Published:Updated:

பொருளாதார குற்றப் பிரிவின் விசாரணை வலையில்... ஐ.எஃப்.எஸ்! - FOLLOW-UP

மக்கள்
பிரீமியம் ஸ்டோரி
மக்கள்

கைவிரிக்கும் ஏஜென்ட்டுகள்... கலங்கி நிற்கும் மக்கள்...

பொருளாதார குற்றப் பிரிவின் விசாரணை வலையில்... ஐ.எஃப்.எஸ்! - FOLLOW-UP

கைவிரிக்கும் ஏஜென்ட்டுகள்... கலங்கி நிற்கும் மக்கள்...

Published:Updated:
மக்கள்
பிரீமியம் ஸ்டோரி
மக்கள்

‘கோடி கோடியாகச் சுருட்டுகிறார்கள். நிதி நிறுவனத்தை நோக்கி நீளும் புகார்கள். நிருபரை மிரட்டும் போலீஸ் இன்ஸ்பெக்டர்’ என்ற தலைப்பில் கடந்த 06/07/2022 தேதியிட்ட ஜூ.வி இதழில் ஒரு கட்டுரை வெளியிடப்பட்டது. ‘பங்குச் சந்தை முதலீட்டில் ஆண்டுக்கு 24% வருமானம் தருவதாகக் கூறி, ஏஜென்ட்டுகள் மூலமாகப் பொதுமக்களிடம் பணம் வசூலிக்கிறது வேலூர், காட்பாடியில் இயங்கிவரும் ஐ.எஃப்.எஸ் (IFS) நிறுவனம்’ என்று கிளம்பிய புகார்களின் அடிப்படையில் வெளியிடப்பட்ட கட்டுரை அது.

இந்த நிலையில், ‘எல்.என்.எஸ் இன்டர்நேஷனல் ஃபைனான்ஷியல் சர்வீசஸ்’ (LNS-IFS) என்ற நிறுவனம் சார்பில் சென்னை, அண்ணா நகரைச் சேர்ந்த வழக்கறிஞர் வி.ராகவாச்சாரியிடமிருந்து நமக்கு நோட்டீஸ் அனுப்பப்பட்டிருக்கிறது.

முதலில், எல்.என்.எஸ்-ஐ.எஃப்.எஸ் நிறுவனம் பற்றி அந்தக் கட்டுரையில் நாம் எதுவும் குறிப்பிடவில்லை. ஐ.எஃப்.எஸ் நிறுவனம் தொடர்பாகத்தான் கட்டுரையே எழுதப் பட்டிருக்கிறது. ஒருவேளை, இந்த நிறுவனம் அவர்களால் புதிதாகத் தொடங்கப்பட்டிருக்கும் மற்றொரு நிறுவனமாக இருக்கலாம் என்றே தோன்றுகிறது.

பொருளாதார குற்றப் பிரிவின் விசாரணை வலையில்... ஐ.எஃப்.எஸ்! - FOLLOW-UP

சரி, அவர்களுடைய வழக்கறிஞர் அனுப்பியிருக்கும் நோட்டீஸில் என்ன இருக்கிறது?

‘என் கட்சிக்காரரான லட்சுமிநாராயணன் நடத்தும் எல்.என்.எஸ்-ஐ.எஃப்.எஸ் நிறுவனம், பங்குச் சந்தை முதலீடு பற்றி மாணவர்களுக்குப் பயிற்றுவிக்கும் கல்வி நிறுவனம் மட்டுமே. பங்குச் சந்தை முதலீடு தொடர்பாக எந்த யோசனையும் சொல்வதில்லை. ஆனால், பங்குச் சந்தையில் முதலீடு செய்வதன் மூலம் மிகப்பெரிய வருமானத்தைத் தருவதாகச் சொல்லி, வேலூர், சென்னை பகுதிகளில் மக்களிடமிருந்து கோடிக் கணக்கில் பணம் பெறுவதாகச் சொல்லியிருக் கிறீர்கள். இந்த நிறுவனம் மக்களிடமிருந்து பணம் எதுவும் வாங்குவதில்லை. உங்கள் கட்டுரையைத் தொடர்ந்து, பலரும் எனது கட்சிக்காரரைத் தொடர்புகொண்டு கேள்வி கேட்பதால், அவர் நெருக்கடிக்கு உள்ளாகியிருக்கிறார். நஷ்ட ஈடாக 15 நாள்களுக்குள் ஒரு கோடி ரூபாயை வழங்க வேண்டும். இல்லாவிட்டால், சட்டப்படியான நடவடிக்கை எடுப்போம்’ என்பதுதான் அதன் சாராம்சம்.

அந்தக் கட்டுரையைப் பிரசுரிப்பதற்கு முன்பே உரிய விளக்கத்தைக் கேட்டு மின்னஞ்சல் செய்தோம். ஆனால், பதில் தரப்படவில்லை. அதையடுத்துத்தான் அந்த நிறுவனத்தைச் சேர்ந்த ஜனார்த்தனனைத் தொடர்புகொண்டோம். அவரும் பதில் தர மறுத்துவிட்டார். தற்போது வழக்கறிஞர் நோட்டீஸ் மூலமாக, பணம் வாங்கவில்லை என்று விளக்கமளித்திருக்கிறார்கள். ஆனால், ஐ.எஃப்.எஸ் நிறுவனத்தின் பெயரைச் சொல்லி, கோடிக்கணக்கில் பணம் வசூலிக் கப்பட்டிருக்கிறது என்பதுதான் குற்றச்சாட்டே. அதை இவர்கள் மறுக்கும் நிலையில், இவர்களின் நிறுவனத்தின் பெயரைச் சொல்லி பணத்தை வசூலிப்பது யார்... மக்களின் முதலீட்டுப் பணத் துக்கு என்ன உத்தரவாதம்... தங்கள் பெயரைப் பயன்படுத்தி வெளியில் பணம் வசூலிக்கப்படுவது தொடர்பாகச் சட்டரீதியான நடவடிக்கை ஏதும் இவர்கள் எடுத்துள்ளனரா... என்பது உள்ளிட்ட பல கேள்விகள் இயல்பாகவே எழுகின்றன.

பொருளாதார குற்றப் பிரிவின் விசாரணை வலையில்... ஐ.எஃப்.எஸ்! - FOLLOW-UP

இந்த நிலையில், கடந்த 16-ம் தேதியன்று காஞ்சிபுரம் மாவட்டக் காவல்துறை கண்காணிப்பாளர் சுதாகரிடம், ‘பங்குச் சந்தையில் முதலீடு செய்கிறோம். ஒரு லட்ச ரூபாய் கொடுத்தால் மாதம் 10,000 ரூபாய் தருகிறோம் என்று சொல்லி, தனஞ்செழியன் என்பவர் கோடிக்கணக்கில் மோசடி செய்துவிட்டார்’ என்று கோனேரிக்குப்பம் பகுதியைச் சேர்ந்த சூர்யா, சுகுமார் குடும்பத்தினர், நண்பர்கள் மற்றும் பொதுமக்கள் எனத் திரண்டுவந்து புகார் கொடுத்துள்ளனர்.

புகார் கொடுத்த சூர்யா, சுகுமார் குடும்பத்தினரிடம் பேசியபோது, ‘‘ராணிப்பேட்டை மாவட்டம், வன்னிவேடு கிராமத்தைச் சேர்ந்த சாம்பசிவம் என்பவரின் மகன்கள் அதியமான், தனஞ்செழியன், பரத், பாரி ஆகிய நால்வருடன், அதியமானின் மனைவி மீரா, தனஞ்செழியனின் மனைவி கங்காதேவி ஆகியோர் கூட்டாகச் சேர்ந்து, ஆன்லைன் டிரேடிங் மூலம் முதலீடு செய்யும் பணத்துக்கு மாதம்தோறும் 10% முதல் வருமானம் ஈட்டித் தருவதாகக் கூறி, எங்களிடமிருந்து பணத்தை வாங்கினார்கள். அதாவது, 1 லட்சம் ரூபாய் முதலீடு செய்தால், மாதம்தோறும் 10,000 ரூபாய் தருவதாகக் கூறினார்கள். கம்ப்யூட்டரெல்லாம் வைத்து டிரேடிங் செய்யும் அலுவலகத்தையும் காட்டினார்கள். தனஞ்செழியனின் அண்ணன் அதியமான், கிராம நிர்வாக அதிகாரியாக இருக்கிறார். ‘உங்கள் பணத்துக்கு நான் பொறுப்பு, ஏதேனும் பிரச்னை எனில், என் சொத்துகளை விற்று பணத்தைத் திரும்பத் தருவேன்’ என்று அதியமான் உறுதி கூறினார். அதன் பிறகே, நாங்கள் நம்பி பணத்தைக் கொடுத்தோம்.

2021 பிப்ரவரி முதல் 2022 மே வரை மொத்தமாக ரூ.6 கோடி ரூபாய் அளவுக்கு வசூலித்துள்ளனர். ஆன்லைன் வங்கிக் கணக்கு மூலமாகப் பணத்தை அனுப்பியபோது, ‘பணமாகவே கொடுங்கள்’ என்று சொல்லி வாங்கிக்கொண்டார்கள். ‘வியாபாரம் நிமித்தம் கடனாக இந்தத் தொகையை வாங்கிக்கொள்கிறேன்’ என்று பத்திரத்தில் எழுதிக் கொடுத்தவர்கள், அந்தத் தொகைக்கு ஈடான காசோலையையும் கொடுத்தார்கள்.

பொருளாதார குற்றப் பிரிவின் விசாரணை வலையில்... ஐ.எஃப்.எஸ்! - FOLLOW-UP

எங்களை நம்பி ஊர்க்காரர்கள் பலரும் முதலீடு செய்தார்கள். கணவரை இழந்தவர்கள், ஏழைகள், கூலிகள் எனப் பலரும் பிள்ளைகளைப் படிக்கவைக்கலாம், திருமணம் செய்துவைக்கலாம், ஏழ்மையிலிருந்து மீண்டுவிடலாம் என்கிற கனவுகளுடன்தான், இதுநாள் வரை தாங்கள் சேர்த்துவைத்திருந்த பணத்தை முதலீடு செய்தார்கள். இப்போது அத்தனையும் சிதைந்துவிட்டன. சில மாதங்கள் வரை மட்டும், ரூ.1 லட்சத்துக்கு ரூ.10,000 வீதம் பணம் கொடுத்தவர்கள், ஏமாற்ற ஆரம்பித்துவிட்டார்கள்.

இந்நிலையில், நேரில் சென்று பார்த்தபோது, அலுவலகத்தில் இருந்தவர்கள், ‘கங்காதேவி உள்ளிட்டோர், பணத்தை ஏற்பாடு செய்ய சென்னை சென்றுள்ளனர்’ என்று கூறினார்கள். நாங்கள் விடாமல் துளைத்தெடுத்தபோதுதான், ஆன்லைன் டிரேடிங் போன்ற பிசினஸ் எதையும் அவர்கள் செய்யவில்லை என்பது எங்களுக்குத் தெரிந்தது. பணத்தைக் கேட்டு தொடர்ந்து அழுத்தம் கொடுத்த நிலையில், எங்கள் மீதே போலீஸில் கந்துவட்டி புகார் கொடுத்துவிட்டார்கள்’’ என்று குமுறினார்கள்.

வட்டிக்குக் கடன் வாங்கியதுபோலவும், திருப்பித் தருவதுபோலவும் பத்திரத்தில் எழுதிக் கொடுத்துவிட்டு, நாளைக்குப் பணத்தைக் கேட்டால், கந்துவட்டி புகார் கொடுக்கலாம் என்று பலே கில்லாடியாக யோசித்துச் செயல்படுத்தியுள்ளனர். ஆம், வேலூர் எஸ்.பி அலுவலகத்தில், பணம் கொடுத்த மக்கள்மீதே கந்துவட்டி புகார் தரப்பட்டிருக்கிறது. இதைத் தொடர்ந்துதான் காஞ்சிபுரம் எஸ்.பி-யிடம் பாதிக்கப்பட்டவர்கள் புகார் கொடுத்திருக்கிறார்கள்.

பொருளாதார குற்றப் பிரிவின் விசாரணை வலையில்... ஐ.எஃப்.எஸ்! - FOLLOW-UP

இதைப் பற்றி பேசிய காஞ்சிபுரத்தைச் சேர்ந்த நம் வாசகர் ஒருவர், ‘‘ஏமாந்து நிற்கும் மக்களிடம் இருக்கும் ஆவணங்கள் அனைத்தும், ஐ.எஃப்.எஸ் நிறுவனத்தின் பெயரில் மோசடி செய்து கொண்டிருக்கும் நபர்கள் கொடுக்கும் ஆவணங்களுடன் பொருந்துகின்றன. இந்தத் தனஞ்செழியன், அதியமான் குடும்பத்தினர், ஐ.எஃப்.எஸ் நிறுவனத்தின் பினாமி ஏஜென்ட்டுகளாகக்கூட இருக்கலாம். வேலூரைத் தாண்டி சென்னை வரை இப்படி வசூலித் திருக்கிறார்கள். கணக்கு போட்டுப் பார்த்தால், பல்லாயிரம் கோடிகள் சுருட்டப்பட்டிருக்கும் என்றே தோன்றுகிறது. ஆனால், காவல்துறை இதுவரை எந்த நடவடிக்கையும் எடுக்கவில்லை’’ என்றார்.

தனஞ்செழியனைத் தொடர்புகொண்டபோது, போனை எடுத்த அவருடைய மனைவி கங்காதேவி, ‘‘எல்லோரும் பணம் கேட்டு மிரட்டுவதால், மிகுந்த மன உளைச்சலுக்கு ஆளாகியிருக்கிறார். மனநல மருத்துவரிடம் சிகிச்சை எடுத்துக்கொண்டிருக் கிறார். இப்போது அவரால் எதுவும் பேச முடியாது” என்று சொன்னவர், அவர்கள் மீதான புகார் எதையும் மறுக்கவில்லை. இந்த மோசடித் திட்டத்தின் பின்னணியில் இருப்பவர்கள் யார் என்றெல்லாம் கேட்டபோது, அதற்கான பதிலையும் தரவில்லை. ‘சொத்தை விற்றுப் பணத்தைக் கொடுப்பேன்’ என்று மக்களிடம் வாக்குறுதி கொடுத்த வி.ஏ.ஓ-வான அதியமானும் தற்போது, ‘தொடர்பு எல்லைக்கு வெளியே’தான் இருக்கிறார்.

மனைவியுடன் தனஞ்செழியன்
மனைவியுடன் தனஞ்செழியன்

காஞ்சிபுரம் ஏ.டி.எஸ்.பி-யான வினோத்திடம் கேட்டபோது, ‘‘இப்படி ஏராளமான புகார்கள் வருகின்றன. ஆனால், மக்களிடம் விழிப்புணர்வு இல்லை. எங்களிடம் கொடுக்கப் பட்டிருக்கும் புகாரில், மோசடி செய்யப்பட்ட தொகை கோடிகளில் இருப்பதால், பொருளாதாரக் குற்றப் பிரிவு காவல்துறை விசாரணைக்கு மாற்றியிருக்கிறோம். விரைவில் விசாரணை மேற்கொள்ளப்படும்’’ என்றார்.

மாதம்தோறும் முதலீட்டுதாரர்களுக்கு வட்டிப் பணத்தைக் கொடுத்துவந்த ஏஜென்ட்டுகள், தற்போது கைவிரிக்க ஆரம்பித்திருப்பதால், இந்த மோசடிக் கும்பலின் முகத்திரை வேகமாகக் கிழிய ஆரம்பித்திருக்கிறது. இதைத் தொடர்ந்து, ‘ஐ.எஃப்.எஸ் நிறுவனத்தின் செயல்பாடுகள் குறித்து விசாரிக்க வேண்டும்’ என்று மாநிலப் பொருளாதாரக் குற்றப்பிரிவு காவல்துறை சார்பில் வேலூர் மாவட்டக் காவல்துறைக்கு அறிவுறுத்தல் அனுப்பப்பட்டிருப்பதாகக் கூறப்படுகிறது.

மக்கள் சாதுர்யமாகச் செயல்படாதவரை, சதுரங்க வேட்டைகள் தொடரவே செய்யும்!