Published:Updated:

வீணாகிப்போன 1.30 கோடி ரூபாய்!

ஆதிகேசவப்பெருமாள் கோயில்
பிரீமியம் ஸ்டோரி
ஆதிகேசவப்பெருமாள் கோயில்

இந்து சமய அறநிலையத் துறை அதிகாரிகளின் அலட்சியம்...

வீணாகிப்போன 1.30 கோடி ரூபாய்!

இந்து சமய அறநிலையத் துறை அதிகாரிகளின் அலட்சியம்...

Published:Updated:
ஆதிகேசவப்பெருமாள் கோயில்
பிரீமியம் ஸ்டோரி
ஆதிகேசவப்பெருமாள் கோயில்

கன்னியாகுமரி மாவட்டத்தில் உள்ள பிரசித்திபெற்ற கோயில்களில் ஒன்று, திருவட்டாறில் அமைந்துள்ள ஆதிகேசவப் பெருமாள் கோயில். இந்தக் கோயிலுக்குச் சொந்தமாக, 120 ஏக்கர் பரப்பில் ‘ஆனையடி எஸ்டேட்’ உள்ளது. இங்கு ஏராளமான ரப்பர் மரங்கள் உள்ளன. ``இந்த மரங்கள் பருவத்துக்கு வந்தும், கடந்த மூன்று ஆண்டுகளாக பால் வடிக்க, அறநிலையத் துறை அதிகாரிகள் நடவடிக்கைகள் எடுக்கவில்லை’’ என்கிறார்கள் பக்தர்கள். இதனால், 1.3 கோடி ரூபாய் இழப்பு ஏற்பட்டுள்ளது எனக் குற்றச்சாட்டு கிளம்பியுள்ளது.

வீணாகிப்போன 1.30 கோடி ரூபாய்!

கன்னியாகுமரி மாவட்ட காங்கிரஸ் தொழிற்சங்கத் தலைவர் அனந்தகிருஷ்ணன், இதுகுறித்து நம்மிடம் பேசினார். ‘‘ஆனையடி எஸ்டேட்டில் முன்பு ஏராளமான ரப்பர் மரங்கள் இருந்தன. அவற்றில் பால் வடிக்கும் தொழில்நுட்பம் தெரிந்த பணியாளர்கள் அறநிலையத் துறையில் இல்லை. அதனால், தனியார் நிறுவனங்களுக்கு ஒப்பந்த அடிப்படையில் பால் வடிக்கும் உரிமை வழங்கப்பட்டுவந்தது.

ரப்பர் மரங்கள், 35 ஆண்டுகள் வரை பலன் கொடுக்கக்கூடியவை. ஆனால், அறநிலையத் துறையிடம் அனுமதி பெற்ற நிறுவனங்கள் பால் வடிப்பதற்காக முறையாக வெட்டாததால், அந்த மரங்கள் அனைத்தும் நடவுசெய்த 15 ஆண்டுகளுக்குள் அழிந்துவிட்டன. ரப்பர் மரங்களில் பால் வடிக்க, சரியான அனுபவம் இல்லாத நிறுவனங்களுக்கு ஒப்பந்தம் அளிக்கப்பட்டதுதான் மரங்கள் அழிந்ததற்குக் காரணம்.

ஒட்டுமொத்த விகடனுக்கும் ஒரே ஷார்ட்கட்!

அனந்தகிருஷ்ணன், அன்புமணி
அனந்தகிருஷ்ணன், அன்புமணி

அதன் பிறகு, கடந்த 2009-ம் ஆண்டில் 12 ஏக்கர் பரப்பிலும், 2010-ம் ஆண்டில் 36 ஏக்கர் பரப்பிலும் 2014-ம் ஆண்டில் 35 ஏக்கர் பரப்பிலும் ரப்பர் மரக்கன்றுகள் நடப்பட்டன. ரப்பர் மரங்களில் ஏழு ஆண்டுகளில் பால் வடிக்கலாம். அந்த வகையில், 2009 மற்றும் 2010-ம் ஆண்டில் நடப்பட்ட மரங்கள், தற்போது பால் வடிக்கும் பருவத்தில் இருக்கின்றன. ஆனால், இந்து சமய அறநிலையத் துறை அதிகாரிகளின் மெத்தனத்தால் இதுவரை பால் வடிக்கப்படவில்லை.

இரண்டு ஆண்டுகளுக்கு முன்பே அறிவிப்பு வெளியிட்டு, ரப்பர் தோட்டத்தில் களைகளை அகற்றி உரமிட்டுப் பராமரிக்க ஒரு நிறுவனத்துக்கும், பால் வடிக்க மற்றொரு நிறுவனத்துக்கும் ஒப்பந்தம் இறுதிசெய்யப்பட்டது. ஆனால், இன்று வரை பால் எடுப்பதற்கான அனுமதி அளிக்கப்படவில்லை.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

ஒரு மரத்தில் ஆண்டுக்கு ஐந்து கிலோ பால் கிடைக்கும். அந்த வகையில், கடந்த மூன்று ஆண்டுகளில் கிட்டத்தட்ட ஒரு லட்சம் கிலோ பால் வடித்திருக்க முடியும். ஒரு கிலோ பாலின் சராசரி விலை, 130 ரூபாய். அந்தக் கணக்கில் பார்த்தால், 1 கோடியே 30 லட்சம் ரூபாய் மதிப்பிலான பாலை வடித்திருக்க முடியும். ஆனால், அதிகாரிகள் அனுமதி அளிக்காததால், அறநிலையத் துறைக்கு இவ்வளவு பெரிய இழப்பு ஏற்பட்டிருக்கிறது.

ஆதிகேசவப்பெருமாள் கோயில்
ஆதிகேசவப்பெருமாள் கோயில்

திருவட்டாறு ஆதிகேசவப்பெருமாள் கோயிலில் நடைபெற்றுவரும் திருப்பணிகளுக்குச் செலவுசெய்யப் பணம் இல்லை என்று இந்து சமய அறநிலையத் துறை அதிகாரிகள் கைவிரித்துவருகின்றனர். ஆனால், அதே கோயிலுக்குச் சொந்தமான நிலத்தில் 1 கோடியே 30 லட்சம் ரூபாய் பணத்தை வீணடித்திருக்கிறார்கள். இந்தத் தொகையை, சம்பந்தப்பட்ட அதிகாரிகளின் சம்பளத்திலிருந்து பிடித்தம் செய்ய வேண்டும்” என்றார்.

இந்து சமய அறநிலையத் துறை பணியாளர்கள் சிலரிடம் இதுகுறித்துப் பேசினோம். ‘‘சென்னையில் உள்ள தலைமை அலுவலகத்தில் பணியாற்றும் அதிகாரிகளிடம் அனுமதி பெற்றுத்தான், ரப்பர் மரங்களில் பால் வடிப்பதற்கும், மரங்களைப் பராமரிப்பதற்கும் ஒப்பந்தம் கோரப்பட்டு, இரண்டு நிறுவனங்கள் தேர்வுசெய்யப்பட்டன. அந்த நிறுவனங்கள் பணியைத் தொடங்குவதற்கான அனுமதியை, சென்னையில் உள்ள ஆணையர்தான் அளிக்க வேண்டும். அதற்கு அனுமதி கேட்டு, இரண்டு ஆண்டுகளுக்கு முன்பே ஆணையர் அலுவலகத்துக்குக் கோப்புகள் அனுப்பப்பட்டுவிட்டன. இவ்வளவு நாள்களாக அதைக் கிடப்பில் போட்டுவிட்டு, சமீபத்தில் ‘கூட்டுறவுச் சங்கங்கள் மூலம் பால் வெட்டும் பணியை மேற்கொள்ளலாமா? அதுகுறித்த அறிக்கையை அனுப்பவும்’ என்று சொல்லி, அந்தக் கோப்புகளை கன்னியாகுமரி மாவட்ட இணை ஆணையருக்குத் திருப்பி அனுப்பியிருக்கிறார்கள். இணை ஆணையர், ரப்பர் கூட்டுறவுச் சங்கத்துக்கு இது சம்பந்தமாகக் கடிதம் எழுதியிருக்கிறார். ஆனால், இன்னும் பதில் வரவில்லை. பதில் கிடைத்தவுடன், சென்னைக்கு அனுப்பினால் அதன்மீது இன்னும் எத்தனை கேள்விகள் கேட்பார்களோ தெரியாது. உண்மையில், சென்னையில் உள்ள உயர் அதிகாரிகள் ரப்பர் மரங்கள் குறித்து முழுமையாகப் புரிந்துகொள்ளாததுதான் இதற்குக் காரணம். அதனால்தான் சம்பந்தமில்லாத கேள்விகளை எழுப்புகிறார்கள்’’ என்றனர்.

கன்னியாகுமரி மாவட்ட இந்து சமய அறநிலையத் துறை இணை ஆணையர் அன்புமணியிடம் பேசியபோது, ‘‘ஆனையடி எஸ்டேட்டில், ரப்பர் பால் வெட்டுவதற்கான டெண்டர் வைக்கப்பட்டுவிட்டது. பால் வடிப்பதற்கான ஆணை, அவர்களுக்கு விரைவில் வழங்கப்படும்’’ என்றார்.

`கோயிலுக்குச் சேர வேண்டிய 1 கோடியே 30 லட்சம் ரூபாய் பணத்தை வீணடித்த அதிகாரிகள்மீது நடவடிக்கை எடுக்கப்படுமா?’ என்பதுதான் பக்தர்களின் கேள்வி!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism