ஊதாரி Vs கஞ்சன் குடும்பச் செலவை செய்வது எப்படி? - கணவன் - மனைவிக்கு ஆலோசனை

வீ ட்டுக்கு வீடு வாசற்படி போலவே, செலவாளி - கஞ்சன் பிரச்னையும் பல வீடுகளில் நிச்சயம் இருக்கும். ‘சரியான ஓட்டக்கை... பணத்தைத் தண்ணியா செலவழிக்கிறார்’ என்று கணவர் மீது மனைவியும், ‘நியாயமான செலவுக்குக்கூட யோசிக்கிறா... . சரியான கஞ்சாம்பட்டி’ என்று மனைவி மீது கணவரும், பண விஷயத்தில் பரஸ்பரம் குற்றம்சாட்டிக் கொள்வதைப் பல வீடுகளில் நம்மால் பார்க்க முடியும். சில வீடுகளில் இந்தக் குற்றச்சாட்டு தலைகீழாகவும் நடக்கும். பண விஷயத்தில் வருகிற இந்தப் பிரச்னையை ஸ்மார்ட்டாகச் சரிசெய்வது எப்படி என்பதற்கான வழிகளைச் சொல்கிறார் நிதி ஆலோசகர் லலிதா ஜெயபாலன்.

. தம்பதியர் மூன்று வகை..!

‘‘இன்றைய சமூகத்தில் தம்பதிகளை மூன்று விதமாகப் பிரிக்கலாம். கணவன் - மனைவி இருவருமே கிட்டத்தட்ட ஒரே அளவில் சம்பாதிப்பவர்கள் முதல் வகை. இரண்டாவது வகையில், இருவரில் ஒருவர் அதிகம் சம்பாதிப்பவராகவும் இன்னொருவர் கொஞ்சம் குறைவாகச் சம்பாதிப்பவராகவும் இருப்பார். மூன்றாவது வகையில், கணவர் மட்டும் சம்பாதிக்க, மனைவி ஹோம்மேக்கராக இருப்பார். இந்த மூன்று வகை குடும்பத்திலுமே செலவாளி - கஞ்சத்தனம் பிரச்னை இருக்கும். வைரத்தை வைரத்தால் அறுப்பதுபோல, பணப்பிரச்னையைப் பணத்தால்தான் சரிசெய்ய முடியும்’’ என்றவர், அது எப்படி என்று சொல்ல ஆரம்பித்தார்.

செலவாளி துணையைச் சமாளிக்க..!

இது செலவாளி வாழ்க்கைத் துணையைச் சரிசெய்வதற்கான வழிமுறை. கணவருடைய சம்பள அக்கவுன்ட், மனைவியின் சம்பள அக்கவுன்ட் தாண்டி மூன்றாவதாக ஒரு ஜாயின்ட் அக்கவுன்ட்டைத் தனியாக ஆரம்பியுங்கள். அதில் அந்தந்த மாத செலவுக்கான பணத்தை மட்டும் இருவரும் போட்டுவிடுங்கள். இருவரும் ஏறக்குறைய ஒரே அளவில் சம்பாதிக்கிறீர்கள் என்றால், இந்த ஜாயின்ட் அக்கவுன்ட்டில் ஆளுக்கு ஒரே அளவிலான தொகையைப் போடலாம். ஒருவேளை கணவன் - மனைவி சம்பாதிப்பதில் அதிக வித்தியாசம் இருந்தால், அதிகம் சம்பாதிப்பவர் கொஞ்சம் அதிக தொகையும் குறைவாக சம்பாதிப்பவர் சற்று குறைவான தொகையும் போடலாம். கணவர் மட்டும் வேலை பார்க்கிறார் என்றாலும் ஜாயின்ட் அக்கவுன்ட் ஓப்பன் செய்து அந்தந்த மாத செலவுக்கான பணத்தை அதில் போடுங்கள்.

. இந்த அக்கவுன்ட்டிலிருந்துதான் இருவருமே குடும்பத்துக்கான வீட்டு வாடகையில் ஆரம்பித்து, ஷாப்பிங் செல்வதற்கான செலவுகள் வரைக்கும் செய்ய வேண்டும் என்பதை ஓர் எழுதாத சட்டமாக உங்களுக்கு நீங்களே நிர்ணயித்துக்கொள்ளுங்கள். பேடிஎம், கூகுள் பே செலவுகள் அனைத்தும் இந்த அக்கவுன்ட்டிலிருந்துதான் டிரான்ஸாக்ஷன் ஆக வேண்டும். அப்படிச் செய்யும்போது அவசியமான செலவு மட்டுமே செய்ய முடியும்.

. ஒருவேளை, இருவரில் ஒருவர் வேண்டாத செலவுகளை அடிக்கடி செய்தால், பேலன்ஸ் குறைந்துகொண்டே வரும். ‘அச்சச்சோ, இந்த மாதம் கரன்ட் பில் கட்ட முடியாதே, கேஸ் சிலிண்டர் வாங்க முடியாதே’ என்ற பயம் தானாகவே வந்துவிடும். விளைவு, செலவாளிகளுக்கு அவர்கள் மனமே ஸ்பீடு பிரேக்கர் போட்டுவிடும். இதையும் கண்டு கொள்ளாமல் செலவு செய்தால், வீட்டுக் கடனுக்கு இ.எம்.ஐ கட்டுவது, பிள்ளைக்குப் பள்ளிக் கட்டணம் கட்டுவது போன்ற முக்கியமான செலவுகளில் துண்டு விழுந்து விடும். சுய கட்டுப்பாட்டை மீறி ஊதாரியாக இருப்பவர்களுக்கு இதுவோர் எச்சரிக்கையாக இருக்கும். தேவையில்லாத செலவைச் செய்து விட்டோம் என்ற குற்ற உணர்ச்சி வந்துவிடும். விளைவு, தானாகவே மாற ஆரம்பிப்பார். இதனால், ஒருவரையொருவர் ஊதாரி, செலவாளி என்று திட்ட வேண்டிய அவசியம் வராது.

ஒரு கல்லில் மூன்று மாங்காய்!

இந்த ஐடியாவை மேலோட்டமாகப் பார்த்தால், அந்தந்த மாத செலவுக்கான பணத்தை தனி அக்கவுன்ட்டில் போட்டு செலவழிக்கப்போகிறோம். மாத இறுதியில் அக்கவுன்ட் காலியாகப்போகிறது என்று நினைப்போம். ஆனால், சில மாதங்களில் இந்த அக்கவுன்ட்டிலும் எப்படிச் சேமிப்பது என்ற ஐடியா உங்களுக்குப் பிடிபட்டுவிடும். ஷாப்பிங் செலவை எப்படிக் கட்டுப்படுத்தலாம், சினிமா செலவை எப்படிக் குறைக்கலாம் என்பது உங்களுக்கே தெரிந்துவிடும்.

இதில் சிறப்பு என்னவென்றால், கணவரின் அக்கவுன்ட்டிலும் பணம் சேரும், மனைவியின் அக்கவுன்ட்டிலும் பணம் சேர்ந்து கொண்டிருக்கும். மூன்றாவதாக, இந்தச் செலவு அக்கவுன்ட்டிலும் சிறுவாடு சேமிப்புபோல பணம் சேமிப்பாகிக்கொண்டிருக்கும். ஊதாரித்தனத்தைக் கட்டுக்குள் கொண்டு வருவது, புதிய சேமிப்பு, கணவன் - மனைவிக்குள் பிரச்னை வராமல் இருப்பது என ஒரே கல்லில் மூன்று மாங்காய் அடிக்கலாம். கூடுதலாக, ‘இந்த மாசம் சேமிப்பாகிற பணத்துல நீ ஷாப்பிங் போய்க்கோ, நான் கிரிக்கெட் மேட்சுக்கு டிக்கெட் வாங்கிக்கிறேன்’ என்று ஒருவருக்கொருவர் அன்பையும் பரிமாறிக் கொள்ளலாம்.

. எல்லாருக்கும் வொர்க் அவுட் ஆகும்!

மாதம் லட்ச ரூபாய் சம்பாதித்தாலும், 10,000 சம்பாதித்தாலும் ஐந்த ஐடியா வொர்க் அவுட் ஆகும். இப்படிச் செய்யும்போது, உங்களுடைய சம்பள அக்கவுன்டை நிலம் வாங்குவது, வீடு வாங்குவது போன்ற நீண்ட காலத்திட்டத்துக்குப் பயன்படுத்தலாம்.

. ‘என் லைஃப் பார்ட்னர் ரொம்ப செலவழிக்கிறார். இதனால குடும்பத்துல அடிக்கடி பிரச்னை வருது. தீர்வு சொல்லுங்க’ என்ற என்னுடைய க்ளெய்ன்ட்ஸுக்கு மேலே இருக்கிற மூன்று அக்கவுன்ட் வழியைத்தான் சொன்னேன். அது சக்ஸஸ் ஆனது’’ என்றவர், படு சிக்கனக்காரர்களை மாற்றுவதற்கான வழியையும் சொன்னார்.

இது கஞ்சத்தனம் செய்பவர்களுக்கு..!

‘‘செலவாளிகள்கூட அனுபவப்பட்டுத் திருந்திவிடுவார்கள். ஆனால், சிக்கனம் என்ற பெயரில் கஞ்சமாக இருப்பவர்களிடம் எந்த ட்ரிக்கும் நடக்காது. இவர்களிடம் சரியான காரணத்தைத் திரும்ப திரும்பச் சொல்லி சொல்லித்தான் தேவையான செலவுகளைச் செய்ய முடியும். வாழ்க்கையில் சம்பாதிப்பது அனுபவிக்கத்தான் என்பதை இவர்களுக்குப் புரிய வைக்க வேண்டும். ‘குடும்பத்தாரிடம் பணத்தைக் கொடுத்து வரவு, செலவு பார்க்க வைப்பதே நல்லது’ என்பதையும் அவர்களைவிட வயதில் பெரியவர்கள்தான் சொல்லிப் புரிய வைக்க வேண்டும். அப்படிப் புரிந்துகொண்டு அவர்களாகப் பார்த்து மாறினால்தான் உண்டு. ஏனென்றால், இதுவோர் உளவியல் சிக்கல். பொருளாதார விஷயத்தில் சந்தித்தக் கஷ்டங்கள் காரணமாக அவர்கள் இப்படி மாறியிருக்கலாம். அதனால், உங்கள் வாழ்க்கைத்துணை இப்படிப்பட்டவராக இருந்தால், அவரிடம் சண்டையிடுவதைவிட இதற்கான பின்னணிக் காரணத்தைப் புரிந்துகொண்டு நடப்பதே குடும்பத்தில் நிம்மதி நீடிக்க ஒரே வழி’’ என சைக்கலாஜிக்கல் டிப்ஸ் ஒன்றையும் தந்தார் லலிதா ஜெயபாலன்.

செலவைக் குறைப்பது எப்படி என்று சண்டை போடாமல், இவர் சொல்லும் வழியின்படி நடந்துபார்க்கலாமே!

ஊதாரி Vs கஞ்சன் குடும்பச் செலவை செய்வது எப்படி? - கணவன் - மனைவிக்கு ஆலோசனை

ஆ.சாந்தி கணேஷ்Follow