வாசல் தூணில் கண் திருஷ்டி விநாயகர், துளசிச் செடிகள், நாள் தவறாது பூஜை புனஸ்காரங்கள், தினந்தோறும் படையல்கள், மாலை நேரத்தில் சாம்பிராணிப் புகையுடன் கற்பூர தீபங்கள் என பக்தி மணக்கிறது... எங்கே என்று கேட்கிறீர்களா? புதுச்சேரி மாநிலம், காரைக்கால் நகரக் காவல் நிலையத்தில்!

ஆச்சர்யப்பட்டுப்போய், போலீஸாருக்கு இவ்வளவு கடவுள் பக்தியா என்று விசாரித்தால்... `பூஜைகளுக்குக் காரணம், பக்தி இல்லை, பயம்’ என்றார்கள். ஆம், எட்டு ஆண்டுகளுக்கு முன்னர் இறந்துபோன விநோதினி என்ற இளம்பெண்ணின் ஆவிக்கு பயந்துதான், மந்திரவாதிகளின் ஆலோசனைப்படி இந்த விஷயங்களைக் கடைப்பிடித்துவருகிறார்கள் அந்தக் காவல் நிலைய போலீஸார்.

காரைக்காலைச் சேர்ந்த பொறியியல் பட்டதாரி விநோதினி. அவரை சுரேஷ் என்பவர் ஒருதலையாகக் காதலித்தார். சுரேஷின் காதலை ஏற்றுக்கொள்ளாத விநோதினியின் மீது கோபமுற்ற சுரேஷ், 14.11.2012 அன்று, விநோதினியின்மீது ஆசிட்டை வீசினார். படுகாயமடைந்த நிலையில், மூன்று மாதங்கள் உயிருக்குப் போராடிவந்த விநோதினி, 12.02.2013 அன்று உயிரிழந்தார். அந்தச் சம்பவம் நாடு முழுவதும் பெரும் அதிர்வலைகளை எழுப்பியது.

இந்த வழக்கை விசாரித்த காரைக்கால் மாவட்ட நீதிமன்றம், 20.08.2013 அன்று, சுரேஷுக்கு ஆயுள் தண்டனையும் அபராதமும் விதித்து, தீர்ப்பளித்தது. ஆனாலும், இந்த வழக்கை விசாரித்த காரைக்கால் நகர காவல் நிலைய போலீஸார், சுரேஷ் தரப்புக்கு ஆதரவாகச் செயல்பட்டதாகக் குற்றச்சாட்டு எழுந்தது.

இதற்கிடையில், விநோதினியின் குடும்பத்துக்குப் பல தரப்பிலிருந்து ஒரு கோடி ரூபாய் அளவுக்கு நிதியுதவி கிடைத்தது. அதைவைத்து, விநோதினியின் பெயரில் ஒரு டிரஸ்ட் ஆரம்பித்தார், அவரின் தந்தை ஜெயபால். அந்த டிரஸ்ட்டை, தன் சகோதரி மகன் ரமேஷ், தன் மனைவி சரஸ்வதி ஆகியோருடன் இணைந்து நிர்வகித்துவந்தார் ஜெயபால். விநோதினி இறந்த ஒரே ஆண்டில் அவரின் தாயார் சரஸ்வதி தற்கொலை செய்துகொண்டார். அந்தத் தற்கொலை விவகாரத்தில் ரமேஷ் மீது சர்ச்சையைக் கிளப்பிவந்தார் ஜெயபால்.அடுத்தடுத்த மரணங்களால் மதுவுக்கு அடிமையான ஜெயபால், அவரது வீட்டில் மர்மமான முறையில் இறந்துகிடந்தார். இந்த மரணத்திலும் ரமேஷ் மீது பலரும் சந்தேகம் கிளப்பினர். அதிலிருந்து தப்புவதற்காக காரைக்கால் நகர போலீஸாரை ரமேஷ் நன்கு கவனித்ததாகவும் கூறப்படுகிறது. அடுத்த சில மாதங்களில் ரமேஷ், சென்னைக்குச் சென்று செட்டிலாகிவிட்டார்.

விநோதினி, சரஸ்வதி, ஜெயபால் ஆகிய மூவரின் மரண வழக்குகளையும் விசாரித்தது, காரைக்கால் நகரக் காவல் நிலைய போலீஸார்தான். அந்த வழக்குகளை அப்போதைய அதிகாரிகள் சரியாக விசாரணை செய்யாமல் விட்டுவிட்டதால், இன்னமும் விநோதினியின் ஆவி ஆத்திரத்துடன் அந்தக் காவல் நிலையத்தைச் சுற்றிவருவதாக அச்சத்தில் இருக்கிறார்கள் போலீஸார். அந்த ஆவியால் பல அமானுஷ்ய சம்பவங்கள் நிகழ்ந்திருப்பதாகவும் சொல்கிறார்கள்.

இந்தக் காவல் நிலையத்துக்குப் பொறுப்பேற்கும் அதிகாரிகள் யாரும் தொடர்ந்து பணியில் நீடிப்பதில்லை. ஏதாவதொரு காரணத்தால் உடனடியாக இடமாற்றம் செய்யப்படுகிறார்கள். அதனால், பலரும் இங்கு பணிக்கு வருவதற்கே தயங்குகிறார்கள். காரைக்கால் மாவட்டத்திலேயே அதிக நாள்களாக ஆய்வாளர், உதவி ஆய்வாளர் இல்லாமல் செயல்பட்ட காவல் நிலையம், நகரக் காவல் நிலையம்தான். இதற்கெல்லாம் காரணம், விநோதினியின் ஆவிதான் என்கிறார்கள்.

இது குறித்து காவல் நிலையத்தில் பணிபுரியும் போலீஸார் சிலரிடம் பேசினோம். “இந்தக் காவல் நிலையத்தில் வேலைபார்த்த புதுச்சேரியைச் சேர்ந்த துணை உதவி ஆய்வாளர் விபத்துக்குள்ளானார். அவரது கால் முறிந்து, நீண்ட நாள்கள் படுக்கையில் இருந்தார். எழுத்தர் ஒருவருக்கும் பைக் விபத்தில் கால் முறிந்தது. காவலர் ஒருவர் மனநல பாதிப்புக்குள்ளானார். அவர், ‘விநோதினியின் ஆவி, என்னை ஸ்டேஷனுக்குள் உட்கார விடாமல் அலையவிட்டது’ என்று சொல்லிவந்தார். அடுத்தடுத்து பல அதிகாரிகளுக்கும் ஏதோ ஒருவகையில் பிரச்னைகள் ஏற்பட்டு வந்ததால், ஒரு பூசாரியை வைத்துக் கடந்த ஏழு ஆண்டுகளாகப் பரிகார பூஜைகள் செய்துவருகிறோம்’’ என்றார்கள்.

பரிகார பூஜைகள் நடந்தாலும் இன்னமும் இந்த காவல் நிலையத்தில் பணிபுரியும் போலீஸார், விநோதினியின் ஆவி குறித்த அச்சத்துடன்தான் பணியாற்றிவருகிறார்கள். ஆனால், இங்கு விசாரணைக்கு வரும் மக்களுக்கோ, குற்றவாளிகளுக்கோ இதுவரை எந்தப் பிரச்னையும் ஏற்பட்டதில்லை என்கிறார்கள்.

மறுக்கப்படும் நியாயங்களைப்போல ஊளையிடுகிற, குற்றமுள்ள மனதைப்போல மிரட்டி உலுக்குகிற ஆவிகள் தனியே வேறு இருக்கின்றனவா என்ன?