Published:Updated:

மின்சாரம் தாக்கியதற்கான ஆதாரம் இல்லை! - ராம்குமார் மரணத்தில் அவிழும் மர்ம முடிச்சுகள்...

ராம்குமார் - சுவாதி
பிரீமியம் ஸ்டோரி
ராம்குமார் - சுவாதி

சிறையிலிருந்து மருத்துவமனைக்கு அழைத்துவரும் வழியில்தான் ராம்குமார் இறந்ததாக சிறை மருத்துவர்கள் சொன்னார்கள்.

மின்சாரம் தாக்கியதற்கான ஆதாரம் இல்லை! - ராம்குமார் மரணத்தில் அவிழும் மர்ம முடிச்சுகள்...

சிறையிலிருந்து மருத்துவமனைக்கு அழைத்துவரும் வழியில்தான் ராம்குமார் இறந்ததாக சிறை மருத்துவர்கள் சொன்னார்கள்.

Published:Updated:
ராம்குமார் - சுவாதி
பிரீமியம் ஸ்டோரி
ராம்குமார் - சுவாதி

ஐந்தாண்டுகளுக்கு முன்பு தமிழகத்தையே உலுக்கிய சுவாதி கொலை வழக்கில் கைதாகி, சிறையிலேயே தற்கொலை செய்துகொண்டதாகக் காவல்துறையால் சொல்லப்பட்ட ராம்குமார் மரணத்தில் திடீர் திருப்பம் ஏற்பட்டிருக்கிறது. சிறையில் மின்சார வயரைக் கடித்து தற்கொலை செய்துகொண்டதாக போலீஸ் தரப்பில் தெரிவிக்கப்பட்டிருந்த நிலையில், அது உண்மையில்லை என்று ஆதாரத்துடன் தகவல் வெளியாகியிருக்கிறது.

2016, ஜூன் மாதம் 24-ம் தேதி அதிகாலை சென்னை நுங்கம்பாக்கம் ரயில் நிலையத்தில் மென்பொறியாளர் சுவாதி கொடூரமாக வெட்டிப் படுகொலை செய்யப்பட்டார். காதல் விவகாரமே கொலைக்குக் காரணம் என்று கூறப்பட்டது. தமிழகத்தையே அதிரவைத்த இந்தக் கொலை வழக்கில், செங்கோட்டை அருகேயுள்ள மீனாட்சிபுரம் கிராமத்தைச் சேர்ந்த பரமசிவத்தின் மகன் ராம்குமார், ஜூலை 1-ம் தேதி கைதுசெய்யப்பட்டு சிறையில் அடைக்கப்பட்டார். முன்னதாக, ராம்குமாரைக் கைதுசெய்வதற்காக அவரது வீட்டுக்குச் சென்றபோதே, பிளேடால் தன் கழுத்தை அறுத்துத் தற்கொலை செய்துகொள்ள முயன்றதாகக் காவல்துறை தெரிவித்தது. அதற்கான சிகிச்சைகளுக்குப் பிறகு சென்னை புழல் சிறையில் அடைக்கப்பட்டார் ராம்குமார்.

ராம்ராஜ், பரமசிவன்
ராம்ராஜ், பரமசிவன்

ஒருபுறம், ராம்குமாருக்கு உரிய தண்டனை வழங்கப்பட வேண்டும் என்ற குரல்கள் ஒலிக்க, மறுபுறம் ‘இந்தக் கொலைக்கும் ராம்குமாருக்கும் சம்பந்தம் இல்லை’ என்ற வாதங்களும் முன்வைக்கப்பட்டன. இவ்வளவு சர்ச்சைகளுக்கு இடையில் 2016, செப்டம்பர் 18-ம் தேதி புழல் சிறையில் மின்சார வயரைக் கடித்து ராம்குமார் தற்கொலை செய்துகொண்டதாக போலீஸார் தெரிவித்தனர். இதையடுத்து சுவாதி கொலை வழக்கு விசாரணை முடிவுக்கு வந்ததாகவும் போலீஸ் தரப்பில் தெரிவிக்கப்பட்டது.

ஆனால், ‘‘ராம்குமார், சுவாதியைக் கொலை செய்திருக்க எப்படி வாய்ப்பில்லையோ... அதேபோல, ராம்குமார் தற்கொலை செய்திருக்கவும் வாய்ப்பே இல்லை’’ என்று ராம்குமாரின் பெற்றோரும், அவரின் வழக்கறிஞர் ராம்ராஜும் தொடர்ந்து வலியுறுத்திவந்தார்கள். இதையடுத்து, ராம்குமார் மரணம் தொடர்பான விசாரணை, மாநில மனித உரிமை ஆணையத்தில் நடந்துவந்தது. இந்தநிலையில்தான் சில நாள்களுக்கு முன்பு ராம்குமாரின் பிரேத பரிசோதனை அறிக்கை, மருத்துவர்களால் மாநில மனித உரிமை ஆணையத்தில் சமர்ப்பிக்கப்பட்டது. அந்த அறிக்கையும், மருத்துவர்கள் அளித்த சாட்சியங்களும்தான் தற்போது இந்த விவகாரத்தை மீண்டும் விஸ்வரூபம் எடுக்கவைத்திருக்கின்றன.

மின்சாரம் தாக்கியதற்கான ஆதாரம் இல்லை! - ராம்குமார் மரணத்தில் அவிழும் மர்ம முடிச்சுகள்...


மருத்துவர்கள் அளித்த சாட்சிகள் பற்றி நம்மிடம் விவரித்தார் ராம்குமாரின் வழக்கறிஞர் ராம்ராஜ்... ‘‘ராம்குமாரின் மூளை, இதயம், நுரையீரல், நாக்கு, கல்லீரல், மண்ணீரல், மேல் உதடு, கீழ் உதடு, சிறுநீரகம் ஆகிய உறுப்புகளின் திசுக்களை ஹிஸ்டோபேத்தாலஜி (Histopathology) நிபுணர்கள் ஆய்வுக்கு உட்படுத்தினார்கள். அதில், ராம்குமார் மின்சாரம் தாக்கி இறந்ததற்கான ஆதாரம் இல்லை என மருத்துவர் வேணு ஆனந்த்தும், மருத்துவர் ஆண்டாளும் மாநில மனித உரிமை ஆணையத்தில் நேரில் ஆஜராகி சாட்சியம் அளித்திருக்கிறார்கள். சிறையிலிருந்து மருத்துவமனைக்கு அழைத்துவரும் வழியில்தான் ராம்குமார் இறந்ததாக சிறை மருத்துவர்கள் சொன்னார்கள். ஆனால், அவசர சிகிச்சை மருத்துவரான அப்துல் காதரோ, ‘ராம்குமாரின் உடலில் மரண விரைப்பு ஏற்பட்டிருந்தது. அவர் 12 மணி நேரத்துக்கு முன்பாகவே இறந்திருக்க வேண்டும்’ என்று சாட்சியம் அளித்திருக்கிறார். இதன் மூலம், ராம்குமார் தற்கொலை செய்யவில்லை; அவர் கொலை செய்யப்பட்டிருக்கிறார் என்று ஆரம்பம் முதலே நாங்கள் சொல்லிவந்தது உண்மை என்று நிரூபணமாகியிருக்கிறது.

மின்சாரம் தாக்கியதற்கான ஆதாரம் இல்லை! - ராம்குமார் மரணத்தில் அவிழும் மர்ம முடிச்சுகள்...

உண்மையான குற்றவாளியைக் காப்பாற்றுவதற்காகத்தான் ராம்குமாரை காவல்துறையும் சிறைத்துறையும் இணைந்து கொலை செய்திருக்கின்றன. மருத்துவத்துறையும் அவர்களின் தவறுகளை மறைக்க உதவி புரிந்திருக்கிறது. ராம்குமாரின் மரணத்துக்குப் பிறகு உடலை போஸ்ட்மார்ட்டம் செய்தபோது எங்கள் சார்பில் ஒரு மருத்துவரை அனுமதிக்க வேண்டும் என்று கேட்டோம். ஆனால், நீதித்துறையும் அப்போது எங்களைக் கைவிட்டுவிட்டது. ஒருவேளை அனுமதித்திருந்தால் ஐந்தாண்டுகளுக்கு முன்பே உண்மை வெளியே வந்திருக்கும். சுவாதி கொலை வழக்கு மற்றும் ராம்குமார் மரணம் தொடர்பாக மீண்டும் விசாரணை நடத்த வேண்டும்’’ என்றார்.

“நான்தான் அப்போதே சொன்னேனே...” என்று தழுதழுத்தபடி பேசினார் ராம்குமாரின் தந்தை பரமசிவன். ‘‘என் மகன் கொலை செய்யப்பட்டதற்கு நீதியும் வேணும்; அதேசமயம், சுவாதியை யார் கொலை செஞ்சாங்கங்கிறதையும் கண்டுபிடிக்கணும். எனக்கும் ரெண்டு பெண் பிள்ளைகள் இருக்காங்க. என் மகன் கண்டிப்பா கொலை செய்யுற அளவுக்குப் போக மாட்டான்... தற்கொலை பண்ணிக்கிற அளவுக்கும் கோழையில்லை. அதைத்தான் நான் ஆரம்பத்துல இருந்து சொல்லிட்டு வர்றேன். அது இன்னைக்கு உண்மைனு நிரூபணம் ஆகியிருக்கு. என் மகனை நம்பித்தான் எங்க குடும்பமே இருந்துச்சு. எந்தப் பிடிமானமும் இல்லாம ரொம்பக் கஷ்டப்படுறோம். என் மகளுக்கு அரசு வேலை தர்றதா போன ஆட்சியில சொன்னாங்க. அஞ்சு வருஷம் ஆகியும் கொடுக்கலை. ஸ்டாலின் ஐயாகிட்ட மனு கொடுத்திருக்கோம். அவர்தான் உரிய நடவடிக்கை எடுக்கணும்’’ என்றார்.

கான்ஸ்டன்டைன் ரவீந்திரன்
கான்ஸ்டன்டைன் ரவீந்திரன்

இந்த விஷயத்தில் தமிழக அரசின் நிலைப்பாடு குறித்துத் தெரிந்துகொள்ள, தி.மு.க-வின் செய்தித் தொடர்பு இணைச் செயலாளர் கான்ஸ்டன்டைன் ரவீந்திரனிடம் பேசினோம். ‘‘ராம்குமார் தற்கொலை செய்துகொண்டு இறக்கவில்லையென்றால் ஏன் அப்படி அறிக்கை கொடுத்தார்கள்... அதற்கான அழுத்தத்தை யார் கொடுத்தார்கள்... இதற்குப் பின்னணியில் யார் இருக்கிறார்கள் என்பது குறித்தெல்லாம் விசாரிக்கப்படும். எது நியாயமோ, அதை இந்த அரசு நிச்சயமாகச் செய்யும்’’ என்றார் உறுதியாக.

ராம்குமாரின் குடும்பத்துக்குத் தேவை நீதி மட்டுமல்ல... அரசின் உதவிக்கரங்களும்தான்!