவரங்களின்படிதான் கொடுப்பார்கள் என்பதில் கவனம் இருக்கட்டும்.

ஆன்லைன் ஷாப்பிங்கில் பெரும்பாலான பொருள்கள் சகாய விலையில் கிடைக்கும் என்பது பொது அபிப்பிராயம் என்றாலும், இது தங்கத்துக்குப் பொருந்தாது. மலிவான விலையில் தங்கம் என யார் சொன்னாலும், விளம்பரம் செய்தாலும் நம்ப வேண்டாம்.

நகைக்கடை உரிமையாளரின் ரிட்டர்ன் அல்லது பைபேக் பாலிசியைக் கட்டாயமாக ஆய்வு செய்யுங்கள். விதிமுறைகள் மற்றும் நிபந்தனை களைப் பொறுத்தவரை, ஆன்லைனில் விற்கப்படும் ஏனைய பொருள் களுக்கு உள்ளதைக் காட்டிலும் தங்கத்துக்கான விதிமுறைகள் மிகவும் கெடுபிடியானவை. எனவே, தங்கத்தை ஆன்லைனில் வாங்க முடிவு செய்யும் முன் இந்த நிபந்தனைகளை நன்கு படித்துப் புரிந்துகொண்டு முடிவெடுங்கள்.

நகையை ஆன்லைனில் ஆர்டர் செய்யும்போது `ஹோம் டெலிவரி’ ஆப்ஷனை நீங்கள் பயன்படுத்தினால், வீட்டுக்கு நகை வரும்போது, அதன் பேக்கேஜ் ஒழுங்காக சீல் செய்யப்பட்டிருக்கிறதா என்பதோடு, அது எவ்வித சிதைவுக்கும் உள்ளாகாமல் இருக்கிறதா என்பதையும் பார்க்கவும். பேக்கேஜிங்கில் துளியளவு சந்தேகம் தோன்றினாலும், அதைப் பரிசோதனைக்கு உட்படுத்துங்கள்.

தங்கம் வைத்திருந்தால் அரசுக்குக் கணக்கு காட்ட வேண்டுமா?

2016 டிசம்பர் 1-ல் சி.பி.டி.டி (CBDT) அறிவிப்பின்படி, ஓர் இந்தியர் எவ்வளவு தங்கம் வேண்டுமானாலும் வைத்திருக்கலாம். ஆனால், அதற்கு முறையான கணக்கு இருக்க வேண்டும்.

நம்மில் பலரிடமும் பாரம்பர்யமாக வந்த நகைகள், திருமணம் மற்றும் பண்டிகை விசேஷங்களில் பெரியவர்கள் அன்பளிப்பாக அளித்த தங்கம் போன்றவை இருக்கும். அதற்கு கணக்கு இருக்க வாய்ப்பில்லை என்பதால், திருமணமான பெண் 500 கிராம் வரையும் (சுமார் 62 சவரன்). திருமணமாகாத பெண் 250 கிராம் வரையும் (சுமார்

31 சவரன்). ஆண் 100 கிராம் வரையும் (சுமார் 12 சவரன்) தங்கத்துக்கு கணக்கு காட்டத் தேவையில்லை.

இதற்குமேல் தங்கம் இருக்கும்பட்சத்தில், அதை வாங்கிய ரசீது, அந்த வருடத்தின் வருமான வரித் தாக்கல் நகல் போன்றவற்றைக் காட்ட வேண்டும்.

பாரம்பர்யமாக வந்த தங்கம் எனில், உயில், செட்டில்மென்ட் பத்திரம், தானப் பத்திரம் போன்ற சான்றுகளைக் காட்ட வேண்டும். இவற்றை நாம் விற்கும்போது மூலதன ஆதாய வரி கட்டுவதற்கும் தயாராக இருக்க வேண்டும்.

தங்க இருப்பில் டாப் 10 நாடுகள்!

ஒரு நாட்டின் பொருளாதார ஸ்திரத்தன்மையை நிர்ணயம் செய்யும் காரணிகளில் தங்கம் முக்கிய இடத்தில் இருப்பதால், இந்தியா உட்பட மற்ற உலக நாடுகளும் தங்கம் வாங்கி இருப்பு வைத்துக்கொள்வதில் அதீத ஆர்வம் காட்டிவருகின்றன.

மேலும், ஒவ்வொரு நாடும், அதன் தலைமை வங்கியில் உள்ள தங்கத்தின் இருப்புக்கேற்ப, பணத்தைப் புழக்கத்தில் விடுவதால், தங்கத்தை அதிகமாக இருப்பு வைத்துக்கொள்வதில் அனைத்து நாடுகளுக்கு இடையே போட்டி காணப்படுகிறது.

அந்த வகையில் உலக அளவில் இன்று தங்கத்தை அதிகமாக இருப்பு வைத்துள்ள டாப் 10 நாடுகளின் பட்டியல் இதோ...

2021 ஏப்ரல் நிலவரப்படி, உலக தங்க கவுன்சில் வெளியிட்ட மதிப்பு பட்டியல் இது.

தங்கம் விலை ஒரு கண்ணோட்டம் (ரூபாயில்)!

source (2016-21): myloancare.in
source (2016-21): myloancare.in

மிகப் பெரிய தங்க ஊழல்!

கொரோனா வைரஸின் பிறப்பிடமாகக் கருதப்படும் வூஹான் நகரைத் தலைமையிடமாகக் கொண்ட, மிகப்பெரிய தங்க பதப்படுத்தும் மற்றும் தங்க நகை தயாரிப்பு நிறுவனம் `கிங் கோல்டு ஜுவல்லரி'.

இந்நிறுவனம், முன்னாள் ராணுவ வீரரான `ஜியா ஜிஹோங்’ என்பவரால், 2002-ம் ஆண்டு ஆரம்பிக்கப்பட்டது. சிறிய தங்கச் தொழிற்சாலையாக இருந்து, இப்போது உலகிலேயே மிகப்பெரிய தனியார் தங்க நகை நிறுவனங்களுள் ஒன்றாக உருவெடுத்துள்ளது.

இந்த நிறுவனத்தின் இணையதளத்தில் `தங்கமயமான எதிர்காலம் கொண்ட நிறுவனம்’ என ஆங்கிலத்தில் குறிப்பிடப்பட்டிருக்கும். ஆனால், உண்மையில் இது `செம்புமயமான நிறுவனம்’ என்றுதான் இருந்திருக்க வேண்டும்.

ஏனெனில், 83 டன் எடை கொண்ட, தங்க முலாம் பூசப்பட்ட செம்புகளை ஈடாக வைத்துதான் இந்நிறுவனம் 2.8 பில்லியன் டாலர் (சுமார் ரூ.20,800 கோடி) அளவுக்கு 14 நிதி நிறுவனங்களிடமிருந்து கடன்களைப் பெற்றிருக்கிறது. இந்தத் தங்கத்துக்கு இன்ஷூரன்ஸ் எடுக்கப்பட்டிருப்பது தனிக்கதை.

கடந்த 5 வருடங்களாக இந்த நிறுவனம் தன்னிடம் இருந்த தங்கம் என ஈடாகக் காட்டியவை அனைத்தும் தங்க முலாம் பூசிய செம்புக் கட்டிகள் என்பதைக் குறிப்பிட்டு, பெய்ஜிங்கை தலைமையிடமாகக் கொண்ட புலனாய்வு பத்திரிகையான `கைஷின்’ இந்த மிகப்பெரிய தங்க ஊழலை அம்பலப்படுத்தியது.

இந்தப் பத்திரிகை நிறுவனம், தங்கத்தைத் தவறாகப் பயன்படுத்தி யுள்ளதைச் சுட்டிக்காட்டி, ``2019-ம் ஆண்டு நிலவரப்படி, இது சீனாவின் ஆண்டு தங்க உற்பத்தியில் 22% அல்லது சீனாவின் ஆண்டு தங்க இருப்பில் 4.2 சதவிகிதமாகும். இது சீனப் பொருளாதாரத்துக்கு மிகப் பெரிய பாதிப்பாகும். மேலும், இது நாட்டின் கடன் மதிப்பைச் சிதைத்து விட்டது” எனத் தெரிவித்துள்ளது.

2019-ல் தங்கம் இறக்குமதி - டாப் 10 நாடுகள்!

Source: worldstopexports.com
Source: worldstopexports.com

இந்திய மக்களின் தங்க நகைகள் நுகர்வு!

சர்வதேச அளவில் தங்கம் இறக்குமதியில் இந்தியா மிகப் பெரிய நாடாகத் திகழ்கிறது. ஆண்டுக்கு 800 டன் அளவிலான தங்கத்தை இந்தியா இறக்குமதி செய்கிறது. இறக்குமதி செய்யும் தங்கம் பெரும்பாலும் நகை உற்பத்திக்காகவே பயன்படுத்தப்படுகிறது.

Source: statista
Source: statista

தங்க நகைக்கடன்... கவனிக்க வேண்டியவை

வீட்டில் இருக்கும் தங்கத்தை அடமானம் வைப்பதை கெளரவக் குறைச்சலாகப் பார்க்கும் நிலை மாறி, அவசரத் தேவைகளைப் பூர்த்தி செய்வதற்காகத் தற்போது நகைகளை அடமானம் வைக்கும் பழக்கம் மக்களிடையே அதிகரித்திருக்கிறது. ‘கோவிட்-19’ மாதிரியான பெருந்தொற்றுக் காலத்தில்கூட மக்களுக்குப் பேருதவி செய்தது தங்கமும் தங்க நகைக்கடனும்தான்.

அவசரத் தேவைக்கு தங்க நகைகளை அடமானம் வைக்கும்போது, கடன் கிடைத்தால் போதும் என்று மட்டுமே மக்கள் நினைக்கிறார்கள். ஆனால், நகைக்கடன் பெறும்போது சில விஷயங்களை அவசியம் கவனிக்க வேண்டும்.

கடன் தொகையை மட்டுமோ, மாதாந்தரத் தவணையை மட்டுமோ கருத்தில் கொள்ளாதீர்கள். மற்ற கட்டணங்களையும் விதிமுறைகளையும் கவனத்தில் கொள்ளுங்கள்.

கடனின் மொத்தக் கட்டணங்கள் என்ன என்பதை ஒப்பிட்டு, அதன் பிறகே, வங்கியைத் தேர்வு செய்ய வேண்டும்.

பெரும்பாலான நிதி நிறுவனங்களில் நகைக்கடன் வழங்க செயல்முறைக் கட்டணம் எதையும் வசூலிக்க மாட்டார்கள். ஆனால், மதிப்பீட்டுக் கட்டணம் உண்டு. இந்தக் கட்டணம் அதிகமாக இருந்தால், நீங்கள் வேறு நிறுவனங்களை நாடலாம். எனவே, ஒன்றுக்கு இரண்டு நிறுவனங்களிடம் விசாரித்து முடிவெடுங்கள்.

நகைக்கடன் பெறுவதற்கு உங்களின் அடையாளச் சான்றுகளை சமர்ப்பிக்க வேண்டியிருக்கும். ஓட்டுநர் உரிமம், பான் கார்டு, பாஸ்போர்ட் அல்லது ஆதார் அட்டை ஆகியவற்றைச் சான்றாகச் சமர்ப்பிக்க வேண்டியிருக்கும். உங்களிடம் பான் அட்டை இல்லை என்றால், படிவம் 60-ஐ நீங்கள் சமர்ப்பிக்குமாறு கேட்டுக் கொள்ளப்படுவீர்கள்.

முகவரிச் சான்றுக்காக உங்களது மின்சாரக் கட்டண ரசீது, ரேஷன் அட்டை அல்லது தொலைபேசி கட்டண ரசீது ஆகியவற்றை சமர்ப்பிக்க வேண்டியிருக்கும்.

நீங்கள் அடகு வைக்க நாடும் நிறுவனத்தின் நம்பகத்தன்மை பற்றி நன்றாகத் தெரிந்து கொள்ளுங்கள். சில நிறுவனங் களில் நீங்கள் அடகு வைக்கும் தங்க நகைகளைப் பத்திர

மாக வைத்திருக்கும் வசதிகள் இருக்காது. எனவே, நீங்கள் கடன் தொகையைச் செலுத்திய பிறகு, உங்கள் நகைகள் மீண்டும்

உங்களுக்குத் திரும்பக் கிடைக்க வேண்டும் என்பதை உறுதிப்படுத்திக் கொள்ளுங்கள்.

தங்க நகைக்கான சமமாக்கப்பட்ட மாதாந்தரத் தவணையைக் கட்ட மறக்காதீர்கள். பணத்தைத் திரும்பச் செலுத்த மறக்காதீர்கள். ஏனெனில், இதனால் உங்கள் தங்கத்தை இழக்கக்கூடும்.

அதே போல, எளிதாகக் கடன் கிடைக்கிறது என்பதற்காகத் தேவைக்கு அதிகமான கடனுக்கு விண்ணப்பிக்காதீர்கள். உங்களால் கடனைத் திரும்பச் செலுத்த முடியவில்லை என்றால் நீங்கள் அதை இழக்க நேரிடும்.

நகைக்கடன் வட்டி விகிதம்!

தமிழகத்தில் தேசிய வங்கிகள், தனியார் வங்கிகள், கூட்டுறவு வங்கிகள் என்று 10,000-க்கும் மேற்பட்ட வங்கிக் கிளைகள் உள்ளன. தங்க நகைக்கடனுக்கு பொதுத்துறை வங்கிகள் சுமார் 7.35% முதல் 8.5% வரையிலும், தேசிய மயமாக்கப்பட்ட மற்றும் தனியார் துறை வங்கிகள் 8.5% முதல் 12% வரையிலான ஆண்டு வட்டியில் கடன் வழங்குகின்றன. கூட்டுறவு வங்கிகளில் 9% வட்டியிலும், தொடக்க வேளாண்மைக் கடன் சங்கங்கள் 11% வட்டியிலும் நகைக்கடன் வழங்குகின்றன. மற்றும் வங்கி சாரா நிதி நிறுவனங்கள் 18% முதல் 25% வரை நகைக்கடனுக்கு வட்டி வசூலிக்கின்றன.

தனியார் வங்கிகளைவிட பொதுத்துறை வங்கிகளில் தங்க நகைக் கடனுக்கு வட்டி விகிதம் குறைவு. அதனால் தங்க நகைகளை அடமானம் வைப்பவர்கள் பொதுத்துறை வங்கிகளைப் பரிசீலிக்கலாம். தற்போதைய நிலையில் கனரா வங்கி மற்ற பொதுத்துறை வங்கியைவிட குறைவான வட்டி விகிதத்தில் தங்க நகைக் கடன்களை வழங்கி வருகிறது. வட்டி விகிதம் 7.35%. நகைகளுக்குப் பாதுகாப்பு குறைவாக இருக்கும் காரணத்தால், வங்கி சாரா நிதி நிறுவனங்கள் மற்றும் அடகுக் கடைகளில் நகைகளை அடமானம் வைப்பதை மக்கள் தவிர்ப்பது நல்லது. அங்கு பணம் கிடைப்பதற்கான நேரம் குறைவாக இருந்தாலும், வட்டி விகிதமும் இதர கட்டணங்களும் அதிகமாக இருக்கும்.

குறைந்த வட்டியில் தங்க நகைக்கடன் வழங்கும் வங்கிகள்!

ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z

விற்பதா, அடமானம் வைப்பதா?

தங்கத்தை அடமானமாக வைத்து கடன் வாங்கும்போது, கடன் இருக்கிறது என்ற எண்ணத்தால் அதை மீட்க முயற்சி செய்வோம்.

நகையை விற்றுவிட்டால் மீண்டும் வாங்காமல் போகக்கூடிய சூழ்நிலை

கூட ஏற்படலாம். இதனால் கையிலுள்ள நகைச் சேமிப்பும் கரைந்துவிடும்.

உதாரணத்துக்கு, ஒருவர் வங்கியில் நகைக் கடன் வாங்கும் போது, அந்த தங்க நகைக் கடனுக்கான வட்டி மற்றும் நகைப் பரிசோதனைக் கட்டணம் (தோராயமாக ரூ.1,000- ரூ.3,000) ஆகியவை மட்டுமே எக்ஸ்ட்ரா செலுத்த வேண்டி இருக்கும்.

ஆனால், தங்க நகைகளை விற்கும்போது, ஆரம்பத்திலேயே தேய்மானம் மற்றும் இதர விஷயங்களைக் காரணம்காட்டி தங்க நகையின் மதிப்பிலிருந்து 5% வரை கழிக்க வாய்ப்பிருக்கிறது. பழைய நகைகளை விற்றுவிட்டு புதிய நகைகளை வாங்கும்போது, செய்கூலி, சேதாரம் எக்ஸ்ட்ரா செலவு.

மேலும், தங்கத்தின் விலையானது ஒவ்வொரு மாதமும் ஏறுமுகத்தில் உள்ளது. அதன்படி, நடப்பு மாதத்தில் தங்க நகைகளை விற்றுவிட்டு, அடுத்த மாதத்தில் புதிய நகைகளை வாங்கினால் கூட, எக்ஸ்ட்ரா பணத்தை செலவழிக்க வேண்டி யிருக்கும்.

சில மாதங்கள் அல்லது ஓரிரு வருடங்கள் என்றால், இந்தச் செலவு இன்னும் அதிகரிக்கும்.

ஆக, தேய்மானக் கழிவினால் வீணாகும் தொகை, செய்கூலி, சேதாரத்துக்கான செலவு, தங்கம் விலை உயர்வினால் உருவாகும் எக்ஸ்ட்ரா செலவு என அடமானக் கடனுக்காக கட்டக்கூடிய தொகையைவிட, நகையை விற்கும்போது கூடுதல் தொகையையே இழக்க வேண்டியிருக்கும்.

இதன் அடிப்படையில் பார்க்கும்போது, அவசர தேவைக்கு தங்க நகைகளை விற்பதைவிட, அடகு வைப்பதே சிறந்தது என முடிவாகிறது. அப்படி அடமானம் வைக்கும்போது, நகைக் கடனை நீண்டகாலத்துக்கு எனத் தள்ளிப்போடாமல் ஓரிரு வருடங்களுக்குள் முடித்துக்கொள்வது இன்னும் லாபகரமானதாக இருக்கும்.

தங்க நகைச் சீட்டு... சரியான சாய்ஸா?

நகைச் சீட்டு மூலம் சேமித்து தங்க நகைகளை வாங்கும் திட்டங்களில், பெரும்பாலும் நடுத்தர மற்றும் அதற்கு கீழ்நிலையில் வகைப்படுத்தப்படும் மக்கள்தாம் முதலீடு செய்கிறார்கள். இதில் நூறு ரூபாய் செலுத்தியும் சேமிக்க முடியும் என்பதே காரணம்.

நகைக்கடைகளில் நடத்தும் சீட்டுகளில் 11 மாதங்கள் தொடர்ந்து பணம் கட்ட வேண்டும் என்பது நிபந்தனை. இடையில் கட்ட முடியாமல் போனால், செய்கூலி, சேதாரத்துக்கு கொடுக்கப்பட்ட ஆஃபர் கிடைக்காது. தொடர்ந்து கட்ட முடிந்தால் செய்கூலி, சேதாரம் இல்லாமல் நகைகளை வாங்கிக்கொள்ளலாம்.

திருமணம், அன்பளிப்பு மற்றும் சீர் போன்ற காரணங்களுக்காகத் தங்க நகைச்சீட்டு கட்டி சிறுகச் சிறுக சேர்ப்பதில் பிரச்னை இல்லை. ஆனால், மாத பட்ஜெட்டில் சேமிப்புக்கு என ஒதுக்கும் பணம் முழுவதையும் நகைச்சீட்டு கட்டுவதற்காக மட்டுமே ஒதுக்குவது தவறு.

தங்க நகைகள் தேவையாக இருப்பவர்கள் அதற்கேற்ப திட்டமிட்டு நகைச்சீட்டு மூலம் சேமிக்கலாமே தவிர, முதலீட்டுக் கண்ணோட்டத்தில் தங்கத்தை அணுகுகிறவர்களுக்கு நகைச் சீட்டு ஏற்றது அல்ல.

ஏனெனில், பெரும்பாலும் தங்க நகைகள் முதலீடாகப் பார்க்கப் படுவதில்லை. எளிதில் தங்க நகைகளை விற்றுப் பணமாக்கலாம் என்பது மட்டும்தான் அதில் இருக்கும் ப்ளஸ் பாயின்ட்.

எனவே, இனி தங்க நகைகளை வாங்கும்போது அவற்றை எதற்காக வாங்குகிறோம், அந்த நகை அவசியம்தானா என்பதையும் யோசித்து வாங்க வேண்டும். தங்க நகையை வாங்கி வீட்டில் பூட்டிவைத்துவிட்டு எப்போதாவது போடுவதாக இருந்தால், தங்க நகைகளை வாங்குவதைத் தவிர்த்து, மாறாக தங்கப் பத்திரங்களிலும், கோல்டு ஃபண்டுகளிலும் முதலீடு செய்யலாம்.

தங்கமான முதலீடுகள்!

தங்கத்தை நகையாகவோ, கட்டிகளாகவோ, நாணயமாகவோ வாங்குவதற்குப் பதிலாக தங்கத்தில் மேற்கொள்ளும் முதலீட்டின் பலன்கள் அனைத்தையும் உள்ளடக்கிய ‘பேப்பர் கோல்டு’ ஆக வாங்குவது பல வகைகளில் நன்மை அளிக்கக்கூடியது.

‘பேப்பர் கோல்டு’ என்பது தங்கத்தின் மீது நேரடியாகவும் மறைமுகமாகவும் முதலீடு செய்யப்பட்டு அந்த முதலீட்டின் பயனை முதலீட்டாளர்களுக்கு அளிப்பது. இந்த முதலீட்டின் வருவாய் தங்கத்தின் விலைப்போக்கை யொட்டியே இருக்கும்.

தவிர, செய்கூலி, சேதாரம் கிடையாது. தரம் குறித்துக் கவலைகொள்ளத் தேவையில்லை; பாதுகாக்க லாக்கரும் வேண்டியதில்லை. ஆனால், தங்கத்தில் கிடைக்கும் வருவாய்க்கு நிகரான பலன்கள் இதில் உண்டு.

கோல்டு இ.டி.எஃப் (Gold Exchange Traded Fund)

நகைச்சீட்டு கட்டுவதைவிட அதே பணத்தை பேப்பர் கோல்டு எனப்படும் `கோல்டு இ.டி.எஃப்'பில் முதலீடு செய்யலாம். மியூச்சுவல் ஃபண்டுகளில் முதலீடு செய்வது போன்றதுதான் இது.

நாம் செலுத்தும் பணத்துக்கு ஏற்ற யூனிட்டுகள் நமது கணக்கில் சேர்க்கப்படும். அதாவது, ஒரு யூனிட் என்பதை ஒரு கிராம் எனக் கணக்கில் கொள்ளலாம்.

மாதம்தோறும் கையில் பணம் சேரும்போதெல்லாம் நாம் அதைக் கொண்டு நமக்குத் தேவையான யூனிட்டுகளை வாங்கலாம். குறைந்த பட்சம் ஒரு யூனிட் முதல் அதிகபட்சமாக எத்தனை யூனிட் வரை வேண்டுமானாலும் ஒருவர் வாங்க முடியும்.

தங்கத்தின் மீது நேரடியாக மேற்கொள்ளப்படும் இந்த வகை முதலீடு, பங்குச் சந்தையில் வர்த்தகமாவதால் டீமேட் மற்றும் டிரேடிங் கணக்கு வைத்திருக்க வேண்டியது அவசியம்.

இந்த முதலீட்டின் மூலம் உங்களுக்குத் தங்கம் கிடைக்காது; பணம்தான் திரும்ப கிடைக்கும். கோல்டு இ.டி.எஃப் யூனிட்டுகளை வாங்கிய பிறகு, அந்த யூனிட்டுகளை எப்போது விற்க நினைக்கிறீர் களோ, அப்போது விற்கலாம்.

எதிர்காலத்தில் பிள்ளைகளின் திருமணத் தேவைக்காகத் தங்கம் வாங்க நினைப்பவர்கள் சிறுகச் சிறுகச் சேர்ப்பதற்கு கோல்டு இ.டி.எஃப் சிறந்த முதலீடு.

சிறுகச் சேர்த்த யூனிட்டுகளை நீங்கள் விற்கும்போது அன்றைய சந்தை மதிப்பீட்டில் தங்கத்தின் விலை என்னவோ அந்தப் பணம் உங்களுக்குக் கிடைக்கும்.

சாவரின் கோல்டு பாண்டு!

சாதாரணமாக, நாம் வாங்கும் ஆபரணத் தங்கத்தின் மூலம் நமக்கு வருமானம் எதுவும் கிடைக்காது. ஆனால், `சாவரின் கோல்டு பாண்டு’ எனும் பேப்பர் கோல்டை வாங்கினால் நாம் செய்த முதலீட்டுக்கு ஆண்டுக்கு 2.5% வட்டியை அரசு வழங்கும். இந்த வட்டி, ஆறு மாதக் கால இடைவெளியில் ஆண்டுக்கு இரு தவணைகளாக நம் வங்கிக் கணக்கில் செலுத்தப்படும்.

இந்த வகை பாண்டுகளும் பங்குச் சந்தையில் வர்த்தகம் ஆவதால், டீமேட் மற்றும் டிரேடிங் கணக்கு வைத்திருக்க வேண்டியது அவசியம்.

இந்திய அரசின் உத்தரவாதத்துடன் வருவதால், இந்த பாண்டுகளையும் தங்கம்போல, அவசரத் தேவைக்கு அடமானம் வைத்து பணம் பெற்றுக் கொள்ளலாம்.

இதன் மூலம் தனி நபரொருவர் ஒரு நிதியாண்டில் ஒரு கிராம் முதல் 4,000 கிராம்கள் வரையிலும் தங்கத்தில் முதலீடு செய்யலாம்.

குறிப்பிட்ட தபால் நிலையங்கள் மற்றும் வங்கிகளின் மூலமும் இம் முதலீட்டை மேற்கொள்ளலாம். இந்த பாண்டை டீமேட் கணக்கு இல்லாமல் காகிதப் பத்திர வடிவிலும் வாங்க முடியும்.

இத்திட்டத்தின் கீழ் கிடைக்கும் முழுப் பலனையும் பெற முழுமையாக எட்டு வருடங்கள்வரை காத்திருக்க வேண்டும் என்றாலும் 5, 6, 7-வது ஆண்டுகளுக்குப் பிறகு சில நிபந்தனைகளுக்குட்பட்டு நாம் இத்திட்டத்தில் இருந்து வெளியேறலாம்.

எட்டு ஆண்டுகள் கழித்து விற்கும்போது கிடைக்கும் லாபத்துக்கு, மூலதன ஆதாய வரி கிடையாது. ஐந்து ஆண்டுகளுக்குள் விற்கும்போது கிடைக்கும் லாபத்துக்கு மூலதன ஆதாய வரி உண்டு.

இந்தத் திட்டத்தில் தங்கப் பத்திரங்களைத் திரும்ப ஒப்படைக்கும்போது, முந்தைய வாரத்தின் சராசரி தங்க விலை அடிப்படையில் பணமாகக் கிட்டும். நகைச்சீட்டுபோல தங்கம் கிடைக்காது.

மைனராக இருக்கும் குழந்தைகளுக்காகத் தாயோ, தந்தையோ முதலீடுகளைச் செய்ய முடியும்.

நீங்கள் உங்கள் குழந்தையின் திருமணத்துக்காக முதலீடு செய்பவராக இருந்தால், இது சிறந்த திட்டமாகும். மேலும், தங்கம் வீட்டில் இருந்தால் திருடு போய்விடும் வாய்ப்பு உண்டு அல்லது வங்கியில் இருந்தால் அதற்குப் பணம் செலுத்த வேண்டியிருக்கும். தங்கப் பத்திர முதலீட்டில், அந்த பிரச்னைகள் எதுவுமில்லை.

*****

ஆன்டிக் மற்றும் மெஷின்மேடு நகைகள் அலர்ட்!

கவர்ச்சியான, வேலைப்பாடுகள் அதிகம் உள்ள ‘ஆன்டிக்’ நகைகளுக்கு செய்கூலியும் சேதாரமும் அதிகமாக இருக்கும். ஏறத்தாழ 25% – 30% வரைகூட செல்லும் என்பதால், மக்கள் இவற்றைத் தவிர்ப்பது நல்லது. `டெம்பிள் ஜுவல்லரி' என்று சொல்லப்படுகிற நகைகள், ஆன்டிக் நகை வகையைச் சேர்ந்தவை. வழக்கமான நகைகளைவிட, இந்த வகை

நகைகள் மிகவும் ஆடம்பரமாக இருப்பதே இதன் தனிச் சிறப்பு. தங்கத்தின் தரம் மற்றும் நிறம் ஒன்றாக இருந்தாலும், இந்த நகைகளின் தோற்றம் பழைய ராஜாக்கள் காலத்து நகைகளைப் போல இருக்கும். அதேபோல, மெஷின்களில் செய்யப்படும் செயின்கள் உடலில் காயங்களை ஏற்படுத்த வாய்ப்புள்ளதால் அவற்றையும் தவிர்ப்பது நலம்.

சர்வதேச அளவில் தங்கம் இறக்குமதியில் இந்தியா மிகப் பெரிய நாடாகத் திகழ்கிறது. ஆண்டுக்கு சுமார் 800 டன் முதல் 1,000 டன் அளவிலான தங்கத்தை இந்தியா இறக்குமதி செய்கிறது.

ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z
ஆபரணங்கள்... நகைச்சீட்டு, முதலீடு, அடமானம்- தங்கத் தகவல்கள்... A to Z

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

விவசாய நகைக்கடன்!

கடந்த ஓராண்டுக்கு முன்பு வரை அனைத்து பொதுத்துறை மற்றும் தனியார் வங்கிகளில், விவசாயிகளுக்கு மானியத்துடன்கூடிய விவசாய நகைக்கடன் 4% வட்டி விகிதத்தில் வழங்கப்பட்டு வந்தது. இந்த விவசாய நகைக்கடன் திட்டத்தை மத்திய அரசாங்கம் ரத்து செய்த பிறகு, அனைத்து நகைக்கடன்களுக்கான வட்டி விகிதமும் குறைக்கப்பட்டுள்ளது.

அதன் அடிப்படையில், பொதுத்துறை வங்கிகளில் மற்ற நகைக்கடன்களைப் போல, விவசாய நகைக்கடனுக்கான வட்டி விகிதமும் 7.35%-லிருந்து ஆரம்பமாகிறது. ஆனால், தற்போதும் பயிர்க்கடன் பிரிவில் தங்கத்தை அடமானமாக வைக்கும்போது, அதற்கான 9% வட்டியில் 5% மானியம் வழங்கப்படுகிறது. அப்படிப் பார்க்கும்போது இதற்கான வட்டி விகிதம் 4% மட்டுமே. அதே சமயம், கோழிப்பண்ணை, பால் உற்பத்தி போன்ற காரணங்களுக்காக தங்க நகைகளை அடமானம் வைக்கும்போது, அதற்கான வட்டி விகிதம் 7.35%. இதற்கு மானியம் கிடையாது.

ஹெச்.டி.எஃப்.சி, ஆக்ஸிஸ் வங்கி மாதிரியான தனியார் வங்கிகளிலும் விவசாய நகைக்கடன்கள் வழங்கப்படுகின்றன. ஆனால், சாதாரண நகைக்கடன்களுக்கு வசூலிக்கும் வட்டி விகிதம்தான் இதற்கும். குறைந்தபட்சம் 9 முதல் 10% வரை வட்டி வசூலிக்கப்படுகிறது.

‘ஹால்மார்க்’ முத்திரையை நகை தயாரிப்பவர்களோ, அந்நியர்களோ பொறித்துவிட முடியாது. ‘ஹால்மார்க்’ என்பது அரசு நிறுவனம் தரும் முத்திரை என்பதால், அந்த முத்திரையுள்ள நகைகள் நம்பிக்கைக்கு உரியன. தற்போதைய நிலையில், இந்தியாவிலுள்ள 718 மாவட்டங்களில், 234 மாவட்டங்களில்892 ஹால்மார்க் மதிப்பீட்டு முத்திரை மையங்கள் இருக்கின்றன.

2020-ம் ஆகஸ்ட் 7-ம் தேதி ஒரு கிராம் ஆபரணத் தங்கம் ரூ.5,416 என்கிற விலையிலும், 8 கிராம் ஆபரணத்தங்கம் ரூ.43,328 என்கிற விலையிலும் வர்த்தகமானது. தங்கத்தின் விலை வரலாற்றிலேயே இதுதான் உச்சபட்சவிலையாகும்.

தங்கத்தின் மீதான இந்தியர்களின் மோகம் நாளுக்கு நாள் அதிகரித்து வருகிறது. இவ்வுலகில் உள்ள தங்கத்தில் 20% (சுமார் 25,000 டன்) இந்தியாவின் வீடுகளிலும், கோயில்களிலும் இருப்பதாக தரவுகள் சொல்கின்றன. இது அமெரிக்காவில் உள்ளதைப்போல்3 மடங்கு அதிகம்.

தங்கத்தின் இறக்குமதியைக் குறைக்கும் பொருட்டு, தங்கத்தின் இறக்குமதி மீதான வரியை மத்திய அரசு 12.5 சதவிகிதமாக உயர்த்தியது. ஆனால், தங்கத்தின் இறக்குமதி குறைவதற்குப் பதிலாகத் தங்கக் கடத்தல் அதிகமானதால் தற்போது இந்த வரி 7.50 சதவிகிதமாக குறைக்கப்பட்டுள்ளது.

ஆண்டுக்கு 300 முதல் 400 டன் தங்கம்வரை சட்டவிரோதமாக இந்தியாவுக்குள் வருவதாக உலக தங்க கவுன்சில் கூறுகிறது.

ஒலிம்பிக் கோல்டு மெடலில்1.34 % மட்டுமே தங்கம் சேர்க்கப்பட்டிருக்கும்.