Published:Updated:

லஞ்சம் கேட்கும் சென்னை மாநகராட்சி! - குமுறும் ஹோட்டல் நிர்வாகம்

ஹோட்டல்
பிரீமியம் ஸ்டோரி
ஹோட்டல்

கமிஷன் கொடுக்காத சிலர், தங்களுக்கு வர வேண்டிய தொகையைக் கேட்டுப் பெறும் வழி தெரியாமல் திகைத்து நிற்கிறார்கள்.

லஞ்சம் கேட்கும் சென்னை மாநகராட்சி! - குமுறும் ஹோட்டல் நிர்வாகம்

கமிஷன் கொடுக்காத சிலர், தங்களுக்கு வர வேண்டிய தொகையைக் கேட்டுப் பெறும் வழி தெரியாமல் திகைத்து நிற்கிறார்கள்.

Published:Updated:
ஹோட்டல்
பிரீமியம் ஸ்டோரி
ஹோட்டல்

கொரோனா தொற்றால் பாதிக்கப்பட்டவர்களைக் கண்டறிந்து அவர்களுக்கு மருத்துவமனைகளில் சிகிச்சையளிப்பது மட்டுமன்றி, ‘ஏசிம்டமேட்டிக்’ நோயாளிகளைத் தனியார் விடுதிகள், கல்லூரிகளில் தனிமைப்படுத்துவது தொடங்கி, சத்தான உணவு கிடைப்பதை உறுதிசெய்வது வரை கொரோனா பரவலின் முதல் மற்றும் இரண்டாவது அலையைச் சிறப்பாகக் கையாண்டுவருவதில் இந்தியாவிலேயே தமிழகம் இரண்டாவது இடத்தில் இருக்கிறது. அதேநேரத்தில், கொரோனா நிதியில் கைவைப்பதாக அரசு நிர்வாகம் மீது வைக்கப்படும் குற்றச்சாட்டுகள் பெருமை சேர்ப்பதாக இல்லை!

தமிழகம் முழுவதுமுள்ள முக்கியமான தனியார் தங்கும் விடுதிகள் மற்றும் உணவகங்களுடன் ஒப்பந்தமிட்டு கொரோனா தடுப்பு மையங்களைச் செயல்படுத்திவந்த தமிழக அரசு, தலைநகர் சென்னையிலும் மாநகராட்சி நிர்வாகம் மூலம் இதேபோல் பலருடன் ஒப்பந்தமிட்டு கொரோனா தடுப்பு மையங்களைச் செயல்படுத்திவந்தது. அப்படி ஒப்பந்தம் போடப்பட்ட தனியார் தங்கும் விடுதிகள் மற்றும் உணவகங்களுக்கான பில் தொகையை அளிப்பதில் கமிஷன் வாங்கப்பட்டதாக, சென்னை மாநகராட்சி மீது தொடர்ந்து புகார்கள் எழுந்துவந்தன.

லஞ்சம் கேட்கும் சென்னை மாநகராட்சி! - குமுறும் ஹோட்டல் நிர்வாகம்

‘அமைச்சர்கள் சிலருக்கும் கமிஷன் தொகையில் பங்கிருக்கிறது’ என்று சொல்லப்பட்டதால், சென்னை மாநகராட்சியுடன் முரண்பட வேண்டாம் என்று சில நிறுவனத்தினர் கொடுக்க வேண்டியதைக் கொடுத்து, வர வேண்டியதைப் பெற்றுக்கொண்டிருக்கிறார்கள். கமிஷன் கொடுக்காத சிலர், தங்களுக்கு வர வேண்டிய தொகையைக் கேட்டுப் பெறும் வழி தெரியாமல் திகைத்து நிற்கிறார்கள். இவர்களுக்கிடையே, சங்கீதா உணவகத்தை நடத்தும் ‘ஆர்எஸ்எம் ஃபுட்ஸ் பிரைவேட் லிமிடெட்’ நிறுவனத்தினர் மட்டும் தைரியமாக வெளியே வந்து, ‘எங்களுக்கான நிலுவைத் தொகையைத் தர, சென்னை மாநகராட்சி தரப்பில் கமிஷன் கேட்கிறார்கள்’ என்ற புகாரை சென்னை மாநகராட்சி ஆணையருக்கு அனுப்பியுள்ளனர். அந்தக் கடிதத்தின் நகலை மத்திய குற்றப் புலனாய்வுச் செயலகம், லஞ்ச ஒழிப்பு மற்றும் ஊழல் தடுப்புச் செயலகம், தமிழகத் தலைமைச் செயலாளர், எம்.எஸ்.எம்.இ துறைச் செயலாளர், எம்.எஸ்.எம்.இ துறை அமைச்சர், தமிழ்நாடு வணிகர்கள் சங்கம் என்று பலருக்கும் அனுப்பி அதிரவைத்திருக்கிறார்கள்.

அந்தப் புகார்க் கடிதத்தில், ‘‘கொரோனா தொற்றாளர்களுக்கு உணவு வழங்கியதற்காக மாநகராட்சித் தரப்பிலிருந்து எங்களுக்கு வர வேண்டிய 8.43 கோடி ரூபாய் நிலுவையில் உள்ளது. நிலுவைத் தொகையை விடுவிக்கக் கோரி எங்கள் ஊழியர்கள் உங்களை அணுகும்போதெல்லாம், ‘உள்ளாட்சித்துறை அமைச்சர் எஸ்.பி.வேலுமணியிடம் பேசுங்கள்’ என்று சொல்லி வேண்டுமென்றே தாமதம் செய்கிறீர்கள். ‘உங்களுக்கும் அமைச்சருக்கும் கமிஷன் கொடுக்கவில்லையென்றால், நிலுவைத் தொகையை ரிலீஸ் செய்ய மாட்டீர்கள்’ என்பதை அதன் மூலம் புரிந்துகொண்டோம். கொரோனா காலத்தில் ஊழியர்களுக்கு ஊதியம் அளிப்பது உள்ளிட்ட பல நெருக்கடிகள் எங்களுக்கும் இருக்கும் என்பதை சென்னை மாநகராட்சி புரிந்துகொண்டு நிலுவைத் தொகையை உடனடியாக விடுவிக்குமாறு தாழ்மையுடன் கேட்டுக்கொள்கிறோம்” என்று குறிப்பிடப்பட்டுள்ளது.

புகார் தொடர்பாக ஆர்எஸ்எம் ஃபுட்ஸ் பிரைவேட் லிமிடெட் நிர்வாகத் தரப்பில் விசாரித்தோம்... ‘‘கொரோனா தொற்றின் முதல் அலையின்போது தொற்றாளர்களுக்கு மூன்று வேளை உணவும், மாலையில் சத்தான சிற்றுண்டியும் வழங்க வேண்டும் என சென்னை மாநகராட்சித் தரப்பில் எங்களை அணுகினார்கள். அதையடுத்து 2020 ஏப்ரல் முதல் 2021 ஜனவரி வரை சென்னையில் 27 கொரோனா தடுப்பு மையங்களுக்கு உணவு வழங்கிவந்தோம். ஒவ்வொரு மாத இறுதியிலும் பில்லைக் கொடுப்போம். அதற்கான தொகையை முறையாக வழங்கிவந்தார்கள். அந்த வகையில், சென்னை மாநகராட்சியிடமிருந்து இதுவரை 2.50 கோடி ரூபாய் வாங்கியிருக்கிறோம். ஆனால், சில மாதங்களுக்குப் பிறகு இந்த நடைமுறையை சென்னை மாநகராட்சித் தரப்பில் பின்பற்றவில்லை.

பில்லை வாங்கி வைத்துக்கொண்டு, ‘தொகையைப் பிறகு தருகிறோம்’ என மாநகராட்சி அதிகாரிகள் கூறத் தொடங்கினார்கள். பில் தொகை சில கோடிகளை எட்டியதும், அதற்கு மேல் சமாளிக்க முடியாமல், நிலுவையிலிருக்கும் தொகையை விடுவிக்குமாறு சென்னை மாநகராட்சியின் கதவுகளைத் தட்டத் தொடங்கினோம். தொடக்கத்தில் முறையாகப் பதிலளித்த அதிகாரிகள், பின்னர் நாளுக்கொரு காரணத்தைச் சொல்லத் தொடங்கிவிட்டார்கள். நீண்டநாள் போராட்டத்துக்குப் பின்னர், ‘உண்மையில் என்னதான் காரணம்... செக்கைத் தராமல் ஏன் இப்படி இழுத்தடிக்கிறீர்கள்?’ என அங்கிருக்கும் அதிகாரி ஒருவரிடம் கேட்டதற்கு, ‘கொடுக்க வேண்டியதைக் கொடுத்தாத்தானே நாங்க செக்கை ரிலீஸ் செய்ய முடியும்! மேலிடம் வரைக்கும் பங்கு கொடுக்க வேண்டியிருக்குது. இதை நீங்களே புரிஞ்சுக்குவீங்கன்னு நினைச்சோம்’ என எங்கள் ஊழியரிடம் கூறி அனுப்பினார்கள்.

லஞ்சம் கேட்கும் சென்னை மாநகராட்சி! - குமுறும் ஹோட்டல் நிர்வாகம்

அதன் பிறகுதான் கமிஷனை எதிர்பார்த்துத்தான் இப்படி நடந்துகொண்டார்கள் என்பதே எங்களுக்கு உறைத்தது. ‘கமிஷன் கொடுக்காமல் முறைப்படி எங்களுக்கான நிலுவைத் தொகையை எப்படிப் பெற வேண்டுமோ அப்படிப் பெற்றுக்கொள்வோம்’ எனக் கூறிவிட்டு எங்கள் ஊழியர்கள் அங்கிருந்து வந்துவிட்டார்கள். நிலுவையிலிருக்கும் தொகையை வாங்குவதற்குப் பல மாதங்களாகப் போராடி வருகிறோம். இப்போதும் சென்னை மாநகராட்சியுடன் இணக்கமாகச் செல்லவே விரும்புகிறோம். அதற்கு முன் ஆணையர் எங்களுக்கு வர வேண்டிய நிலுவைத் தொகை 8.43 கோடி ரூபாயைப் பெரிய மனதுவைத்து விடுவிக்க வேண்டும்’’ என்றார்கள்.

ஆர்எஸ்எம் .ஃபுட்ஸ் பிரைவேட் லிமிடெட் நிறுவனத்தின் குற்றச்சாட்டு தொடர்பாக விளக்கம் கேட்க சென்னை மாநகராட்சி ஆணையர் பிரகாஷ் மற்றும் அமைச்சர் வேலுமணியைப் பலமுறை தொடர்புகொண்டோம். இந்த இதழ் அச்சுக்குச் செல்லும் வரையில் அவர்கள் நமது அழைப்பை ஏற்கவில்லை. அவர்கள் தரப்பில் விளக்கம் அளிக்கும் பட்சத்தில் அதை வெளியிடத் தயாராக இருக்கிறோம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism