அரிய வகைத் தாவரங்கள், விலங்கினங்கள், பறவைகள், நீர்வாழ்வன, நீர்-நில வாழ்வன, ஊர்வன என எண்ணிலடங்கா காட்டுயிர்கள் இங்கே பாதுகாக்கப்பட்டுவருகின்றன. சூழலியல் முக்கியத்துவம் வாய்ந்த இந்தப் பாதுகாக்கப்பட்ட வனப்பகுதியில் சட்டத்தை மீறி 15 கி.மீ தொலைவுக்கு கேபிள் பதிக்க ரிலையன்ஸின் ஜியோ நிறுவனத்துக்கு அனுமதி அளிக்கப்பட்டுள்ளதாகப் புகார் கிளம்பியுள்ளது.

இந்த விவகாரம் குறித்து முதுமலை பழங்குடிகள் பாதுகாப்புச் சங்கத்தின் நிறுவனர் செந்தில்குமாரிடம் பேசினோம். ‘‘வன நிலங்களில் மின்சாரம் மற்றும் தொலைத் தொடர்பு சார்ந்த பணிகள் மேற்கொள்ள வேண்டுமானால், 2006 வன உரிமைச் சட்டத்தின்படி சில விதிமுறைகளைக் கடைப்பிடிக்க வேண்டும். அதன்படி உள்ளூர் கிராமசபையில் ஒப்புதல் பெற வேண்டும். இதை நன்கு அறிந்திருந்தும், பழங்குடி மக்களின் கருத்தைக் கேட்காமலேயே ஜியோ நிறுவனத்தின் ஆப்டிக் ஃபைபர் கேபிள் பதிக்க வனத்துறை அதிகாரிகள் அனுமதி அளித்துள்ளனர். தங்களது தனிப்பட்ட ஆதாயத்துக்காகச் சில அதிகாரிகள் சட்டத்தை மீறி இதற்கு அனுமதியளித்துள்ளனர். எனவே, இதை அரசு மறுபரிசீலனை செய்ய வேண்டும்’’ என்றார்.