Published:Updated:

கேளுங்கள், பதில் கிடைக்கும்! : கல்விச் செலவுக்கு சில்ட்ரன் ஃபண்டுகள் நிச்சயம் உதவுமா?

கல்வி
பிரீமியம் ஸ்டோரி
News
கல்வி

இலக்கை நெருங்கும் நேரத்தில், ரிஸ்க் இல்லாத பாதுகாப்பான திட்டங்களுக்கு முதலீட்டை மாற்றவும்!

பிள்ளைகளின் உயர்கல்விக்கு எப்படி நிதித் திட்டமிட வேண்டும் என்பது குறித்த நாணயம் விகடன் வாசகர்களின் பல்வேறு சந்தேகங்களுக்கு நிதி ஆலோசகர் ஸ்ரீதேவி (www.financial planners.co.in) பதில் அளித்துள்ளார்.

கல்விக் கடன் வரிச் சலுகையுடன் கிடைக்கும்போது எதற்காக உயர்கல்வி செலவுக்காக முதலீடு செய்ய வேண்டும்?

- சி.கார்த்திகேயன், சாத்தூர்

“பொதுவாக, இந்தியாவில், குழந்தைகளின் கல்விக்கு செலவழிக்க பெற்றோர் விரும்புகிறார்கள். கல்விக் கடனைத் தேர்ந்தெடுப்பதில் தவறில்லை. உங்கள் மற்ற கடமைகளுடன் உயர்கல்விக்கான தொகுப்பு நிதியை உருவாக்க முதலீடு செய்ய முடியாவிட்டால் மட்டுமே கல்விக் கடன் வாங்குவது நல்லது. இல்லையென்றால், பிள்ளைகளை நாமே கடன்தாரர்களாக மாற்றிவிடுவோம். திருப்பிச் செலுத்தும் வட்டிக்கு வரிச் சலுகை இருக்கிறது. அதே நேரத்தில், கல்விக் கடனுக்கான வட்டி விகிதம், திருப்பிச் செலுத்தும் விதிமுறைகள் ஆகியவற்றையும் நீங்கள் கவனிக்க வேண்டும். எந்தவொரு நோக்கத்தையும் கடன் மூலம் அடைவதை விட முதலீட்டின் மூலம் அடைவது எப்போதும் சிறந்தது.”

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
கேளுங்கள், பதில் கிடைக்கும்! : கல்விச் செலவுக்கு சில்ட்ரன் ஃபண்டுகள் நிச்சயம் உதவுமா?

உயர்கல்விக்கான பணவீக்கம் சதவிகிதம் எவ்வளவு, எதிர்காலத்தில் தேவைப்படும் தொகையைக் கணக்கிடுவது எப்படி?

- அ.தங்கையா, சங்கரன்கோவில்

“நீங்கள் கல்விச் செலவுக்கான இலக்குத் தொகைக்குத் திட்டமிடும்போது பணவீக்கத்தைக் கருத்தில் கொள்வது எப்போதும் நல்லது. கல்விச் செலவுகளின் பணவீக்கம் என்று பார்த்தால், அது ஆண்டுக்கு 8% முதல் 10% வரை மாறுபடும். பெரும்பாலான கல்லூரிகள் ஒவ்வோர் ஆண்டும் சிறிய அளவில் கட்டணத்தை அதிகரிக்கின்றன. 3 - 4 ஆண்டுகளுக்கு ஒருமுறை மிக அதிகமாகக் கட்டணத்தைக் கூட்டுகின்றன. எனவே, முதலீட்டுக் காலம் 10 ஆண்டுகளுக்கு மேல் என்றால், கல்விச் செலவுக்கான பண வீக்கம் 8 - 10 சதவிகிதமாக எடுத்துக்கொள்ளலாம். இது பாடத்திட்டம் மற்றும் கல்லூரிகளைப் பொறுத்து மாறும்.”

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

என் வயது 30. என் மகனின் வயது 3. அவனை சென்னையில் பொறியியல் படிக்க வைக்க விரும்புகிறேன். அதற்கு நான் எவ்வளவு, எந்தத் திட்டங்களில் முதலீடு செய்ய வேண்டும்?

- தினேஷ், பாளையங் கோட்டை, திருநெல்வேலி

“உங்கள் மகனின் வயது இப்போது 3 என்பதால், இப்போது அவன் என்ன படிக்கப்போகிறான் என்று முடிவு செய்யாமல் இருப்பது நல்லது. அதற்குப் பதிலாக, நீங்கள் ஒரு தொகுப்பு நிதியைக் கருத்தில் கொள்ளலாம். இதன் மூலம் நீங்கள் பொறியியல் உள்ளிட்ட பெரும்பாலான படிப்புகளில் உங்கள் மகனைப் படிக்க வைக்க முடியும். நீங்கள் தமிழ்நாட்டில் பொறியியல் கல்லூரிகளைத் தேர்வு செய்யத் திட்டமிட்டால், தற்போதுள்ள கட்டணங்களைக் கணக்கிட்டு, ஆண்டுக்கு 10% செலவை உயர்த்தவும்; அந்த இலக்குத் தொகையை அடைய முதலீடு செய்யத் திட்டமிடுங்கள். தற்போதைய கல்விச் செலவு, பொறியியல் படிப்பு முடிக்க, கல்லூரிகள் மற்றும் படிப்புகளைப் பொறுத்து ரூ.5 லட்சம் முதல் ரூ.30 லட்சம் வரை செலவாகிறது. எனவே, எவ்வளவு தொகை வேண்டும் என்பதை முடிவு செய்துவிட்டு முதலீட்டை ஆரம்பியுங்கள்.

நீங்கள் இப்போது ஆரம்பத்தில் சிறிய தொகையுடன் மாத முதலீட்டை ஆரம்பிக்கலாம். ஆண்டுக்கு அல்லது இத்தனை ஆண்டுகளுக்குப் பிறகு இவ்வளவு சதவிகித அதிகரிப்பு என்ற திட்டத்துடன் முதலீட்டைத் தொடரலாம். அந்த வகையில் நீண்டகாலத்தில் கணிசமான தொகுப்பு நிதியை உருவாக்கலாம். ஒரு சீரான சொத்து ஒதுக்கீட்டின் (Balanced Asset Allocation) மூலம் நீண்டகால இலக்குக்காக முதலீடு செய்வதில் கவனம் செலுத்தவும். இலக்கை நெருங்கும் நேரத்தில், ரிஸ்க் இல்லாத பாதுகாப்பான திட்டங்களுக்கு முதலீட்டை மாற்றவும். குறிக்கோள்களுடன் இணைந்த முதலீடுகளை அவ்வப்போது மதிப்பாய்வு செய்வது திட்டமிடப்பட்ட இலக்கை சரியாக அடைய சரியான வழியாகும்.”

கேளுங்கள், பதில் கிடைக்கும்! : கல்விச் செலவுக்கு சில்ட்ரன் ஃபண்டுகள் நிச்சயம் உதவுமா?

என் இரு பிள்ளைகளின் படிப்புக்காக மூன்று மாதங்களுக்கு ஒருமுறை ரூ.20,000 இன்ஷூரன்ஸ் பிரீமியம் கட்டி வருகிறேன். இது சரியான முறையல்ல என்கிறான் நண்பன். அவன் சொல்வது சரியா?

- அ.வெங்கடேஷ், தர்மபுரி

“காப்பீட்டையும் முதலீட்டையும் தனித் தனியாகப் பார்க்க வேண்டும். முதலீடு என்பது நீங்கள் உயிருடன் இருக்கும் போது குறிக்கோளை அடைய உதவும் பணமாகும். நீங்கள் இல்லாவிட்டாலும் இலக்கைப் பாதுகாப்பது காப்பீடு. ஒரே திட்டத்தில் இரண்டு நன்மைகளையும் நீங்கள் முழுமையாக எதிர்பார்க்க முடியாது. உங்களுக்கு ஏதாவது அசம்பாவிதம் ஏற்படும் போது குடும்பத்தைப் பாதுகாக்க காப்பீடு மட்டுமே அளிக்கும் குறைந்த பிரீமியம் கட்டக் கூடிய டேர்ம் இன்ஷூரன்ஸ் பாலிசியைத் தேர்வு செய்துவிட்டு, மீதமுள்ள தொகையை உங்களின் ரிஸ்க் எடுக்கும் திறன் அடிப்படையில் உங்கள் அனைத்து இலக்குகளுக்கும் தேவையான நிதியைப் பெற முதலீடு செய்ய வேண்டும். கல்விச் செலவை ஈடுகட்ட எந்தவொரு காப்பீட்டுத் திட்டத்தையும் நாங்கள் பரிந்துரை செய்வதில்லை. ஏனெனில், எண்டோவ்மென்ட் பாலிசி மூலம் கிடைக்கும் வருமானம், பணவீக்கத்துடன் கணக்கிட்டால் போதாது.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பிள்ளைகளின் எதிர்கால உயர்கல்விச் செலவுக்காக முதலீடு செய்ய ஆர்.டி., எஃப்.டி., மியூச்சுவல் ஃபண்டில் கடன் ஃபண்ட், ஈக்விட்டி ஃபண்ட் இவற்றில் எது சிறந்தது, ஏன் சிறந்தது எனச் சொல்ல முடியுமா?

- ஆர்.ராகேஷ், பெங்களூரு

‘‘இந்த அனைத்து முதலீட்டுத் திட்டங்களின் கலவையும் மிகவும் பொருத்தமானது. முதலீட்டுக் காலம், உங்களின் அடிப்படை வருமான வரி வரம்பைப் பொறுத்து, நீங்கள் முதலீட்டுக் கலவையைத் தேர்வு செய்யலாம். ஒவ்வொரு திட்டத்துக்கும் எனப் பிரத்யேக முதலீட்டுப் பிரிவினர் இருக்கிறார்கள். உங்கள் ரிஸ்க் எடுக்கும் திறனை மதிப்பீடு செய்து அதன் அடிப்படையில் முதலீடு செய்ய வேண்டும். நீங்கள் ஒரு தீவிர முதலீட்டாளராக (Aggressive Investor) இருந்தாலும், உங்கள் இலக்கை நெருங்கும்போது, அதுவரைக்கும் சேர்ந்திருக்கும் தொகையைப் பாதுகாப்பான முதலீடுகளுக்கு மாற்றிக்கொள்ள வேண்டும். கல்வி இலக்குக்கு கால எல்லை இருக்கிறது; நீங்கள் தயாராக இருக்கிறீர்களா, இல்லையா, சந்தை உங்களுக்கு வருமானத்தை அளித்திருந்தாலும் இல்லாவிட்டாலும், உங்கள் காப்பீட்டு பாலிசி முதிர்ச்சியடைந்தாலும் இல்லாவிட்டாலும், உங்கள் தேவைக்கான பணத்தைச் சரியான நேரத்தில் செலுத்த வேண்டும்.

எனவே, எந்தவொரு முதலீட்டையும் எப்போது வேண்டுமானாலும் பணத்தைத் திரும்ப எடுக்கிற மாதிரியான நெகிழ்வுத்தன்மையுடன் தேர்வு செய்ய வேண்டும். மேலும், ஒவ்வோர் ஆண்டும் இலக்கு செலவை மதிப்பாய்வு செய்வதோடு, உங்கள் பிள்ளைகள் என்ன படிக்க விரும்புகிறார்கள் என்பதையும் மதிப்பிடுங்கள்.

ஆக செலவுக்கேற்ப உங்கள் முதலீடுகளைத் திட்டமிடுங்கள். பணவீக்க விகிதத்தைக் கணக்கில் எடுத்துக்கொண்டு, தொகுப்புத் தொகையைக் கணக்கிடுவது மிக முக்கியம். எதிர்பார்க்கப்படும் தொகைக்கு அதிக ரிஸ்க் உள்ள திட்டங்களை உங்களால் தேர்வு செய்ய முடியாவிட்டால், அதே தொகுப்பு நிதியை உருவாக்க நீங்கள் அதிக தொகையை முதலீடு செய்ய வேண்டும்.

அதிக ரிஸ்க் உள்ள திட்டங்கள், எல்லா நேரத்திலும் அதிக வருவாயைத் தரும் என்ற உத்தரவாதம் கிடையாது என்பதை நினைவில் கொள்ளுங்கள்.’’

கேளுங்கள், பதில் கிடைக்கும்! : கல்விச் செலவுக்கு சில்ட்ரன் ஃபண்டுகள் நிச்சயம் உதவுமா?

பிள்ளைகளின் கல்விச் செலவுக்கு மியூச்சுவல் ஃபண்டுகளில் உள்ள சில்ட்ரன் ஃபண்டுகள் நிச்சயம் உதவுமா? அல்லது ஈக்விட்டி டைவர்சிஃபைடு ஃபண்ட் அல்லது மல்ட்டிகேப் ஃபண்டுகளில் முதலீடு செய்வதன் மூலம் அதிக தொகை கிடைக்குமா?

- டி.கணேஷ்குமார், திருச்சி

“மியூச்சுவல் ஃபண்ட் பிரிவில் உள்ள சில்ட்ரன் ஃபண்டுகள் பெரும்பாலும் ஈக்விட்டி சார்ந்த மியூச்சுவல் ஃபண்டுகளாகும். அவை, உங்கள் ரிஸ்க் எடுக்கும் திறனுக்கு ஏற்றவையா என்பதை நீங்கள் மதிப்பீடு செய்ய வேண்டும். வெளியேறும் கட்டணம் மற்றும் சொத்து ஒதுக்கீடு ஆகியவற்றின் அடிப்படையில் நீங்கள் நெகிழ்வுத்தன்மையைக் கொண்டிருக்க விரும்பினால், உங்கள் கல்வி இலக்குக்கான தொகுப்பு நிதியைச் சேர்க்க டைவர்சிஃபைடு அல்லது லார்ஜ்கேப் ஃபண்டுகளை நீங்கள் தேர்வு செய்யலாம்.”