தன்னம்பிக்கை
லைஃப்ஸ்டைல்
Published:Updated:

அவள் பதில்கள்! 19- மனச்சிக்கலைத் தரும் மலச்சிக்கல்... தீர்வுகள் உண்டா?

அவள் பதில்கள்
பிரீமியம் ஸ்டோரி
News
அவள் பதில்கள்

சாஹா

என் வயது 37. பல வருடங்களாக எனக்கு மலச்சிக்கல் பிரச்னை இருக்கிறது. என்னென்னவோ மருந்துகள் சாப்பிட்டும் பலனில்லை. இது நிரந்தர பிரச்னையா... தீர்வே கிடையாதா?

- மாலினி சந்திரன், சேலம்

பதில் சொல்கிறார் சென்னையைச் சேர்ந்த டயட்டீஷியன் ஷைனி சுரேந்திரன்

அவள் பதில்கள்! 19- மனச்சிக்கலைத் தரும் மலச்சிக்கல்... தீர்வுகள் உண்டா?

ஆரோக்கியமான குடல் இயக்கம் என்பது ஆரோக்கிய மான உடல்நலத்தின் அறிகுறி. மலச்சிக்கல் என்பது மனச்சிக்கலும்கூட என்பதை உணர்ந்தவர்கள் நிச்சயமாக ஒப்புக்கொள்வார்கள். வயிற்றிலுள்ள கழிவுகள் முற்றிலும் வெளியேறும்போது உடலும் உள்ளமும் அமைதியாக உணரும். மலச்சிக்கலிலிருந்து விடுபட எளிமையான ஆலோசனைகளைச் சொல்கிறேன். உடலில் நீர்ச்சத்து குறையாமல் பார்த்துக் கொள்ளுங்கள். தண்ணீர், எலுமிச்சை ஜூஸ், மோர், இளநீர், ரசம், ஓமம்-சீரகம்-பெருஞ்சீரகம் சேர்த்த நீர், க்ரீன் டீ, நீர்ச்சத்து நிறைந்த வெள்ளரி, சுரைக்காய் போன்றவற்றைச் சேர்த்துக் கொள்ளவும். நாள் முழுவதும் உடல் இயக்கம் இருக்கும்படி பார்த்துக்கொள்ளவும். உட்கார்ந்து எழுந்திருக்கும் பயிற்சிகள் உதவும்.

நார்ச்சத்து மிக முக்கியம். பாலிஷ் செய்யாத அரிசி, சிறு தானியங்கள் சிறந்தவை. மூன்று வேளை உணவுடனும் காய்கறிகள் சேர்த்துக்கொள்ளவும். பசிக்கும்போது பச்சை வெள்ளரிக் காய், கேரட், முளைகட்டிய தானியங்கள், பழங்கள், சுண்டல் சாப்பிடவும். தினமும் ஒரு வாழைப் பழம் அல்லது ஒரு கப் பப்பாளி சாப்பிடுவது உங்கள் குடல் இயக்கத் தில் மிகப் பெரிய மாற்றத்தைக் காட்டும். தினமும் ஒரு கப் காய்கறி சாலட்டும், வாரத்துக்கு மூன்று நாள்களுக்கு கீரையும் அவசியம்.

அவள் பதில்கள்! 19- மனச்சிக்கலைத் தரும் மலச்சிக்கல்... தீர்வுகள் உண்டா?

உங்களுக்கு ஏதேனும் உணவு ஒவ்வாமை இருக்கிறதா என்று பாருங்கள். க்ளூட்டன் மற்றும் பால் உணவுகளை நான்கு வாரங் களுக்குத் தவிர்த்துவிட்டு ஏதேனும் மாற்றங்கள் தெரிகின்றனவா என்று பாருங்கள். மலச்சிக்கலில் இருந்து விடுபடுவது போல உணர்ந்தால் அந்த உணவுகளைக் குறைத்துக் கொள்ளவோ, தவிர்க்கவோ செய்ய லாம். உணவு ஒவ்வாமை மலச் சிக்கலுக்கு வழிவகுப்பதோடு, நுண்ணூட்டச் சத்துகள் உடலில் சேர்வதையும் தடுக்கும்.

காலையில் வெதுவெதுப்பான நீர் குடிப்பது சிலருக்கு மலச்சிக்கலில் இருந்து நிவாரணம் தரும். அந்த நீரிலேயே சிறிது நெல்லிக்காய் அல்லது எலுமிச்சைப்பழச் சாறும் சேர்த்துக் குடித்தால் வைட்டமின் சி சத்தும் உடலில் சேரும்.

சுய மருத்துவம் வேண்டாம். உடற்பயிற்சி செய்யுங்கள். ஆக்டிவ் வாக இருங்கள். ஸ்ட்ரெஸ் இல்லாமல் வாழப் பழகுங்கள்.

அவள் பதில்கள்! 19- மனச்சிக்கலைத் தரும் மலச்சிக்கல்... தீர்வுகள் உண்டா?

மசாஜ் சிகிச்சையின் அவசியம் என்ன? எல்லோருக்கும் அது அவசியமா? மசாஜ் செய்துகொள்வதால் என்ன நன்மைகள் கிடைக்கும்?

-அ.யாழினி பர்வதம், சென்னை-78

பதில் சொல்கிறார் திருப்பத்தூரைச் சேர்ந்த சித்த மருத்துவர் வி.விக்ரம்குமார்

சித்த மருத்துவத்தில் மசாஜ் சிகிச்சையை `தொக்கணம்’ என்று அழைக்கிறார்கள். புற மருத்துவத்தில் மிக முக்கியமான சிகிச்சை முறை இது. மருந்தில்லாத மருத்துவ முறையான மசாஜ், அந்தக் காலம் முதல் இன்றுவரை நடைமுறையில் இருக்கிறது. தென்தமிழகத்தில் இது முக்கியமான சிகிச்சையாகப் பின்பற்றப்படுகிறது.

எண்ணெய்க் குளியல் என்ற விஷயத்தை நாம் எப்படி வலியுறுத்துகிறோமோ, அதைப் போல மசாஜ் எனப்படும் தொக்கண சிகிச்சையும் குறிப்பிட்ட நாள் களுக்கொரு முறை மேற்கொள்ள வேண்டிய அவசியமான ஒன்று. செல்களுக்குப் புத்துணர்வளித்து நல்ல உறக்கத்தை அளிக்கக்கூடியது இது. தசைகளுக்கு வலிமை அளித்து, வாத நோய்களுக்கும் தீர்வாகும் என்கிறது சித்த மருத்துவம். குறிப்பாக பக்கவாதம் பாதித்தவர்களுக்கு தொக்கண சிகிச்சையின் மூலம் சீக்கிரம் தீர்வளிக்க முடியும்.

`வர்ம தொக்கணம்’ என ஒன்று உண்டு. அதாவது நம் உடல் முழுவதும் வர்ம புள்ளிகள் நிறைந்து இருக்கின்றன. அந்தப் புள்ளிகளைத் தூண்டுவதன் மூலமும் தொக்கணத்தின் முழுப் பலனையும் பெறலாம். எண்ணெய் தேய்த்துக் குளிக்கும்போது சரியான முறையில் மசாஜ் செய்வதன் மூலம் (ஆங்கிலத்தில் ‘ஸ்ட்ரோக்ஸ்’ என்று சொல்வார்கள்) வர்ம புள்ளிகள் தூண்டப்பட்டு உடல் புத்துணர்வு பெறும். தொக்கணம் அல்லது மசாஜின் சரியான முறை தெரியாமல் பலரும் அதை பிசினஸாக செய்கிறார்கள். அப்படித் தவறாகச் செய்யும்போது நிறைய பாதக விளைவுகள் ஏற்படுகின்றன. நிறைய சுற்றுலா தலங்களில் `ஹெட் மசாஜ்’ என்ற பெயரில் தவறாக மசாஜ் செய்கிறார்கள். அதனால் தொடர் தலைவலி ஏற்பட்டு சிகிச்சைக்கு வருபவர்களையும் பார்க்கிறோம். முறையாக தொக்கணம் பயின்ற மருத்துவ நிபுணர்களிடம் செய்துகொள்ளும்போது தசைகள் இறுகி, கழிவுகள் வெளியேறி, முகத்திலும் பொலிவு கூடும்.

சித்த மருத்துவத்தில் தொக்கண சிகிச்சையை தட்டல், இறுக்கல், பிடித்தல், கைக்கட்டல், மல்லாத்துதல், உருவுதல், அழுத்துதல் எனப் பல பிரிவுகளாகச் செய்வது வழக்கம். தேவைப்படுவோருக்கு இதை சிகிச்சையாகவும், மற்றவர்கள் புத்துணர்வுக்கான விஷயமாகவும் மேற் கொள்ளலாம். கேரளாவில் குழந்தைகளுக்குச் செய்யப் படுகிற ‘தொக்கணத் தடவல்’ மசாஜ் சிகிச்சை இன்றும் பிரபலம். இடுப்புப்பகுதிக்கு மட்டும், தலைக்கு மட்டும் என குறிப்பிட்ட பகுதிகளுக்கு மட்டும் மசாஜ் செய்து கொள்ளலாம். நிபுணர்களுக்கு அந்த நுணுக்கங்கள் தெரியும். மசாஜ் சிகிச்சைக்குச் செல்லும்போது உங்களுக்கு உடலில் ஏதேனும் பிரச்னைகள் இருந்தால் முன்கூட்டியே சொல்லிவிட வேண்டியதும் அவசியம்.

என் 9 வயது மகளுக்கு கையெழுத்து சரியாக இல்லை. பள்ளிக்கூடங்கள் நடந்துகொண்டிருந்தவரையில் கையெழுத்து பழக வாய்ப்பிருந்தது. நிறைய நோட்ஸ் எழுதுவாள். ஹோம்வொர்க் செய்வாள். இப்போது எழுத்துக்கான வாய்ப்பு குறைந்துவிட்டது. கோவிட் காலத்தில் கையெழுத்துப் பயிற்சிக்கான வகுப்பில் சேர்க்கவும் பயமாக இருக்கிறது. இனி எதிர்காலத்தில் கையெழுத்து என்பதே இல்லாமல் போய்விடுமா? என் மகளின் கையெழுத்தை மேம்படுத்த வழிகள் உண்டா?

- சி.ஆனந்தி, கோவை

அவள் பதில்கள்! 19- மனச்சிக்கலைத் தரும் மலச்சிக்கல்... தீர்வுகள் உண்டா?

பதில் சொல்கிறார் சென்னையைச் சேர்ந்த மழலையர் கல்வி ஆலோசகர் ஜெயப்ரியா தேவி

ஆன்லைன் வகுப்புகள் தொடங்கப்பட்டதிலிருந்து குழந்தைகளின் கையெழுத்து மிக மோசமாகப் போய்க்கொண்டிருப்பதாகப் பல பெற்றோர்களும் தொடர்ந்து புகார் சொல்லிக்கொண்டிருக்கிறார்கள். நேரடி வகுப்புகளில் பிள்ளைகளை எழுதச் சொல்லி, வீட்டுப் பாடங்களைப் பார்த்து, கையெழுத்தை சரிசெய்து கொண்டிருந்த ஆசிரியர்களுக்கு, ஆன்லைன் வகுப்பு களில் அதற்கு வாய்ப்பில்லாமல் இருக்கிறது. இந்த ஒன்றரை வருடத்தில் குழந்தைகளின் கையெழுத்துத் திறன் மோசமாகியிருக்கிறது என்பதும் உண்மைதான். இந்தச் சூழல் சரியாகும்வரை ஆசிரியர்களால் எதுவும் செய்ய முடியாது. பெற்றோர் சில விஷயங்களை முன்னெடுக்கலாம். எல்லாம் கம்ப்யூட்டர் மயமாகிக் கொண்டிருக்கும் நிலையில் கையெழுத்து முக்கியமா என்ற கேள்வியும் பலருக்கு இருக்கிறது. கையெழுத்துகூட ‘டிஜிட்டல் சிக்னேச்சராக’ மாறிக்கொண்டிருக்கிறது. கையெழுத்துக்கு எதிர்காலம் என ஒன்று இருக்குமா என்ற கேள்வியும் இருக்கிறது.

கையெழுத்து என்பது வெறும் தேவை மட்டுமல்ல, அது ஒரு கலை. எழுதப் பழகும்போது சென்சரி மோட்டார் திறன்கள் மேம்படுகின்றன. அதாவது உங்கள் உணர் திறன்களும் மோட்டார் திறன்களும் ஒருங்கிணைந்து ஒரு விஷயத்தைச் செய்யும்போது நினைவாற்றல், கவன ஈர்ப்பு போன்ற விஷயங்கள் மேம்படுவதாக ஆய்வுகளில் நிரூபிக்கப்பட்டுள்ளன. வீட்டில் ஆன்லைனில் படிக்கும் குழந்தைகளை வாய்ப்பு கிடைக்கும்போதெல்லாம் எழுத வையுங்கள். அவர்கள் அமர்ந்திருக்கும் நிலை, டேபிள், இருக்கை போன்றவை சரியாக உள்ளனவா என கவனியுங்கள். ரொம்பவும் தள்ளி இருந்து எழுதுவதும், கூன்போட்டபடி அமர்ந்து எழுதுவதும் கூடாது. பட்டாணி உரிப்பது, மாவு பிசைவது போன்ற வேலைகளில் குழந்தைகளையும் ஈடுபடுத்துங்கள். இத்தகைய வேலைகள் உங்கள் பிள்ளைகளின் விரல்களின் வலிமையைக் கூட்டும். அதன் விளைவாக அவர்களது கையெழுத்து மேம்படும்.

தினமும் இரண்டு மணி நேரம் பிள்ளைகளை எழுத வைக்கலாம். அதை பதினைந்து நிமிடங்களாகப் பிரித்து, இடைவெளி கொடுத்து எழுதச் சொல்லுங்கள். எழுதும்போது அவர்களைப் பாராட்டுங்கள். கையெழுத்து சரியில்லை என திட்டுவதோ, தண்டிப்பதோ கூடாது. எழுத்து என்பதை அவர்கள் ரசித்துச் செய்ய வேண்டும். அதற்கு பெற்றோரின் ஊக்கமும் பாராட்டும் மிகவும் அவசியம்.

உடல், மனநலம், உறவுகள், படிப்பு, வேலை என வழக்கமான ஏரியாக்கள் மட்டுமன்றி, யாரிடம் கேட்பது எனத் தயங்க வைக்கிற விஷயங்களுக்கும் தீர்வுகள் தரக் காத்திருக்கிறது அவள் விகடன். கேட்க நினைப்பதைத் தயங்காமல் கேளுங்கள்... அந்தந்தத் துறை நிபுணர்களிடமிருந்து பதில்கள் பெற்றுத் தரக் காத்திருக்கிறோம். உங்கள் கேள்விகளை

`அவள் பதில்கள்', அவள் விகடன், 757, அண்ணாசாலை, சென்னை - 600 002 என்ற முகவரிக்கோ,

avalvikatan@vikatan.com என்ற மின்னஞ்சலுக்கோ அனுப்பி வைக்கவும்.