Published:Updated:

வாக்கை விற்றால் நாட்டை விற்றதாக அர்த்தம்!

வாக்கை விற்றால் நாட்டை விற்றதாக அர்த்தம்!
பிரீமியம் ஸ்டோரி
வாக்கை விற்றால் நாட்டை விற்றதாக அர்த்தம்!

ஏ.ஆர்.முருகதாஸ்

வாக்கை விற்றால் நாட்டை விற்றதாக அர்த்தம்!

ஏ.ஆர்.முருகதாஸ்

Published:Updated:
வாக்கை விற்றால் நாட்டை விற்றதாக அர்த்தம்!
பிரீமியம் ஸ்டோரி
வாக்கை விற்றால் நாட்டை விற்றதாக அர்த்தம்!
நியூட்டன்’ இந்தியத் தேர்தல்கள் பற்றி இந்தியில் வந்த மிக முக்கியமான படம். பழங்குடி மக்கள் வாழ்கிற ஒரு மலை உச்சி கிராமத்தில் தேர்தலை நடத்தவிடாமல் செய்கிறார்கள் மாவோயிஸ்ட்கள். அவர்களின் தடையை மீறித் தேர்தல் அங்கே நடக்கிறதா இல்லையா என்பதுதான் கதை.

தேர்தல் நாளின்போது, தேர்தல் அதிகாரிகள் எல்லோரும் அந்தக் கிராமத்துக்குள் நுழைய அஞ்சுகிறார்கள். திடீரென ஒரு சின்னக் கூட்டம் தேர்தல் நடத்த வருகிறது. உடன் ஓர் இளம் அரசு அதிகாரியும் வருகிறார். ‘பரவாயில்லையே... சில பேர் தைரியமா தேர்தல் வேலைக்கு வந்திருக்காங்களே’ என அந்த அதிகாரி நினைக்கும்போதே அவருக்கு அதிர்ச்சி காத்திருக்கிறது.

ஏ.ஆர்.முருகதாஸ்
ஏ.ஆர்.முருகதாஸ்

அவர்கள் யாருமே மலை உச்சிக்குப் போகாமல் மலை அடிவாரத்தில் தங்களுக்குள்ளாகவே வாக்குகளைப் போட்டுக்கொண்டு திரும்பிப் போகப் போவதாக தங்கள் திட்டத்தை விவரிக்கிறார்கள். இப்படித்தான் பல தேர்தல்கள் இந்தக் கிராமத்தில் நடத்தப்பட்டிருப்பதாகவும் சொல்கிறார்கள். ஆனால், இளம் தேர்தல் அதிகாரி இந்தப் பித்தலாட்டத்துக்கு ஒப்புக்கொள்ளாமல் அவர்கள் எல்லோரையும் மலை உச்சிக்கு அழைத்துச்செல்கிறார். பயந்தபடியே எல்லோரும் காட்டு வழியே பயணப்பட்டு மலை உச்சிக்குப் போய்ச் சேர்கிறார்கள்.

தேர்தல் நடத்த வரும் அரசு ஊழியர்களைப் பார்த்ததும் மாவோயிஸ்ட்களுக்குப் பெரிய அதிர்ச்சி. இதுவரைக்கும் தேர்தலே நடக்காத இடத்தில் தேர்தலை நடத்தவிட்டுவிட்டால் அது பழக்கமாகிவிடும், பயம் போய்விடும் எனத் தேர்தலை நிறுத்துவதற்கான வேலைகளில் இறங்குகிறார்கள். நிலைமை பதற்றமாகும் சூழலில் மக்கள் வாக்களிப்பதற்கான பூத் திறக்கப்படுகிறது.

ஆனால், ஒருவர்கூட வாக்களிக்க வரவில்லை. இதற்கிடையே மாவோயிஸ்ட்கள் துப்பாக்கிச்சூடு, வெடிகுண்டு வீச்சு என மிரட்ட பயந்துகொண்டு எல்லோரும் வாக்குப்பெட்டிகளைத் தூக்கிக்கொண்டு காட்டு வழியே ஓடுகிறார்கள். ஓடும் வழியில் 5-6 மலைவாழ் மக்கள் வாக்களிப்பதற்காக எதிரில் வருகிறார்கள். அவர்களைப் பார்த்ததும் இளம் அதிகாரி அந்த இடத்திலேயே தேர்தலை நடத்துவது என முடிவெடுத்து, உயிரைப் பணயம் வைத்து, வந்த மக்களை வாக்களிக்கவைக்கிறார்.

வாக்கை விற்றால் நாட்டை விற்றதாக அர்த்தம்!

இந்த எல்லாவற்றையும் நடத்த அந்த இளம் அதிகாரிக்கு உறுதுணையாக இருந்தது அந்தக் கிராமத்தைச் சேர்ந்த ஓர் இளம் பள்ளி ஆசிரியை. சில மாதங்களுக்கு முன்பு வேறு ஒரு விஷயமாக மும்பை வரும் அந்தப் பள்ளி ஆசிரியை, இளம் அரசு அதிகாரியான கதையின் நாயகனைச் சந்தித்து அந்தக் கிராமத்தில் மாவோயிஸ்ட் பிரச்னை, தேர்தல் இல்லாதது எனப் பல விஷயங்களை விவரித்திருப்பார். அவர் சொல்லி முடிக்க, இருவரும் டீ குடிப்பதோடு படம் முடியும்.

மிகப்பெரிய வரவேற்பைப் பெற்ற இந்தப்படத்தில் அவர்கள் சொன்னது, பெரிய மாற்றங்களுக்கான ஆரம்பம் மிகவும் சிறியதாகத்தான் இருக்கும் என்பதுதான். அந்தக் கிராமத்தைப் பொறுத்தவரை அன்று நடந்த தேர்தலே மிகப்பெரிய வெற்றிதான். ‘இன்று தேர்தல் நடந்தால் என்றாவது ஒருநாள் ஜனநாயகம் பிறக்கும்’ என்பதுதான் உட்கருத்து.

இந்தப்படத்திற்கு ஏன் ‘நியூட்டன்’ எனப் பெயர்வைத்தார்கள் என்கிற கேள்விக்கும் ஒரு சுவாரஸ்யமான பதில் இருக்கிறது. நியூட்டன் கண்டுபிடித்தது புவியீர்ப்பு விசை. எந்தப்பொருளை மேலே தூக்கியடித்தாலும் புவியீர்ப்பினால் அது மீண்டும் கீழே வரும். நியூட்டனின் கண்டுபிடிப்புக்கு முன்புவரை அரசர்கள் எல்லோரும் கடவுளின் குழந்தைகள். மற்றவர்கள் எல்லோரும் அவர்களின் அடிமைகள் என்று சொல்லிக்கொண்டிருந்தார்கள். ஆனால், நியூட்டனின் விதிப்படி கீழே இருந்து யாரை மேலே போட்டாலும் அவர்கள் மீண்டும் கீழேதான் விழுவார்கள். இயற்கையின் முன் எல்லோருமே சமம் என்று சொன்னது. அதற்கான குறியீடுதான் படத்தின் தலைப்பு.

தேர்தலில் எப்படி வாக்களிக்கவேண்டும் என சுஜாதா சார் எப்போதோ எழுதியது இப்போதும் நினைவில் நிற்கிறது.

‘கட்சி பார்த்து ஓட்டு போடக்கூடாது, சின்னம் பார்த்து ஓட்டு போடக்கூடாது. சாதி - சாமி பார்த்து ஓட்டுபோடக்கூடாது. வேட்பாளரைப் பார்த்து ஓட்டுபோடவேண்டும். நாம் யாருக்கு வாக்களிக்கிறோமோ அவர் வெற்றிபெற வேண்டும் என்கிற அவசியம் இல்லை. நல்ல சமூக சேவகர். ஆனால், சுயேச்சையாக நிற்கிறார். நிச்சயம் தோற்றுவிடுவார் என்றாலும் அவருக்கு வாக்களியுங்கள். உங்கள் வாக்கு அவரின் அவமானகரமான தோல்வியைத் தவிர்க்கலாம். அடுத்த தேர்தலுக்கு அவருக்கு நம்பிக்கையைக் கொடுக்கலாம்’ என்று சொன்னவர் மிக முக்கியமாக இன்னொன்றையும் சொல்லியிருந்தார். ‘பணம் வாங்கிக்கொண்டு ஓட்டுபோட்டுவிட்டு சிங்கப்பூர் அப்படி, அமெரிக்கா இப்படி என வியாக்கியானம் பேசாதீர்கள்’ என்று எழுதியிருந்தார். பல தேர்தல்களுக்கு முன்பு அவர் எழுதியது இப்போதும் பொருந்துகிறது.

வாக்கை விற்றால் நாட்டை விற்றதாக அர்த்தம்!

கடந்த தேர்தலின்போது நடந்த ஒரு சம்பவம் என்னை மிகவும் கவலைக்குள்ளாக்கியது. தேர்தல் நாள் வரை ஒரு பகுதிக்கு எந்தக் கட்சியும் பணமே கொடுக்கவில்லை. அந்தப்பகுதி பணப்பட்டியலில் இருந்து தவறுதலாக விடுபட்டுவிட்டதாம். கோபம் கொண்ட அந்தப்பகுதி மக்கள் ‘எங்களுக்கு ஏன் ஓட்டு போட பணம் கொடுக்கவில்லை’ எனச் சாலை மறியல் செய்திருக்கிறார்கள்.

என் சக வாக்காளர்களுக்கு நான் சொல்லவிரும்புவது ஒன்றே ஒன்றுதான். வாக்களிக்காமல் இருந்துவிடாதீர்கள். உங்கள் வாக்கு உங்கள் உரிமை. வேட்பாளர் வெற்றிபெறுவார், தோற்பார் என்பது பற்றியெல்லாம் கவலைப்படாமல் உங்கள் தொகுதிக்காக ஓடி ஓடி உழைக்கக்கூடிய நல்ல மனிதர் என்றால் அவருக்கு நிச்சயம் வாக்களிக்க மறக்காதீர்கள்.

பணத்துக்காக வாக்கை விற்பதுதான் நாட்டை விற்பதற்கான ஆரம்பம். அதனால் நம் ஜனநாயகக் கடமையை நேர்மையாகவும், உண்மையாகவும் நிறைவேற்றுவோம். நல்லவர்கள் ஆட்சி செய்யட்டும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism