Published:Updated:

அரியலூர்: `உங்களுக்கு இந்தி தெரியுமா?!’ - லோன் கேட்டு சென்ற மருத்துவரை அதிரவைத்த வங்கி

டாக்டர் பாலசுப்பிரமணியன்
டாக்டர் பாலசுப்பிரமணியன்

``ஒருவேளை எனக்கு இந்தி தெரிந்திருந்தால் லோன் கொடுத்திருப்பார். அவரிடம் நஷ்ட ஈடு வாங்க வேண்டும் என்பதற்காக நோட்டீஸ் அனுப்பவில்லை’’ என்று டாக்டர் தெரிவித்தார்.

அரியலூர் மாவட்டத்திலுள்ள இந்தியன் ஓவர்சீஸ் வங்கிக் கிளைக்கு ஓய்வுபெற்ற டாக்டர் ஒருவர் லோன் கேட்டுச் சென்ற நிலையில், வங்கி மேலாளர், ``உனக்கு ஹிந்தி தெரியுமா?’’ எனக் கேட்க, ``தெரியாது’’ என்று கூறியதால், ``லோன் கிடையாது’’ என்று அந்த டாக்டரைத் திருப்பி அனுப்பிய சம்பவம் பெரும் சர்ச்சையை ஏற்படுத்தியிருக்கிறது.

பேங்க்
பேங்க்

அரியலூர் மாவட்டம், ஜெயங்கொண்டத்தில் வசித்துவருபவர் ஓய்வுபெற்ற தலைமை அரசு மருத்துவர் பாலசுப்பிரமணியன். இவர் கடந்த 25 ஆண்டுகளுக்கும் மேலாக பல்வேறு அரசு மருத்துவமனைகளில் மருத்துவராகப் பணியாற்றியிருக்கிறார். இவரது சொந்த ஊர் கங்கைகொண்ட சோழபுரம் அருகேயுள்ள யுத்தபள்ளம். அந்தப் பகுதியில் பல்வேறு இடங்களில் டாக்டர் பாலசுப்ரமணியனுக்குச் சொந்த நிலம், வீடு உள்ளிட்டவை உள்ளன. மேலும், கங்கைகொண்ட சோழபுரத்திலுள்ள இந்தியன் ஓவர்சீஸ் வங்கிக் கிளையில் வங்கிக் கணக்கு வைத்திருக்கிறார்.

இந்தநிலையில் தனது இடத்தில் புதிய வணிக வளாகம் கட்ட முடிவு செய்து அதற்கான ஆவணங்களைத் தயார் செய்து எடுத்துக்கொண்டு கங்கைகொண்ட சோழபுரத்திலுள்ள இந்தியன் ஓவர்சீஸ் வங்கிக்கு லோன் கேட்டு, கடந்த வாரம் சென்றிருக்கிறார். அங்கு பணியிலிருந்த மேலாளர், ``உங்களுக்கு இந்தி தெரியுமா?’’ என்ரு ஆங்கிலத்தில் கேட்டிருக்கிறார். அதற்கு பாலசுப்பிரமணியன், ``எனக்கு இந்தி தெரியாது. தமிழ் மற்றும் ஆங்கிலம் தெரியும்’’ எனக் கூறிய நிலையில், ``உங்களுக்கு லோன் கிடையாது’’ எனத் திருப்பி அனுப்பியதாகக் கூறப்படும் சம்பவம் தற்போது சர்ச்சையை ஏற்படுத்தியிருக்கிறது.

டாக்டர் வீடு
டாக்டர் வீடு

இது குறித்து டாக்டர் பாலசுப்பிரமணியனிடம் பேசினோம். ``ஜெயங்கொண்டம் பேருந்து நிலையம் அருகேயுள்ள எனக்குச் சொந்தமான இடத்தில் வணிக வளாகம் கட்டுவதற்கு முடிவு செய்து, அதற்கான மொத்த மதிப்பீடு உள்ளிட்டவற்றை தயார் செய்து எடுத்துக்கொண்டு இந்தியன் ஓவர்சீஸ் பேங்க்கில் லோன் கேட்பதற்காகச் சென்றேன்.

பேங்க்கில் பணியிலிருந்த மேலாளரிடம் நான் என்னிடமிருந்த ஆவணங்களைக் காண்பித்தேன். அவற்றை அவர் வாங்கிப் பார்க்காமலேயே, `டூ யூ நோ ஹிந்தி?’ என ஆங்கிலத்தில் கேட்டார். அதற்கு நான், `எனக்கு இந்தி தெரியாது. ஆனால் தமிழ் மற்றும் ஆங்கிலம் தெரியும்’ என ஆங்கிலத்தில் கூறினேன். அதற்கு அவர், `ஐ யம் ஃப்ரம் மகராஷ்டிரா. எனக்கு தமிழ் தெரியாது. ஒன்லி ஹிந்தி மட்டுமே தெரியும். லாங்வேஜ் பிராப்ளம்’ என ஆங்கிலத்தில் கூறினார்.

லோன் கேட்டுச் சென்ற டாக்டர் பாலசுப்பிரமணியன்
லோன் கேட்டுச் சென்ற டாக்டர் பாலசுப்பிரமணியன்

`நான் உங்கள் கிளையில்தான் கணக்கு வைத்திருக்கிறேன்’ எனக் கூறி, மீண்டும் என்னிடமிருந்த ஆவணங்களான பேங்க் பாஸ்புக் உள்ளிட்டவற்றைக் காண்பித்தேன். ஆனால், அந்த மேலாளர் என்னிடம் இந்தி குறித்தே பேசிக்கொண்டிருந்ததுடன் `லோன் கொடுக்க முடியாது’ எனக் கூறி திருப்பி அனுப்பிவிட்டார். எனக்கு அந்த மேலாளர் லோன் கொடுக்காமல் போனதில் எந்தப் பிரச்னையும் இல்லை. நான் தமிழ் என்று தெரிந்ததுமே என்னை உட்காரச் சொல்வதற்குக்கூட அந்த அதிகாரிக்கு மனம் இல்லை. அவருக்குத்தான் தமிழ் தெரியாது; பேங்கில் இருக்கும் ஒருவருக்குக்கூடவா தமிழ் தெரியாது... அவர்களையாவது என்னிடம் பேசவைத்திருக்கலாம். அதையும் செய்யவில்லை. தமிழ்நாட்டிலுள்ள ஒரு வங்கியில் வேலைக்கு வந்திருக்கும் அவர் இந்தியைப் பற்றி ஏன் பேச வேண்டும் என்ற கேள்வியும் எனக்கு எழுந்தது.

இந்தி தெரியாது என்பதைக் காரணம் காட்டி, என் அடிப்படை உரிமையான லோன் பெறுவதை மறுத்தது எனக்குப் பெரும் மன உளைச்சலை ஏற்படுத்தியது. இதனால் சம்பந்தப்பட்ட பேங்க் மேலாளரிடம் மானநஷ்ட ஈடு கேட்டு என்னுடைய வழக்கறிஞர் சிவராமகிருஷ்ணன் மூலமாக நோட்டீஸ் அனுப்பியிருக்கிறேன். மேலும், நீதிமன்றத்துக்கும் செல்ல இருக்கிறேன்.

அந்த மேலாளர் நடந்துகொண்டவிதம், ஒருவேளை எனக்கு இந்தி தெரிந்திருந்தால் லோன் கொடுத்திருப்பார் என்பதைத்தான் உணர்த்தியது. நான் அவரிடம் நஷ்ட ஈடு வாங்க வேண்டும் என்பதற்காக நோட்டீஸ் அனுப்பவில்லை. ராஜேந்திர சோழனின் தலைநகராக விளங்கிய கங்கைகொண்ட சோழபுரம் மண்ணில் இருந்துகொண்டு, `இந்தி தெரியாது’ என்பதால், என்னவென்றுகூட விசாரிக்காமல், `கடன் கிடையாது’ என்று திருப்பி அனுப்பிவிட்டார்.

இந்தப் பகுதியில் விவசாயத் தொழிலாளர்கள் நிறைந்திருக்கிறார்கள். ஒரு டாக்டரான என்னிடமே பேங்க் மேலாளர் இப்படி நடந்துகொண்டாரென்றால், விவசாயத் தொழிலாளர்கள் மற்றும் படிக்காத ஏழை மக்களிடம் எப்படி நடந்துகொள்வார் என்பதை நினைக்கும்போதே மனம் பதை பதைக்கிறது. எனவே, அந்த மேலாளருக்குப் பாடம் புகட்டி, தமிழ் மற்றும் தமிழகத்தின் மகத்துவத்தை உணர்த்த வேண்டும் என்பதற்காகவே நோட்டீஸ் அனுப்பினேன்” என்று தெரிவித்தார்.

இந்த விவகாரம் தொடர்பாக வங்கித் தரப்பில் பேச முயன்றோம். ஆனால் அவர்கள், `இது தொடர்பாக நாங்கள் பேச முடியாது’ என மறுத்துவிட்டனர். வங்கித் தரப்பில் இது தொடர்பாக விளக்கம் அளித்தால், அதை உரிய பரிசீலனைக்குப் பின்னர் பதிவு செய்யத் தயாராக இருக்கிறோம்.

அடுத்த கட்டுரைக்கு