“விதை நெல்லை விற்றுவிட்டால், விதைப்புக்கு என்ன செய்வது?”

மத்திய அமைச்சர்களில் மிகவும் பிஸியான அமைச்சராக வலம்வந்துகொண்டிருக்கிறார், நிதியமைச்சர் நிர்மலா சீதாராமன். சமீபத்தில், ஒரே வாரத்தில் மூன்று முறை பத்திரிகையாளர்கள் சந்திப்பை நடத்திவிட்டார். அதிரடியான பல அறிவிப்புகளை வெளியிட்டுள்ளார். இந்த அதிரடி அறிவிப்புகள் தொடரும் என்று சொல்லப்படுகிறது.

‘இந்தியாவின் பொருளாதாரம் மந்தநிலையில் இருக்கிறது. ஆட்டோமொபைல், ஜவுளி உள்ளிட்ட துறைகள் கடும் நெருக்கடிக்குள்ளாகியுள்ளன. லட்சக்கணக்கானோர் வேலை இழந்துள்ள னர்’ என்று நாடே அலறிக்கொண்டிருக்க, மத்திய அரசு மௌனம் காத்துவந்தது. திடீரென ஒருநாள் செய்தியாளர்களைச் சந்தித்த நிர்மலா சீதாராமன், ‘‘இந்தியப் பொருளாதாரம் வளர்ச்சிப் பாதையில் சென்றுகொண்டிருக்கிறது’’ என்றார். அத்துடன், `நாட்டின் பணப்புழக்கத்தை அதிகரிக்கும் வகையில் பொதுத்துறை வங்கிகளுக்கு 70,000 கோடி ரூபாய் வழங்கப்படும்’ என்பது உட்பட முக்கியமான பல அறிவிப்புகளை வெளியிட்டார்.

பொருளாதார மந்தநிலை, வேலையிழப்புகள் தொடர்பான விவாதங்கள் ஒருபுறம் தீவிரமாக நடந்துகொண்டிருக்க, தன்னுடைய மூலதன இருப்பிலிருந்து 1.76 லட்சம் கோடி ரூபாயை மத்திய அரசுக்குக் கொடுத்துள்ளது இந்திய ரிசர்வ் வங்கி. இதற்கு, கடும் எதிர்ப்பு கிளம்பியது. ‘விதை நெல்லை அள்ளிக் கொடுத்தால், நாளை விதைப்பதற்கு நெல் இருக்காது. அதுபோல ரிசர்வ் வங்கியின் மூலதன இருப்பை எடுத்துக் கொடுத்துவிட்டால், நாளைக்கு நெருக்கடியான சூழல் ஏற்படும் நிலையில் நாட்டின் பொருளாதாரம் நிலைகுலைந்துவிடும்’ என்று பலரும் எச்சரிக்கை மணியை ஒலிக்கச் செய்தனர். இது சரியா, தவறா என்பது பற்றிய விவாதங்கள் தீவிரமாக நடந்துவருகின்றன.

. இந்த விவகாரம் குறித்து, ஓய்வுபெற்ற வங்கி அதிகாரியான கோபாலகிருஷ்ணனிடம் கேட்டோம். ‘‘எந்தப் பிரச்னையும் இல்லாத இயல்பான ஒரு நேரத்தில் இந்தப் பணத்தை மத்திய அரசுக்கு ரிசர்வ் வங்கி கொடுத்திருந்தால், எந்தச் சர்ச்சையும் ஏற்பட்டிருக்காது. யாரும் அதை ஒரு பெரிய விஷயமாகப் பார்த்திருக்க மாட்டார்கள். ஆனால், பொருளாதார மந்தநிலை ஏற்பட்டிருப்பதாக சீரியஸாக விவாதிக்கப்படும் இந்த நேரத்தில் அதைக் கொடுத்திருப்பதால்தான் பெரிய பிரச்னையாகப் பார்க்கப்படுகிறது.

. ரிசர்வ் வங்கி தன் லாபத்திலிருந்து மத்திய அரசுக்கு பங்குத்தொகை கொடுப்பது இயல்பான ஒன்றாகவே இதுவரை நடந்துவந்துள்ளது. ரிசர்வ் வங்கி எவ்வளவு கொடுக்கிறதோ, அதை அப்படியே மத்திய அரசு வாங்கிக்கொள்ளும். ஆனால் சமீபகாலமாக, ‘இருப்பை அதிகரித்துக்கொண்டேபோகிறீர்களே!’ என்று ரிசர்வ் வங்கியைப் பார்த்து மத்திய அரசு கேட்க ஆரம்பித்தது. இது நியாயமான கேள்வி அல்ல.

அரசு ஆட்டம்கண்டால் நாட்டைப் பாதுகாக்கக்கூடியது ரிசர்வ் வங்கிதான். ரிசர்வ் நிதி எவ்வளவு முக்கியமானது என்பதற்கு, பல அனுபவங்களை நாம் பார்த்திருக்கிறோம். 2008-ல் ஏற்பட்ட பொருளாதார நெருக்கடியால் அமெரிக்கா உட்பட உலக நாடுகள் அல்லோலகல்லோலப்பட்டன. அந்தப் புயலில் சிக்காத ஒரே நாடு இந்தியாதான். ‘இந்திய ரிசர்வ் வங்கிதான் அதற்குக் காரணம்’ என்று நியூயார்க் டைம்ஸ் உள்ளிட்ட சர்வதேசப் பத்திரிகைகள் எழுதின. ரிசர்வ் வங்கியிடம் நிறைய பணம் இருந்ததால், நமக்கு எந்தப் பாதிப்பும் ஏற்படவில்லை.

. கடந்த சில ஆண்டுகளாகவே, ரிசர்வ் நிதியைக் கொடுக்குமாறு ரிசர்வ் வங்கியிடம் மத்திய அரசு கேட்டுவந்தது. ரிசர்வ் வங்கியின் கவர்னராக அப்போது இருந்த பிமல் ஜலான் தலைமையில் ஒரு குழு அமைக்கப்பட்டு, அந்தக் குழுவின் பரிந்துரைப்படி 1.76 லட்சம் கோடி ரூபாயை மத்திய அரசுக்கு ரிசர்வ் வங்கி கொடுத்துள்ளது.

இதை மட்டும் தனியாகப் பார்த்தோ மானால், நல்ல விஷயம்தான். மத்திய அரசும் ரிசர்வ் வங்கியும் இணக்கமாக இருப்பது வரவேற்க வேண்டிய ஒன்றுதான். நியாயத்தின் அடிப்படையில் இதைக் கொடுத்திருக்கலாம். இந்தப் பணத்தைக் கொடுத்தால் பொருளாதார வளர்ச்சி ஏற்படும் என்ற எதிர்பார்ப்பில் கொடுத் திருக்கலாம். அரசுக்குத் தேவை இருக்கும்போது நாம் ஏன் குறுக்கே நிற்க வேண்டும் என்ற எண்ணத்தில் கொடுத்திருக்கலாம்” என்றார்.

1.76 லட்சம் கோடி ரூபாய் சர்ச்சைக்கு மத்தியில், அதிரடியான இன்னோர் அறிவிப்பை வெளியிட்டார் நிர்மலா சீதாராமன். அது, பொதுத்துறை வங்கிகளை இணைப்பதற்கான அறிவிப்பு. இணைப்பு நடவடிக்கை மூலம், இதுவரை 27 என இருந்த பொதுத்துறை வங்கிகளின் எண்ணிக்கை, தற்போது 12 ஆகச் சுருங்கிவிட்டது. இதற்கு வங்கி ஊழியர்கள் மத்தியில் கடும் எதிர்ப்பு கிளம்பியுள்ளது. ‘`பொருளாதார நெருக்கடி மிகுந்த இந்தக் காலகட்டத்தில், பொதுத்துறை வங்கிகளை வலுப்படுத்துவதற்குப் பதிலாக, அதை பலவீனப்படுத்தும் நடவடிக்கை இது’’ என்று வங்கி ஊழியர் சங்கங்கள் விமர்சித்துள்ளன.

இதுகுறித்து இந்திய வங்கி ஊழியர்கள் சங்கத்தின் தமிழ்நாடு பொதுச்செயலாளர் சி.பி.கிருஷ்ணனிடம் பேசினோம். ‘‘இந்த இணைப்பு நடவடிக்கை மூலம் பெரிய வங்கியாக மாற்றி, அதில் தனியார் ஆதிக்கத்தை அதிகரிப்பதுதான் அரசின் நோக்கம். ஐ.டி.பி.ஐ வங்கி, ஒரு பொதுத்துறை வங்கி. அதன் 51 சதவிகிதப் பங்குகளை எல்.ஐ.சி-யிடம் கொடுத்தனர். பிறகு, அதை தனியார் வங்கி என வகைப்படுத்திவிட்டனர்.

. இந்திய ஸ்டேட் வங்கியுடன் ஐந்து துணை வங்கிகள் இணைக்கப்பட்டன. அதன் பிறகு, முற்றிலும் கார்ப்பரேட் ஆதரவு நிலையுடன் அந்த வங்கியினர் செயல்பட்டுவருகின்றனர். சாதாரண மக்களைப் பற்றி அவர்கள் கவலைப்படவில்லை. 2017-18 நிதியாண்டில் மட்டும் சாதாரண மக்கள் மீது ஸ்டேட் வங்கி விதித்த அபராதம் மட்டும் சுமார் 1,800 கோடி ரூபாய். அதே காலகட்டத்தில் கார்ப்பரேட்களுக்கு 27,000 கோடி ரூபாய் தள்ளுபடி செய்துள்ளனர். 2018-19 நிதியாண்டில் 2,000 கிளைகளை ஸ்டேட் வங்கி மூடிவிட்டது. இவையெல்லாம், அது பெரிய வங்கியாக மாறிய பிறகு நடக்கின்றன. எனவே, வங்கிகள் இணைப்பை நாங்கள் எதிர்க்கிறோம்” என்றார்.

அதே நேரத்தில், ‘1.76 லட்சம் கோடி ரூபாய் நிதியை மத்திய அரசுக்கு ரிசர்வ் வங்கி கொடுப்பது நியாயமானதுதான். வங்கிகள் இணைப்பு சரியான நடவடிக்கைதான்’ என்றும் குரல்கள் எழுகின்றன. இதுகுறித்து பொருளாதார நிபுணர் ஷியாம் சேகரிடம் பேசினோம்.

. ‘‘ரிசர்வ் வங்கி என்பது இந்திய அரசின் ஓர் அங்கம்தான். ரிசர்வ் வங்கியில் உள்ள உபரியை அங்கேயே வைத்துக்கொண்டிருந்தால், நாட்டுக்கு என்ன பயன்? ஒரு பயனும் கிடையாது. முதலில் மூன்று லட்சம் கோடி ரூபாய் எடுக்க திட்டமிட்டனர். அது சரியில்லை என்று, எதிர்ப்பு கிளம்பியது. அதனால், ஏற்கெனவே ரிசர்வ் வங்கி கவர்னராக இருந்த பிமல் ஜலான் தலைமையில் ஒரு குழு அமைக்கப்பட்டது. அதை ரிசர்வ் வங்கியே அமைத்தது. அந்தக் குழுவின் பரிந்துரைப்படி, இப்போது 1.76 லட்சம் கோடி ரூபாயை மத்திய அரசுக்குக் கொடுக்கிறார்கள்.

. சில வழிமுறைகளின் அடிப் படையில் இதைச் செய்திருக்கிறார்கள். அதனால், இது தவறல்ல.

இந்த நிதியைக்கொண்டு எதிர்காலத்துக்குத் தேவையான சொத்துகளை உருவாக்குவார்கள். தனியாரால் சொத்துகளை உருவாக்க முடியாது. அம்பானியோ, அதானியோ இதற்குமேல் கடன் வாங்க முடியாது. எனவே, அரசுதான் தொடர்ந்து முதலீடுகளைச் செய்ய வேண்டும். ரிசர்வ் வங்கி தரும் பணத்தை அரசு முதலீடுதான் செய்யப்போகிறது.

காங்கிரஸ் இருந்திருந்தாலும் இதைத்தான் செய்திருக்கும். அரசியல்ரீதியான எதிர்ப்புகள் இருப்பதால், ஒவ்வொரு கட்டத்திலும் நிபுணர்களைப்போட்டு, அவர்கள் என்ன சொல்கின்றனர் என்பதைக் கேட்டு பி.ஜே.பி அரசு செயல்பட்டுவருகிறது. இது வரவேற்கத்தக்கது.

வங்கிகள் இணைப்பைப் பொறுத்தவரை, இது சரியான நடவடிக்கை. வங்கிகளை இணைத்தால் கிளைகளைக் குறைக்க முடியும். அதனால் அதன் திறன் மேம்படும். தவிர, வங்கித்துறையில் அரசு இருக்கவே கூடாது. அரசைப் பொறுத்தவரையில், ஒழுங்குமுறையைத்தான் செய்ய வேண்டும்’’ என்றார்.

படங்கள்: அசோக்

“விதை நெல்லை விற்றுவிட்டால், விதைப்புக்கு என்ன செய்வது?”

ஆ.பழனியப்பன்

கார்த்திகேயன் மேடி

க.பாலாஜி