என்டர்டெயின்மென்ட்
லைஃப்ஸ்டைல்
தொடர்கள்
தன்னம்பிக்கை
Published:Updated:

அவள் பதில்கள் - 11 - தேவையற்ற கர்ப்பம்.... சுய மருத்துவம் சரிதானா?

அவள் பதில்கள்
பிரீமியம் ஸ்டோரி
News
அவள் பதில்கள்

உடல் சூடாவது, அடர்த்தியான வெள்ளைப்போக்கு போன்ற அறிகுறி களை வைத்து இர்ரெகுலர் பீரியட்ஸ் உள்ளவர்கள், ஓவியுலேஷன் நாள்களைத் தெரிந்துகொள்ளலாம்.

என் மகளை யுபிஎஸ்சி தேர்வுக்குத் தயார் செய்துகொண்டிருக்கிறோம். அதில் ஆப்ஷனல் பிரிவில் 27 பாடங்களில் ஒன்றைத் தேர்வு செய்யலாம் என்கிறார்களே... அதில் எதைத் தேர்வுசெய்தால் அவளை வெற்றிபெறச் செய்ய முடியும்?

- கே.ராமலட்சுமி, திருநெல்வேலி

பதில் சொல்கிறார் சென்னையைச் சேர்ந்த கல்வி ஆலோசகர் பத்மாவதி...

அவள் பதில்கள் - 11 - தேவையற்ற கர்ப்பம்.... சுய மருத்துவம் சரிதானா?

யுபிஎஸ்சி தேர்வில் மூன்று மேஜர் லெவல்கள் இருக்கும். முதலில் `ப்ரீலிமினரி' தேர்வு. அப்ஜெக்டிவ் டைப் தேர்வான இதில் ஒரு கேள்விக்கு நான்கு ஆப்ஷன்கள் கொடுக்கப்படும். அடுத்தது `மெயின்ஸ்'. டிஸ்க்ரிப்டிவ் எனப்படும் இதில் எழுத வேண்டி யிருக்கும். மூன்றாவது, நேர்முகத்தேர்வு.

மெயின்ஸில் மூன்று பிரிவுகள் இருக்கும். முதலில் கட்டுரை. அதற்கு 250 மதிப்பெண். அடுத்து ஜெனரல் ஸ்டடீஸ். இதில் நான்கு பேப்பர்கள். ஒவ்வொன்றுக்கும் 250 மதிப்பெண். மூன்றாவது ஆப்ஷனல் சப்ஜெக்ட்ஸ். இதில் 27 ஆப்ஷனல் பாடங்கள் இருக்கின்றன. இதில் ஒன்றைத் தேர்வு செய்ய வேண்டும். அந்த ஒன்றில் இரண்டு பேப்பர்கள் இருக்கும். பேப்பர் 1, பேப்பர் 2 என இரண்டுக்கும் தலா 250 மதிப்பெண். மெயின்ஸ் தேர்வுக்கு மொத்தம் 1,750 மதிப் பெண்ணுக்கு எழுத வேண்டும். இதில் கட் ஆஃப் மதிப்பெண் 700 முதல் 750 வரை இருக்கும். இதில் ஆப்ஷனல் பாடம் மூலம் 300 மதிப்பெண் வரை வாங்கிவிட முடியும்.

பத்மாவதி
பத்மாவதி

சரி, இந்த ஆப்ஷனல் பாடத்தை எப்படித் தேர்வு செய்வது... அது கிட்டத்தட்ட திருமணம் செய்வது போன்ற முடிவு. நல்ல இணை அமையும்போது வாழ்க்கை மகிழ்ச்சியாக மாறுமல்லவா... அதுபோலத்தான் ஆப்ஷனல் பாடத் தேர்வும். அதைச் சரியாகத் தேர்வு செய்துவிட்டாலே நல்ல ரேங்க் நிச்சயம். யுஜியில் படித்த பாடத்தைதான் ஆப்ஷனல் பாடமாகத் தேர்வுசெய்ய வேண்டும் என்று பலரும் நினைக்கிறார்கள். இன்று வெற்றிகரமான ஐஏஎஸ் அதிகாரிகளாக இருக்கும் பலரும் இன்ஜினீயரிங் படித்து விட்டு, ஆப்ஷனல் பாடங்களாக சமூக அறிவியலையும் தமிழ் இலக்கியத்தையும் தேர்வு செய்தவர்கள்.

தேன்மொழி ராஜேந்திரன்
தேன்மொழி ராஜேந்திரன்

யுபிஎஸ்சிக்குத் தயாராகும் ஒருவர் ஆப்ஷனல் பாடத்தைத் தேர்வுசெய்ய சம்பந்தப்பட்ட பாடத்தில் அவரது விருப்பமே பிரதானம். யாரோ தேர்ந்தெடுத்தார்கள் என்பதற்காக விருப்பமில்லாத பாடத்தைத் தேர்ந்தெடுக்கக் கூடாது. இந்தத் தேர்வுக்குத் தயாராவது என்பது கிட்டத்தட்ட குறைந்தது இரண்டு ஆண்டு முயற்சி. அந்த இரண்டு ஆண்டுகளும் ஒருவர் தேர்ந்தெடுக்கும் ஆப்ஷனல் பாடம் அவருக்கு அலுப்பைத் தரக்கூடாது. ஆப்ஷனல் பாடத்தின் சிலபஸை முதலில் புரிந்துகொள்ள வேண்டும். அந்தப் பாடம் தொடர்பான அடிப்படை புத்தகங்களைப் படிக்கச் சொல்லுங்கள். டாப்பர்களின் வீடியோக்களைப் பார்க்கச் சொல்லுங்கள். ஆப்ஷனல் பாடங்களின் ப்ளஸ், மைனஸ் பற்றி அவர்கள் பகிர்ந்துள்ள தகவல்களைப் பார்க்கச் சொல்லுங்கள். அந்தப் பாடத்துடன் உங்கள் மகளால் ஒன்றிப்போக முடிகிறதா, அதற்காக அவர் செலவிடும் நேரம், பணம் போன்றவற்றையும் கவனத்தில் கொண்டு ஆப்ஷனல் பாடத்தைத் தேர்வுசெய்யச் சொல்லுங்கள்.

லாக்டௌனுக்கு சில மாதங்கள் முன்புதான் திருமணமானது. இரண்டு வருடங்களுக்குப் பிறகுதான் குழந்தை என்ற முடிவிலிருக்கிறோம். லாக்டௌனில் இரண்டு முறை கருத்தரித்து, கொரோனா பயத்தில் மருத்துவமனை போகத் தயங்கி, தோழியின் அறிவுரையின் பேரில் கருக்கலைப்பு மாத்திரை சாப்பிட்டுவிட்டேன். எனக்கு முறைதவறிய பீரியட்ஸ் சுழற்சி என்பதால் கருத்தரிக்கும் நாளைக் கணக்கிடுவதில் சிக்கல் இருக்கிறது. இனி இப்படி நிகழாமலிருக்க என்ன செய்வது?

- சுவேதா சந்திரன், திருச்சி

பதில் தருகிறார் கோவையைச் சேர்ந்த பொது மற்றும் மகப்பேறு மருத்துவர் தேன்மொழி ராஜேந்திரன்

தலத் சலீம்
தலத் சலீம்

லாக்டௌன் நேரத்தில் நிறைய பெண்கள் என்னிடம் ஆலோசனை கேட்டது இந்த விஷயத்துக்குத்தான். தேவையற்ற கர்ப்பத்தைக் கலைக்க மருத்துவமனைக்குப் போக பயந்துகொண்டு என்ன செய்வது என்ற தவிப்பு பலரிடமும் இருந்ததைப் பார்த்தேன். ஓவியு லேஷன் பீரியடில்தான் பொதுவாகக் கருத்தரிக்கும். அதாவது பீரியட்ஸ் ஆனதிலிருந்து 12 முதல் 18-வது நாள்களுக்குள் தாம்பத்திய உறவுவைத்துக்கொண்டால் கருத் தரிக்கும். கர்ப்பத்தைத் தவிர்க்க நினைப்பவர்கள் இந்த நாள்களில் உறவைத் தவிர்க்கலாம்.

நீங்கள் குறிப்பிட்டுள்ளது போல முறைதவறிய மாதவிடாய் சுழற்சி கொண்டவர்களுக்கு இந்த நாள்களைக் கணக்கிடுவது சிரமம்தான். உறவின்போது பாதுகாப்பு நடவடிக்கைகளை மேற்கொள்ளலாம். அதையும் மீறி கர்ப்பம் தங்கிவிட்டது போல சந்தேகம் வந்தால் மருத்துவரை அணுகி பரிசோதனையின் மூலம் உறுதிசெய்துகொள்ள வேண்டும். கர்ப்பம் இல்லையென்றால் பீரியட்ஸை வரவழைக்க மருந்துகள் தருவார்கள். ஒருவேளை கர்ப்பம் தரித்துவிட்டால் அதைத் தொடர்வ தற்கான அறிவுரைகளைத் தருவார்கள்.

உடல் சூடாவது, அடர்த்தியான வெள்ளைப்போக்கு போன்ற அறிகுறி களை வைத்து இர்ரெகுலர் பீரியட்ஸ் உள்ளவர்கள், ஓவியுலேஷன் நாள்களைத் தெரிந்துகொள்ளலாம். இவர்கள் பீரியட்ஸ் ஆன 10-வது நாள் முதல் 20வது நாள்வரை உறவைத் தவிர்க்கலாம். நீங்களாக மாத்திரைகளை வாங்கிப் பயன் படுத்துவது உங்களுக்கும் உங்கள் கருவுக்கும் ஆரோக்கியமானதல்ல. இனி அதைச் செய்யாதீர்கள்.

அவள் பதில்கள் - 11 - தேவையற்ற கர்ப்பம்.... சுய மருத்துவம் சரிதானா?

எனக்குப் பாதவெடிப்பு அதிகமாக இருக்கிறது. களிம்புகள் போட்டும் சரியாகவில்லை. நடக்கும்போது வலி அதிகரிக்கிறது. இதற்கு ஏதேனும் தீர்வு உண்டா?

- வரலட்சுமி முத்துசாமி, முகப்பேர், சென்னை - 37

பதில் சொல்கிறார் சென்னையைச் சேர்ந்த சரும மருத்துவர் தலத் சலீம்

நிறைய பேருக்கு இருக்கும் இந்தப் பிரச்னையை பலரும் ஆரம்பத்திலேயே கவனிக்கத் தவறி, அலட்சியப்படுத்துவதால்தான் தீவிரமடைகிறது. பருமனானவர்களுக்கு பாதவெடிப்பு தாக்குவது இன்னும் அதிகம். வெடிப்புகள் பெரிதாகப் பிளந்து, இன்ஃபெக்‌ஷனை ஏற்படுத்தலாம். நீரிழிவு இருப்பவர்களுக்கு இது இன்னும் அதிக பாதிப்புகளை ஏற்படுத்தலாம். பாதவெடிப்பு குளிர்காலத்தில் அதிகம் பாதிக்கும். பாதங்களைச் சரியாகப் பராமரிக் காதவர்களுக்கு, தவறான காலணிகள் உபயோகிப்பவர்களுக்கு, குதிகால் பகுதி திறந்தநிலையில் உள்ள காலணிகள் அணிபவர்களுக்கு அதிகம் வரலாம். நீரிழிவு, தைராய்டு, உயர் ரத்த அழுத்தம், பருமன், எக்ஸிமா போன்றவையும் பாதவெடிப்புக்கு காரணங்களாக இருக்கலாம்.

உங்களுக்கு நீரிழிவு இருக்கிறதா என்று பார்க்கவும். ரத்தத்தில் சர்க்கரையின் அளவு கட்டுக்குள் இல்லாவிட்டால் இப்படி பாதவெடிப்பு வருவதுடன், அது பாத நரம்புகளையும் பாதிக்கலாம். பாதப் பகுதியிலுள்ள சருமம் அதீதமாக வறண்டுபோவதால்தான் இப்படி வெடிப்பு வருகிறது என்பதால் அந்தப் பகுதியை வறண்டுபோகாமல் வைத்திருக்க மாயிஸ்ச்சரைசர், பெட்ரோலியம் ஜெல்லி போன்றவற்றைத் தடவி, காட்டன் சாக்ஸ் அணிந்துகொள்ளலாம்.

குளித்து முடித்ததும் அரை பக்கெட் வெது வெதுப்பான நீரில் எப்சம் உப்பு அல்லது கல் உப்பு சேர்த்து, பாதங்களை ஊறவைக்கவும். 10 நிமிடங்கள் கழித்து பியூமிக் ஸ்டோனால் பாத வெடிப்புகளைத் தேய்த்து நீக்கவும். பியூமிக் ஸ்டோன் வேண்டாம் என்பவர்கள், மூன்று டீஸ்பூன் அரிசி மாவு, ஒரு டீஸ்பூன் தேன், மூன்று துளிகள் ஆப்பிள் சிடர் வினிகர் கலந்து ஸ்க்ரப் செய்து, பாதங்களில் தேய்த்து இறந்த செல்களை நீக்கலாம். இதை இரவில் செய்வதானால், ஸ்க்ரப் உபயோகித்துப் பாதங்களைச் சுத்தப்படுத்திய பிறகு பெட்ரோலியம் ஜெல்லியைத் தடவி, அதன் மேல் காட்டன் சாக்ஸ் அணிந்து தூங்கவும். தினமும் செய்துவந்தால் ஒரே வாரத்தில் பலன் தெரியும். வெடிப்பு மிக அதிகமிருந்தால் வெதுவெதுப்பான நீரில் மூன்று டேபிள்ஸ்பூன் பேக்கிங் சோடா சேர்த்து பாதங்களை ஊறவைத்து, பிறகு பெட்ரோலியம் ஜெல்லி தடவலாம்.

உடல், மனநலம், உறவுகள், படிப்பு, வேலை என வழக்கமான ஏரியாக்கள் மட்டுமன்றி, யாரிடம் கேட்பது எனத் தயங்க வைக்கிற விஷயங்களுக்கும் தீர்வுகள் தரக் காத்திருக்கிறது அவள் விகடன். கேட்க நினைப்பதைத் தயங்காமல் கேளுங்கள்... அந்தந்தத் துறை நிபுணர்களிடமிருந்து பதில்கள் பெற்றுத் தரக் காத்திருக்கிறோம். உங்கள் கேள்விகளை

`அவள் பதில்கள்', அவள் விகடன், 757, அண்ணாசாலை, சென்னை - 600 002 என்ற முகவரிக்கோ, avalvikatan@vikatan.com என்ற மின்னஞ்சலுக்கோ அனுப்பி வைக்கவும்.