ஐடியா அய்யனாரு!

சி ல மாதங்களுக்கு முன்பு, ‘‘தமிழ்த் திரையுலகின் சூப்பர் ஸ்டார் இனிமே சிலம்பரசன்தான்’’ என்று சொல்லிவிட்டு ‘புவாஹா’ சிரிப்பைப் போட்டார் சீமான். இடையில் என்ன ஆனதோ ஏது ஆனதோ...‘‘படப்பிடிப்புக்கு சரியான நேரத்தில் சிம்பு செல்வதில்லை. தமிழகத்தின் அடுத்த சூப்பர் ஸ்டார் விஜய்தான்’’ என்று, பருத்தி மூட்டையை மீண்டும் குடோனிலேயே வைத்துவிட்டார் சீமான். எப்படியும் பருத்தி மூட்டையை மீண்டும் தென்னந்தோப்புக்கே மாற்ற மறுபடியும் முயற்சிப்பார். அதனால், தமிழ் நடிகர்களில் யார் யாருக்கெல்லாம் அடுத்த சூப்பர் ஸ்டார் ஆகும் தகுதியிருக்கிறது என அவர் வழியில் சில ஐடியாக்கள். நோட் பண்ணிக்கோங்கண்ணே...

‘‘சிம்பு அடுத்த சூப்பர் ஸ்டாராக மாறுவதற்கான தகுதிகளில் ஒன்று, அவருக்கு சினிமாவில் உள்ள எல்லா துறைகளைப் பற்றியும் தெரிந்திருப்பது’’ என்கிறார் சீமான். இதன் அடிப்படையில் பார்த்தால், புரொடக்ஷனில் ஆரம்பித்து போஸ்டர் ஒட்டுவது, தியேட்டரில் பாப்கார்ன் விற்பது வரை எல்லா வேலைகளையும் ஒற்றை ஆளாகவே செய்து முடிக்கும் வல்லமை படைத்த டி.ஆரை, சீமான் எப்படி மறந்தார் எனத் தெரியவில்லை. ‘அட்டகாசமான புலி, அசராத புலி, அடங்காத புலி’ என ஆல்ரெடி டி.ஆரும் கொஞ்சம் நெருங்கி வந்திருப்பதால், சீமான் கொஞ்சம் சிந்தித்துப்பார்க்கலாம்.

. ‘‘நேரத்துக்கு ஷூட்டிங் வந்தாலே பாதிப் பிரச்னை முடிந்துவிடும்’’ என்கிறார் சீமான். வெள்ளிக்கிழமை விமல், இதற்கு சரியான மாற்றாக இருப்பார். சரியான நேரத்துக்கு அவர் ஷூட்டிங் சென்றதால்தான், உள்ளம் மகிழ, உடலும் குளிர, வாராவாரம் ஆரவாரத்தோடு படம் ரிலீஸ் பண்ண முடிந்தது. விமலும் சும்மா இல்லை... டி.ஆர் `புலி’ வசனம் பேசியிருக்கிறார் என்றால், விமல் `புலிவால்’ என்ற படமே நடித்திருக்கிறார். புலிக்குப் புலி வாலாக, அண்ணனுக்குப் போர்வாளாக தமிழ் சினிமாவை விமல் திருப்பிப்போடுவார் என, அண்ணன் சீமான் நம்பிக்கை வைக்க வேண்டும்.

. கடைசி அஸ்திரம் வேறு யாருமல்ல... சீமானேதான்! ஏற்கெனவே, ‘மாயாண்டி குடும்பத்தார்’ படத்தில் கலக்கியெடுத்திருப்பார். இப்போதுகூட, `தவம்’ என்ற படத்தில் சிலம்பமெல்லாம் சுற்றி, `நானே ஒரு சிலம்பரசன்டா!’ என நிரூபித்திருக்கிறார். அது, `தவம்’ படத்தின் டிரெய்லரைப் பார்க்கும்போதே தெரிகிறது. நடிப்பு என்பது மாபெரும் தவம். அது சீமானுக்கு வாய்த்திருக்கிறது. ‘வாய்ப்பில்லை ராஜா’ என ஒதுங்காமல், ‘திங்க்’ பண்ணிப்பார்க்கலாம். சீமானுக்கு சூப்பர் ஸ்டார் ஆகும் விருப்பமில்லை என்றால், கூடவே சுற்றும் கூப்பிட்ட குரலுக்கு ஓடோடிவரும் கூல் சுரேஷையாவது ட்ரை பண்ணலாம்.