Published:Updated:

வக்கீலின் காலை உடைத்து, வாயில் செருப்பைத் திணித்த போலீஸார்!

8 போலீஸார் மீது சி.பி.சி.ஐ.டி வழக்கு

பிரீமியம் ஸ்டோரி

சாத்தான்குளம் சம்பவத்துக்குப் பிறகு, போலீஸாரின் அராஜகத்துக்குக் கடிவாளம் கட்டப்பட்டுவருகிறது. திருநெல்வேலி மாவட்டத்தில் மூன்று வருடங்களுக்கு முன்னர் போலீஸாரால் கடுமையாகத் தாக்கப்பட்டார் வழக்கறிஞர் ஒருவர். ‘நீதி வேண்டும்’ என்று விடாமல் சட்டப் போராட்டம் நடத்திய அந்த வழக்கறிஞருக்கு இப்போது நீதியின் கதவுகள் திறக்கப்பட்டிருக்கின்றன. தாக்குதலில் தொடர்புடைய டி.எஸ்.பி., இன்ஸ்பெக்டர் உள்ளிட்ட எட்டுப் பேர்மீது சட்ட விரோதமாக அடைத்துவைத்தல், கொலை முயற்சி உள்ளிட்ட 11 பிரிவுகளில் வழக்கு பதிந்திருக்கிறது சி.பி.சி.ஐ.டி.

நெல்லை மாவட்டம், பழவூர் அருகேயுள்ள மாறன்குளம் கிராமத்தைச் சேர்ந்தவர் வழக்கறிஞர் ராஜரத்தினம் என்ற செம்மணி. அவர்மீது காவல்துறையினர் நடத்திய கொடூரத் தாக்குதல் குறித்து 12.11.2017 தேதியிட்ட ஜூ.வி இதழில் ‘‘நெல்லை போலீஸ் அடின்னா எப்படி இருக்கும்னு காட்டணும்!’’ என்ற தலைப்பில் அட்டைப்படக் கட்டுரை வெளியிட்டிருந்தோம். இந்தநிலையில் தற்போதைய சட்ட நடவடிக்கை குறித்து வழக்கறிஞர் செம்மணியிடம் பேசினோம்.

செம்மணி சிகிச்சையில் இருந்தபோது...
செம்மணி சிகிச்சையில் இருந்தபோது...

‘‘அந்தக் கொடூரச் சம்பவத்தை என் வாழ்நாளில் மறக்கவே முடியாது. நான் கொடுத்திருந்த ஒரு புகார்மீது நடவடிக்கை எடுக்காத காரணத்தால், அப்போதைய வள்ளியூர் டி.எஸ்.பி குமார் மற்றும் அப்போதைய பணகுடி இன்ஸ்பெக்டர் ஸ்டீபன் ஜோஸ் ஆகியோர்மீது நீதிமன்றத்தில் வழக்கு தொடர்ந்திருந்தேன். அதனால் என்மீது கோபமடைந்த போலீஸார், 2017, நவம்பர் 3-ம் தேதி நள்ளிரவில் என் வீட்டுக்குள் நுழைந்து என்னை இழுத்துச் செல்ல முற்பட்டனர். தடுக்க வந்த என் மனைவியின் கையைப் பிடித்துத் திருகினார்கள். போலீஸாரின் செயலை செல்போனில் படம்பிடித்த என் மகளை அடித்துக் கீழே தள்ளினார்கள். செல்போனையும் பறித்துக்கொண்டார்கள். அங்கிருந்து என்னை இழுத்துச் சென்றவர்கள், ராதாபுரம் காவல் நிலையத்தில் என்னை ஜட்டியுடன் உட்கார வைத்து மூன்று மணி நேரம் அடித்தார்கள்.

கைகளையும் கால்களையும் சேர்த்துக் கட்டி, அதற்குள் இரும்புக்குழாயைச் சொருகி, ஏறி நின்றார்கள். ஒரு காவலர் என் வாயில் செருப்பைத் திணித்தார். அது போதாதென தலைகீழாகக் கட்டித் தொங்கவிட்டு அடித்தார்கள். என் கால் எலும்பு உடைந்தது. பிறகு அங்கிருந்து என்னை உவரி ஸ்டேஷனுக்குக் கொண்டு சென்றார்கள்.

நடவடிக்கை எடுக்கக்கோரி நடந்த போராட்டம்...
நடவடிக்கை எடுக்கக்கோரி நடந்த போராட்டம்...

இந்த தகவலைக் கேள்விப்பட்ட வள்ளியூர் வழக்கறிஞர்கள், உவரி காவல் நிலையத்தின் முன்பாக திரண்டார்கள். அதன் பிறகு டி.எஸ்.பி குமார், இன்ஸ்பெக்டர் ஸ்டீபன் ஜோஸ் ஆகியோர் என்னை வெளியே போகச் சொல்லி சமரசம் பேசினார்கள். ‘என்னைக் கொடூரமாக தாக்கியதற்குக் காரணம் தெரியாமல் வெளியே செல்ல முடியாது’ என மறுத்துவிட்டேன். அதனால் என்மீது பொய் வழக்கு தொடர முயற்சி நடந்தது. அதன் பிறகு வெளியே வந்தேன். வழக்கறிஞர்கள் இந்த விவகாரத்தை வள்ளியூர் குற்றவியல் நடுவரின் கவனத்துக்குக் கொண்டு சென்றனர். அதைத் தொடர்ந்து அவர் வழக்கறிஞர்கள் குழுவை நியமித்தார். பிறகு பாளையங்கோட்டை அரசு மருத்துவமனையில் ஒரு மாதம் சிகிச்சையில் இருந்தேன்.

என்மீதான தாக்குதலுக்குக் காரணமான போலீஸார் மீது நடவடிக்கை எடுக்கக் கோரி நெல்லை மாவட்ட காவல்துறை கண்காணிப்பாளர் அலுவலக முற்றுகைப் போராட்டத்தையும், நீதிமன்றப் புறக்கணிப்பு போராட்டத்தையும் வழக்கறிஞர்கள் சங்கத்தினர் நடத்தினார்கள். ஆனாலும், போலீஸார்மீது வழக்கு பதிவு செய்யப்படவில்லை.

உயர் நீதிமன்ற மதுரை கிளையில் வழக்கு தொடர்ந்தேன். தாக்குதலில் ஈடுபட்ட டி.எஸ்.பி உள்ளிட்டோர்மீது வழக்கு பதிவு செய்யும்படி நீதிமன்றம் உத்தரவிட்டது. அதன் பிறகும் வழக்கு பதிவு செய்யப்படவில்லை. தீர்ப்பை சீராய்வு செய்யும்படி நீதிமன்றத்தில் முறையிட்டது போலீஸார் தரப்பு. அதை விசாரித்த நீதிமன்றம், வழக்கை சி.பி.சி.ஐ.டி-க்கு மாற்றி 2.2.2020 அன்று உத்தரவிட்டது.

குமார் - ஸ்டீபன் ஜோஸ் - சாகர் - பழனி - செல்லத்துரை - ஜோஸ் -
குமார் - ஸ்டீபன் ஜோஸ் - சாகர் - பழனி - செல்லத்துரை - ஜோஸ் -

இந்த விவகாரத்தை கையிலெடுத்த சி.பி.சி.ஐ.டி போலீஸார் தற்போது டி.எஸ்.பி குமார், இன்ஸ்பெக்டர் ஸ்டீபன் ஜோஸ், எஸ்.ஐ-கள் பழனி, விமல்குமார், முகமது சம்சீர், ஏட்டுகள் செல்லதுரை, சாகர், ஜோஸ் ஆகிய எட்டுப் பேர் மீதும் 11 பிரிவுகளில் வழக்கு பதிவு செய்திருக்கின்றனர். சி.பி.சி.ஐ.டி போலீஸார் எனக்கு உரிய நியாயம் பெற்றுத் தருவார்கள் என்கிற நம்பிக்கை உள்ளது’’ என்றார்.

சி.பி.சி.ஐ.டி போலீஸார் வழக்கு பதிவு செய்தது குறித்த தகவல் கிடைத்ததும் டி.எஸ்.பி குமார், இன்ஸ்பெக்டர் ஸ்டீபன் ஜோஸ் உள்ளிட்ட எட்டு போலீஸாரும் விடுப்பில் சென்றுவிட்டனர். அவர்களின் செல்போன்கள் அணைத்துவைக்கப்பட்டுள்ளன. அவர்களைக் கண்டுபிடித்து விசாரணையைத் தொடங்க சி.பி.சி.ஐ.டி போலீஸார் தீவிரம் காட்டிவருகின்றனர்.

தவறு செய்த நெல்லை போலீஸார் அன்றே சட்டப்படி தண்டிக்கப்பட்டிருந்தால், ஒருவேளை சாத்தான்குளம் போன்ற சம்பவங்களே நடந்திருக்காதே!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு