Published:Updated:

மிரட்டிப்பார்க்கும் ஜி ஸ்கொயர்... உடந்தையான காவல்துறை... சட்டரீதியாக எதிர்கொள்ளும் விகடன்!

சட்டரீதியாக எதிர்கொள்ளும் விகடன்!
பிரீமியம் ஸ்டோரி
சட்டரீதியாக எதிர்கொள்ளும் விகடன்!

பொதுவாக, அவதூறு வழக்குகளின்மீது காவல்துறை நடவடிக்கை எடுக்க முடியாது. பாதிக்கப்பட்ட நபர் நேரடியாக நீதிமன்றத்தைத்தான் அணுக வேண்டும்

மிரட்டிப்பார்க்கும் ஜி ஸ்கொயர்... உடந்தையான காவல்துறை... சட்டரீதியாக எதிர்கொள்ளும் விகடன்!

பொதுவாக, அவதூறு வழக்குகளின்மீது காவல்துறை நடவடிக்கை எடுக்க முடியாது. பாதிக்கப்பட்ட நபர் நேரடியாக நீதிமன்றத்தைத்தான் அணுக வேண்டும்

Published:Updated:
சட்டரீதியாக எதிர்கொள்ளும் விகடன்!
பிரீமியம் ஸ்டோரி
சட்டரீதியாக எதிர்கொள்ளும் விகடன்!

23.01.2022 தேதியிட்ட ஜூனியர் விகடன் இதழில் ‘மூக்கை நுழைக்கும் குடும்பம்... முரட்டு கமிஷன்... திடீர் சஸ்பெண்ட்!’ எனும் தலைப்பில் கட்டுரை வெளியிட்டிருந்தோம். அந்தக் கட்டுரை அச்சாகி, இதழ் கடைகளில் விற்பனைக்குக் கிடைத்த அன்று (18.01.2022) இரவு, ஒரு நபர் ‘ஜி ஸ்கொயர்’ நிறுவனத்தைத் தொடர்புகொண்டு, ‘அந்தக் கட்டுரை வெளிவராமல் இருக்க வேண்டுமானால், 50 லட்ச ரூபாய் கொடுக்க வேண்டும்’ என மிரட்டியதாக ஜி ஸ்கொயர் நிறுவனத்தின் சார்பில் வழக்கு பதிவுசெய்யப்பட்டிருக்கிறது. லாஜிக்கே இல்லாமல் தொடுக்கப்பட்டிருக்கும் புகாரின் அடிப்படையிலான முதல் தகவல் அறிக்கையில் ஜூனியர் விகடன் இதழின் பெயரும், இயக்குநர் மற்றும் ஆசிரியர் உள்ளிட்டோரின் பெயர்களும் சம்பந்தமே இல்லாமல் சேர்க்கப்பட்டிருக்கின்றன. வழக்கின் முழு விவரங்களையும், அதிலுள்ள முரண்களையும், ஜி ஸ்கொயர் மற்றும் காவல்துறையின் அபத்தமான நடவடிக்கைகளையும் விரிவாகப் பார்க்கலாம்!

‘ஜி ஸ்கொயர்’ நிறுவனம் தொடுத்த வழக்கு விவரம்!

2022, மே 21-ம் தேதி, மயிலாப்பூர் காவல் நிலையத்தில், புருஷோத்தம் குமார் என்பவர், `ஜி ஸ்கொயர் ரியல்டர்ஸ்’ என்ற நிறுவனம் சார்பில் ஒரு புகாரை அளித்திருக்கிறார். அதில் `2008-ல் தொடங்கப்பட்ட ஜி ஸ்கொயர் ரியல்டர்ஸ் நிறுவனம், இன்று 1,000 கோடி ரூபாய் வருவாய் ஈட்டும் நிறுவனமாக வளர்ந்துள்ளது. இந்த நிறுவனம் பற்றி ஜூனியர் விகடன் இதழில் தவறான, ஆதாரமற்ற, அவதூறான கட்டுரைகளை வேண்டுமென்றே தொடர்ச்சியாக வெளியிட்டுவருகின்றனர். நிர்வாக இயக்குநர் ராமஜெயம் என்கிற பாலாவுக்கு அவப்பெயரை ஏற்படுத்தும்விதமாக தொடர்ந்து இது போன்ற செய்திகளை வெளியிட்டுவருகின்றனர். கடந்த 18.01.2022 அன்று, எங்கள் நிறுவனத்தின் நிறுவனர் மற்றும் நிர்வாக இயக்குநர் ராமஜெயம் என்கிற பாலாவுக்கு, கெவின் என்பவரிடமிருந்து தொலைபேசி அழைப்பு வந்தது. அவர், விகடனுடன் நெருங்கிய தொடர்புள்ளவர் என்று சொன்னதோடு, எங்கள் நிறுவனத்தின் நிறுவனர் மற்றும் நிர்வாக இயக்குநர் திரு.ராமஜெயம் என்கிற பாலாவுக்கு ஜூனியர் விகடனில் வெளியாகவிருந்த ஒரு கட்டுரையின் புகைப்படத்தை அனுப்பினார். அந்தக் கட்டுரை வெளிவராமல் இருக்க வேண்டுமென்றால் விகடன் நிறுவனத்துக்கு ரூபாய் 50 லட்சம் கொடுக்க வேண்டும் என மிரட்டினார். ஆனாலும் எங்கள் நிர்வாக இயக்குநர், கெவின் கேட்ட தொகையைக் கொடுக்கவில்லை. அதனால் அடுத்த நாள், ஜூனியர் விகடன், 23.01.2022 தேதியிட்ட இதழில், “மூக்கை நுழைக்கும் குடும்பம்... முரட்டு கமிஷன்... திடீர் சஸ்பெண்ட்!’ என்ற கட்டுரையை வெளியிட்டிருந்தனர். இந்தக் கட்டுரையில் எங்கள் நிறுவனத்தின் பெயர் நேரடியாகக் குறிப்பிடப்படவில்லை என்றாலும், அது எங்கள் நிறுவனத்தின் மீதுதான் அவதூறு பரப்புகிறது. இந்த அடிப்படையில், கெவின் மற்றும் விகடன் நிர்வாக இயக்குநர் பா.சீனிவாசன், அவருடைய மனைவி ராதிகா சீனிவாசன், ஜூனியர் விகடன் ஆசிரியர், மாரிதாஸ், சவுக்கு சங்கர் ஆகியோர் சேர்ந்து, ஜி ஸ்கொயர் நிர்வாக இயக்குநரிடம் பணம் பறிக்கச் சதித் திட்டம் தீட்டியுள்ளார்கள். இது குறித்து விசாரித்து நடவடிக்கை எடுக்க வேண்டும்’ என்று புகாரில் குறிப்பிடப்பட்டிருக்கிறது. இதன் அடிப்படையில் கெவின், பார்த்தால் அடையாளம் காட்டக்கூடிய ஒரு நபர், ஜூனியர் விகடன் தொடர்புடையவர்கள், ஜுனியர் விகடன் நிருபர், ஆசிரியர், மாரிதாஸ், சவுக்கு சங்கர் ஆகியோர்மீது ஐ.பி.சி 147, 294 பி, 120 பி, 384, 506 (2) ஆகிய பிரிவுகளில் வழக்கு பதிவுசெய்யப்பட்டுள்ளது.

மிரட்டிப்பார்க்கும் ஜி ஸ்கொயர்... உடந்தையான காவல்துறை... சட்டரீதியாக எதிர்கொள்ளும் விகடன்!

பத்திரிகை மற்றும் கருத்துச் சுதந்திரத்துக்கு எதிராகவும், மிரட்டும் தொனியிலுமான தமிழ்நாடு காவல்துறையின் இந்த நடவடிக்கை குறித்து, பல்வேறு அரசியல் தலைவர்கள் மற்றும் பத்திரிகையாளர்கள் தங்களது கடுமையான கண்டனங்களை அரசு மற்றும் காவல்துறை மீது பதிவுசெய்தார்கள்.

ஜி ஸ்கொயர் என்ற கட்டுமான நிறுவனத்தைப் பற்றி ஜூ.வி-க்கு வந்த தகவல்களின் அடிப்படையிலேயே ஜூனியர் விகடனில் கட்டுரை வெளியிடப்பட்டது. கட்டுரை வெளியான இரண்டு வாரங்களுக்குப் பிறகு, ஜி ஸ்கொயர் நிறுவனத்தின் சார்பில் வழக்கறிஞரிடமிருந்து (2022, பிப்ரவரி 3) ஜூ.வி-க்கு நோட்டீஸ் வந்தது. அதில், ‘நீங்கள் வெளியிட்டுள்ளது அவதூறான செய்தி. எனவே, ஒரு கோடி ரூபாய் இழப்பீடு வழங்க வேண்டும்’ எனவும், ‘கெவின் என்பவர் பணம் கேட்டு மிரட்டியதாகவும்’ குறிப்பிடப்பட்டிருந்தது. அடுத்த மூன்று நாள்களில் (பிப்ரவரி 7-ம் தேதி) முதற்கட்ட பதில் அறிவிப்பு அனுப்பியதோடு, ‘நோட்டீஸில் குறிப்பிடப்பட்டிருக்கும் கெவின் யார்... நாங்கள் அவர்மீது சட்டரீதியாக நடவடிக்கை எடுக்க, அவரது விவரம் வேண்டும்’ என்று கேட்டு விகடன் சார்பில் நோட்டீஸ் அனுப்பப்பட்டது. இரண்டு நாள்கள் கழித்து, ஜி ஸ்கொயர் வழக்கறிஞரிடம் தொலைபேசியில் அழைத்து ‘கெவின் என்பவர் குறித்த விவரம் வேண்டும்’ என ஜூனியர் விகடன் தரப்பில் வழக்கறிஞர் கேட்டார். ஆனால், கெவின் குறித்த விவரங்கள் ஜி ஸ்கொயர் தரப்பிலிருந்து தரப்படவில்லை.

வழக்கில் இருக்கும் முரணும் வேடிக்கைகளும்!

ஜூனியர் விகடன், புதன் மற்றும் சனி என வாரம் இரு முறை வெளியாகும் இதழ். புதன்கிழமை வெளியாகும் இதழ் திங்கள் மாலையும், சனி அன்று வெளியாகும் இதழ் வியாழன் மாலையும் அச்சுக்குச் சென்றுவிடும். அதன் பிறகு, இதழில் எந்த மாற்றமும் செய்ய முடியாது. செவ்வாய்க்கிழமை மாலையே பல நகரங்களில் இதழ் விற்பனைக்கு வந்துவிடும். அப்படியிருக்க, செவ்வாய்க்கிழமை மாலையே அச்சாகி வெளியான ஒரு கட்டுரையைத் தடுத்து நிறுத்த ஒருவர் போனில் பேசி மிரட்டிப் பனம் கேட்டார் என்பதில் எந்த லாஜிக்கும் இல்லை.

மிரட்டியதாகச் சொல்லப்பட்ட நபர் குறித்து ஜூனியர் விகடன் கேட்ட தகவல்களுக்கு, 100 நாள்களாக ஜி ஸ்கொயர் தரப்பிலிருந்து எந்த பதிலும் தரப்படவில்லை.

எந்தவிதத்திலும் ஜூனியர் விகடனோடு தொடர்பில் இல்லாதவரை, இதழோடு தொடர்புபடுத்தி, அதன் மூலம் விகடன் மற்றும் விகடன் நிர்வாக அதிகாரிகளை வழக்கில் இணைத்தது காவல்துறையின் வேடிக்கையான செயல். அதுவும், புகாரளித்த இரண்டு மணி நேரத்தில் எஃப்.ஐ.ஆர் பதிவுசெய்து நடவடிக்கை எடுத்ததெல்லாம் காவல்துறையில் மிக அரிதாக நடக்கும் சம்பவம். (நடக்கட்டும்!)

தனியார் நிறுவனம் ஒன்று அளித்த புகாரில், இந்த அளவு வேகமாக நடவடிக்கை எடுக்கப்பட்டிருப்பதன் பின்னணியிலும், ‘அந்த நிறுவனம் தொடர்பாக மேலும் இது போன்ற புகார்கள் வரும்பட்சத்தில், சம்பந்தப்பட்ட நபர்கள் மீது கடுமையான சட்ட நடவடிக்கை எடுக்கப்படும்’ என்ற காவல்துறையின் செய்திக் குறிப்பிலும் மிரட்டும் தொனி இருக்கிறது.

பொதுவாக, அவதூறு வழக்குகளின்மீது காவல்துறை நடவடிக்கை எடுக்க முடியாது. பாதிக்கப்பட்ட நபர் நேரடியாக நீதிமன்றத்தைத்தான் அணுக வேண்டும். எனவே, அவதூறு வழக்காகப் பதிவுசெய்யாமல், மிரட்டல் மற்றும் பணம் பறித்தல் எனக் காவல்துறையால் க்ரைம் வழக்காக எஃப்.ஐ.ஆர் பதிவுசெய்யப்பட்டிருக்கிறது. அந்தவகையில், ஜி ஸ்கொயர் நிறுவனத்துக்குக் காவல்துறை உடந்தையாகச் செயல்பட்டிருக்கிறது. மயிலாப்பூர் காவல் மாவட்ட உயரதிகாரிகளுக்கே இப்படி ஒரு புகார் பதிவானது குறித்துத் தெரிந்திருக்கவில்லை என்கிறார்கள்.

ஒரு குற்றம் நடந்தது தொடர்பாக யார் வேண்டுமானாலும் புகார் அளிக்கலாம். ஆனால், அந்தப் புகாரை எடுத்துக்கொண்ட காவல்துறை, பாதிக்கப்பட்டதாகச் சொல்லப்படும் நபரிடம் விசாரித்த பிறகுதான் அடுத்தகட்ட நடவடிக்கையை மேற்கொள்ள வேண்டும். அதுதான் நடைமுறை. ஆனால், இதுவரை மிரட்டப்பட்டதாகச் சொல்லப்படும் ராமஜெயத்தைக் காவல்துறை அழைத்து விசாரித்ததாகத் தெரியவில்லை.

மே 9-ம் தேதி, அடையாளம் தெரியாத நபர் ஜி ஸ்கொயர் அலுவலகத்துக்குச் சென்று மிரட்டினார், தகாத வார்த்தைகள் சொல்லிப் பேசினார், கொலை மிரட்டல் விடுத்தார் என மூன்று விஷயங்கள் சொல்லப்படுகின்றன. இவற்றில் எந்த இடத்திலும் விகடனின் பெயர் வரவில்லை. ஜி ஸ்கொயர் மிகப்பெரிய நிறுவனம். அங்கு நிச்சயம் சிசிடிவி இருக்கும். அதில் பதிவானவற்றைவைத்து உள்ளே நுழைந்தவர் யார் என அடையாளம் கண்டிருக்கலாம். ஆனால், இதுவரை அதையும் செய்யவில்லை.

அவ்வளவு பெரிய நிறுவனம், ஒரு போன் கால் செய்தால் போலீஸ் உடனே அங்கு சென்றிருக்கும். அதைச் செய்யவில்லை. விகடன் நிறுவனத்தைத் தொடர்புகொண்டு விளக்கம் கேட்டிருக்கலாம், அதையும் செய்யவில்லை. மிரட்டப்பட்டதாகச் சொன்னாலும், இரண்டு வாரங்களுக்குப் பிறகே புகார் கொடுக்கப்பட்டிருக்கிறது. இவ்வளவு முரண்களும் வேடிக்கையும் நிறைந்ததாக இருக்கிறது இந்த வழக்கு.

விகடன் நிறுவனம், இந்த வழக்கைச் சட்டரீதியாக எதிர்கொள்ள அனைத்து நடவடிக்கைகளையும் எடுத்துவருகிறது. காவல்துறையின் கருத்துரிமைக்கு எதிரான இந்த நடவடிக்கையைக் கண்டித்து, சென்னை பத்திரிகையாளர் மன்றத்தில் அடையாள கண்டன ஆர்ப்பாட்டம் நடத்தப்பட்டது. அதில் நூற்றுக்கும் மேற்பட்ட பத்திரிகையாளர்கள் பங்கேற்று, ‘இந்த வழக்கைத் திரும்பப் பெற வேண்டும். பத்திரிகைச் சுதந்திரம் மற்றும் கருத்துச் சுதந்திரம் காக்கப்பட வேண்டும்’ என முழக்கமிட்டனர்.

இந்த முழக்கம் அரசின் காதுகளுக்கு எட்டும் என நம்புவோம்!

****

என்.ரமேஷ்
என்.ரமேஷ்

96 ஆண்டுக்கால வரலாற்றில், பணம் கேட்டு மிரட்டியதாக ஒரு வழக்குகூட இல்லை!

வழக்கு நடவடிக்கைகள் குறித்து வாசகர்களுக்குக் கூடுதல் தெளிவு தர, விகடன் வழக்கறிஞர் என்.ரமேஷிடம் சில கேள்விகளை முன்வைத்தோம்...

“ ‘ஜி ஸ்கொயர்’ தொடுத்துள்ள வழக்கை எதிர்த்து, விகடன் எடுத்துள்ள நடவடிக்கைகள் என்னென்ன?”

“பதில் நோட்டீஸ் அனுப்பிய பிப்ரவரி 7-ம் தேதியிலிருந்து அதில் குறிப்பிட்டிருக்கும் கெவின் என்பவர் யார், அவரது மொபைல் எண் என்ன, அவரது அடையாளம் என்ன என்பது குறித்துக் கேட்டிருந்தோம். சொல்லப்படவே இல்லை. மே 21-ம் தேதி, மயிலாப்பூர் காவல் நிலையத்தில் கொடுக்கப்பட்ட புகாரை அடுத்துதான், கெவின் என்பவர் 2ஜி சாதிக் பாட்சாவோடு தொடர்புடையவர் என்பதே நமக்குத் தெரியவந்தது. இதையடுத்து மே 23-ம் தேதி திங்கள்கிழமை ‘ஜூனியர் விகடனின் பெயரைத் தவறாகப் பயன்படுத்துகிறார்கள். நாங்கள் மிரட்டியதாக போலியான வழக்கு பதிவுசெய்திருக்கிறார்கள். எனவே கெவின் மற்றும் ஜி ஸ்கொயர் ராமஜெயம் மீது நடவடிக்கை எடுக்க வேண்டும்’ என்று காவல் ஆணையரிடம் நேரடியாகச் சென்று புகாரளித்திருக்கிறோம். நமக்கு எதிராகக் கொடுக்கப்பட்ட புகாரில் இரண்டு மணி நேரத்துக்குள் முதல் தகவல் அறிக்கையைப் பதிவுசெய்து, கைதுவரை சென்ற காவல்துறை, நாம் கொடுத்த புகாரில் இதுவரை எந்த நடவடிக்கையும் எடுக்கவில்லை. நம்மை அழைத்து விசாரிக்கவும் இல்லை. இரண்டு நாள்கள் கழித்து (சி.எஸ்.ஆர்) ரசீது மட்டுமே கொடுத்திருக்கிறார்கள். அரசும் காவல்துறையும் இப்படிப் பாரபட்சமாக நடந்துகொள்வதைப் பார்க்கும்போது முழுமையான, உண்மையான விசாரணை நடக்குமா என்ற சந்தேகம் எழுந்திருக்கிறது. எனவே, இந்த வழக்கை சி.பி.ஐ விசாரணைக்கு எடுத்துக்கொள்ள வேண்டும் எனக் கோரிக்கை வைக்க உத்தேசித்திருக்கிறோம்.”

“முதல் தகவல் அறிக்கையில் குறிப்பிடப்பட்டுள்ள சட்டப் பிரிவுகள் ஏற்புடையவைதானா?”

“அதாவது ஐ.பி.சி 147, 294 (பி), 120 பி, 384, 506 (2) ஆகிய பிரிவுகளில் வழக்கு பதிவுசெய்யப்பட்டுள்ளது. அதில் குறிப்பிட்டுள்ள பிரிவு 147-ன் முக்கியக் கூறு, ஐந்து பேர் கூடி சட்டவிரோதமான நடவடிக்கையில் ஈடுபடுவது. ஆனால், அவர்கள் குறிப்பிட்டிருக்கும் சம்பவத்தில் ஐந்து பேர் இல்லை. ஒருவர் மட்டுமே. எனவே, இந்தச் சட்டப் பிரிவு 147 பொருந்தாது. பிரிவு 384-ன் படி குற்ற நோக்கத்துக்காக மிரட்டுதல், அதன் மூலம் பணம் பறித்தல் நடந்திருக்க வேண்டும். ஆனால், இங்கு பணம் கொடுத்ததாகவோ, வாங்கியதாகவோ எந்தப் புகாரும் இல்லை. எனவே, பிரிவு 384 பொருந்தாது. 120 பி என்பது (மிரட்டிப் பணம் பறிப்பதற்காக) சதி செய்தல் என்பதைக் குறிக்கும். ஆனால், இங்கு மிரட்டிப் பணம் பறித்ததாகப் புகாரே இல்லை எனும்போது 120 பி சேர்த்ததும் தவறு. 294 (பி) ஆபாசமாகத் திட்டினார், 506 (2) கொலை மிரட்டல் விடுத்தார் என்பவை அடுத்தடுத்த பிரிவுகள். இவை இரண்டையும் செய்தவர் போலீஸார் சொல்லும் ‘பார்த்தால் அடையாளம் சொல்லக்கூடிய யாரோ ஒரு நபர்.’ அதாவது அடையாளம் தெரியாத ஒரு நபர். இதில் எங்கிருந்து விகடன் வந்தது... ஏதோ ஒரு வகையில் விகடனைத் துன்புறுத்த வேண்டும், மிரட்ட வேண்டும் என்ற நோக்கத்துக்காகத் திட்டமிட்டுப் பதிவுசெய்யப்பட்டது இந்த வழக்கு என்பது அப்பட்டமாகத் தெரிகிறது.”

“விகடனுக்கு இப்படியான வழக்குகள் வருவது வழக்கம்தானே?”

“தமிழக பத்திரிகை வரலாற்றில், அதிகமாக அவதூறு வழக்குகளைச் சந்தித்தது விகடனாகத்தான் இருக்கும். ஆனால், விகடனின் 96 ஆண்டுக்கால வரலாற்றில், பணம் கேட்டு மிரட்டினார்கள் என்கிறரீதியில் ஒரு வழக்குகூட இதுவரை வந்ததே இல்லை. இனியும் வராது!”

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
மிரட்டிப்பார்க்கும் ஜி ஸ்கொயர்... உடந்தையான காவல்துறை... சட்டரீதியாக எதிர்கொள்ளும் விகடன்!

ஜூ.வி மீது ஜி ஸ்கொயர் நிறுவனம் வழக்கு... என்ன நடந்தது?

17.1.2022 இதழ் அச்சுக்கு அனுப்பப்பட்ட தேதி

18.1.2022 இதழ் கடைகளில் கிடைத்த அன்று, கெவின் என்ற நபர், ஜி ஸ்கொயர் நிறுவனத்துக்குக் குறிப்பிட்ட கட்டுரையின் புகைப்படத்தை அனுப்பி, அந்தக் கட்டுரை வெளிவராமல் இருக்க 50 லட்சம் ரூபாய் பணம் கொடுக்க வேண்டுமென, இரவு 9:15 மணிக்கு தொலைபேசியில் அழைத்து மிரட்டியதாக, காவல்துறையின் எஃப்.ஐ.ஆரில் சொல்லப்பட்டிருக்கிறது.

3.2.2022 கெவின் என்ற நபர் குறிப்பிட்ட கட்டுரையைக் காட்டி தங்களை மிரட்டியதாகவும், அவதூறான செய்தியை வெளியிட்ட விகடன் நிறுவனம் தங்களுக்கு ஒரு கோடி ரூபாய் நஷ்ட ஈடு கொடுக்க வேண்டும் எனவும் ஜி ஸ்கொயர் நிறுவனத்திடமிருந்து நமது அலுவலகத்துக்கு வக்கீல் நோட்டீஸ் வந்தது.

7.2.2022 அடுத்த மூன்று நாள்களில், ‘கெவின் என்பவர் யார்... அவர் குறித்த விவரங்களைக் கொடுங்கள். நாங்கள் சட்டரீதியாக நடவடிக்கை எடுக்க வேண்டும்’ என விளக்கம் கேட்டு விகடன் தரப்பிலிருந்து பதில் நோட்டீஸ் அனுப்பப்பட்டது.

9.2.2022 விகடன் வழக்கறிஞர், ஜி ஸ்கொயர் வழக்கறிஞரை தொலைபேசியில் அழைத்து, மிரட்டிய நபர் பற்றிய விவரங்களைக் கேட்டார். ஆனால், விவரம் தரப்படவில்லை.

10.2.2022 - 20.5.2022 இடைப்பட்ட இந்த 100 நாள்களில் விவகாரம் தொடர்பாகவோ, கெவின் குறித்தோ ஜூ.வி-யிடம் எந்தத் தகவலையும் ஜி ஸ்கொயர் நிறுவனம் தெரிவிக்கவில்லை!

21.5.2022 காவல் நிலையத்தில், ஜி ஸ்கொயர் நிறுவனம் கொடுத்த புகாரின் பேரில் உடனடியாக இரவு 9 மணிக்கே எஃப்.ஐ.ஆர் பதிவு செய்யப்பட்டது.

22.5.2022 இன்றுதான் கெவின் யார் என்ற தகவல் தெரியவந்தது. காவல்துறை வெளியிட்ட செய்திக்குறிப்பில் கடைசி இரண்டு வரிகளில், `மேலும் இது போன்ற புகார்கள் வரும் பட்சத்தில் சம்பந்தப்பட்ட நபர்கள்மீது கடுமையான சட்ட நடவடிக்கை எடுக்கப்படும்’ என்று மிரட்டல் தொனியில் சொல்லப்பட்டிருந்தது.

23.5.2022 பல அரசியல் தலைவர்கள், பத்திரிகையாளர் சங்கங்கள், அமைப்புகள் விகடன் மீதான இந்த வழக்கைக் கண்டித்து அறிக்கை வெளியிட்டன. சென்னை காவல்துறை ஆணையர் அலுவலகத்தில், கெவின் என்பவர் மீதும், ஜி ஸ்கொயர் நிறுவனத்தின் நிர்வாக இயக்குநர் மீதும் விகடன் சார்பில் புகாரளிக்கப்பட்டது.

24.5.2022 சென்னை பத்திரிகையாளர் மன்றத்தில் இந்த வழக்கை வாபஸ் பெறக் கோரி அடையாள ஆர்ப்பாட்டம் நடத்தப்பட்டது.

25.5.2022 ‘ஜூனியர் விகடன் பத்திரிகையின் இயக்குநர்கள் மீது தெரிவிக்கப்பட்ட குற்றச்சாட்டுகளுக்கு ஆதாரம் இல்லை என்பது தெரியவந்துள்ளது. எனவே, முதல் தகவல் அறிக்கையிலிருந்து அவர்கள் பெயர்களை நீக்கிட நடவடிக்கை எடுக்கப்படும்’ எனக் காவல்துறை செய்தி வெளியிட்டது. (இவ்வழக்கில் பொறுப்புடைய) சென்னை தெற்கு மண்டலக் கூடுதல் ஆணையர் என்.கண்ணன் காத்திருப்போர் பட்டியலுக்கு மாற்றப்பட்டார்.

26.5.2022 சென்னை காவல்துறை ஆணையர் அலுவலகத்தில் நாம் கொடுத்த புகார் தொடர்பாக, CSR ரசீது வழங்கப்பட்டது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism