Published:Updated:

ரூ.31,000 கோடி மோசடி... மாயமான ‘கிரிப்டோ ராணி’... FBI-ன் ‘மோஸ்ட் வான்டட்’ குற்றவாளியான ரூஜா!

சகோதரருடன் ரூஜா இக்னடோவா
பிரீமியம் ஸ்டோரி
சகோதரருடன் ரூஜா இக்னடோவா

பல்கேரியாவில் தொடங்கப்பட்ட `ஒன்காயின்’ கிரிப்டோகரன்சி நிறுவனத்தின் நிறுவனர்தான் இந்த ரூஜா

ரூ.31,000 கோடி மோசடி... மாயமான ‘கிரிப்டோ ராணி’... FBI-ன் ‘மோஸ்ட் வான்டட்’ குற்றவாளியான ரூஜா!

பல்கேரியாவில் தொடங்கப்பட்ட `ஒன்காயின்’ கிரிப்டோகரன்சி நிறுவனத்தின் நிறுவனர்தான் இந்த ரூஜா

Published:Updated:
சகோதரருடன் ரூஜா இக்னடோவா
பிரீமியம் ஸ்டோரி
சகோதரருடன் ரூஜா இக்னடோவா

அமெரிக்க உளவுத்துறையான FBI-ன் `மோஸ்ட் வான்டட்’ குற்றவாளிகளின் ‘டாப் 10’ பட்டியலில், இணைந்திருக்கிறார் பல்கேரியாவைச் சேர்ந்த ரூஜா இக்னடோவா. கொலைகாரர்கள், கேங் லீடர்கள் அடங்கிய பட்டியலில் இடம்பெற்றிருக்கும் இந்த ரூஜா கொலைகாரருமில்லை, கேங் லீடரும் இல்லை. பத்துப் பேரில் இவர் மட்டுமே பெண்.

FBI வலைவிரித்துத் தேடும் அளவுக்கு என்ன செய்தார் ரூஜா?

யார் இந்த ரூஜா இக்னடோவா?

பல்கேரியாவில் தொடங்கப்பட்ட `ஒன்காயின்’ கிரிப்டோகரன்சி நிறுவனத்தின் நிறுவனர்தான் இந்த ரூஜா. 1980-ம் ஆண்டு பல்கேரியாவில் பிறந்த ரூஜா, ஆக்ஸ்ஃபோர்டு பல்கலைக்கழகத்தில் சட்டம் பயின்றார். உலகின் மிகப்பெரிய மேனேஜ்மென்ட் கன்சல்ட்டிங் நிறுவனமான `McKinsey & Company’-ல் சில காலம் வேலை செய்திருக்கிறார். 2014-ம் ஆண்டு, `ஒன்காயின்’ என்ற நிறுவனத்தைத் தொடங்கினார் ரூஜா. ‘பிட்காயினை’ப் போன்ற மெய்நிகர் நாணயம்தான் இந்த ‘ஒன்காயின்.’ இந்த நிறுவனத்தைத் தொடங்கும்போது, `பிட்காயினை, இந்த ஒன்காயின் ஒழித்துக்கட்டும்’ என்று சொன்ன ரூஜாவை, கிரிப்டோகரன்சியைப் பயன்படுத்துவோர் ‘கிரிப்டோ ராணி’ என்று கொண்டாடினர்.

ரூ.31,000 கோடி மோசடி... மாயமான ‘கிரிப்டோ ராணி’... FBI-ன் ‘மோஸ்ட் வான்டட்’ குற்றவாளியான ரூஜா!

2016-ம் ஆண்டு நடந்த ‘ஒன்காயின்’ நிறுவனத்தின் இரண்டாம் ஆண்டு விழா கொண்டாட்டத்தில் பேசிய ரூஜா, ``இன்றைய தேதிக்கு நம்மிடம் 20 லட்சம் பயனாளர்கள் இருக்கின்றனர். வேறெந்த கிரிப்டோகரன்சி நிறுவனத்திடமும் இத்தனை பயனாளர்கள் இல்லை’’ என்று மெச்சிக்கொண்டார். `ஒன்காயின் மிகவும் வெளிப்படைத்தன்மை வாய்ந்தது; சட்டபூர்வமானது’ என்று ரூஜா அடிக்கடி சொல்லிவந்திருக்கிறார். ஆனாலும் அது சட்டபூர்வமானது என்பதை பல்கேரியா உட்பட எந்த அரசும் அறிவிக்கவில்லை.

அமெரிக்காவிலிருந்து நிறைய பேர் இவரது ஒன்காயினில் முதலீடு செய்யவே, இவரது பரிவர்த்தனைகளை கவனிக்கத் தொடங்கியது அமெரிக்க உளவு நிறுவனமான FBI. அதில் பலத்த சந்தேகம் ஏற்பட 2017-ம் ஆண்டு, அக்டோபர் 12 அன்று முதன்முறையாக ரூஜா மீது மோசடி வழக்கு பதிந்து, அவரைக் கைதுசெய்யத் தயாரானது FBI. இதையடுத்து, அக்டோபர் 25-ம் தேதி பல்கேரியா தலைநகர் சோஃபியாவிலிருந்து கிரீஸ் நாட்டுக்குப் பறந்த ரூஜா, அதன் பிறகு எங்கு சென்றார் என்பது இன்று வரை மர்மமாக இருக்கிறது.

என்ன மோசடி செய்தார் ரூஜா?

ஒன்காயின் நிறுவனத்தில் முதலீடு செய்யப்பட்ட பணத்தைச் சுருட்டிக்கொண்டு தப்பிவிட்டார் என்பதுதான் ரூஜா மீதான அடிப்படைக் குற்றச்சாட்டு. `வொயிட் காலர் க்ரைம்’ எனக் கருதப்படும் செக்யூரிட்டி மோசடிகளில் பல நூதன வழிமுறைகளைக் கையாண்டு முதலீட்டாளர்களின் பணத்தைச் சுருட்டியிருக்கிறார் ரூஜா. ஆன்லைன் பணப் பரிவர்த்தனைகளிலும் மோசடிகளைச் செய்திருக்கிறார். டெலிகம்யூனிகேஷனைப் பயன்படுத்தியும் பல்வேறு மோசடிகளில் ஈடுபட்டிருக்கிறார்.

``உலகம் முழுக்க கிரிப்டோகரன்சிகள் ‘பிளாக்செயின்’ என்ற முறைப்படி கணக்கில் வைத்துக்கொள்ளப்படுகின்றன. ஆனால், இந்த ஒன்காயின், பிளாக்செயின் முறையைப் பின்பற்றாமல் பாதுகாப்பற்ற வகையில் செயல்படுத்தப்பட்டிருக்கிறது. பிட்காயின் உள்ளிட்ட சில கிரிப்டோகரன்சிகளைக் கொண்டு சில நாடுகளில் பொருள்கள் வாங்கலாம். ஆனால், இந்த ஒன்காயின் மூலம் எங்கும், எதுவும் வாங்க முடியாது. இது மதிப்பற்ற ஒரு கிரிப்டோகரன்சியாகவே இருந்திருக்கிறது. முதலீட்டாளர்களை நம்பவைத்து ஏமாற்றியிருக்கிறார் ரூஜா’’ என்று FBI அதிகாரிகள் சர்வதேச ஊடகங்களுக்குப் பேட்டியளித்திருக்கின்றனர்.

சகோதரருடன் ரூஜா இக்னடோவா
சகோதரருடன் ரூஜா இக்னடோவா

காதல்... தலைமறைவு... ரூ.31,000 கோடி மோசடி!

ரூஜா தலைமறைவான பிறகு, ஒன்காயின் நிறுவனத்தை அவரின் சகோதரர் கான்ஸ்டன்டின் இக்னடோவாதான் (Konstantin Ignatova) கவனித்துவந்தார். 2019-ல் ஒன்காயின் நிறுவனம் செய்த மிகப்பெரிய மோசடிகள் வெளிச்சத்துக்கு வர, கான்ஸ்டன்டின் கைதுசெய்யப்பட்டார். பல்வேறு மோசடிகளில் குற்றத்தை ஒப்புக்கொண்ட அவர், ``2017-ல் ரூஜா, அமெரிக்காவின் ஃபுளோரிடாவில் ஒரு அப்பார்ட்மென்ட் வாங்கி, அவரின் காதலருடன் தங்கியிருந்தார். ரூஜாவின் காதலன், FBI-க்கு ஒத்துழைப்பதை அறிந்ததும் மனமுடைந்து, சில வாரங்களில் தலைமறைவாகிவிட்டார்’’ என்று கூறினார்.

ரூஜா, முதலீட்டாளர்களிடமிருந்து 4 பில்லியன் அமெரிக்க டாலர் (சுமார் ரூ.31,000 கோடி) அளவுக்கான பணத்தைச் சுருட்டியிருக்கிறார் என்று சமீபத்தில் கண்டறிந்திருக்கிறது FBI. இதையடுத்து கடந்த வாரம், ரூஜாவை அதிகம் தேடப்படும் டாப் 10 குற்றவாளிகளின் பட்டியலில் சேர்த்திருக்கிறது. `இவரைப் பற்றித் தகவல் கொடுப்பவருக்கு, வெகுமதியாக 1,00,000 அமெரிக்க டாலர் (சுமார் ரூ.80 லட்சம்) வழங்கப்படும்’ என்றும் FBI அறிவித்திருக்கிறது.

``இந்தப் பாதுகாப்பற்ற கிரிப்டோகரன்சிகளில் பணம் போடுகிறவர்கள், ரூஜா போன்ற மோசடிக்காரர்களின் கதையை அறிந்துகொண்ட பிறகாவது விழித்துக்கொள்ள வேண்டும்’’ என்கிறார்கள் பொருளாதார வல்லுநர்கள்.

****

இந்தியாவிலும் ரூஜா மீது வழக்கு!

அமெரிக்கா மட்டுமல்லாமல், பல்கேரியா, ஐக்கிய அரபு அமீரகம், நார்வே, இத்தாலி உள்ளிட்ட பல்வேறு நாடுகளிலும் ரூஜா மீது வழக்குகள் பதியப்பட்டிருக்கின்றன. இந்தியாவிலுள்ள பலரும் ‘ஒன்காயின்’ நிறுவனத்தில் முதலீடு செய்ததை அடுத்து, இந்தியப் புலனாய்வு நிறுவனங்கள்கூட ‘ஒன்காயின்’ நிறுவனத்தின்மீது வழக்கு பதிவுசெய்திருக்கின்றன. 2017-ம் ஆண்டு நவி மும்பையிலுள்ள காவல் நிலையத்தில், ரூஜா மீது வழக்கு பதியப்பட்டது.