Published:Updated:

நாணயம் பிட்ஸ்...

business bits
பிரீமியம் ஸ்டோரி
News
business bits

பிட்ஸ்...

நாணயம் பிட்ஸ்...

டிரைவர்களின் சொர்க்கமாகும் பெங்களூரு மற்றும் மும்பை..!

கார் ஓட்டத் தெரிந்த டிரைவர்களுக்கு வேலை கிடைக்கவில்லையா? பெங்களூருக்கும் மும்பைக்கும் சென்றால், உடனே வேலை கிடைத்துவிடும். இந்தியா விலேயே மிக அதிகமான கார் டிரைவர்கள் பெங்களூரிலும் மும்பையிலும் இருப்பதாகச் சொல்கிறது வேலை வாய்ப்பை அளிக்கும் ஓர் இணையதளம். இந்தியாவில் உள்ள மொத்த டிரைவர்களில் 15% பேர் பெங்களூரிலும் 10% பேர் மும்பையிலும் 7% பேர் டெல்லியிலும் இருக்கிறார்களாம். நம் நாட்டில் கடந்த ஐந்து ஆண்டு களில் டிரைவர்களுக்கான தேவை, இரண்டு மடங்காக உயர்ந்திருக்கிறது. ஆன்லைனில் உணவுச் சேவை தரும் நிறுவனங்களின் எண்ணிக்கை பெருகியிருப்பதாலும், ஸ்டார்ட்அப் நிறுவனங்களின் எண்ணிக்கை அதிகரித்திருப்பதாலும் டிரைவர்களுக்கான தேவை வெகுவாக அதிகரித்திருக்கிறதாம்!

#டிரைவர் ப்ரோஸ் இதைக் கவனிக்கலாமே!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
நாணயம் பிட்ஸ்...

மருத்துவக் கட்டணமும் இனி பே டிஎம் மூலம்!

செல்போனை வைத்து எல்லாவிதமான கட்டணங்களையும் கட்டிமுடிக்கிற மாதிரியான அமைப்பில் தன்னுடைய பிசினஸை விரிவாக்கி வருகிறார் பே டிஎம் நிறுவனத்தின் சி.இ.ஓ விஜய் சேகர் சர்மா. இந்தியா முழுக்க நீங்கள் எங்கிருந்தாலும் மருத்துவர் கட்டணத்தையும், மருத்துவக் கட்டணத்தையும் பே டிஎம் மூலமாகச் செலுத்தும் புதிய சேவையைத் தரத் தொடங்கியிருக்கிறார் விஜய். இதன்மூலம் லட்சக்கணக்கான மருத்துவர்களையும் அவர்களின் வாடிக்கை யாளர்களையும் தன்னுடைய நிறுவனத்துக்குள் கொண்டுவர முடிவு செய்திருக்கிறார். கடந்த மாதம்தான் கல்விக் கட்டணம் தொடர்பான சேவையைக் கொண்டுவந்தார் விஜய். இதுவரை 1.40 கோடி நிறுவனங்கள் பே டிஎம் தரும் சேவைகளைப் பயன்படுத்துகிறதாம். இந்த நிறுவனத்தின் இன்றைய மதிப்பு என்ன தெரியுமா? 15 பில்லியன் அமெரிக்க டாலர்!

விஜய்ஜி, ஐ.பி.ஓ எப்ப வர்றீங்க?

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

நாணயம் பிட்ஸ்...

மிக மகிழ்ச்சியான குழந்தைகளில் முதல் இடம் கேரளாவுக்கு..!

கவலைகள் இல்லாமல், மகிழ்ச்சியாக இருக்கும் குழந்தைகள் எந்த மாநிலத்தில் அதிகமாக இருக்கின்றனர் என்பதை சர்வே நடத்தி வெளியிட்டிருக்கிறது வேர்ல்டு விஷன் இந்தியா. ஐ.எஃப்.எம்.ஆர் உடன் இணைந்து நடத்திய இந்த சர்வேயில், இந்தியாவில் மகிழ்ச்சியான குழந்தைகள் கேரளாவிலும், அதிக அளவில் மகிழ்ச்சி இல்லாத குழந்தைகள் மத்தியப்பிரதேசத்திலும் இருப்பதாகத் தெரிய வந்திருக்கிறது. பத்தாம் வகுப்பில் தேர்ச்சிப் பெறுவது, ஆசிரியர் - மாணவர் விகிதம், மாணவர்கள் பள்ளி செல்லாமல் நிற்றல், குழந்தைத் தொழிலாளர்கள், இளவயதில் குற்றம் செய்வது எனப் பல விஷயங்களை ஆராய்ந்து, இந்த சர்வே முடிவை வெளியிட்டிருக்கிறது வேர்ல்டு விஷன் இந்தியா.

குழந்தைகளின் மகிழ்ச்சியே நிஜமான மகிழ்ச்சி!

நாணயம் பிட்ஸ்...

அரசு உணவுக்கிடங்கில் குவிந்துகிடக்கும் தானியங்கள்!

நம் அரசுக்குச் சொந்தமான ஃபுட் கார்ப்பரேஷன் ஆஃப் இந்தியாவின் உணவுக்கிடங்கில் உணவு தானியங்கள் குவிந்து கிடக்கின்றன. இந்த ஆண்டின் ஜனவரியில் ஃபுட் கார்ப்பரேஷன் ஆஃப் இந்தியாவில் 45.4 மில்லியன் டன் அளவுக்கு அரிசியும் கோதுமையும் இருந்தன. இது கடந்த மே மாதத்தில் 62.2 மில்லியன் டன் அளவுக்கு உயர்ந்து, இந்த ஆகஸ்டு மாதத்தில் 71.1 மில்லியன் டன்களாக உயர்ந்திருக்கிறது. குறைந்தபட்ச ஆதார விலையில் பெருமளவிலான உணவு தானியங்கள் வாங்கப்பட்டதே, உணவு தானியக் கையிருப்புக்கு முக்கியமான காரணமாம்!

விளைபொருள்களை வாங்கினால் அரசுக்குக் கஷ்டம், வாங்காவிட்டால் விவசாயிகளுக்குக் கஷ்டம்..!

நாணயம் பிட்ஸ்...

பரபரப்புடன் முடிந்த இண்டிகோ ஏஜிஎம்!

விமானத்துறை நிறுவனமான இண்டிகோ நிறுவனத்தின் பங்குதாரர்கள் ஆண்டுக்கூட்டம் (AGM) கடந்த வாரம் புதுடெல்லியில் பரபரப்புடன் நடந்து முடிந்திருக்கிறது. பொதுவாக, இந்த நிறுவனத்தின் ஆண்டுக்கூட்டத்துக்கு புரமோட்டர்களான ராகுல் பாட்டியாவும் ராகேஷ் கன்வாலும் வரமாட்டார்கள். நிறுவனத்தின் சி.இ.ஓ-வே இந்தக் கூட்டத்தை நடத்திமுடித்துவிடுவார். ஆனால், இந்த ஆண்டு வழக்கத்துக்கு மாறாக ராகுல் பாட்டியா மட்டும், பங்குதாரர்கள் கூட்டத்தில் கலந்துகொண்டார். புரமோட்டர்கள் இருவருக்கும் இடையில் மோதல் ஏற்பட்டிருப்பதால், ராகேஷ் கன்வால் இந்தக் கூட்டத்துக்கு வரவில்லை. ‘‘இந்தக் கூட்டத்துக்கு ராகேஷ் ஏன் வரவில்லை?’’ என்று முதலீட்டாளர்கள் கேட்க, ‘‘நான் வந்திருக்கிறேன். என்னிடம் கேட்க வேண்டிய கேள்விகளைக் கேளுங்கள்’’ என்று சாதுர்யமாகப் பேசி, முதலீட்டாளர்களைச் சமாளித்தார் ராகுல் பாட்டியா.

இண்டிகோ ஈகோ மோதல் எப்படி முடிவுக்கு வருமோ!

நாணயம் பிட்ஸ்...

அமேசானுடன் ஒப்பந்தம்... மகிழ்ச்சியில் கிஷோர் பியானி!

ஆன்லைன் வர்த்தகத்தில் உலகப் புகழ்பெற்ற அமேசான் நிறுவனம், ஃப்யூச்சர் குரூப் நிறுவனத்தில் முதலீடு செய்ததைத் தொடர்ந்து, குதூகலமாக இருக்கிறார் ஃப்யூச்சர் குரூப் நிறுவனத்தின் சி.இ.ஓ கிஷோர் பியானி. ஃப்யூச்சர் கூப்பன் நிறுவனத்தின் 49% பங்குகளை வாங்கி, ஏறக்குறைய ரூ.2,000 கோடி அளவுக்கு முதலீடு செய்திருக்கிறது அமேசான் நிறுவனம்.

‘‘எங்களுக்கு நிதி வேண்டும் என்பதற்காக நாங்கள் இந்த ஒப்பந்தத்தைச் செய்துகொள்ளவில்லை; இதன்மூலம் பேமென்ட் சிஸ்டத்தில் அமேசான் நிறுவனத்தை ஓர் அங்கத்தினராக ஆக்கியிருக்கிறோம்’’ என்று சொல்லியிருக்கிறார். ஃப்யூச்சர் குரூப் நிறுவனத்தில் 5.5 கோடி வாடிக்கையாளர்கள் ஏறக்குறைய 800 கோடி முறை பரிவர்த்தனைகளைச் செய்திருக்கிறார்களாம். இந்த நிறுவனம் கூடிய விரைவில் உணவு வழங்கும் தொழிலிலும் இறங்கப் போகிறதாம்!

பட்டையைக் கிளப்புங்க பியானிஜி!