Published:Updated:

``பசுமைப் பட்டாசுகூட வெடிக்க வேண்டாமே..!’’ - காற்று மாசு குறித்து ஜவடேகர் வேதனை

பண்டிகையைக் கட்டாயம் கொண்டாட வேண்டும் என்றால், தயவுசெய்து பசுமைப் பட்டாசுகளை வெடியுங்கள். மத்திய அமைச்சர் பிரகாஷ் ஜவடேகர் வேண்டுகோள்.

Prakash Javadekar
Prakash Javadekar

இந்தியாவில் தீபாவளி, தசாரா போன்ற பண்டிகைக் காலங்களில் வானில் வண்ணங்களைத் தெளிக்கும் பட்டாசுகள் வெடிப்பது வழக்கம். பண்டைய காலம் தொட்டு பின்பற்றிவரும் கலாசாரம் என்றாலும், இதனால் சுற்றுச்சூழல் மாசுபாடு, காற்று மாசுபாடு ஏற்படுகிறது. இந்நிலையில், டெல்லியில் நேற்று செய்தியாளர்களைச் சந்தித்துப் பேசிய மத்திய அமைச்சர் பிரகாஷ் ஜவடேகர், “பண்டிகைக் காலங்களில் பசுமைப் பட்டாசுகளை வெடிப்பதைக்கூட பொதுமக்கள் தவிர்க்க வேண்டும். பட்டாசுகளை வாங்க வேண்டாம் என்று குழந்தைகள் உங்கள் பெற்றோர்களிடம் எடுத்துக்கூறுங்கள். பண்டிகையைக் கட்டாயம் கொண்டாட வேண்டும் என்றால் மட்டும் பசுமைப் பட்டாசுகளை வெடியுங்கள்.

Diwali
Diwali

மேலும், வாகனங்கள் கக்கும் புகையினால் காற்று மாசுபாடு ஏற்படுகிறது. இந்தியாவில் பிஎஸ்-6 வாகனங்கள் அறிமுகமானால், வாகன மாசுபாட்டில் 80 சதவிகிதம் குறையும். தலைநகர் டெல்லியில் காற்று தர கண்காணிப்பு மையத்தை அமைப்பதற்கு, பிரதமர் மோடிக்கு நன்றி” எனக் கூறினார்.

டெல்லியைச் சேர்ந்த 6 முதல் 14 மாததுக்குட்பட்ட 3 குழந்தைகள் சார்பில். 2015-ம் ஆண்டு உச்ச நீதிமன்றத்தில் மனுத் தாக்கல் செய்யப்பட்டது. அந்த மனுவில், டெல்லியில் பட்டாசு வெடிப்பதால் நரம்புத்தளர்ச்சி, ஆஸ்துமா, உறுப்புகள் செயலிழப்பு போன்ற பிரச்னைகள் ஏற்படுவதாகவும், இதன் காரணமாக இந்தியா முழுவதும் பட்டாசு விற்பனைக்குத் தடை விதிக்க வேண்டும் எனவும் கூறப்பட்டது. இந்த வழக்கில், கடந்த ஆண்டு அக்டோபர் மாதம் உச்ச நீதிமன்றம் தீர்ப்பு வழங்கியது. இதில், சில நிபந்தனைகளுடன் பட்டாசு விற்பனை மேற்கொள்ளலாம் எனத் தீர்ப்பளித்து. அதிக மாசு மற்றும் சத்தம் ஏற்படுத்தக்கூடிய பட்டாசுகளுக்குத் தடை விதித்தது. மேலும், குறிப்பிட்ட நேரம் மட்டுமே பட்டாசு வெடிக்க வேண்டும் என அந்த உத்தரவில் கூறப்பட்டது.

Supreme Court
Supreme Court

இந்தப் பிரச்னைகளுக்குத் தீர்வு காணும் விதமாக, தேசிய சுற்றுச்சூழல் பொறியியல் ஆராய்ச்சி நிறுவனம் பசுமைப் பட்டாசுகளைக் கண்டுபிடித்தது. இது, பார்ப்பதற்கு வழக்கமான பட்டாசு போலவே இருக்கும். பசுமைப் பட்டாசு வெடிக்கும்போது, குறைவான சத்தத்தையும் மாசையும் வெளிப்படுத்தும் எனக் கூறப்படுகிறது. இந்த வருடம் மே மாதத்தில், பசுமைப் பட்டாசுகளை உற்பத்திசெய்ய உச்ச நீதிமன்றம் அனுமதித்தது.