Published:Updated:

கான்கிரீட் சிக்கலில் கல்லணை, பவானிசாகர் வாய்க்கால்கள்... தீருமா தண்ணீர் பஞ்சாயத்துகள்?

கல்லணை
பிரீமியம் ஸ்டோரி
கல்லணை

கால்வாயின் தரைத்தளத்தில் கான்கிரீட் தளம் அமைக்கப்படுவதால், நிலத்துக்குள் நீர் இறங்காது.

கான்கிரீட் சிக்கலில் கல்லணை, பவானிசாகர் வாய்க்கால்கள்... தீருமா தண்ணீர் பஞ்சாயத்துகள்?

கால்வாயின் தரைத்தளத்தில் கான்கிரீட் தளம் அமைக்கப்படுவதால், நிலத்துக்குள் நீர் இறங்காது.

Published:Updated:
கல்லணை
பிரீமியம் ஸ்டோரி
கல்லணை

உலக நாடுகள் தொடங்கி உள்ளூர் வரை தண்ணீர் பங்கீடு என்றாலே பிரச்னைதான். தமிழகமும் அதற்கு விதிவிலக்கல்ல... தற்போது தமிழகத்தின் பல்வேறு அணைகளிலிருந்தும் பாசனத்துக்காகத் தண்ணீர் திறந்துவிடப்பட்டிருக்கும் நிலையில், விவசாயிகள் மத்தியில் தண்ணீருக்கான தகராறுகள் களைகட்டியிருக்கின்றன.

கான்கிரீட் தளம்... கலங்கும் விவசாயிகள்!

தஞ்சாவூர் மாவட்ட விவசாயிகளின் நீண்டகாலக் கோரிக்கையான கல்லணைக் கால்வாய் புனரமைப்பு பணிகள் சமீபத்தில் தொடங்கியிருக்கின்றன. இது கடைமடை விவசாயிகளுக்கு மகிழ்ச்சி அளித்தாலும், கால்வாயின் தரைப்பகுதியில் கான்கிரீட் தளம் அமைக்கப்படுவதால், நிலத்தடி நீர்வளம் பாதிக்கப்படும் என்று தஞ்சாவூர் விவசாயிகள் கடும் அதிர்ச்சி அடைந்துள்ளனர்.

பிரகாஷ், வீரசேனன்
பிரகாஷ், வீரசேனன்

கான்கிரீட் திட்டத்தை எதிர்க்கும் தஞ்சாவூர் ஆலக்குடியைச் சேர்ந்த விவசாயியான பிரகாஷ் நம்மிடம், ‘‘கல்லணைக் கால்வாய் புனரமைக்கும் திட்டத்துக்காக, ஆசிய வளர்ச்சி வங்கி உதவியுடன் 2,639 கோடி ரூபாயை மத்திய அரசு ஒதுக்கியிருக்கிறது. ஆனால், கால்வாயின் தரைத்தளத்தில் கான்கிரீட் தளம் அமைக்கப்படுவதால், நிலத்துக்குள் நீர் இறங்காது. நிலத்தடி நீர்மட்டம் பாதிப்படைந்து கிணறுகள், ஆழ்துளைக் கிணறுகள் வறண்டு குடிநீர்த் தட்டுப்பாடு ஏற்படுவதுடன், விவசாயமும் பாதிக்கப்படும். எனவே, கான்கிரீட் தளம் அமைப்பதற்கு பதிலாக, கரைகளை பலப்படுத்தி மதகுகளைச் சீரமைத்தாலே கடைமடை வரை தண்ணீரைக் கொண்டுசெல்ல முடியும். இது தொடர்பாக, உயர் நீதிமன்ற மதுரைக் கிளையில் வழக்கும் தொடரப்பட்டுள்ளது’’ என்றார்.

கான்கிரீட் தளம் தேவை என்று கூறும் பட்டுக்கோட்டையைச் சேர்ந்த விவசாயி வீரசேனனோ, ‘‘கல்லணைக் கால்வாயிலிருந்து கிளம்பும் தண்ணீர், தஞ்சையின் கடைக்கோடியிலிருக்கும் எங்களுக்குக் கிடைப்பதில்லை. கடைமடைக்கும் தண்ணீர் சென்று சேர வேண்டும் என்பதற்காக, கான்கிரீட் தளம் அமைக்க, தொடர்ந்து வலியுறுத்தியதாலேயே அதற்கான பணிகள் தொடங்கியிருக்கின்றன. இதனால், நிலத்தடி நீர்மட்டம் உயராது என்பது சம்பந்தமே இல்லாத குற்றச்சாட்டு. கடைமடை விவசாயிகள் தரப்பில் எங்கள் தரப்பு நியாயத்தையும் நீதிமன்றத்தில் வைத்துள்ளோம்’’ என்றார்.

கல்லணைக் கால்வாய் கோட்டச் செயற்பொறியாளர் முருகேசனோ, ‘‘நிலத்தடி நீர்மட்டம் உயர்வதற்காக, கால்வாயில் 15 மீட்டர் இடைவெளியில் பைப் அமைக்கப்படுகிறது. இதனால் 694 ஏரிகள், 2,000 ஊரணிகள், குளம், குட்டைகளில் நீர் நிரம்ப வாய்ப்புள்ளதால், நிலத்தடி நீர்மட்டம் உயருமே தவிர குறையாது’’ என்றார்.

பவானிசாகரிலும் பஞ்சாயத்து!

இதே பிரச்னை ஈரோடு மாவட்டத்திலும் கிளம்பியிருக்கிறது. பவானிசாகர் அணையிலிருந்து 125 மைல் நீளத்துக்கு வெட்டப்பட்டுள்ள கீழ்பவானி வாய்க்கால் மூலமாக ஈரோடு, திருப்பூர், கரூர் மாவட்டங்களைச் சேர்ந்த 2,07,000 ஏக்கர் நிலங்கள் பாசனம் பெறுகின்றன. வாய்க்கால் வெட்டப்பட்டு 60 ஆண்டுகளுக்கு மேலாகிவிட்டதால், பல இடங்களில் மதகுகள் பழுதடைந்து நீர்க்கசிவு அதிகமாகியிருக்கிறது. இதனால், ‘கடைமடை விவசாயிகளுக்குத் தண்ணீர் கிடைப்பதில்லை; கீழ்பவானி வாய்க்காலைச் சீரமைக்க வேண்டும்’ என விவசாயிகள் பல ஆண்டுகளாகக் கோரிக்கை வைத்ததால், கடந்த ஆட்சியில் கீழ்பவானி பாசன சீரமைப்புத் திட்டத்துக்காக 710 கோடி ரூபாய் நிதி ஒதுக்கப்பட்டு பணிகள் தொடங்கப்பட்டன. ஆனால், வாய்க்காலில் கான்கிரீட் தளம் அமைக்கும் திட்டத்தால் நிலத்தடி நீர் பாதிக்கும் என்று விவசாயிகளில் ஒரு தரப்பினர் எதிர்ப்பு தெரிவித்ததால், தற்காலிகமாக இந்தத் திட்டம் நிறுத்தி வைக்கப்பட்டுள்ளது.

கான்கிரீட் சிக்கலில் கல்லணை, பவானிசாகர் வாய்க்கால்கள்... தீருமா தண்ணீர் பஞ்சாயத்துகள்?

பேச்சிப்பாறை அணையிலும் சிக்கல்!

குமரி மாவட்டம், பேச்சிப்பாறை அணையிலிருந்து, திருநெல்வேலி மாவட்டம் ராதாபுரம் கால்வாய்க்கு தண்ணீர் திறக்க தமிழக அரசு பிறப்பித்த உத்தரவால், இரு மாவட்ட விவசாயிகளுக்கும் இடையே பிரச்னை கிளம்பியுள்ளது. வறட்சியான தேரிக்காடுகளைக் கொண்ட ராதாபுரம் தாலுகாவில் தண்ணீர் பஞ்சம் அதிகம். இதனால், பேச்சிப்பாறை அணையிலிருந்து ராதாபுரம் தாலுகாவுக்கு தண்ணீர் வழங்க 1972-ல் ராதாபுரம் கால்வாய் வெட்டப்பட்டது. அதன்படி அணைகள் நிரம்பினால், ராதாபுரம் கால்வாயில் தண்ணீர் திறக்கப்பட்டுவருகிறது. இந்த ஆண்டு குமரி மாவட்டத்தில் அணைகள் நிரம்பியுள்ள நிலையில், ராதாபுரம் கால்வாயில் விநாடிக்கு 150 கன அடித் தண்ணீரை ஜூன் 16-ம் தேதி முதல் அக்டோபர் 31-ம் தேதி வரை திறக்க தமிழக அரசு ஆணையிட்டுள்ளது. இந்த உத்தரவுதான் இப்போது பிரச்னைக்கு வித்திட்டுள்ளது.

மேற்கண்ட உத்தரவால் குமரி மாவட்ட விவசாயிகள் பாதிப்படைவார்கள் என்று சொல்லும் கன்னியாகுமரி தொகுதி அ.தி.மு.க எம்.எல்.ஏ தளவாய் சுந்தரம், ‘‘குமரி மாவட்ட அணைகளில் நீர் இருப்புள்ள காலத்தில் ராதாபுரம் கால்வாயில் தண்ணீர் திறப்பது வழக்கம்தான். ஆனால், இந்த முறை தொடர்ந்து நான்கரை மாதங்களுக்குத் தண்ணீர் திறக்க ஆணை பிறப்பித்துள்ளார்கள். இதனால், குமரி மாவட்டத்தில் 79,000 ஏக்கர் பாசன நிலங்களுக்குச் சரிவர தண்ணீர் கிடைக்காது. ராதாபுரம் எம்.எல்.ஏ-வும், சபாநாயகருமான அப்பாவு கொடுத்த அழுத்தத்தாலேயே இந்த உத்தரவு பிறப்பிக்கப்பட்டுள்ளதாகத் தெரிகிறது” என்றார்.

கான்கிரீட் சிக்கலில் கல்லணை, பவானிசாகர் வாய்க்கால்கள்... தீருமா தண்ணீர் பஞ்சாயத்துகள்?

அரசின் உத்தரவை வரவேற்கும் ராதாபுரம் மேற்கு ஒன்றிய தி.மு.க செயலாளர் ஜோசப் பெல்சி, ‘‘குமரி மாவட்டத்தில் அணைகள் நிரம்பி கடலில் தண்ணீர் கலக்கும் நிலையில், ராதாபுரம் கால்வாயில் தண்ணீர் வந்தால் 16,000 ஏக்கர் நிலங்கள் பாசன வசதி பெறும். 52 குளங்கள் நிரம்புவதால் 1,012 ஏக்கர் நஞ்சை நிலங்களுக்குப் பாசன வசதி கிடைக்கும். அரசியல் காரணங்களுக்காக இந்த உத்தரவுக்கு எதிர்ப்பு தெரிவிக்கக் கூடாது’’ என்றார்.

தண்ணீருக்காக விவசாயிகள் தங்களுக்குள்ளேயே மோதிக்கொள்வது தகுமா?