Published:Updated:

தனியாருக்கு தாரைவார்க்கும் மத்திய அரசு... ஏற்று நடத்துமா தமிழக அரசு?

செங்கல்பட்டு ஒருங்கிணைந்த தடுப்பூசி வளாகம் -
பிரீமியம் ஸ்டோரி
செங்கல்பட்டு ஒருங்கிணைந்த தடுப்பூசி வளாகம் -

- செங்கல்பட்டு ஒருங்கிணைந்த தடுப்பூசி வளாகம்

தனியாருக்கு தாரைவார்க்கும் மத்திய அரசு... ஏற்று நடத்துமா தமிழக அரசு?

- செங்கல்பட்டு ஒருங்கிணைந்த தடுப்பூசி வளாகம்

Published:Updated:
செங்கல்பட்டு ஒருங்கிணைந்த தடுப்பூசி வளாகம் -
பிரீமியம் ஸ்டோரி
செங்கல்பட்டு ஒருங்கிணைந்த தடுப்பூசி வளாகம் -

கொரோனா தடுப்பூசி மற்றும் ஆக்ஸிஜன் தேவைகளுக்காக மாநிலங்கள், மத்திய அரசைப் பெரிதும் எதிர்பார்த்திருக்கும் சூழலில் ‘தடுப்பூசி, ஆக்ஸிஜன் மற்றும் உயிர் காக்கும் மருந்துகள் தமிழகத்திலேயே உற்பத்தி செய்யப்படும்’ என்று அதிரடியாக அறிவித்திருக்கிறார் முதல்வர் மு.க.ஸ்டாலின். மாநில நலனுக்கு எதிரான மத்திய அரசின் திட்டங்களுக்கு எதிர்ப்பு தெரிவித்துவரும் தமிழக அரசின் இந்த ‘தற்சார்பு’ அறிவிப்பு பலத்த வரவேற்பைப் பெற்றிருக்கும் நிலையில், செங்கல்பட்டில் முடங்கிக்கிடக்கும் மத்திய அரசின் ஒருங்கிணைந்த தடுப்பூசி வளாகம் (ஹெச்.பி.எல் - HLL Biotech Limited) நிறுவனத்தை தமிழக அரசே ஏற்று நடத்தி, தடுப்பூசிகளைத் தயாரிக்குமா என்கிற எதிர்பார்ப்பும் எழுந்துள்ளது. இதை உறுதி செய்வதுபோல செங்கல்பட்டு ஆட்சியர், தி.மு.க எம்.பி உள்ளிட்டோர் தொடர்ச்சியாக அந்த நிறுவனத்தை ஆய்வு செய்துவருகிறார்கள். பா.ம.க இளைஞரணித் தலைவரான அன்புமணி ராமதாஸும் ‘ஹெச்.பி.எல் நிறுவனத்தை தமிழக அரசே ஏற்று நடத்த வேண்டும்’ என்று குரல் கொடுத்திருக்கிறார்.

தனியாருக்கு தாரைவார்க்கும் மத்திய அரசு... ஏற்று நடத்துமா தமிழக அரசு?

தமிழகத்தில் தினமும் 33,000 பேருக்கு மேல் கொரோனா தொற்று ஏற்படுகிறது. தினசரி மரணங்கள் 350-ஐ தாண்டுகின்றன. தடுப்பூசி, ஆக்ஸிஜன் மற்றும் உயிர் காக்கும் மருந்துகளுக்கும் தட்டுப்பாடு நிலவுகிறது. இதனால், “உலகளாவிய டெண்டர் விடப்பட்டு, தமிழக அரசே தடுப்பூசிகளை நேரடியாகக் கொள்முதல் செய்யும்” என்று கடந்த வாரம் அறிவித்தார் முதல்வர் ஸ்டாலின். இதன் அடுத்தகட்டமாக, மே 18-ம் தேதி முதல்வர் ஸ்டாலின், “கொரோனா தடுப்பூசி, ஆக்ஸிஜன், ஆக்ஸிஜன் செறிவூட்டி உள்ளிட்ட மருத்துவ உபகரணங்கள், உயிர் காக்கும் மருந்துகள் ஆகியவை தமிழகத்திலேயே உற்பத்தி செய்யப்படும்” என்று அதிரடியாக அறிவித்திருக்கிறார். இதையடுத்தே தமிழகத்தில் தடுப்பூசி தயாரிப்பதற்காக நிறுவப்பட்டு, முடங்கிக்கிடக்கும் மத்திய அரசின் ஹெச்.பி.எல் நிறுவனத்தை தமிழக அரசே ஏற்று நடத்துமா என்கிற எதிர்பார்ப்பு வலுப்பெற்றிருக்கிறது.

விரைவில் ஆக்ஸிஜன் உற்பத்தி!

ஸ்டாலினின் மேற்கண்ட அறிவிப்பைச் செயல்படுத்துவதில் முக்கியப் பங்கு வகிக்கும் தமிழக தொழில்துறை அமைச்சர் தங்கம் தென்னரசுவிடம் பேசினோம். “முதல்வரின் இந்த அறிவிப்பு முக்கியமானது. தற்போது தமிழகத்தில் ஆக்ஸிஜனை எங்கெல்லாம் உற்பத்தி செய்ய முடியுமோ அங்கெல்லாம் உற்பத்தி செய்கிறோம். வெளி மாநிலங்கள் மற்றும் வெளிநாடுகளிலிருந்தும் ஆக்ஸிஜன் மற்றும் ஆக்ஸிஜன் சிலிண்டர்களை இறக்குமதி செய்கிறோம். இந்தநிலையில்தான், ‘ஆக்ஸிஜன் உற்பத்தி ஆலைகளைத் தொடங்கும் நிறுவனங்களுக்குத் தேவையான உதவிகளை தமிழ்நாடு தொழில் வளர்ச்சி நிறுவனம் (டிட்கோ) செய்யும்’ என்று முதல்வர் அறிவித்திருக்கிறார்.

ஆக்ஸிஜன் தயாரிப்பு, ஆக்ஸிஜன் செறிவூட்டிகள் தயாரிப்பு, மருந்துகள் தயாரிப்பு, இதர மருத்துவ உபகரணங்கள் தயாரிப்பு ஆகிய அனைத்தும் இதில் அடங்கும். 50 கோடி ரூபாய்க்கு முதலீடு செய்து, இவற்றைத் தயாரிக்க முன்வருபவர்களுடன் தமிழக அரசு இணைந்து (Joint Venture) நிறுவனத்தைத் தொடங்கும். இதில் ஆர்வம் இருப்பவர்கள் மே 31-ம் தேதிக்குள் தெரிவிக்குமாறு கேட்டுக்கொண்டிருக்கிறோம். தடுப்பூசி உற்பத்தியைப் பொறுத்தவரை ஹெச்.பி.எல் உட்பட மூன்று இடங்களில் தடுப்பூசிகளைத் தயாரிக்கும் பொதுத்துறை நிறுவனங்கள் தமிழகத்தில் உள்ளன. மத்திய அரசுக்குச் சொந்தமான அந்த நிறுவனங்களில் கொரோனா தடுப்பூசிகளை உற்பத்தி செய்வதற்கான வாய்ப்புகளை ஆராய்ந்து தமிழக அரசு உரிய நடவடிக்கைகளை எடுக்கும்” என்றார்.

தனியாருக்கு தாரைவார்க்கும் மத்திய அரசு... ஏற்று நடத்துமா தமிழக அரசு?

இரு நிறுவனங்களுக்கு மட்டுமே வாய்ப்பா?

மன்மோகன் சிங் தலைமையிலான ஐக்கிய முற்போக்கு கூட்டணி ஆட்சியில் செங்கல்பட்டு, திருமேனி கிராமத்தில் 594 கோடி ரூபாய் செலவில் உருவாக்கப்பட்ட ஹெச்.பி.எல் வளாகத்தில் வெறிநாய்க் கடி தடுப்பூசி உட்பட 13 வகையான தடுப்பூசிகளை உற்பத்தி செய்யலாம். ஆனால், கடந்த ஆண்டு கிருமிநாசினி தயாரித்ததைத் தவிர வேறு எந்த உற்பத்தியும் இங்கு நடக்கவில்லை. இது குறித்து விகடனின் ஆன்லைன் தளத்தில் தொடர்ச்சியாகக் கட்டுரைகள் வெளியிட்டதுடன், 02.05.2021 தேதியிட்ட ஜூ.வி இதழிலும் விரிவான கட்டுரையை வெளியிட்டோம்.

ஜூ.வி-யில் கட்டுரை வெளியான சில நாள்களில், ஹெச்.பி.எல் இயக்கப்படாமல் இருப்பது குறித்து சென்னை உயர் நீதிமன்ற மதுரைக் கிளை கேள்வி எழுப்பியது. “கொரோனாவுக்கு முன்புவரை தடுப்பூசிகள் உற்பத்தியில் இந்தியா முன்னோடியாக இருந்தது. இப்போது, தனியார் நிறுவனங்கள் மட்டுமே கொரோனா தடுப்பூசியைத் தயாரித்துவருகின்றன” என்று குறிப்பிட்ட உயர் நீதிமன்றம், “கொரோனா தடுப்பூசிகளை உற்பத்தி செய்வதற்கு, தடுப்பூசி தயாரிக்கும் பொதுத்துறை நிறுவனங்களை ஏன் பயன்படுத்தவில்லை, செங்கல்பட்டு ஹெச்.பி.எல் நிறுவனத்தின் உற்பத்தித்திறன் என்ன, அதன் தற்போதைய நிலை என்ன?” என்று கேள்விகளை எழுப்பியது.

அடுத்ததாக மருத்துவ ஆக்ஸிஜன் மற்றும் தடுப்பூசி தொடர்பான மற்றொரு வழக்கு சென்னை உயர் நீதிமன்றத்தில் விசாரணைக்கு வந்தது. அதில், தி.மு.க எம்.பி-யான வழக்கறிஞர் வில்சன் ஆஜராகி, “செங்கல்பட்டு ஹெச்.பி.எல்., குன்னூர் பாஸ்டர் நிறுவனம், கிண்டி கிங் இன்ஸ்டிட்யூட் ஆகிய மூன்று பொதுத்துறை நிறுவனங்களில் கொரோனா தடுப்பூசிகளை உற்பத்தி செய்ய வேண்டும்” என்று வாதிட்டார். இந்த விவகாரம் குறித்து மத்திய சுகாதாரம் மற்றும் குடும்ப நலத்துறை அமைச்சர் ஹர்ஷ் வர்தனுக்கும் கடிதம் எழுதியிருக்கும் வில்சனிடம் நாம் பேசினோம்.

“ஹெச்.பி.எல் நிறுவனம் உற்பத்தியைத் தொடங்குவதற்கு தயார்நிலையில் இருக்கிறது. ஆனால், அரசுத் தரப்பில் உற்பத்தியைத் தொடங்காமல், தனியாருக்கு டெண்டர் வெளியிட்டிருக்கிறார்கள். அதில், விதிமுறைகள் கடுமையாக இருக்கின்றன. அதாவது, தற்போது இந்தியாவில் கொரோனா தடுப்பூசிகளை உற்பத்தி செய்யும் சீரம் மற்றும் பாரத் பயோடெக் ஆகிய இரண்டு தனியார் நிறுவனங்களை மீறி வேறு யாரும் உள்ளே வர முடியாத அளவுக்கு வேலைகள் நடைபெறுவதாகத் தெரிகிறது. அதனால்தான், இரண்டு முறை டெண்டர் விட்டும் யாரும் வரவில்லை” என்றார்.

ஹெச்.பி.எல் நிறுவனத்தின் ஊழியர்கள் சிலரிடம் பேசினோம். “ஆரம்பத்தில் இங்கு விஞ்ஞானிகள், தொழில்நுட்பப் பணியாளர்கள் என 400-க்கும் மேற்பட்டோர் பணியிலிருந்தனர். ஆனால், உற்பத்தி தொடங்கப்படாததாலும், ஊதியம் வழங்கப்படாததாலும் பலரும் பணியிட மாறுதல் பெற்று சென்றுவிட்டனர். தற்போது பணியிலிருக்கும் சொற்ப நபர்களுக்கும் சம்பளம் வழங்கப்படாததால், அவர்கள் போராட்டங்களை நடத்திவருகிறார்கள். இந்த மனஉளைச்சலால் சமீபத்தில் பணியாளர் ஒருவர் தற்கொலை செய்துகொண்டார்” என்றார்கள் வேதனையுடன்.

‘தமிழகத்திலேயே தடுப்பூசிகள் தயாரிக்கப்படும்’ என்று ஸ்டாலின் அறிவிப்பதற்கு மூன்று நாள்களுக்கு முன்னதாக, மே 14-ம் தேதி தி.மு.க-வின் வடசென்னை எம்.பி-யும், மத்திய சுகாதாரம் மற்றும் குடும்ப நல அமைச்சகத்தின் ஆலோசனைக்குழு உறுப்பினருமான டாக்டர் கலாநிதி வீராசாமி ஹெச்.பி.எல் வளாகத்துக்குச் சென்று ஆய்வு மேற்கொண்டார். அதற்கு முந்தைய தினம் மே 13-ம் தேதிதான் செங்கல்பட்டு மாவட்ட ஆட்சியர் ஜான் லூயிஸ் உள்ளிட்ட அதிகாரிகள் அங்கு சென்று ஆய்வு நடத்தினர்.

தனியாருக்கு தாரைவார்க்கும் மத்திய அரசு... ஏற்று நடத்துமா தமிழக அரசு?

“நிலம் தமிழக அரசுக்குச் சொந்தமானது!”

“இந்த நிறுவனத்தை தமிழக அரசு கையிலெடுத்தோ அல்லது தனியார் நிறுவனங்களுடன் இணைந்தோ தடுப்பூசி உற்பத்தியைத் தொடங்க முடியுமா?” என்று கலாநிதி வீராசாமியிடம் கேட்டோம். “ஹெச்.பி.எல். நிறுவனத்தில் தடுப்பூசிகளைத் தயாரிக்க கூடுதலாக 300 கோடி ரூபாய் தேவை. அதைக் காரணம் காட்டி நிறுவனத்தை முடக்கிவைத்திருக்கிறது மத்திய அரசு. அங்கு தடுப்பூசி உற்பத்தியைத் தொடங்கிவிட்டால், நாடு முழுவதுமே நம்மால் தடுப்பூசி சப்ளை செய்ய முடியும். எனவே, அந்த நிறுவனத்தை தமிழக அரசு எடுத்து நடத்துவதற்கு என்னென்ன வழிவகைகள் இருக்கின்றன என்பதை ஆய்வு செய்தேன். தமிழக முதல்வரும் ஹெச்.பி.எல் விஷயத்தில் ஆர்வத்துடன் இருக்கிறார். விரைவில் இந்த நிறுவனத்தை இயங்கவைப்போம்” என்றார் உறுதியாக.

டி.கே.ரங்கராஜன்
டி.கே.ரங்கராஜன்
வில்சன்
வில்சன்

இந்த நிறுவனத்தை இயக்க வேண்டும் என்று தொடர்ந்து குரல் கொடுத்துவரும் மார்க்சிஸ்ட் கம்யூனிஸ்ட் கட்சியின் முன்னாள் எம்.பி டி.கே.ரங்கராஜன் நம்மிடம், “இந்த நிறுவனத்தை இயக்குவதற்காக மத்திய அரசுக்குக் கடிதங்கள் எழுதியதுடன், பிரதமர் மோடியையும் மத்திய சுகாதாரத்துறை அமைச்சர் ஹர்ஷ் வர்தனையும் சந்தித்துப் பேசினேன். இதையடுத்து, கடந்த ஆண்டு ஜனவரியில் இங்கு வந்த ஹர்ஷ் வர்தன், நிறுவனத்தை இயக்குவதற்கான நடவடிக்கைகளை எடுப்பதாக உறுதியளித்தார். ஆனால், எதுவும் நடக்கவில்லை. தற்போது தடுப்பூசி, ஆக்ஸிஜன் உள்ளிட்டவை தமிழகத்திலேயே உற்பத்தி செய்யப்படும் என்று முதல்வர் ஸ்டாலின் அறிவித்திருக்கிறார். ஹெச்.பி.எல் நிறுவனம் அமைந்துள்ள 100 ஏக்கர் நிலம் மாநில அரசுக்குச் சொந்தமானது. மாநில அரசு விரும்பினால் அந்த நிறுவனத்தை ஏற்று நடத்த முடியும்” என்றார்.

ஹெச்.பி.எல் நிர்வாகத்தின் தரப்பிலோ, “கொரோனா தடுப்பூசிகள் உற்பத்தி செய்வதற்காக இரு முறை டெண்டர் விடப்பட்டது. டெண்டர் எடுக்க யாரும் முன்வரவில்லை. அடுத்த டெண்டரும் மே 21-ம் தேதியுடன் முடிவடைகிறது” என்றனர்.

விரைவில் நல்லது நடக்கட்டும்!

தனியாருக்கு தாரைவார்க்கும் மத்திய அரசு... ஏற்று நடத்துமா தமிழக அரசு?

“தமிழகத்திடம் ஒப்படைக்க வேண்டும்!”

இதற்கிடையே மே 19-ம் தேதி மேற்கண்ட நிறுவனம் தொடர்பாக அறிக்கை வெளியிட்டிருக்கும் பா.ம.க இளைஞரணித் தலைவர் அன்புமணி, ‘செங்கல்பட்டிலிருக்கும் ஒருங்கிணைந்த தடுப்பூசி வளாகத்தை, தனியாரிடம் ஒப்படைக்க மத்திய அரசு முடிவு செய்திருப்பதாகவும், அதற்கான ஒப்பந்தப்புள்ளிகள் கோரப்பட்டிருப்பதாகவும் வரும் செய்திகள் அதிர்ச்சியளிக்கின்றன. செங்கல்பட்டு தடுப்பூசி வளாகம் தனியாருக்கு வழங்கப்பட்டால், எந்த நோக்கத்துக்காக அது அமைக்கப்பட்டதோ, அந்த நோக்கமே சிதைந்துவிடும். எனவே, செங்கல்பட்டு தடுப்பூசி வளாகத்தில் தடுப்பூசி தயாரிக்கும் பணியை மத்திய அரசு மேற்கொள்ள வேண்டும் அல்லது தமிழகத்திடம் ஒப்படைக்க வேண்டும்’ என்று குறிப்பிட்டிருக்கிறார்.