Published:Updated:

நிறுவனத்தின் ஹீரோ ஆகுங்கள்! - நிபுணர் சொல்லும் யோசனைகள்!

ஹீரோ
பிரீமியம் ஸ்டோரி
News
ஹீரோ

நெகட்டிவ் எண்ணங்களைத் தூரமாக வைத்துவிட்டு, உங்களைச் சுற்றி பாசிட்டிவ் எண்ணங்களைப் படரவிடுங்கள்!

டந்த ஆறு மாதங்களில் கொரோனா நோய்த் தொற்று காரணமாகப் பெரிய தொழில் நிறுவனங்கள் தொடங்கி, சிறு, குறு நிறுவனங்கள் வரை தொழிலைத் தொடர்ந்து நடத்த பல்வேறு சிக்கல்களை எதிர்கொண்டு வருகின்றன. தங்கள் நிறுவனத்தைத் தக்கவைத்துக்கொள்ள ஊதியக் குறைப்பு, ஆள்குறைப்பு போன்ற நடவடிக்கைகளை நிறுவனங்கள் மேற்கொண்டு வருகின்றன. இந்தச் சூழலில், ஒரு நிறுவனம் தன் பணியாளர்களிடம் எதிர்பார்க்கும் பண்புகளையும், ஒரு பணியாளர் தொடர்ந்து தன்னுடைய பணியைத் தக்கவைத்துக்கொள்ளும் வழிமுறைகளையும் விளக்குகிறார் ‘பொலாரிஸ்’ நிறுவனத்தின் மனிதவள மேம்பாட்டுத்துறை தலைவர் பாலமுருகன்.
நிறுவனத்தின் ஹீரோ ஆகுங்கள்! - நிபுணர் சொல்லும் யோசனைகள்!

பாசிட்டிவ் எண்ணங்கள்!

‘‘எதிர்காலம் குறித்த பயமும் குடும்பச் சூழலும், நோய்த் தொற்றும் எல்லாருடைய மனதிலும் ஒருவித பயத்தை விதைத்துள்ளது. இந்தச் சூழலிலும், சரிவில் இருக்கும் நிறுவனத்தை எப்படியேனும் மீட்டு பழைய நிலைக்குக் கொண்டு வந்துவிட வேண்டும் என்பதே, ஒவ்வொரு நிறுவனத்தின் குறிக்கோளாக இருக்கும். அதே பாசிட்டிவ் சிந்தனையை நிறுவனம் ஊழியர்களிடமும் எதிர்பார்க்கும்.

நிறுவனத்தின் வளர்ச்சிக்காக, பல புதிய உத்திகளையும், வேலைமுறைகளையும் நடைமுறைப்படுத்த முயற்சி செய்வார்கள். ‘இந்தச் செயல்முறையும் திட்டங்களும் பயனளிக்காது. இந்த முயற்சி தோல்வி அடையும்’ என நெகட்டிவ் சிந்தனைகளை உங்கள் மனதில் விதைக்காமல், நிறுவனத்தின் எல்லா மாற்றங்களுக்கும் ஓர் ஊழியர் பக்கபலமாக இருப்பது அவசியம்.

நெகட்டிவ் எண்ணங்களையும், அதை விதைக்கும் மனிதர்களையும் தூரமாக வைத்துவிட்டு, உங்களைச் சுற்றி பாசிட்டிவ் எண்ணங்களை வைத்துக்கொள்ளுங்கள். அந்த எண்ணமே உங்களைப் புத்துணர்வு உடைய மனிதராகவும், உழைக்கத் தயாராக உள்ள மனிதராகவும் காட்டும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

இணைந்து செயல்படுதல்!

இதுபோன்ற இக்கட்டான சூழலில் நிறுவனத்தின் ஒவ்வொரு பணியாளரும் ஒத்துழைப்புக் கொடுத்தால் மட்டுமே, நிறுவனத்தில் எல்லா புதிய முயற்சிகளும் வெற்றி அடையும். எனவே, தலைமை அதிகாரிகள், சகபணியாளர்களுடன் இணைந்து பணி செய்வது அவசியம். அலுவலகம் சார்ந்து உயரதிகாரிகள் சொல்லும் வேலைகளைச் சரியாகவும் உரிய நேரத்திலும் செய்து கொடுக்க முயலுங்கள். ஒரு பணியாளர் தன்னுடைய திறமையை முழுமையாக வெளிப்படுத்தி தன்னை நிரூபிக்க வேண்டிய நேரம் இது. அதற்கான எல்லா வாய்ப்புகளையும் முயற்சிகளையும் மேற்கொள்ளுங்கள். அதே நேரம், உங்களுக்கான நியாயமான கோரிக்கைகளையும் பிரச்னை களையும் உங்கள் தலைமையிடம் பொறுமையாக எடுத்துச் சொல்லலாம்.

நிறுவனத்தின் ஹீரோ ஆகுங்கள்! - நிபுணர் சொல்லும் யோசனைகள்!

அப்டேட் அவசியம்!

நிறுவனம் ஆள்குறைப்பு பணியை மேற்கொண்டுள்ளதால், பெரும்பாலான பணியிடங்கள் காலியாக இருக்கலாம். அதனால் உங்களின் பணியுடன் சார்ந்த அல்லது உங்களுக்கு விருப்பமான பணிகளை நீங்கள் கூடுதலாகச் செய்ய முயற்சி செய்யலாம். இது கட்டாயம் இல்லை என்றாலும் பன்முகத் திறமையுடன் இருக்கும் ஊழியரை நிறுவனம் எப்போதுமே இழக்க விரும்பாது. எனவே, அடுத்தடுத்து புதிதாக எதையாவது கற்றுக் கொண்டே இருந்து உங்களை எப்போதும் அப்டேட்டாகவும் பன்முகத்திறமை கொண்டவராகவும் வைத்துக்கொள்ளுங்கள்.

தலைமைப் பண்பு!

இதுபோன்ற சூழலில் புதிய முயற்சிகளும் இலக்குகளும் எந்தளவு முக்கியமோ, அதே அளவுக்கு அந்த இலக்குகளின் மீதான வெற்றியும் அவசியம். வெற்றி மட்டுமே நிறுவனத்துக்குத் தேவையான நிதியைக் கொண்டுவரும். எனவே, உங்களின் திறமை சார்ந்த செயல்களில் எந்தத் தயக்கமும் இல்லாமல், தொடர்ந்து இயங்குங்கள். உங்களின் ஒவ்வொரு புதிய முயற்சியும் உங்களின் மீதான நன்மதிப்பை அதிகரிக்கும். உங்களின் சக பணியாளர்களையும் ஒன்றாக இணைத்து உங்களின் தலைமைப் பண்பை வெளிப் படுத்துங்கள். உங்களின் பணிசார்ந்து தேவைப்படும் உதவிகளை நிறுவனத்திலிருந்து கேட்டுப் பெறுங்கள். நீங்கள் கொடுக்கும் சிறிய வெற்றிகளும் மாற்றங்களும்கூட உங்களை நிறுவனத்தின் தூணாக மாற்றலாம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

தவறுகள் கூடாது!

நிறுவனம் தரும் பணிகளை எந்தத் தவறும் இல்லாமல் குறிப்பிட்ட நேரத்துக்கு முன்பே செய்துகொடுக்க முயற்சி செய்யுங்கள். ஏதேனும் தவறுகள் நிகழ்ந்திருந்தாலும், அதற்கான பொறுப்புகளை ஏற்கப் பழங்குகள். உங்களின் நேர்மையே உங்களுக்கான தொடர் வாய்ப்புகளைப் பெற்றுத் தரும். அதேபோல், உங்களின் சகபணியாளர்களைப் பற்றியும், உங்கள் நிறுவனத்தைப் பற்றியும் தவறான வதந்திகளை எங்கும் பரப்பாதீர்கள்.

நிறுவனத்தின் ஹீரோ ஆகுங்கள்! - நிபுணர் சொல்லும் யோசனைகள்!

ஸ்மார்ட் வொர்க்!

இதுபோன்ற நெருக்கடியான சூழலில் மணிக்கணக்கில் வேலை செய்பவர்களையும்விட ஸ்மார்ட்டாக வேலை செய்து, வேலையைச் சீக்கிரம் முடிப்பவர்களையே நிறுவனம் விரும்பும். அதனால் உங்கள் பணி சார்ந்தவற்றில் இருக்கும் சின்னச் சின்ன மாற்றங்களை நுணுக்கமாகக் கற்றுக்கொண்டு ஸ்மார்ட்டாக வேலை செய்யப் பழகுங்கள்.

அலட்சியம் வேண்டாம்!

நிறுவனம் ஊதியக் குறைப்பு செய்துள்ளதால், ‘இவங்க கொடுக்குற சம்பளத்துக்கு இந்த வேலை செய்தால் போதும்’ என அலட்சியமாக இருக்காதீர்கள். வேலையிழப்பைச் சந்தித்த மற்றொருவர் இருக்க வேண்டிய இடத்தைத்தான் நிறுவனம் உங்களுக்கு வழங்கியுள்ளது. வேலையிழப்பை நீங்கள் சந்திக்கவில்லை என்ற மகிழ்ச்சியில் இன்னும் பல மடங்கு பணி செய்யத் தொடங்குங்கள். இதன்மூலம் நிறுவனத்தின் வளர்ச்சிக்குத் துணை நின்று, நீங்களும் வளருங்கள்’’ என்றார் பாலமுருகன்.

இவர் சொல்வதுபடி நடந்தால், நீங்கள் உங்கள் நிறுவனத்தின் ஹீரோ ஆவது நிச்சயம்!