Published:Updated:

நுகர்வோர் பிரச்னைகளுக்குத் தீர்வு..! - வழிகாட்டும் மன்றங்கள்..!

நுகர்வோர்
பிரீமியம் ஸ்டோரி
News
நுகர்வோர்

கடைக்குச் சென்று ஒரு ரூபாய் கொடுத்து சாக்லேட் வாங்கினால்கூட அவர் நுகர்வோர்தான்!

நுகர்வோர்கள் சந்திக்கும் பிரச்னைகள் தொடர்பாக `நுகர்வோர் கோர்ட்டில் வழக்கு தொடர்வது எப்படி?’ என்ற ஆன்லைன் நிகழ்ச்சியை நாணயம் விகடன் நடத்தியது. இந்த நிகழ்ச்சியில் சிட்டிசன் கன்ஸ்யூமர் அண்ட் சிவிக் ஆக்‌ஷன் குரூப் அமைப்பின் நுகர்வோர் பாதுகாப்பு பிரிவு இயக்குநர் எஸ்.சரோஜா கலந்துகொண்டு சிறப்புரையாற்றினார். இந்த நிகழ்ச்சியில் அவர் பேசியதாவது...

யார் நுகர்வோர்?

ஒரு பொருளையோ, ஒரு சேவையையோ ஒருவர் விலை கொடுத்து வாங்கும்போது நுகர்வோர் ஆகிறார். கடைக்குச் சென்று ஒரு ரூபாய் கொடுத்து சாக்லேட் வாங்கினால்கூட அவர் நுகர்வோர்தான். 18 வயதுக்குக்கீழ் உள்ளவர்கள் பொருள்கள் வாங்கும்போது அவருடைய பெற்றோரோ, பாதுகாவலரோ குழந்தைகளின் சார்பாக நுகர்வோராகக் கருதப்படுவார்கள்.

நுகர்வோர் பிரச்னைகளுக்குத் தீர்வு..! - வழிகாட்டும் மன்றங்கள்..!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

நுகர்வோருக்கான பிரச்னைகள்

முழுமையான, தேவையான தகவல்கள் நுகர்வோருக்குக் கிடைப்பதில்லை. முறையற்ற வணிகம் அதாவது, பொருள்களை வாங்கும்போது அளவுகளில் ஏமாற்றுதல், விளம்பரங்களின் வழியாக ஏமாற்றுதல், தரம் இல்லாத பொருள்கள், பாதுகாப்பு இல்லாத பொருள்கள், போலி பொருள்கள் ஆகியவற்றை விற்பது, முறையான பில் கொடுக்காமல் இருப்பது, பணம் செலுத்தியும் சேவை வழங்காமல் இருப்பது, பொருளை வாங்கிய பிறகு,

அதில் பிரச்னை ஏற்படும்போது தீர்வு தராமல் அலைக்கழிப்பது, ரீஃபண்ட் அல்லது ரீபிளேஸ்மென்ட் கிடைக்காமல் இருப்பது, பொருள்களுக்கான இன்ஷூரன்ஸ் பிரச்னைகள் போன்ற பல்வேறு பிரச்னைகளைத் தினமும் நுகர்வோர்கள் சந்தித்து வருகின்றனர்.

பொருள்களை வாங்கும் முன் செய்ய வேண்டியது...

பொருள்களை வாங்குவதற்கு முன் என்ன தேவை என்பதை உணர வேண்டும். ஏனெனில், தேவைக்கு அதிகமான நுகர்வு தற்போது உள்ளது. வாங்கும் பொருள்களைக் குறித்த அனைத்துத் தகவல்களையும் தெரிந்துகொள்ள வேண்டும். ஆன்லைனில் வாங்கும்போது நம்பிக்கையான வெப்சைட்டா என்பதை உறுதி செய்ய வேண்டும். கொரோனா காலத்தில் இ-காமர்ஸ் பிரச்னைகள் அதிகமாக நடைபெறுகின்றன. ஆஃப்லைனில் வாங்கும்போது நம்பிக்கையான கடைகளைத் தேர்வு செய்ய வேண்டும். அப்போதுதான், பின்னால் ஏதேனும் பிரச்னை ஏற்படும்போது அதற்கான தீர்வை எளிதாகப் பெற முடியும்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

பொருள்களை வாங்கும்போது செய்ய வேண்டியது...

கடைகளில் பொருள்களை வாங்கும்போதோ, சர்வீஸ் செய்யும்போதோ அதற்கான முழுத் தகவல்களைக் கொடுப்பார்கள். அதைக் கவனமாகக் கேட்டுகொள்ள வேண்டும். வாய்மொழியாக ஏதேனும் உத்தரவாதம் கொடுத்தால், எழுதி வாங்கிக்கொள்ள வேண்டும். இல்லையெனில், அது நிச்சயம் நடக்க வாய்ப்பில்லை. ஆவணங்களில் கையொப்பமிடும்போது தெளிவாகப் படித்துப் புரிந்துகொண்டு கையொப்பமிட வேண்டும். வாரன்டி விவரங்கள், கடையின் முத்திரை ஸ்டாம்ப், முறையான ரசீது என அனைத்தையும் கவனமாக வாங்கிக்கொள்ள வேண்டும். ஒரே நேரத்தில் பல பொருள்களை வாங்கும்போது பில்லை சரியாகக் கவனிக்க வேண்டும். டெலிவரி, சர்வீஸ் கட்டணம் போன்றவை இருந்தால், அதுகுறித்து தெளிவாகத் தெரிந்து கொள்ள வேண்டும். பொருள்களை வாங்கச் சொல்லி வற்புறுத்தினால் நாம் நிச்சயமாக வாங்கக் கூடாது.

நுகர்வோர் பிரச்னைகளுக்குத் தீர்வு..! - வழிகாட்டும் மன்றங்கள்..!

பொருள்களை வாங்கிய பிறகு செய்ய வேண்டியது...

பில், வாரன்டி கார்டு போன்றவற்றை மிகவும் பத்திரமாக வைத்துக்கொள்ள வேண்டும். பொருள்களை எப்படிப் பயன்படுத்த வேண்டும் எனச் சொல்லியிருக்கிறார்களோ, அதன்படி சரியாகப் பயன்படுத்த வேண்டும். இல்லையெனில், வாரன்டியில் பிரச்னை ஏற்படும். கஸ்டமர்கேர் உள்ளிட்ட எண்களை அப்டேட்டுடன் தெரிந்து வைத்துக்கொள்ள வேண்டும். சர்வீஸ் தேவைப்படும்பட்சத்தில், அதற்கான அங்கீகரிக்கப்பட்ட மையங்களில் பொருள்களைக் கொடுக்க வேண்டியது மிகவும் அவசியமானது. பிரச்னை வரும்பட்சத்தில் அவர்களைத் தொடர்புகொண்டு தீர்வைக் கேட்கலாம். தொலைபேசி அழைப்புகளுக்குப் பிறகு, எழுத்துபூர்வமான கம்யூனிகேஷனைத் தொடங்குவது மிகவும் நல்லது. பிற்காலத்தில் அதுதான் ஆதாரமாக நம்மிடம் இருக்கும். நினைவூட்டல் அனுப்பியும் எந்தவிதமான பதிலும் கிடைக்காதபட்சத்தில், பதிவு செய்த நுகர்வோர் அமைப்புகளின் உதவியைக் கோரலாம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

நுகர்வோர் பாதுகாப்புச் சட்டம்

1986-ல் நுகர்வோர் பாதுகாப்புச் சட்டம் இயற்றப்பட்டது. அதன்பிறகு, நிறைய மாற்றங்களுடன் புதுச் சட்டம் 2019-ம் ஆண்டு கொண்டுவரப்பட்டது. இந்தப் புதுச் சட்டத்தில் `சென்ட்ரல் கஸ்டமர் புரொடக்‌ஷன் அத்தாரிட்டி’ என்பதை நிறுவுவதற்கான புரொவிஷன் உள்ளது. நுகர்வோர் பாதிக்கப்படுவதை விசாரித்து தீர்வு கிடைப்பதற்கான வழிகளை அவர்கள் செய்வார்கள். பாதுகாப்பு இல்லாத பொருள்கள் விற்பனை, முறையற்ற வணிகம், தவறாக வழி நடத்தும் விளம்பரம் போன்றவற்றின் மீது நடவடிக்கை எடுக்க இவர் களுக்கு உரிமை உண்டு.

நுகர்வோர் பிரச்னைகளுக்குத் தீர்வு..! - வழிகாட்டும் மன்றங்கள்..!

விளம்பரங்களில் வருகிற பிரபலங்கள் மீதும் நடவடிக்கை எடுக்க முடியும். இ-காமர்ஸ் விதிமுறைகளும் இந்தச் சட்டத்தில் கொண்டு வரப்பட்டுள்ளது. பொருளை வாங்கும் பயனாளர்களுக்கு ஏதேனும் பாதிப்பு ஏற்பட்டால், அதற்கான நஷ்டஈடு வழங்கவும் இந்தச் சட்டத்தில் வழிவகை செய்யப்பட்டுள்ளது. தனி அத்தியாயமாக இதை அறிமுகம் செய்துள்ளனர். அனைத்து நுகர்வோர் குறைதீர் மன்றங்களிலும் மீடியேஷன் என்னும் சமரசத் தீர்வுக்கான வாய்ப்பும் ஏற்படுத்தப்பட்டுள்ளது.

நாமே வாதாடலாம்..!

நுகர்வோர் குறைதீர் மன்றங்கள் மாவட்டம், மாநிலம், தேசியம் என மூன்று நிலைகளில் உள்ளன. அவற்றை அணுகும்போது வழக்கறிஞர்கள் தேவை இல்லை. நம்முடைய வழக்குகளுக்கு நாமே வாதாடலாம். இதுபோன்ற சில எளிமையான வழிகள் உள்ளன. மூன்று மாதங்களில் நுகர்வோருக்குத் தீர்வு கிடைக்கவும் சட்டத்தில் வழிவகை செய்யப்பட்டுள்ளது. ஆய்வகச் சோதனை இருக்கும்பட்சத்தில் 150 நாள்களுக்குள் தீர்வு வழங்க வேண்டும்.

நுகர்வோர் இருக்குமிடத்தில் இருந்தே வழக்கைப் பதிவு செய்யவும் புதுச் சட்டத்தில் வழிவகை செய்யப்பட்டுள்ளது. வாங்கும் பொருளின் விலை அல்லது சேவையின் மதிப்பு ரூ.1 கோடி வரை இருந்தால் மாவட்ட நுகர்வு மன்றத்தில் வழக்கு பதிவு செய்யலாம்.

ரூ.1 கோடி முதல் ரூ.10 கோடி வரை இருந்தால் மாநில நுகர்வு மன்றத்திலும், ரூ.10 கோடிக்குமேல் இருந்தால் தேசிய நுகர்வு மன்றத்தில் வழக்கு பதிவு செய்யலாம். பொருள்களின் விலைக்கேற்ப கட்டணம் செலுத்த வேண்டியது வரும். பாதிப்படைந்தவர்கள், பதிவு செய்யப்பட்ட நுகர்வோர் அமைப்பு, மத்திய, மாநில அரசு போன்றவர்கள் வழக்கு பதிவு செய்யலாம். தீர்வுகள் வழங்க தாமதமானால் அதற்கான காரணத்தையும் பதிவுசெய்ய வேண்டும்.

சம்பவம் நடந்த நாளிலிருந்து இரண்டு வருடங்களுக்குள் வழக்கை பதிவு செய்ய வேண்டும். அதைத் தாண்டினாலும் உரிய காரணங்களைக் கொடுத்து வழக்கை பதிவு செய்யலாம். எனினும், இரண்டு வருடங்களுக்குள் பதிவு செய்வது நல்லது. மாவட்ட அளவில் சரியான தீர்வு கிடைக்கவில்லை என்றால் அதை அப்பீல் செய்யலாம். ஆர்டர் வந்து 30 நாள்களுக்குள் அப்பீல் செய்வதும் அவசியம்” என்று பேசினார்.

இதைத் தொடர்ந்து வாசகர்கள் பலர் கேட்ட கேள்விக்கும் விளக்கமான பதில்களை அவர் அளித்தார். இந்த நிகழ்ச்சி குறித்த வீடியோவைப் பார்க்க நினைக்கும் வாசகர்கள் இந்த லிங்க்கினைச் சொடுக்கிப் பார்க்கலாம்: https://www.facebook.com/NaanayamVikatan/videos/3714013628642680/