இந்தியாவும் தடுப்பு மருந்தும்..!

மருந்து உற்பத்தியில் இந்தியா உலக நாடுகளில் மூன்றாவது இடத்தில் உள்ளது. 220 நாடுகளுக்கு மருந்து, மாத்திரைகளையும், 188 நாடுகளுக்கு தடுப்பூசிகளையும் தயாரித்து ஏற்றுமதி செய்துவருகிறது. ஹெச்.ஐ.வி எய்ட்ஸ், புற்றுநோய், ஹெபடைடிஸ் பி.சி, காசநோய், மலேரியா உள்ளிட்ட பல்வேறு உயிர்க்கொல்லி நோய்களுக்கான மருந்துகளையும் அதிக அளவில் உற்பத்தி செய்துவருகிறது. எய்ட்ஸ் நோயால் அதிகம் பாதிக்கப்பட்ட ஆப்பிரிக்க நாடுகளுக்கு வழங்கப்படும் மருந்துகளில் 90% இந்தியாவில் தயாரிக்கப்பட்டவை. உலக அளவில் மூன்று நபரில் ஒருவர் எடுத்துக்கொள்ளும் மாத்திரை இந்தியாவில் தயாரிக்கப்பட்டது என்கிறது புள்ளிவிவரம். உலக மக்களைத் தாக்கும் 98% நோய்களுக்கான மருந்துகள் இந்தியாவில் உற்பத்தி செய்யப்படுகின்றன.

தடுப்பு மருந்துகளைப் பொறுத்தவரை, உலக நாடுகளுக்கான தேவையில் 50 சதவிகிதத்தை இந்திய மருந்து உற்பத்தி நிறுவனங்கள் பூர்த்தி செய்கின்றன. 2019-2020-ம் நிதியாண்டில் இந்தியாவின் ஒட்டுமொத்த மருந்து ஏற்றுமதியின் மதிப்பு 19.14 பில்லியன் அமெரிக்க டாலராகும். தடுப்பு மருந்து ஏற்றுமதியின் மதிப்பு 835.27 மில்லியன் அமெரிக்க டாலராகும்.

உலகப் பொருளாதாரத்தை மீட்டெடுக்குமா இந்தியா?

கோவிட்-19 தடுப்பு மருந்து உற்பத்தியில் இந்தியாவின் நிலை என்னவாக இருக்கும், பொருளாதாரம் இதனால் மீட்கப் படுமா என்ற கேள்வியுடன் கேப்லின் பாயின்ட் லேபாரட்டரீஸ் நிறுவனத்தின் தலைவர் பார்த்திபனிடம் பேசினோம்.

“கோவிட்-19 தடுப்பு மருந்தைப் பொறுத்தவரை, புதிய தடுப்பு மருந்தைக் கண்டுபிடிப்பது, உற்பத்தி செய்வது என இரண்டு முக்கிய நிலைகள் உள்ளன. உற்பத்தியில் இந்தியா உலக நாடுகளின் வரிசையில் முன்னணியில் இருக்கிறது. குறிப்பாக, புனேயைச் சேர்ந்த சீரம் இன்ஸ்டிட்யூட் ஆஃப் இந்தியா நிறுவனம் இதில் முக்கியப் பங்கு வகிக்கிறது. உலக அளவில் ஐந்தில் ஒருவர் சீரம் நிறுவனத்தின் தடுப்பு மருந்தைப் பயன்படுத்துகின்றனர் என்கிறது புள்ளிவிவரம். ஏற்றுமதியிலும் ஆசியாவிலேயே முதலிடத்தில் உள்ளது இந்த நிறுவனம். இன்னும் ஒரு சில நிறுவனங்களும் தடுப்பு மருந்துகளைத் தயாரித்து வருகின்றன.

பிற தடுப்பு மருந்துகளைப் போன்று கோவிட்-19 நோய்க்கான தடுப்பு மருந்துகளையும் இந்தியா உற்பத்தி செய்து ஏற்றுமதி செய்ய ஆரம்பித்துவிட்டால், அதைப் போட்டுக் கொள்ளும் மக்கள் நோய்ப் பரவல் அச்சமின்றி வெளியே வரத் தொடங்குவார்கள். பொது முடக்கமே தேவை இருக்காது. வழக்கம்போல் எல்லோரும் செயல்படத் தொடங்கி, வேலைவாய்ப்புகள் அதிகரித்து, பொருளாதாரம் முன்னேற்றமடையும். பொதுமக்களின் செலவழிக்கும் திறனும் அதிகரிக்கும். அதனால் தான் இந்தியாவின் தடுப்பு மருந்து உற்பத்தி உலகப் பொருளாதாரத்துடன் தொடர்புபடுத்தி பேசப்படுகிறது.

ஆனால், என் கணிப்பின்படி, இன்னும் இரண்டு ஆண்டுகளுக்கு பொருளாதாரம் பெரிய அளவில் வளர்ச்சியடையப் போவதில்லை. காரணம், கோவிட்-19 பெருந்தொற்றுடன், இந்தியா - சீனா எல்லை விவகாரம், சீன - அமெரிக்க உரசல்கள் போன்ற பிரச்னைகள் அதிகரித்து வருகின்றன. இதுபோன்ற பிரச்னைகளால் பணத்தின் மதிப்பு வீழ்ச்சிடையுமோ என்ற பதற்றம் இருக்கிறது. சில நாடுகள் தங்களின் உற்பத்திப் பொருள்களின் ஏற்றுமதியை நிறுத்தி வைத்திருக்கிறது. இவையெல்லாம் பொருளாதாரம் மீண்டெழுவதைப் பாதிக்கும் பிரச்னைகள். இவற்றுக்குத் தீர்வு கிடைக்க வேண்டும்’’ என்றார் அவர்.

தடுப்பு மருந்து மட்டும் போதாது...

உலகின் முன்னணி பொருளாதார ஆராய்ச்சி நிறுவனமான கேப்பிட்டல் எக்னாமிக்ஸின் பொருளாதார வல்லுநர்களின் கூட்டமைப்பான நீல் ஷியரிங் (Neil Shearing) வெளியிட்டுள்ள ஆராய்ச்சி அறிக்கையின்படி, கோவிட்-19 தடுப்பு மருந்து கண்டறியப்பட்டாலும் அதிலேயே பல்வேறு சவால்கள் உள்ளன. இன்னும் சில மாதங்களில் ஒன்றுக்கும் மேற்பட்ட கோவிட்-19 தடுப்பு மருந்துகள் கண்டறியப்பட்டால், இந்த ஆண்டு இறுதிக்குள் 100 கோடி மருந்துகள் தயாரித்து விநியோகிக்க முடியும். 2021-ம் ஆண்டில் 700 கோடி மருந்துகள் விநியோகிக்க முடியும். அதுவே ஒரு தடுப்பு மருந்து மட்டும் கண்டறியப்பட்டால், இத்தனை எண்ணிக்கையில் உற்பத்தி செய்ய முடியாது. தடுப்பு மருந்தோடு அதைச் செலுத்துவதற்கான பிரத்யேக ஊசி, சிரிஞ்சுகள் தேவைப்படும். அமெரிக்கா போன்ற வல்லரசு நாடுகளிடம்கூட பற்றாக்குறையாகத்தான் உள்ளது. மேலும், தடுப்பு மருந்தை அடைக்கும் கண்ணாடிக் குப்பிக்கு (Glass Vial) உலக அளவில் பற்றாக்குறை நிலவுகிறது. இது தவிர, தடுப்பு மருந்துகளைப் போட்டுக்கொள்ள மாட்டோம் என இந்தியா உட்பட பல்வேறு நாடுகளில் குறிப்பிட்ட சதவிகிதம் மக்கள் இருப்பதையும் நாம் கவனிக்க வேண்டும். இவையெல்லாம் பொருளாதார முன்னேற்றத்தின் தடைக்கற்களாகும்’’ என அந்த நிறுவனம் தெரிவித்துள்ளது. பொருளாதாரம் மீண்டெழ தடுப்பு மருந்து முக்கியம் என்றாலும், அதுமட்டுமே பொருளாதாரப் பிரச்னைக்குத் தீர்வாகிவிடாது என்று சிலர் சொல்கிறார்கள்.

தடுப்பு மருந்துக்கும் முக்கிய பங்கு உண்டு

ஸிஃபோ ஆர்&டி சொல்யூஷன்ஸ் நிறுவனத்தின் தலைமை செயல் இயக்குநர் ஜி.ராஜ் பிரகாஷிடம் இது குறித்துப் பேசினோம்.

“கோவிட்-19 தடுப்பு மருந்து பொருளாதாரம் மீண்டெழுவதில் மிகப்பெரிய பங்கு வகிக்கும் என்பதில் மாற்றுக்கருத்து இல்லை. இந்தியா உள்நாட்டுத் தேவைகளுக்கு மட்டுமல்லாமல், வெளிநாடுகளுக்கு தடுப்பு மருந்து உற்பத்தி செய்து ஏற்றுமதி செய்கிறது. கோவிட்-19 தடுப்பு மருந்து உற்பத்தியுடன், கண்டுபிடிப்பிலும் இந்தியா கவனம் செலுத்தி வருகிறது.

ஆக்ஸ்ஃபோர்டு பல்கலைக்கழகத்தின் அஸ்ட்ராஸெனிகா, பாரத் பயோ டெக் நிறுவனத்தின் கோவேக்ஸின் கண்டுபிடிப்பு, ரஷ்யாவின் ஸ்புட்னிக் வி தடுப்பு மருந்துக்கு அனுமதி அளிக்கப்பட்டால் அதன் உற்பத்தியிலும் இந்தியா ஈடுபடும் என்று எதிர்பார்க்கப்படுகிறது. சீரம் நிறுவனம் ஏற்கெனவே தடுப்பு மருந்தை உற்பத்தி செய்து இருப்பு வைத்துள்ளது நல்ல விஷயம். இந்தியா, சீனா மக்கள் தொகைக்கு தடுப்பு மருந்து கிடைத்துவிட்டாலே உலக மக்கள் தொகையில் 30% பேருக்கு தடுப்பு மருந்து கிடைத்துவிட்டது எனலாம்.

கோவிட்-19 தடுப்பூசி கண்டுபிடிக்கப்பட்டு பெருந்தொற்றிலிருந்து உலகம் படிப்படியாக மீளும்போது அந்தந்த நாட்டின் பொருளாதார, நிர்வாகக் கட்டமைப்புகளில் நிலையற்றத் தன்மை குறைந்து, அந்தந்த நாட்டு அரசின் கொள்கை முடிவுகள், செயலாக்கங்கள் போன்ற விஷயங்கள் வேகமாகவும், தீவிரமாகவும் ஏற்படத் தொடங்கும். அரசின் செயல்பாடுகளில் நிலையானதன்மை ஏற்பட்டுவிட்டாலே பொருளாதாரமும் மேம்படத் தொடங்கிவிடும். தடுப்பு மருந்து என்பது நிலையான தன்மையையும், திட்டமிடுவதற்கான நேரத்தையும் அளிக்கும்.

தடுப்பு மருந்து உற்பத்தியின் நிலை, விநியோகிப்பது, எத்தனை பேரை குறிப்பிட்ட நாள்களில் சென்றடைவது என்பது போன்ற தெளிவு கிடைத்துவிட்டால் பல்வேறு நாட்டு அரசாங்கங்கள், தொழில்துறை அமைப்புகள், தனிநபர் செயல்பாடுகள் அனைத்தும் இயல்புக்குத் திரும்பி பொருளாதாரம் மேம்படும். எனவே, கோவிட்-19 தடுப்பு மருந்து உலகப் பொருளாதாரத்தின் முக்கிய அம்சமாகப் பார்க்கப்படுகிறது” என்றார்.

கோவிட் தடுப்பூசி சீக்கிரமே வர வேண்டும் என்பதே நம் பிரார்த்தனை!