Published:Updated:

கிணற்றில் போடப்பட்ட கற்களாக அறிக்கைகள்!

திருச்செந்தூர் கோயில் முதல் தூத்துக்குடி துப்பாக்கிச்சூடுவரை...

பிரீமியம் ஸ்டோரி
தூத்துக்குடி துப்பாக்கிச்சூடு சம்பவம் தொடர்பான ஒருநபர் விசாரணை ஆணையத்தின் இடைக்கால அறிக்கையை முதல்வர் ஸ்டாலினிடம் நீதிபதி அருணா ஜெகதீசன் ஒப்படைத்திருக்கும் நிலையில், ‘இடைக்கால அறிக்கையில் தெரிவிக்கப்பட்டதை உடனடியாக பொதுவெளியில் வெளியிட வேண்டும்’ என ஸ்டெர்லைட் எதிர்ப்பு போராளிகளின் கோரிக்கை வலுத்துள்ளது.

தூத்துக்குடியிலுள்ள வேதாந்தாவின் ஸ்டெர்லைட் காப்பர் உருக்காலையை மூட வலியுறுத்தி, கடந்த 2018-ல் ஆலையைச் சுற்றியுள்ள 15-க்கும் மேற்பட்ட கிராம மக்கள் தொடர் போராட்டத்தில் ஈடுபட்டார்கள். இந்தப் போராட்டத்தின் 100-வது நாளான மே 22-ம் தேதி, மாவட்ட ஆட்சியர் அலுவலகம் நோக்கி பொதுமக்கள் பேரணியாகச் சென்றபோது ஏற்பட்ட தள்ளுமுள்ளு கலவரமாக வெடித்தது. கலவரத்தைக் கட்டுப்படுத்த போலீஸார் தடியடி மற்றும் துப்பாக்கிச்சூடு நடத்தியதில் இரண்டு பெண்கள் உட்பட 13 பேர் உயிரிழந்தார்கள்; 100-க்கும் மேற்பட்டோர் படுகாயம் அடைந்தார்கள்.

இந்தச் சம்பவத்துக்கு எதிராக நாடு முழுவதும் கண்டனக் குரல்கள் எழுந்ததை அடுத்து மே 28-ம் தேதி ஆலை சீல் வைத்து மூடப்பட்டது. துப்பாக்கிச்சூடு சம்பவம் குறித்து சி.பி.ஐ விசாரணை நடத்திவருகிறது. இதற்கிடையில், சம்பவம் குறித்து விசாரணை செய்ய ஓய்வுபெற்ற உயர் நீதிமன்ற நீதிபதி அருணா ஜெகதீசன் தலைமையில் ஒருநபர் விசாரணை ஆணையத்தை தமிழக அரசு நியமித்தது. துப்பாக்கிச்சூட்டில் உயிரிழந்தவர்களின் குடும்பத்தினர், காயம்பட்டவர்கள், உடல் உறுப்புகளை இழந்தவர்கள், வழக்கறிஞர்கள், சமூக ஆர்வலர்கள், போராட்டக்காரர்கள், பொதுமக்கள் எனப் பல தரப்பினரிடமிருந்தும் பிரமாணப் பத்திரங்கள் பெறப்பட்டன. கடந்த 2018, ஜூன் 4-ம் தேதி முதல் தூத்துக்குடியிலுள்ள முகாம் அலுவலகத்தில் விசாரணையைத் தொடங்கியது ஆணையம்.

கிணற்றில் போடப்பட்ட கற்களாக அறிக்கைகள்!

முதலில் விசாரணைக்காக அளிக்கப்பட்ட மூன்று மாத கால அவகாசம், ஆறு மாதங்களாக நீட்டிக்கப்பட்டது. பின்னர், ஆணையத்தின் தரப்பில் கூடுதல் கால அவகாசம் கேட்டுக்கொள்ளப்பட்டதால், பகுதி பகுதியாக நீட்டிக்கப்பட்டுவருகிறது. இடையில் கொரோனா ஊரடங்கு காரணமாக சில மாதங்கள் விசாரணை தடைப்பட்டது. கடந்த சில மாதங்களாக விசாரணை நடைபெற்றுவந்த நிலையில், மீண்டும் ஊரடங்கு அமல்படுத்தப்பட்டிருப்பதால், தற்காலிகமாக விசாரணை ஒத்திவைக்கப்பட்டது. இந்தநிலையில்தான், துப்பாக்கிச்சூடு சம்பவம் குறித்த 27 கட்ட விசாரணையின் இடைக்கால அறிக்கையை மே 14-ம் தேதி முதல்வர் ஸ்டாலினிடம் ஒப்படைத்தார், ஆணையத்தின் நீதிபதி அருணா ஜெகதீசன்.

“இடைக்கால அறிக்கையில் தெரிவிக்கப்பட்டதை பொதுவெளியில் அரசு வெளியிட வேண்டும்’’ என்று கோரிக்கை விடுத்துவரும் ஸ்டெர்லைட் எதிர்ப்பு தூத்துக்குடி மாவட்ட மக்கள் கூட்டமைப்பின் ஒருங்கிணைப்பாளர் கிருஷ்ணமூர்த்தியிடம் பேசினோம். ‘‘துப்பாக்கிச்சூடு சம்பவத்தின் மூன்றாம் ஆண்டு நினைவுநாள் நெருங்கும் நிலையில், இந்த இடைக்கால அறிக்கை சமர்ப்பிக்கப்பட்டுள்ளது. இதுவரை 719 பேர்தான் விசாரணை செய்யப்பட்டிருப்பதாக ஆணையத் தரப்பில் சொல்லப்படுகிறது. இதுவரை பாதிக்கப்பட்டவர்கள் தரப்பை மட்டுமே விசாரணை செய்திருக்கும் நிலையில், அரசு அதிகாரிகள், ஸ்டெர்லைட் ஆலை நிர்வாகத்தினர், துப்பாக்கிச்சூட்டை நடத்திய போலீஸார் என இன்னும் 300-க்கும் மேற்பட்டோர் விசாரணை செய்யப்பட வேண்டும். மாதத்தில் ஐந்து நாள்கள் மட்டுமே விசாரணை நடத்தினால், முழுமையான விசாரணை எப்போது முடிவடையும்? தற்போதைய சூழலில் உயர் நீதிமன்ற, உச்ச நீதிமன்ற விசாரணையே வீடியோ கான்ஃபரன்ஸிங்கில் நடந்துவருவதைப்போல இந்த விசாரணையை நடத்த ஆணையம் ஏன் தயங்குகிறது?

ஜல்லிக்கட்டுப் போராட்டத்தில் ஏற்படுத்தப்பட்ட கலவரம் தொடர்பாக 2017-ல் அமைக்கப்பட்டு ஓராண்டுக்கு முன்பே தமிழக அரசிடம் தாக்கல் செய்யப்பட்ட, ‘நீதியரசர் ராஜேஸ்வரன் விசாரணை அறிக்கை’யை பொதுவெளியில் வெளியிடுமாறு பல சமூக அமைப்புகள் வலியுறுத்தியும் இன்றுவரை வெளியிடப்படவில்லை. 2013-ல் தாதுமணல் கொள்ளை தொடர்பாக அமைக்கப்பட்ட ககன்தீப் சிங் பேடி ஐ.ஏ.எஸ் குழுவின் அறிக்கையும் வெளியிடப்படவில்லை. மதுரை கிரானைட் முறைகேடு தொடர்பான சகாயம் ஐ.ஏ.எஸ் குழுவின் அறிக்கை 2015 நவம்பரில் தாக்கல் செய்யப்பட்டும் வெளியிடப்படவில்லை.

12.11.1980-ல் திருச்செந்தூர் சுப்பிரமணியசுவாமி கோயில் உதவி ஆணையரான சுப்பிரமணியப் பிள்ளை, அவர் தங்கியிருந்த அறையில் மர்மமான முறையில் மரணமடைந்தார். அவர் தூக்கிட்டுத் தற்கொலை செய்துகொண்டதாக அரசுத் தரப்பில் கூறப்பட்டது. கோயிலில் நடந்த உண்டியல் முறைகேடு பற்றி அரசிடம் புகார் செய்ததால் அவர் கொலை செய்யப்பட்டதாக எதிர்க்கட்சிகள் குற்றம்சாட்டின. அவரின் மரணத்துக்கு நீதி கேட்டு அப்போதைய எதிர்க்கட்சித் தலைவரான கருணாநிதி மதுரை முதல் திருச்செந்தூர் வரை மேற்கொண்ட நடைப்பயணம், அப்போதைய அ.தி.மு.க அரசுக்கு பெரும் நெருக்கடியைத் தந்தது. வேறு வழியில்லாமல் நீதிபதி சி.ஜே.ஆர்.பால் தலைமையில் விசாரணை கமிஷனை அமைத்தார் அப்போதைய முதல்வர் எம்.ஜி.ஆர். விசாரணைக்குப் பிறகு 288 பக்கங்கள் கொண்ட அறிக்கை சமர்ப்பிக்கப்பட்டது.

கிணற்றில் போடப்பட்ட கற்களாக அறிக்கைகள்!

அந்த அறிக்கையை வெளியிட வேண்டுமென எதிர்க்கட்சிகள் வலியுறுத்தியும் அரசு வெளியிடவில்லை. ஆனால், விசாரணை ஆணையத்தின் நகலை கருணாநிதி வெளியிட்டார். அந்த ஆணையத்தின் அறிக்கையில், ‘அறநிலையத்துறை அதிகாரி சுப்பிரமணியப் பிள்ளை தற்கொலை செய்துகொள்ளவில்லை. கொலை செய்யப்பட்டார்’ எனக் கூறப்பட்டிருந்தது. அப்போதும்கூட, அரசு அறிக்கையை வெளியிடவில்லை. இப்படி ஆணையத்தின் அறிக்கைகள் அனைத்துமே கிணற்றில் போடப்பட்ட கற்களாகவே இருக்கின்றன.

‘ஸ்டெர்லைட் ஆலை ஒருபோதும் திறக்கப்படாது. அதற்கு தி.மு.க அரசு அனுமதிக்காது’ என முதல்வர் ஸ்டாலின் கூறியுள்ளார். அதேபோல, துப்பாக்கிச்சூட்டின் பின்னணி உண்மையும், அதற்குக் காரணமானவர்களுக்குத் தண்டனையும், பாதிக்கப்பட்டவர்களுக்கு நியாயமும் கிடைக்கும் என நம்புகிறோம். அதனால், தாமதிக்காமல் துப்பாக்கிச்சூடு சம்பவ விசாரணையின் இடைக்கால அறிக்கையைப் பொதுவெளியில் வெளியிட வேண்டும் என அரசுக்குக் கோரிக்கை வைக்கிறோம்’’ என்றார்.

ஸ்டெர்லைட் எதிர்ப்பு மக்கள் கூட்டமைப்பின் சட்ட ஆலோசகரும், சென்னை உயர் நீதிமன்ற மதுரைக் கிளையின் வழக்கறிஞருமான வாஞ்சிநாதனிடம் பேசினோம். ‘‘Commission of Enquiry Act 1952, பிரிவு 3-ன்படி அமைக்கப்பட்டதுதான் ‘தூத்துக்குடி துப்பாக்கிச்சூடு சம்பவம்’ தொடர்பாக தமிழக அரசால் நியமிக்கப்பட்ட ஒருநபர் ஆணையம். உரிமையியல் மற்றும் குற்றவியல் நீதிமன்றங்களுக்கான அனைத்து அதிகாரமும் அந்த ஆணையத்துக்கு உண்டு. ‘அறிக்கை சமர்ப்பிக்கப்பட்டதிலிருந்து ஆறு மாதங்களுக்குள் அந்த அறிக்கையில் கூறப்பட்டுள்ளவற்றின் அடிப்படையில் எடுக்கப்பட்ட நடவடிக்கைகள் குறித்து சட்டமன்றத்தில் வெளியிட வேண்டும்’ என இதே சட்டத்தில் பிரிவு 3(4)-ல் கூறப்பட்டுள்ளது. அந்த அறிக்கையைப் பொதுமக்கள் மத்தியில் பொதுப்படையாக வெளியிடுவதில் சட்டத்தில் எந்தத் தடையும் கிடையாது. அதை வெளியிடுவதும் வெளியிடாததும், அறிக்கையில் கூறப்பட்டுள்ள ஆணையத்தின் பரிந்துரைகளை ஏற்பதும் ஏற்காததும் அரசின் முடிவு. அந்த அறிக்கையில் கூறப்பட்டுள்ள பரிந்துரைகளின்படியும், முதற்கட்ட ஆவணங்களின் அடிப்படையிலும் குற்றவாளி எனச் சந்தேகப்படும் ஓர் அரசு அதிகாரியை அரசு சஸ்பெண்ட் செய்ய முடியும். எல்லாமே அரசின் முடிவுதான்’’ என்றார்.

அருள் வடிவேல் சேகர்
அருள் வடிவேல் சேகர்

ஒருநபர் விசாரணை ஆணையத்தின் வழக்கறிஞர் அருள் வடிவேல் சேகரிடம் பேசினோம். ‘‘தூத்துக்குடி துப்பாகிச்சூடு சம்பவம் குறித்து இதுவரை 1,126 ஆவணங்கள் குறியீடு செய்யப்பட்டுள்ளன. இதுவரை 1,052 பேருக்கு சம்மன் அனுப்பப்பட்டிருக்கிறது. அவர்களில், துப்பாக்கிச்சூட்டில் உயிரிழந்தவர்களின் குடும்பத்தினர், காயம்பட்டவர்கள், பாதிக்கப்பட்டவர்கள், சிகிச்சை அளித்த மருத்துவர்கள், பத்திரிகையாளர்கள், போராட்டக்குழுவினர், வழக்கறிஞர்கள், சமூக ஆர்வலர்கள் என 27 கட்டமாக மொத்தம் 719 பேர் ஆணையத்தின் முன்பு ஆஜராகி சாட்சியம் அளித்துள்ளார்கள். காவல்துறையினர், அப்போதைய ஆட்சியர், காவல் கண்காணிப்பாளர், ஸ்டெர்லைட் ஆலைக் குடியிருப்பில் வசித்த ஊழியர்கள், ஆலை நிர்வாகத்தினர், நடிகர் ரஜினிகாந்த் என சுமார் 350 பேரை விசாரணை செய்ய வேண்டியுள்ளது. ஊரடங்கால் விசாரணை தற்காலிகமாக ஒத்திவைக்கப்பட்டுள்ளது. எஞ்சியுள்ளவர்களிடம் விரைவாக விசாரணை நடத்தப்பட்டு விரைவில் அரசிடம் அறிக்கை சமர்ப்பிக்கப்படும்’’ என்றார்.

விசாரணை ஆணையம் அமைக்கப்படுவதே உண்மையைக் கண்டறிவதற்காகத்தானே? இடைக்கால அறிக்கையைப் பொதுவெளியில் வெளியிடுவதும், எஞ்சியுள்ள விசாரணையைத் துரிதப்படுத்துவதும் அரசின் கடமை!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு