தங்கம் விலை 2,000 டாலரைக் கடந்தது!
கடந்த சில மாதங்களாகத் தாறுமாறாக உயர்ந்துவந்த தங்கத்தின் விலை, இப்போது வரலாறு காணாத அளவுக்கு சர்வதேசச் சந்தையில் ஒரு அவுன்ஸ் 2,000 அமெரிக்க டாலருக்குமேல் உயர்ந்து வர்த்தகம் ஆகிறது. இதற்கு முன்னர் 2011-ம் ஆண்டு 1,900 டாலருக்கு மேல் விலை உயர்ந்து, பின் குறையத் தொடங்கி, 2016-ல் ஏறக்குறைய 1,000 டாலர் வரை இறங்கியது. 2017-ம் ஆண்டிலிருந்து மீண்டும் உயரத் தொடங்கிய தங்கத்தின் விலை, கடந்த ஓராண்டுக் காலத்தில் 530 டாலர் விலை ஏற்றம் கண்டிருக்கிறது.
சர்வதேசச் சந்தையில் தங்கத்தின் விலை உயர்ந்த அளவுக்கு வெள்ளி விலை உயரவில்லை. கடந்த ஓராண்டுக் காலத்தில் வெள்ளி ஒன்பது டாலர் மட்டுமே உயர்ந்து, தற்போது ஒரு அவுன்ஸ் வெள்ளி விலை 27.62 டாலராக வர்த்தகம் ஆகிறது.
சர்வதேசச் சந்தையை விடுங்க... நம்ம நாட்டுல ரெண்டுமே விலை ஏறிக் கிடக்கே!
ஆதித்ய பூரி போனார், சசிதர் வந்தார்!
தனியார்துறை வங்கிகளில் முன்னணி வங்கியாக இருக்கும் ஹெச்.டி.எஃப்.சி வங்கியின் புதிய தலைவராக நியமிக்கப்பட்டிருக்கிறார் சசிதர் ஜெகதீசன். 55 வயதான சசிதர், கடந்த 1996-ம் ஆண்டு இந்த வங்கியில் பணிக்குச் சேர்ந்தார். இந்த வங்கியில் தலைமைப் பதவிக்கு இவர் வருவதற்கு மிகுந்த வாய்ப்பிருப்பதாக ஓராண்டுக்காலமாகவே பேச்சு இருந்துவந்த நிலையில், இப்போது அவரே தலைமைப் பதவிக்கு வந்திருக்கிறார்.
ஹெச்.டி.எஃப்.சி வங்கி கடந்த பல ஆண்டுகளாக மிகத் திறமையாக நடத்திவந்தார் ஆதித்ய பூரி. இவரைப்போல இப்போது தலைமைக்கு வந்திருக்கும் சசிதரும் இந்த வங்கியைத் தொடர்ந்து நடத்த வேண்டும் என்பது எல்லோரின் எதிர்பார்ப்பு!
கங்ராஜுலேஷன் சசிதர்!
ஐந்தாவது பெரும் பணக்காரர் முகேஷ்!
உலக அளவில் ஆறாவது பெரும் பணக்காரராக உயர்ந்த ரிலையன்ஸ் நிறுவனத்தின் தலைவர் முகேஷ் அம்பானி, குறுகியகாலத்தில் ஐந்தாம் இடத்துக்கு முன்னேறியிருக்கிறார். அவருடைய சொத்து மதிப்பு 77.3 பில்லியன் டாலராக உயர்ந்திருக்கிறது. `இதன் மூலம் எலான் மாஸ்க், ஸ்டீவ் பால்மர், லாறி பேஜ் ஆகியோரை முந்திவிட்டார் முகேஷ் அம்பானி’ என ஃபோர்ப்ஸ் நிறுவனம் தகவல் வெளியிட்டிருக்கிறது!
கலக்குங்க முகேஷ்!
டாக்ஸ் ஃபைலிங்... குஜராத் முதலிடம்!
பான் கார்டு வைத்திருப்பவர்களில் வருமான வரிக் கணக்கைத் தாக்கல் செய்பவர்களில் முதலிடத்தில் இருக்கிறது குஜராத் மாநிலம். 2018-19-ம் ஆண்டில் வருமான வரிக் கணக்கைத் தாக்கல் செய்தவர்கள் பற்றிய புள்ளிவிவரம் இப்போது வெளியாகியுள்ளது. இதன்படி, குஜராத்தில் பான் கார்டு வைத்திருப்பவர்களில் 22.3% பேர் வருமான வரிக் கணக்கைத் தாக்கல் செய்திருக்கிறார்கள். டெல்லி மாநிலத்திலிருந்து 20.5% பேரும், பஞ்சாப் மாநிலத்திலிருந்து 16.74% பேரும் வருமான வரிக் கணக்கைத் தாக்கல் செய்திருக்கின்றனர்.
இந்தப் பட்டியலில் தமிழ்நாடு இடம் பெறுவது எப்போது?
விலை குறையும் கொரோனா மாத்திரைகள்!
கொரோனா வைரஸால் லேசானது முதல் மிதமானது வரை பாதிப்படைந்தவர்கள் உட்கொள்வதற்கென `ஃபெவிபிரவீர்’ என்ற மாத்திரையை க்ளென்மார்க் நிறுவனம் சில வாரங்களுக்கு முன்பு வெளியிட்டது. இந்த மாத்திரையின் விலை ஒன்று ரூ.75 என அப்போது விற்கப்பட்டது. இந்த மாத்திரையை இப்போது வேறு சில மருந்து நிறுவனங்களும் வெளியிடத் தொடங்கியிருக்கின்றன. லூபின் நிறுவனம் இந்த மாத்திரை ஒன்றை ரூ.49-க்கு இப்போது விற்பனை செய்யத் தொடங்கியிருக்கிறது. ஆனால், சன் பார்மா நிறுவனம் ஒரு மாத்திரை விலை ரு.35 என்று சொல்லியிருக்கிறது.
மாத்திரை விலை குறைவது நல்ல செய்திதானே!
ஐ.பி.எல் விளம்பரம்: விவோவுக்கு பதில் யார்?
கூடிய விரைவில் நடக்கவிருக்கும் ஐ.பி.எல் கிரிக்கெட் போட்டியில் விளம்பரதாரர்களுக்கான போட்டி இப்போது சூடுபிடித்திருக்கிறது. இந்தப் போட்டியில் மிகப்பெரிய விளம்பரதாரராக சீனாவின் செல்போன் நிறுவனமான விவோ இருந்தது. ஐ.பி.எல் போட்டியில் ஆண்டுதோறும் ரூ.440 கோடி விளம்பரத்துக்கென தருவது என ஐந்து ஆண்டுகளுக்கு ஒப்பந்தம் செய்துகொண்டிருந்தது. ஆனால், இந்திய எல்லையில் சீனா அத்துமீறி நுழைந்ததால், சீன நிறுவனங்களுக்கு நம் நாட்டில் நிபந்தனை விதிக்கப்பட்டுவருகிறது. இதனால் விவோ நிறுவனம் ஐ.பி.எல் கிரிக்கெட் போட்டியிலிருந்து விலக, இப்போது வேறு விளம்பரதாரர்களைத் தேடிவருகிறது அகில இந்திய கிரிக்கெட் வாரியம். அமுல், அமேஸான், ஜியோ நிறுவனங்களுடன் கிரிக்கெட் வாரியம் பேசிவருகிறது.
ஐ.பி.எல் வரட்டும்; கொரோனா கவலை குறையட்டும்!