Published:Updated:

மும்பை: `இறப்புச் சான்றிதழை வாங்கிச் செல்லுங்கள்!‘ - உயிருடன் இருப்பவருக்கு வந்த அதிர்ச்சி போன் கால்

சந்திரசேகர் தேசாய்
சந்திரசேகர் தேசாய்

உயிருடன் இருக்கும் ஆசிரியருக்கு போன் செய்து, `வந்து இறப்புச் சான்றிதழை வாங்கிச் செல்லுங்கள்’ என்று மாநகராட்சி அதிகாரிகள் தெரிவித்தது அதிர்ச்சியை ஏற்படுத்தியுள்ளது.

மும்பை காட்கோபரிலுள்ள பள்ளி ஒன்றில் ஆசிரியராக இருப்பவர் சந்திரசேகர் தேசாய். இவரது வீடு அருகிலுள்ள தானேயில் இருக்கிறது. கடந்த ஆண்டு சந்திரசேகருக்கு கொரோனா தொற்று ஏற்பட்டது. இதனால் சில நாள்கள் மாநகராட்சி சார்பாக ஏற்பாடு செய்திருந்த மருத்துவமனையில் சேர்ந்து சிகிச்சை எடுத்துக்கொண்டார். பூரண குணமடைந்து வீட்டுக்கும் திரும்பிவிட்டார். ஆனால், அவர் கொரோனா தொற்று காரணமாக இறந்துவிட்டதாக தானே மாநகராட்சி அதிகாரிகள் அவரது பெயரை இறந்தவர்கள் பட்டியலில் சேர்த்துவிட்டனர்.

சந்திரசேகர் தேசாய்
சந்திரசேகர் தேசாய்

அதோடு விடாமல், அவருக்கு இறப்புச் சான்றிதழ் தயாராகிவிட்டது என்றும், உடனே வந்து இறப்புச் சான்றிதழை வாங்கிச் செல்லும்படியும் அவருக்கே போன் செய்து தகவல் கொடுத்தனர். இதனால் அதிர்ச்சியடைந்த சந்திரசேகர், `நான் உயிரோடுதான் இருக்கிறேன்’ என்று தெரிவித்தார். ஆனால் போன் செய்த ஊழியர் அதைக் கேட்பதாக இல்லை. `எங்களது ஆவணங்களில் நீங்கள் இறந்துவிட்டதாகத்தான் இருக்கிறது’ என்று அந்த ஊழியர் தெரிவித்தார்.

உடனே சந்திரசேகர் மாநகராட்சி அலுவலகத்துக்குச் சென்று, `நான் இன்னும் உயிரோடுதான் இருக்கிறேன்’ என்று தெரிவித்தார். அவரிடம் அதிகாரிகள் ஆதார் கார்டு போன்ற விவரங்களை வாங்கிப் பார்த்த பிறகு அவர் உயிரோடு இருப்பதை உறுதி செய்தனர். கொரோனாவால் இறந்தவர்கள் பட்டியலைத் தயாரிக்கும்போது குளறுபடி ஏற்பட்டிருக்க வாய்ப்பு இருக்கிறது என்று தெரிவித்தனர். இது குறித்து சந்திரசேகர் கூறுகையில், ``அதிகாரிகள் இது போன்ற ஒரு செய்தியை எனது 80 வயது தாயார் அல்லது என் மனைவியிடம் தெரிவித்திருந்தால் என்ன ஆகியிருக்கும்?” என்றார்.

மாநகராட்சி கூடுதல் கமிஷனர் சந்தீப் இது குறித்துக் கூறுகையில், ``வழக்கமாக கொரோனா தொற்று ஏற்பட்டு டிஸ்சார்ஜ் செய்யப்பட்டவர்களுக்கு போன் செய்து ஏதாவது அறிகுறி இருக்கிறதா என்றும், குடும்பத்தில் யாராவது கொரோனாவால் இறந்தார்களா என்றும், தொற்று யாருக்காவது இருக்கிறதா என்று கேட்பதுண்டு. சந்திரசேகர் பெயர் இறந்தவர்கள் பட்டியலில் இருந்தது. எனவே, தவறுதலாக அவருக்கு போன் செய்துவிட்டார்கள். ஆனால், இறந்தவர்கள் பட்டியலை நாங்கள் தயாரிப்பதில்லை. புனேயில் பட்டியல் தயாரிக்கப்படுகிறது. இனிமேல் முழுமையாக விசாரிக்காமல் யாருக்கும் போன் செய்வதில்லை என்று முடிவு செய்திருக்கிறோம்” என்று தெரிவித்தார்.

அடுத்த கட்டுரைக்கு