Published:Updated:

பூச்சி மேலாண்மை: 15 - பூச்சிகளை வாழவைக்கும் நுண்ணுயிர்கள்!

பூச்சிகளும் நம் நண்பர்களே..! - 2.0

பிரீமியம் ஸ்டோரி

னித உடம்பின் உள்ளேயும் வெளியேயும் கோடிக்கணக்கான கிருமிகள் இருக்கின்றன. உள்ளே உள்ள நுண்கிருமிகள்தான் மனிதர்கள் உண்ணும் உணவைச் செரிக்கச் செய்கின்றன. இதைப்போல மாட்டுக் குடலில் இருக்கும் கிருமிகள், மாடு உண்ணும் உணவைச் செரிக்கச் செய்கின்றன. இதனால், மாட்டுச் சாணம், மாட்டுச்சிறுநீர் போன்றவை அதன் நுண்ணுயிர்களின் பெருக்கம் காரணமாக அதிக சத்துள்ளதாக இயற்கை விவசாயத்தில் பயன்படுத்தப்படுகிறது.

பூச்சி மேலாண்மை: 15 - பூச்சிகளை வாழவைக்கும் நுண்ணுயிர்கள்!

மனிதர்களைப்போலவே, பூச்சிகள் உடம்பின் மேலும் உள்ளும் கிருமிகள் இருக்கின்றன. உடம்பிலும், சுற்றியிருக்கும் காற்றிலும் இருக்கும் கிருமிகளைச் சகித்துக்கொண்டு மனிதர்கள் உயிர்வாழ்வதைப் போலத்தான், பூச்சிகளும் தங்கள் உடம்பில், காற்றில் உள்ள நுண்ணுயிர்களைத் தாங்கிக்கொண்டும் தங்களுக்கு ஏற்றவாறு பயன்படுத்திக்கொண்டும் வளர்கின்றன. ஆனால், மனிதர்கள் அதிகம் நோய்வாய்ப்படுகிறார்கள். உடலில் இருக்கும் நுண்கிருமிகள் வெளியிலிருந்து வரும் கிருமிகளை எதிர்த்துப் போராட முடியவில்லை என்ற கட்டத்தில், அதாவது, உடம்பில் உள்ள நோய் எதிர்ப்பு சக்தி குறையும்போது, நோய்வாய்ப்படுகிறார்கள். பூச்சிகளையும் கிருமிகள் தாக்குகின்றன. என்றைக்காவது பூச்சிகள் நோய்வாய்ப்பட்டிருக்கின்றனவா? இந்தக் கேள்விக்குள் நுழைந்தால் பூச்சிகளும் நுண் அரசியலும் என்ற பிரமாண்டம் விளங்கும். அதை ஒரு சுருக்கமான உதாரணத்துடன் பார்ப்போம்.

 நீ.செல்வம்
நீ.செல்வம்

சர்க்கரைச் சத்துள்ள ஒரு நபர், ஒரு கப் தேநீரில் ஒரு தேக்கரண்டி சர்க்கரை அதிகமானால் அலறுகிறார். 75 கிலோ உடல் எடையுள்ள மனிதன் ஒரு தேக்கரண்டி சர்க்கரைக்கே அலறும் நிலையில் இருக்கிறது மனித உடல். அப்படியே பூச்சிகளைப் பார்ப்போம். செடிகளின் நுனியில் அமர்ந்து சாற்றை உறிஞ்சும் அசுவினி, அதன் உடல் எடையைவிட 50 மடங்கு சாற்றை உறிஞ்சுகிறது. அது உறிஞ்சுவது முழுக்கச் சர்க்கரைத் தண்ணீர். தனது உடல் எடையைவிட 50 மடங்கு சர்க்கரைத் தண்ணீரை உறிஞ்சி, அதில் உள்ள சத்துக்களை எடுத்துக்கொண்டு மற்றதை வெளியே அனுப்புகிறது. அது வெளியே அனுப்பும் சர்க்கரை, எறும்புகளை வாழவைக்கிறது. எறும்பும் அசுவினி அனுப்பும் சர்க்கரைத் தண்ணீரைக் குடித்து, குட்டிகளுக்கும் கொடுத்து உயிர் வாழ்கிறது. இவ்வளவு அதிக அளவு சர்க்கரைத் தண்ணீர் குடித்தாலும் அசுவினியை என்றாவது சர்க்கரை நோய் தாக்கியிருக்கிறதா?

பூச்சி மேலாண்மை: 15 - பூச்சிகளை வாழவைக்கும் நுண்ணுயிர்கள்!

தனது எடையில் ஆயிரத்தில் ஒரு மடங்குகூட இல்லாத சர்க்கரை மனித உடலை அலறவைக்கிறது. ஆனால், தனது உடல் எடையைவிட 50 மடங்கு அதிகமான சர்க்கரையை உறிஞ்சும் அசுவினி எப்படிப் பாதுகாப்பாக இருக்கிறது? அதுதான் அசுவினியின் உடம்பில் உள்ள நுண்கிருமிகள் செய்யும் வேலை. அது எவ்வளவு சர்க்கரைத் தண்ணீரை உறிஞ்சினாலும் அதன் உடல் பாதிக்காத அளவுக்கு நுண்கிருமிகள் பார்த்துக் கொள்கின்றன. ஒவ்வொரு பூச்சியும் தனிப்பட்ட வகையில் தனது உடலுக்கு உள்ளேயும், மேற்புறத் தோலிலும், குடலிலும், உடம்பிலுள்ள செல்களிலும், சில சமயம் ஒரு பெற்றோரிடமிருந்து இன்னொரு பெற்றோருக்கும்கூட உயிரணுக்கள் மூலமாக நுண்ணுயிர்களைக் கடத்துகின்றன.

ஒரு கிருமியை ஓர் உடம்பிலிருந்து இன்னோர் உடம்புக்குக் கடத்தும் அரசியலில் நம்மைவிடப் பூச்சிகள் பலபடி முன்னே இருக்கின்றன. நம் உடம்பில் உள்ள கிருமிகளைக் குழந்தைகளுக்குக் கடத்துகிறோமா என்ற கேள்வியைவிடப் பூச்சிகள் எப்படிக் கடத்துகின்றன என்பத்தைப் பற்றிப் பார்ப்போம்.

பூச்சி மேலாண்மை: 15 - பூச்சிகளை வாழவைக்கும் நுண்ணுயிர்கள்!

‘சிம்ப்யாட்டிக் ரிலேஷன்ஷிப்’ என்ற முறையில் ஒவ்வொரு பூச்சியும் நுண்கிருமிகளை வாழவைத்துக்கொண்டு, தானும் வாழ்ந்துகொண்டிருக்கின்றன. ஓர் இடத்திலிருந்து இன்னோர் இடத்துக்குப் பரிணாமக்கொள்கையில் கடத்திக்கொண்டே இருக்கின்றன. நுண்கிருமிகள் என்பது பாக்டீரியா, வைரஸ், மைட்டோகாண்ட்ரியா, ஆக்டினோமைசிட் எதுவாக வேண்டுமானாலும் இருக்கலாம்.

ஒரு தேக்கரண்டி சர்க்கரைக்கே அலறும் நிலையில்தான் இருக்கிறது மனித உடல். சர்க்கரைத் தண்ணீர் குடித்தாலும் அசுவினியை என்றாவது சர்க்கரை நோய் தாக்கியிருக்கிறதா?

கறையான்கள் மரத்தைத் தின்று அழித்து, மட்க வைக்கின்றன. ஒவ்வொரு கறையானின் பின்குடலிலும் ஆக்சிஜன் இல்லாத ஓர் அறை இருக்கிறது. அதில் மரத்திலிருந்து கிடைக்கும் செல்லுலோசைக் கொஞ்சம் கொஞ்சமாகச் சிதைக்கும், நொதிக்கும் வேலை நடைபெறும். காற்று இல்லாத அறையில்கூட நொதிக்கும் வேலை செய்யும் ஆற்றல், கறையான் உடலில் உள்ள நுண்ணுயிர்களுக்கு உண்டு.

இயற்கைச் சூழலை எதிர்கொண்டு வாழும் கலையைக் கைக்கொண்டுள்ளன பூச்சிகள். ஆனால், மனிதர்கள் இயற்கைக்கு எதிரான செயல்களால், வாழ்க்கைப் பாதுகாப்பை இழந்து நிற்கிறார்கள். கறையான் தன் குஞ்சுகளுக்கு உணவுடன் நோய் எதிர்ப்பு சக்தி நுண்ணுயிர்களையும் சேர்த்து ஊட்டி விடுகிறது. இதுபோலத்தான் ஒவ்வொரு பூச்சியும், இயற்கைக்கு ஏற்ப தனது வாழ்க்கையை அமைத்துக்கொள்கிறது.

நுண்ணுயிர்கள் ஒரு பூச்சியிலிருந்து இன்னொரு பூச்சிக்குக் கிடைமட்டமாக அல்லது செங்குத்தாகப் பரவுகின்றன. முதலில் கிடைமட்டமாகப் பரவுவதைப் பற்றிப் பார்ப்போம். கறையான்கள் மரத்தை நொதிக்க வைத்து உணவாக உட்கொள்கின்றன. அந்த உணவைக் குஞ்சுகளுக்கு வாய் வழியாக ஊட்டி விடுகின்றன. நமக்கு அம்மா உணவை ஊட்டுவதுபோலக் கறையான்கள் குஞ்சுகளுக்கு ஊட்டி வளர்க்கின்றன. அப்படி ஊட்டி விடும்போது உணவை மட்டும் ஊட்டுவதில்லை. அந்த உணவைச் செரிக்கும் கிருமிகளையும் சேர்த்தே உள்ளே அனுப்புகின்றன. இப்படி ஊட்டி விடுவதன் மூலமாக ஒவ்வொரு கறையானும், அதற்குத் தேவையான கிருமிகளை உள்வாங்கிக்கொள்கின்றன. இதைத்தான் கிடைமட்டமாகப் பரவுதல் என்கிறார்கள்.

பெற்றோர் உடம்பிலிருந்து குழந்தைகளுக்கு உயிரணுக்கள் மூலமாகப் பரவும் வகையைச் செங்குத்தாகப் பரவுதல் என்கிறார்கள். இந்தவகையில் ஒரு பெற்றோரிடமிருந்து கிருமிகள் உயிரணுக்கள் மூலமாக அதன் குழந்தைகளுக்கும் போகின்றன. பூச்சிகள் தங்கள் உடம்பில் உள்ள நுண்ணுயிர்களை எங்கே பாதுகாக்கின்றன? உடலில் ரத்த அணுக்கள் மற்றும் மேல்தோலில் இவற்றைப் பாதுகாக்கின்றன. சிலசமயம் பூச்சிகள் தங்களது வளர்சிதை மாற்றத்தின்போது, மேல்தோலைக் கழற்றிவிடுதல், கால்களைக் கொண்டே உடம்பு முழுவதும் சொறிந்து விடும்போது, கிருமிகளை இழக்கின்றன. மீண்டும் அதைப் பெறுவதற்கு அடுத்த பூச்சிகளுடன் இணைவது, மண்ணில் எடுத்துக்கொள்வது போன்ற பல வழிகளைக் கையாள்கின்றன. இதன்மூலம் நுண்ணுயிர்ப் பெருக்கத்தை உடலில் பாதுகாத்துக் கொள்கின்றன.

‘‘இயற்கைச் சூழலை எதிர்கொண்டு வாழும் கலையைக் கைக்கொண்டுள்ளன பூச்சிகள். ஆனால், மனிதர்கள் இயற்கைக்கு எதிரான செயல்களால், வாழ்க்கைப் பாதுகாப்பை இழந்து நிற்கிறார்கள்.’’

பூச்சிகளின் உடம்பினுள் இருக்கும் கிருமிகள் வெளியிலிருக்கும் கிருமிகளைவிட வடிவம், அளவு போன்றவற்றில் வித்தியாசமாக இருக்கும். உடம்புக்கு உள்ளே இருக்கும் கிருமிகள் பூச்சிகளின் உடலியல் சூழ்நிலைகளைத் தாங்கி வளரும் விதத்தில் அதன் உடல் அமைப்பில் மாற்றத்தை ஏற்படுத்துகின்றன. பூச்சிகள், பல்வேறு சூழல் மாறுபாடுகளுக்கு எதிரான தாங்குதிறனை உருவாக்கும் மந்திரத்தையும் இந்த நுண்ணுயிர்கள் செய்கின்றன.

சாறு உறிஞ்சும் பூச்சிகள், நச்சு உயிர்களை(வைரஸ்) பரப்புகின்றன. இப்படி நச்சுயிரிகளைப் பரப்பவும், உள்ளே இருக்கும் நுண்ணுயிர்கள் உதவுகின்றன என்பது கண்டறியப்பட்டுள்ளது. அசுவினிகள் செடிகளில் உள்ள தாவரச்சாற்றை உறிஞ்சுவதன் மூலம் அதிலுள்ள கார்போஹைட்ரேட்டுகளைச் சிதைப்பதற்குத் தேவையான முயற்சிகளை உடலில் உள்ள கிருமிகள், அமினோ அமிலங்கள், வைட்டமின் பி ஆகியவற்றைக் கொண்டு உருவாக்குகின்றன. மேலும் அசுவினி குஞ்சுகளை உருவாக்கும் தன்மை மற்றும் கூட்டமாகப் பெருகுதல் போன்றவற்றுக்கு உடம்புக்குள் இருந்துகொண்டு உதவி செய்கின்றன நுண்ணுயிர்கள்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பூச்சிகளைத் தாக்கும் பாக்டீரியாக்களைப் பி.டி என்கிறோம். பூஞ்சணங்களைப் பெவேரியா, மெட்டாரைசியம் என்கிறோம். இவற்றைப் பூச்சிகளின் மேல் தெளித்து, அவற்றுக்கு நோய்களை உருவாக்க முயலும்போது, அதிலிருந்து பூச்சிகள் தப்பிக்கும் வகையில் எதிர்ப்புத் தன்மையை உருவாக்கும் வேலையையும் செய்கின்றன நுண்ணுயிர்கள். பூச்சிகள் எதிரிகளைச் சமாளிப்பதிலும் இவை முக்கியப் பங்கு வகிக்கின்றன. பூச்சிகளின் மீது முட்டை போடும் ஒட்டுண்ணிகளைக் குளவிகள் என்கிறோம். இந்தக் குளவிகளைச் சமாளிக்கும் தன்மையைப் பூச்சிகளுக்கு அளிக்கின்றன நுண்ணுயிர்கள். இந்த உதவியைத் தீமை செய்யும் பூச்சிகளுக்குச் செய்கின்றன என்பதுதான் கவலைக்குரிய விஷயம்.

பூச்சி மேலாண்மை: 15 - பூச்சிகளை வாழவைக்கும் நுண்ணுயிர்கள்!

பூச்சிகளை அழிக்க விஷத்தைத் தெளிக்கிறோம். அந்த விஷத்தைப் பூச்சிகள் உறிஞ்சும்போது, அதன் வாயிலிருக்கும் நுண்ணுயிர்கள் விஷத்தைத் துண்டுத் துண்டாக நறுக்கி, தங்களுக்குத் தேவையான உணவாக மாற்றிக்கொள்கின்றன. விஷமுறிவு சக்தியை உருவாக்கும் வலிமையை அந்த நுண்ணுயிர்கள் பூச்சிகளுக்குக் கொடுக்கின்றன. இதுகுறித்துப் பல்வேறு ஆய்வுகள் தொடர்ச்சியாக நடைபெற்றுவருகின்றன. சில பயிர்கள், அவற்றைச் சாப்பிடும் தீமை செய்யும் பூச்சிகளைச் சாப்பிட விடாமல் செய்வதற்காகச் சில விஷங்களை இலைகளில் வைத்துக்கொண்டு அமர்ந்திருக்கின்றன.

அப்படிப்பட்ட செடிகளில் பூச்சிகள் ஏறி மேயும்போது, அந்த விஷங்களாலும் பூச்சிகளுக்குப் பிரச்னை வராமல் பார்த்துக் கொள்கின்றன நுண்ணுயிர்கள். இத்தனை விஷயங்களைச் செய்யும் நுண்ணுயிர்களை உடலுக்குள் பல மடங்கு பெருக்கிக் கொள்வதில் பூச்சிகள் கில்லாடிகள். அதில்தான் பூச்சிகளின் திறமையே அடங்கியிருக்கிறது. பூச்சிகளின் உடம்பில் அதன் எடையைவிடப் பத்து மடங்கு அதிகமான நுண்ணுயிர்கள் இருக்கின்றன. பூச்சிக்கொல்லிகளிலிருந்து பூச்சிகள் தப்பிக்க இந்த நுண்ணுயிர்களும் முக்கிய காரணம்.

-அறிவோம்

பூச்சிகளைக் கட்டுப்படுத்த நுண்ணுயிர்கள் தேவை!

த்திய தரைக்கடல் பகுதியில் பழ ஈக்கள், காய்கறிகள் மற்றும் பழங்களுக்கு மிகுந்த சேதாரத்தை ஏற்படுத்தி வந்தன. இவற்றைக் கட்டுப்படுத்துவதற்காகக் காமா கதிர்கள்மூலம் ஆண்மை நீக்கம் செய்யப்பட்ட ஆய்வகத்தில் வளர்க்கப்பட்ட ஆண் பழஈக்கள், அந்தப் பகுதியில் விடப்பட்டன. ஆனால், அந்தப் பகுதியிலிருந்த பெண் பழஈக்கள் இவற்றை ஏறெடுத்தும் பார்க்கவில்லை. வழக்கமாக அந்தப் பகுதியில் உள்ள ஆண் பழஈக்களுடன் இணைவதற்கே விரும்பின. இதனால், ஆய்வக ஆண் பழஈக்களால் எந்தப் பயனும் இல்லாமல் போனது.

இதைத் தெரிந்துக்கொண்ட பிறகு, மீண்டும் ஆய்வு தொடர்ந்தது. ஆய்வக பழ ஈக்களின் குடலில் இருக்கும் நுண்ணுயிர்களின் குறைபாடுதான் காரணம் என்பது தெரியவந்தது. உடனே அதற்குத் தேவையான சத்துகளைக் கொடுத்துக் குடலில் நுண்ணுயிர்களை உருவாக்கினார்கள். அதனால், அவை வீரியம் மிகுந்தவையாக மாறின. அதை மீண்டும் அந்தப் பகுதியில் விட்டார்கள். இந்தமுறை பெண் ஈக்கள் அவற்றை வெறுக்கவில்லை. மாறாக விரும்பி இணைந்தன. இதன் மூலம் பூச்சிகளின் கட்டுப்பாட்டில் நுண்ணுயிர்களின் தேவை எவ்வளவு முக்கியம் என்பதைப் புரிந்துகொள்ளலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு