Published:Updated:

ஜூனியர் வாக்கிடாக்கி

ஜூனியர் வாக்கிடாக்கி
பிரீமியம் ஸ்டோரி
News
ஜூனியர் வாக்கிடாக்கி

- ‘இன்ஃபார்மர்’ பரத்

ஹார்லிக்ஸ், பூஸ்ட், இளநீர்... வசூல்!

தஞ்சை காவல்துறையில் ‘பொன்னியின் செல்வன்’ கதாபாத்திர பெயர்கொண்ட பெண் அதிகாரி ஒருவரின் வசூல் வேட்டை வெகு நூதனம் என்று வியக்கிறார்கள் சக காக்கிகள். இவர் வாகன சோதனையில் ஈடுபடும்போது, உரிய ஆவணங்கள் இல்லாமல் வருபவர்களின் டூ-வீலரைப் பிடித்தால் அபராதம் விதிப்பதில்லை; வழக்கும் பதிவுசெய்ய மாட்டார். மாறாக, ஒரு லிஸ்ட்டை நீட்டுகிறாராம்... அதில் ஹார்லிக்ஸ், பூஸ்ட், மளிகைப் பொருள்கள், காய்கறி, பழங்கள் என சுமார் 1,000 ரூபாய்க்குக் குறையாமல் பொருள்கள் வரிசைகட்டுகின்றன. அதை வாங்கிக் கொடுத்துவிட்டால், வண்டியை விடுவித்துவிடுவார். சமீபத்தில் மருத்துவர் ஒருவர் இவர் பிடியில் சிக்கியுள்ளார். “மேடம், நான் டாக்டர்” என்று அவர் எவ்வளவோ சொல்லியும் கேட்காமல், ‘‘சார்... ரொம்ப நேரமா வெயில்ல நிக்குறேன். அஞ்சு இளநீர் வாங்கிக் கொடுத்துட்டு வண்டியை எடுத்துட்டுப் போங்க’’ என்று சொல்ல, வேறு வழியில்லாமல் நொந்துகொண்டே இளநீர் வாங்கிக் கொடுத்திருக்கிறார். நாளுக்கு நாள் அந்த அதிகாரியின் செயல்கள் எல்லை மீறுவதாக சக காவலர்களே புலம்புகிறார்கள்.

ஜூனியர் வாக்கிடாக்கி

கூடுதல் கட்டிங்... கடுப்பில் காவலர்கள்!

சமீபத்தில் டெல்டா மாவட்டம் ஒன்றில் குறிப்பிட்ட சப் டிவிஷனிலுள்ள அனைத்துக் காவல் நிலையங்களிலும் கம்ப்யூட்டர் மூலம் எஃப்.ஐ.ஆர் டைப் அடித்துத் தரவும், பதிவேற்றம் செய்யவும் பயிற்சிபெற்ற பெண் காவலர்கள் நியமிக்கப்பட்டிருக்கிறார்கள். அவர்களுக்கு வேறு எந்த டூட்டியும் கிடையாதாம். நல்ல விஷயம்தானே என்கிறீர்களா? அந்தக் காவலர்களால் மட்டுமே கம்ப்யூட்டரை இயக்க முடியும் என்பதால், காவல் நிலையத்திலுள்ள மற்ற போலீஸாரையும் அவர்கள் மதிப்பதில்லை என்று சில காவல் நிலையங்களிலிருந்து புகார்கள் கிளம்பியுள்ளன. அத்துடன், ஸ்டேஷன்களில் மாமூல் பங்கு பிரிப்பதிலும் கூடுதலாக கட்டிங் எதிர்பார்க்கிறார்களாம். இதனால் சக காவலர்கள் கடுப்பில் இருக்கிறார்கள்!

ஊற்றிக்கொடுத்த காக்கிகள்!

வட மாவட்டம் ஒன்றில், மலைப்பகுதிகளில் கள்ளச்சாராயம் கனஜோராகக் காய்ச்சப்படுகிறது. ஊரடங்கில் டாஸ்மாக் கடைகள் அடைக்கப்பட்டிருந்தபோது, சாராயம் வாங்குவதற்காக மதுப்பிரியர்கள் மலைப் பகுதிகளுக்குப் படையெடுத்தார்கள். தகவலறிந்த மதுவிலக்கு போலீஸார் அதிரடி ரெய்டு நடத்தி, கேன் கேனாக கள்ளச்சாராயத்தைப் பறிமுதல் செய்தார்கள். பறிமுதல் செய்யப்பட்ட கள்ளச்சாராயத்தை முறைப்படி டிஸ்போஸ் செய்ய வேண்டும். ஆனால், மதுவிலக்கு போலீஸாரில் ஒருவருக்கு மதுவை வீணாகக் கீழே கொட்டுவதில் மனமில்லை போலும்... தனக்கு வேண்டப்பட்டவர்கள், இன்ஃபார்மர்கள் ஆகியோரை ரகசியமாக அழைத்து லிட்டர் லிட்டராக ஊற்றிக் கொடுத்திருக்கிறார். அதன் பிறகே மீதமுள்ள மதுவை அழித்திருக்கிறார்கள். செய்தியைக் கேள்விப்பட்ட பிற காவல் நிலைய போலீஸார், ‘அதென்ன மதுவிலக்கு காவல் நிலையமா... மது ஊற்றிக்கொடுக்கும் காவல் நிலையமா..?’ என்று தலையில் அடித்துக்கொள்கிறார்கள்.