Published:Updated:

மூன்றே விரல்கள், சுழலும் சிலம்பம்... சுட்டி சாம்பியன் யாஷிகா

யாஷிகா
பிரீமியம் ஸ்டோரி
யாஷிகா

அவளுக்கு அஞ்சு வயசிருக்கும்போது, சிலம்பம் வகுப்புல சேர்த்துவிட்டோம். நம்மால முடியுமானு எந்தத் தயக்கமும் இல்லாம, முழு நம்பிக்கையோட தைரியமா சிலம்பத்தைக் கையில எடுத்தா

மூன்றே விரல்கள், சுழலும் சிலம்பம்... சுட்டி சாம்பியன் யாஷிகா

அவளுக்கு அஞ்சு வயசிருக்கும்போது, சிலம்பம் வகுப்புல சேர்த்துவிட்டோம். நம்மால முடியுமானு எந்தத் தயக்கமும் இல்லாம, முழு நம்பிக்கையோட தைரியமா சிலம்பத்தைக் கையில எடுத்தா

Published:Updated:
யாஷிகா
பிரீமியம் ஸ்டோரி
யாஷிகா

மரக்காணம் அருகே உள்ள குறும்பரம் கடற்கரை கிராமம். தன் ஆசானிடம் சிலம்பம் கற்றுக்கொண்டிருந்தார் யாஷிகா. யாஷிகாவின் அப்பா செந்தில், மகள் நுணுக்க மாக சிலம்பம் சுழற்றுவதைப் பெருமையுடன் பார்த்துக்கொண்டிருந்தார். பிறக்கும்போதே இரண்டு கைகளிலும் மூன்று விரல்கள் மட்டுமே... கைகளின் இயக்கமும் குறைவு... இப்படி பாதிப்புகளுடன் இருந்த மகளை இன்று சிலம்பம் சாம்பியன் ஆக்கியிருக்கும் தந்தையின் பூரிப்பு அது.

செந்திலிடம் பேசினோம். ‘`நான் அஞ்சாவது தான் படிச்சிருக்கேன். மெக்கானிக் ஷாப் நடத்திட்டு இருக்கேன். யாஷிகா எனக்கு ஒரே புள்ள. இப்போ அவளுக்கு ஏழு வயசு. பிறக்கும்போதே யாஷிகாவுக்கு ஒவ்வொரு கையிலும் மூன்று விரல்கள்தான் இருந்துச்சு. வளர வளர, வலது கை கொஞ்சம் ஆக்டிவ்வா இல்லாத மாதிரி தெரிஞ்சது.

செந்தில்
செந்தில்

எங்க வீட்டுக்குப் பக்கத்துல இருக்குற பசங்க சிலம்பம் கத்துக்கப் போனாங்க. அப்போதான், யாஷிகாவையும் சிலம்பம் பயிற்சிக்கு அனுப்பினா அவ கைக்கு பயிற்சி கொடுத்த மாதிரி இருக்குமேனு தோணுச்சு. அவளுக்கு அஞ்சு வயசிருக்கும்போது, சிலம்பம் வகுப்புல சேர்த்துவிட்டோம். நம்மால முடியுமானு எந்தத் தயக்கமும் இல்லாம, முழு நம்பிக்கையோட தைரியமா சிலம்பத்தைக் கையில எடுத்தா. தினமும் காலையில வீட்டுக்கு முன்னாடி ஒரு மணி நேரம் சிலம்பம் பழகுவா. இன்னிக்கு கோல்டு மெடல் வாங்குற அளவுக்கு இதுல முன்னேறியிருக்கா. ரொம்ப மகிழ்ச்சியாவும் நெகிழ்ச்சியாவும் இருக்கு’’ என்றார்.

தனியார் பள்ளியில் இரண்டாம் வகுப்புப் படிக்கும் யாஷிகாவின் பேச்சில் மழலை இன்னும் மிச்சமிருக்கிறது. ‘`நான் நல்லா படிப்பேன். எனக்கு டாக்டர் ஆகணும்னு ஆசை. சின்ன வயசுல இருந்தே சிலம்பம் கத்துக்குறேன். எனக்கு இது ரொம்பப் பிடிச் சிருக்கு. எப்பவும் தைரியமா இருக்கணும்னு ஆசான் சொல்லியிருக்காரு. நான் அப்படிதான் இருப்பேன். சரி இப்போ உங்களுக்கு சிலம்பம் சுத்திக் காட்டட்டுமா..?!’’ என்று எழுந்துகொண்டார் யாஷிகா.

சதீஷ்குமார்
சதீஷ்குமார்

சிலம்பத்தை எடுத்து எல்லோருக்கும் வணக்கம் வைத்து சுழற்ற ஆரம்பித்தார் யாஷிகா. துல்லியமும் தன்னம்பிக்கையும் நிரம்ப இருந்தது அந்தச் சிறுமியிடம். அவர் கம்பை சுழற்றும் அழகை ரசித்தபடியே யாஷிகாவின் ஆசான் சதீஷ்குமாரிடம் பேசினோம். ‘மரக்காணம் சிலம்பக் கலை மற்றும் விளையாட்டுக் கூடத்’தில் ஐந்து வருடங்களாக மாணவர்களுக்கு சிலம்பம் பயிற்சி அளித்துவருகிறார் சதீஷ்குமார்.

‘`ரெண்டு வருஷத்துக்கு முன்னாடி ஒருநாள் வகுப்பில் மாணவர்களுக்கு வழக்கம்போல சிலம்பம் பயிற்சி கொடுத்துட்டு இருந்தப்போ, யாஷிகாவோட அம்மா கோமதி வந்து யாஷிகா பற்றிக் கூறி, ‘அவளுக்கு சிலம்பம் கற்றுத் தர முடியுமா?’னு கேட்டாங்க. ஆரம்பத்துல, இது எந்தளவுக்கு சாத்தியம்னு தெரியாததால, கஷ்டம்தான்னு சொல்லிட்டேன். ஆனா, அவங்க முகம் மாறுனதைப் பார்த்துட்டு, ‘சரி கூட்டிட்டு வாங்க... பார்க்கலாம்’னு சொல்லி அனுப்பினேன்.

யாஷிகாவை கூட்டிட்டு வந்தப்போ, அவ கையில ஒரு கம்பைக் கொடுத்தேன். இடது கையால மட்டுமே கம்பை தூக்கினா. வலது கையால அவளால கம்பை தனிச்சுப் பிடிக்க முடியலை. கம்பை ரெண்டு கையாலயும் நல்லா பிடிச்சு என்னை அடிக்கச் சொன்னேன். அஞ்சு அடி அடிச்சதுல, மூணு அடி வலுவா விழுந்துச்சு. அவளால முடியும்னு நம்பிக்கை வந்துச்சு. ஆனாலும், அவளால ஒரு கையால கம்பை தனிச்சுப் பிடிக்க முடியாததால, அவளுக்கு சிலம்பம் பயிற்சி கொடுக்குறது சவாலா இருந்தது. அதனால,

ஒரு கையை முதுகுக்குப் பின்னாடி கட்ட சொல்லி விட்டு, ஒரு கைக்கு மட்டுமே மூணு மாசம் பயிற்சி கொடுத்தேன். அடுத்த மூணு மாசம் அடுத்த கைக்கு மட்டும் பயிற்சி கொடுத்தேன்.

தினமும் சுமார் ரெண்டு மணி நேரம் யாஷிகா பயிற்சி செஞ்சதோட பலன், சுமார் ஏழு மாசத்துக்கு அப்புறம் சகஜமா ரெண்டு கையாலும் கம்பை பிடிச்சு சுழற்ற ஆரம்பிச்சுட்டா. அதுக்கு அப்புறம் யாஷிகா பண்ணினதெல்லாம் அதகளம்தான். ஒற்றை கை சிலம்பம், இரட்டை கை சிலம்பம், தீப்பந்தம் விளையாட்டு, சுருள்பட்டை விளையாட்டு, அலங்கார அடிபாடம் விளையாட்டுனு கலக்க ஆரம்பிச்சுட்டா’’ என்று பெருமையுடன் சொல்கிறார் சதீஷ்குமார்.

மூன்றே விரல்கள், சுழலும் சிலம்பம்... சுட்டி சாம்பியன் யாஷிகா

கடந்த வருடம் அக்டோபர் மாதம் ‘சர்வதேச சிலம்பம் சம்மேளனம்’

எனும் அமைப்பு கொரோனா காலத்தில் ஆன்லைன் வழியில் நடத்திய சிலம்பப் போட்டியில் கலந்துகொண்டு கோல்ட் மெடல் வென்றிருக்கிறார் யாஷிகா. ‘`அவ இன்னும் நிறைய சாதிக்கணும். என்கிட்ட 40 மாணவர்கள் வரை சிலம்பம் கத்துக்குறாங்க. எல்லாருமே 15 வயதுக்கு உட்பட்ட குழந்தைகள். அதில் 20 பேர் பெண் பிள்ளைகள். பயிற்சிக் கட்டணம் கட்டாயம் இல்லை. அப்படி அவங்க கொடுத்தா, அதைப் பயிற்சிக்கான பொருள்கள் வாங்கவும், போட்டிக்கு அழைத்துச் செல்லவும் பயன்படுத்துவேன்’’ என்றார் சதீஷ்குமார்.

யாஷிகாவின் அம்மா கோமதி, ‘`அரசுப் பள்ளிகள்ல சிலம்பம் கத்துக் கொடுக்கணும். சிலம்பம் சொல்லித்தரும் ஆசிரியர்களுக்கும், யாஷிகா போன்ற குழந்தைகளுக்கும் அரசு உரிய ஊக்கம் தரணும். பிள்ளைங்ககிட்ட இருக்குற குறைகளைத் தாண்டி அவங்க திறமைகளை வெளிக்கொண்டு வர்றது பெற்றோர்கள் கையில்தான் இருக்கு” என்றார்.

யாஷிகாவின் வெற்றிகள் தொடரட்டும்!