Published:Updated:

மலைக்கவைக்கும் மருந்து கொள்முதல் கொள்ளை! - இ.எஸ்.ஐ மீது அதிரவைக்கும் குற்றாச்சாட்டு

மருந்து கொள்முதல் கொள்ளை
பிரீமியம் ஸ்டோரி
மருந்து கொள்முதல் கொள்ளை

இ.எஸ்.ஐ திட்டத்தில் சுமார் 40 லட்சம் தொழிலாளர்களையும், அவர்களின் குடும்பத்தினரையும் சேர்த்தால், சுமார் ஒரு கோடி பேர் பலனடைகிறார்கள்.

மலைக்கவைக்கும் மருந்து கொள்முதல் கொள்ளை! - இ.எஸ்.ஐ மீது அதிரவைக்கும் குற்றாச்சாட்டு

இ.எஸ்.ஐ திட்டத்தில் சுமார் 40 லட்சம் தொழிலாளர்களையும், அவர்களின் குடும்பத்தினரையும் சேர்த்தால், சுமார் ஒரு கோடி பேர் பலனடைகிறார்கள்.

Published:Updated:
மருந்து கொள்முதல் கொள்ளை
பிரீமியம் ஸ்டோரி
மருந்து கொள்முதல் கொள்ளை

கொரோனா என்ற கொடிய நோயால் உலகமே அல்லோலகல்லோலப்பட்டுக்கொண்டிருக்கும் நிலையில், தமிழகத்தில் ஒருசில அரசியல்வாதிகளும் அதிகாரிகளும் கொரோனாவை பணம் கொழிக்கும் அட்சய பாத்திரமாக மாற்றிவிட்டார்கள். கொரோனா முதல் அலையின்போது உணவு மற்றும் தங்கும் விடுதிகள் தொடர்பாக நடந்த ஊழல் முறைகேடுகள் குறித்து, ‘மிரளவைக்கும் கொரோனா கொள்ளை!’ என்ற தலைப்பில் 20.6.2021 தேதியிட்ட ஜூ.வி இதழில் அட்டைப்படக் கட்டுரை வெளியிட்டோம். அதையடுத்து, அதே காலகட்டத்தில் இ.எஸ்.ஐ தொழிலாளர்களுக்கான மருந்து கொள்முதலிலும் மிகப்பெரிய ஊழல் நடந்திருப்பதாக ஜூ.வி-க்கு பிரத்யேகமாகப் புகார்களும் ஆவணங்களும் வரவே, விசாரணையில் இறங்கினோம்.

மலைக்கவைக்கும் மருந்து கொள்முதல் கொள்ளை! - இ.எஸ்.ஐ மீது அதிரவைக்கும் குற்றாச்சாட்டு

ஊழலின் ஊற்றுக்கண்!

மத்திய தொழிலாளர் நலத்துறையின் கீழ் நாடு முழுவதும் தொழிலாளர் காப்பீடு கழகம் இயங்கிவருகிறது. டெல்லியிலுள்ள மருத்துவ சேவைக் காப்பீடு இயக்குநரகம்தான் (டி.ஐ.எம்.எஸ்) இதற்கான தலைமையிடம். தமிழகத்திலுள்ள தொழிலாளர் காப்பீடு கழக நிறுவனம், மக்கள் நல்வாழ்வுத்துறையின் ஓர் அங்கமாகவே செயல்பட்டுவருகிறது. இங்குதான் மருந்து கொள்முதலில் ஊழல் நடைபெற்றிருப்பதாக தமிழ்நாடு மருந்தாளுநர்கள் சங்கத்தைச் சேர்ந்த சிலர் நம்மிடம் விவரித்ததுடன், அது தொடர்பாக சில ரசீது ஆவணங்களையும் கொடுத்தார்கள்...

“மத்திய தொழிலாளர் நலத்துறை, ஒவ்வொரு மாநில இ.எஸ்.ஐ பிரிவுக்கும் மருந்துகள் வாங்குவதற்கான தொகையை மட்டும் அளித்துவிட்டு ஒதுங்கிக்கொள்ளும். மாநில இ.எஸ்.ஐ பிரிவுதான் மருந்துகளைக் கொள்முதல் செய்யும். ஆரம்பத்தில் நேரடியாக மாநில இ.எஸ்.ஐ பிரிவுகளே மருந்துகளைக் கொள்முதல் செய்துவந்தன. இதில் சில மருந்து நிறுவனங்களும், மருந்து விநியோகஸ்தர்களும் தலையிட்டதால், ஊழல் நடக்கக் கூடாது என்பதற்காக, ‘மக்கள் நல்வாழ்வுத்துறையின் கீழ் செயல்படும் தமிழ்நாடு மருத்துவ சேவைக் கழகத்தின் ஒப்புதலைப் பெற்றே மருந்து கொள்முதல் செய்ய வேண்டும்’ என்று மறைந்த கருணாநிதி முதல்வராக இருந்தபோது அரசாணை வெளியிட்டார். அதன்படிதான் ஒவ்வோர் ஆண்டும் தமிழக மக்கள் நல்வாழ்வுத்துறை, தமிழ்நாடு மருத்துவ சேவைக் கழகம், இ.எஸ்.ஐ ஆகிய மூன்று துறைகளும் இணைந்தே மருந்து கொள்முதல் செய்கின்றன.

அவ்வாறு கொள்முதல் செய்யும்போது தேவைக்கேற்ப ‘இந்த மருந்துக்கு அதிக தேவையுள்ளது, இது தேவை குறைவானது, இதை ஏற்கெனவே வாங்கிவிட்டீர்கள்’ என்று கிடுக்குப்பிடிபோட்டு, தேவையுள்ள மருந்துகளை சரியான அளவில் வாங்குவதற்கு மட்டுமே மருத்துவ சேவைக் கழகம் ஒப்புதலைக் கொடுக்க வேண்டும். ஆனால், அப்படி ஆட்சேபனையில்லாமல் கையெழுத்திடுவதற்கு மருத்துவ சேவைக் கழகத்திலுள்ள சில அதிகாரிகள் ‘கமிஷன்’ பெற்றுக்கொண்டு, ஊழலுக்குத் துணை போயிருக்கிறார்கள்.

மலைக்கவைக்கும் மருந்து கொள்முதல் கொள்ளை! - இ.எஸ்.ஐ மீது அதிரவைக்கும் குற்றாச்சாட்டு

தேவை குறைவான மருந்துகள் அதிகம்... தேவையுள்ள மருந்துகள் குறைவு!

இ.எஸ்.ஐ திட்டத்தில் சுமார் 40 லட்சம் தொழிலாளர்களையும், அவர்களின் குடும்பத்தினரையும் சேர்த்தால், சுமார் ஒரு கோடி பேர் பலனடைகிறார்கள். இவர்களுக்காக, கடந்த ஆண்டு 218.85 கோடி ரூபாய்க்கு மருந்துகள் கொள்முதல் செய்யப்பட்டுள்ளன. இவற்றில், சர்க்கரை, இதயம், ஆஸ்துமா, நியூரோ, மகப்பேறு உள்ளிட்ட மிக முக்கியமான நோய்களுக்கான மருந்துகள் வெறும் 2.78 கோடி ரூபாய்க்கு மட்டுமே கொள்முதல் செய்யப்பட்டுள்ளன. மொத்த கொள்முதலில் இவை வெறும் ஆறு சதவிகிதம் மட்டுமே. ஆனால், தேவை குறைவான மருந்துகள்தான் அதிகம் கொள்முதல் செய்யப்பட்டுள்ளன.

உதாரணத்துக்கு, ‘டைக்ளோஃபெனாக் ஸ்ப்ரே’ எனப்படும் காயத்துக்கான ஸ்ப்ரே மருந்து மட்டுமே 25 கோடி ரூபாய்க்கு வாங்கப்பட்டுள்ளது. இது போக, தனியாக இதே மருந்தின் தன்மை கொண்ட வலி நிவாரணி மருந்துகள் 5.55 கோடி ரூபாய்க்கு வாங்கப்பட்டிருக்கின்றன. மல்டி வைட்டமின் சிரப், மாத்திரைகள், ஊசிகள் மட்டுமே 16.25 கோடி ரூபாய்க்குக் கொள்முதல் செய்யப்பட்டுள்ளன. இருமலுக்கான திரவ மருந்துகள் 13.85 கோடி ரூபாய்க்கும், கால்ஷியம் மருந்துகள் 14.71 கோடி ரூபாய்க்கும் கொள்முதல் செய்யப்பட்டிருக்கின்றன. இப்படி, தேவை குறைவான மருந்துகளின் கொள்முதல் பட்டியல் நீள்கிறது” என்றவர்கள், இதன் பின்னாலிருக்கும் தனியார் மருந்து நிறுவனங்களின் லாபி மற்றும் ‘கமிஷன்’ விவரங்களை விவரித்தார்கள்...

மா.சுப்பிரமணியன்
மா.சுப்பிரமணியன்

ஐந்து நிறுவனங்களின் ஆட்டம்!

“தேவை குறைவான மருந்துகளை ஏன் இவ்வளவு தொகை கொடுத்து வாங்குகிறார்கள் என்ற கேள்வி எழலாம். இத்தகைய மருந்துகளில்தான் ‘கமிஷன்’ அதிகமாகக் கொடுக்கிறார்கள். ஒவ்வொரு மருந்து நிறுவனம் சார்பிலும் கொள்முதலுக்குத் துணை நிற்பவர்களுக்குப் பெரும் தொகையை அள்ளிக் கொடுக்கிறார்கள். இந்த மருந்துகளை விநியோகம் செய்ய, குறிப்பிட்ட ஐந்து நிறுவனங்கள் மட்டுமே உரிமையைப் பெற்றிருக்கின்றன. இந்த ஐந்து நிறுவனங்களில், மூன்று நிறுவனங்களை வட மாநிலத்தைச் சேர்ந்த ஒருவரே நடத்துகிறார். ஒரு நிறுவனத்தை நேரடியாகத் தனது கன்ட்ரோலில் வைத்துக்கொண்டு, மீதமுள்ள இரண்டு நிறுவனங்களை பினாமி பெயரில் அதே நபர் நடத்திவருகிறார்.

மீதமுள்ள இரண்டு நிறுவனங்களில் ஒன்று, சர்ச்சை சாமியாரின் பெயர்கொண்ட ஒருவருடையது. இன்னொன்று, கடந்த ஆட்சியில் பவர்ஃபுல் அமைச்சராக இருந்த ஒருவரின் உதவியாளர் தன் பினாமியைக் கொண்டு நடத்தும் நிறுவனம். இந்த ஐந்து நிறுவனங்கள்தான் தமிழக இ.எஸ்.ஐ-க்கான மருந்துகளைத் தொடர்ச்சியாக சப்ளை செய்துவருகின்றன. சென்னையிலுள்ள இ.எஸ்.ஐ இயக்குநர் அலுவலகம் மற்றும் சென்னை, சேலம், மதுரை, கோவை என மண்டல அலுவலகங்களில் பணிபுரியும் முக்கிய அதிகாரிகள் பலர், இந்த முறைகேடுகளுக்குத் துணைபோயிருக்கிறார்கள்.

விஜயபாஸ்கர்
விஜயபாஸ்கர்

சிக்குவது எத்தனை பேர்?

தற்போது தமிழக முதல்வரிடம் பணியாற்றும் ஓர் அதிகாரிதான் முன்பு மருத்துவ சேவைக்கழகத்தில் உச்ச பதவியில் இருந்தார். கொடுக்கப்படும் பேப்பர்களில் கையெழுத்து போடுவது மட்டுமே அவரது வேலை. அடுத்து, தமிழ்நாடு இ.எஸ்.ஐ பிரிவிலுள்ள அசோகவன அதிகாரி, ‘ஏழுமலையான்’ பெயர்கொண்ட அதிகாரி, மருத்துவ சேவை கழகத்தில் எல்லாமுமாக இருந்த தமிழ்க்கடவுள் பெயர்கொண்ட அதிகாரி ஒருவர், கடந்த ஆட்சியின் பவர்ஃபுல் அமைச்சரின் உதவியாளர் ஒருவர் ஆகியோர்தான் இந்த ஊழலில் சம்பந்தப்பட்டிருக்கிறார்கள். மேற்கண்ட 218.75 கோடி ரூபாய் மருந்து கொள்முதல் என்பது கடந்த ஆண்டு கொரோனா காலகட்டத்தில் மேற்கொள்ளப்பட்டது மட்டுமே. இதேபோல கடந்த ஆட்சியின் ஐந்தாண்டுகளிலும் சேர்த்து, சுமார் 1,000 கோடி ரூபாய்க்கும் மேல் இவ்வாறு மருந்து கொள்முதல் செய்யப்பட்டு, பல நூறு கோடிகள் கமிஷன் தொகை விளையாடியிருக்கிறது’’ என்று விரிவாகச் சொன்னார்கள்.

தமிழ்நாடு இ.எஸ்.ஐ அட்மின் இன்சார்ஜ் பதவியிலிருக்கும் கோவிந்தராஜனிடம் மேற்கண்ட குற்றச்சாட்டுகள் பற்றிக் கேட்டோம். ‘‘நான் இங்கு வேலை செய்யும் சாதாரண அதிகாரி. கையெழுத்திடுவதில் எனக்கும் பங்குண்டு என்றபோதும் முடிவெடுக்கும் அதிகாரம் எனக்கில்லை. மருந்து கொள்முதல் உள்ளிட்ட அத்தனை முடிவுகளையும் முன்பு பொறுப்பிலிருந்த இரு ஐ.ஏ.எஸ் அதிகாரிகள்தான் மேற்கொண்டார்கள். துறையில் பணியாற்றும் சிலர் என்மீதான காழ்ப்புணர்ச்சியால் இப்படியான புகார்களைக் கிளப்பிவருகிறார்கள். தமிழக அரசு சார்பில் விஜிலென்ஸிலும் இது பற்றி விசாரித்தார்கள். இந்தக் குற்றச்சாட்டில் துளியும் உண்மையில்லை’’ என்றார்.

இந்த ஊழல் விவரங்களை மக்கள் நல்வாழ்வுத்துறை அமைச்சர் மா.சுப்பிரமணியனிடம் எடுத்துச் சென்றோம். ‘‘கடந்த ஆட்சியில் சுகாதாரத்துறையில் நடந்த ஊழல்கள் மற்றும் முறைகேடுகளை ஆராய்ந்துவருகிறோம். நீங்கள் சொல்லும் இ.எஸ்.ஐ மருந்து கொள்முதல் முறைகேடு பற்றிப் புகார்கள் வந்திருக்கின்றனவா என்று விசாரிக்கிறேன். நீங்களும் சம்பந்தப்பட்டவர்களிடம் புகார் கொடுக்கச் சொல்லுங்கள், நிச்சயம் விசாரித்து நடவடிக்கை எடுக்கப்படும்’’ என்றார்.

மேற்கண்ட மருந்து கொள்முதல் நடந்தபோது சுகாதாரத்துறை அமைச்சராக இருந்த சி.விஜயபாஸ்கரிடம் விளக்கம் கேட்க பலமுறை தொடர்பு கொண்டும், நமது அழைப்பை அவர் ஏற்கவில்லை. தொடர்ந்து, mlaviralimalai@tn.gov.in என்கிற அவரது மின்னஞ்சல் முகவரிக்கு விளக்கம் கேட்டு மின்னஞ்சல் அனுப்பியிருக்கிறோம்.

குற்றச்சாட்டுகள் தொடர்கதை!

இ.எஸ்.ஐ மருந்து கொள்முதலில் மட்டுமன்றி, முன்னாள் அமைச்சரின் உதவியாளர் இன்னும் ஏகப்பட்ட முறைகேடுகளில் சிக்கியிருக்கிறார் என்கிறார்கள். 31.12.2019 முதல் 11.12.2020 வரை ஒரு வருடத்தில் மட்டும் ‘அம்மா ஊட்டச்சத்து பெட்டகம்’ மற்றும் ‘அம்மா குழந்தைகள் நலப்பெட்டகம்’ ஆகிய திட்டங்களுக்குப் பொருள்கள் வாங்கியதில் கமிஷன் மட்டுமே 19,79,58,700 ரூபாய் பெற்றிருக்கிறார். நடிகர் நடத்திவரும் கட்சியில் முக்கியப் பொறுப்பிலிருக்கும் ‘நிலவு’ பிரமுகர் நடத்திவரும் நிறுவனம், அமெரிக்க ராக்கெட் பெயரைக்கொண்ட ஒரு நிறுவனம் என இரண்டு நிறுவனங்கள்தான் முன்னாள் அமைச்சரின் உதவியாளருக்கு நெருக்கமாக இருந்து காரியத்தைச் சாதித்துக்கொண்டிருக்கின்றன.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism