Published:Updated:

தீவிரத் தொற்றில் கேரளா... தயார்நிலையில் இருக்கிறதா தமிழகம்?

பினராயி விஜயன்
பிரீமியம் ஸ்டோரி
பினராயி விஜயன்

கேரள மாநிலம் கொரோனா தடுப்பு நடவடிக்கைகளை சிறப்பாகக் கையாள்கிறது என்று பல்வேறு தரப்பினராலும் பாராட்டப்பட்டது.

தீவிரத் தொற்றில் கேரளா... தயார்நிலையில் இருக்கிறதா தமிழகம்?

கேரள மாநிலம் கொரோனா தடுப்பு நடவடிக்கைகளை சிறப்பாகக் கையாள்கிறது என்று பல்வேறு தரப்பினராலும் பாராட்டப்பட்டது.

Published:Updated:
பினராயி விஜயன்
பிரீமியம் ஸ்டோரி
பினராயி விஜயன்

கடந்த வாரம் தமிழக அரசு ஊரடங்கு தளர்வுகளை அறிவித்ததை அடுத்து கடற்கரைகளும், சுற்றுலாத் தலங்களும், ஷாப்பிங் மால்களும் களைகட்டுகின்றன. இதையடுத்து, “தமிழகத்தில் பொது இடங்களிலும், பொழுதுபோக்கு இடங்களிலும் கூடுவோர் சமூக இடைவெளி உள்ளிட்ட பாதுகாப்பு முன்னெச்சரிக்கை நடவடிக்கைகளை கவனமாகப் பின்பற்ற வேண்டும்” என்று எச்சரிக்கிறார்கள் மருத்துவ நிபுணர்கள். அத்துடன் நம் அண்டை மாநிலமான கேரளாவில் கொரோனா எண்ணிக்கை அதிகரித்துவருவது, நாம் எச்சரிக்கையாக இருக்கவேண்டியதன் அவசியத்தை உணர்த்துகிறது.

இந்தியாவில் கொரோனா முதல் அலையின் தாக்கத்தைவிட இரண்டாம் அலையின் தாக்கம் வீரியமாக இருந்தது. மருத்துவமனைகளில் நோயாளிகள் படுக்கைகளுக்காகவும் ஆக்சிஜனுக்காகவும் நீண்ட வரிசையில் காத்திருந்தார்கள். ஒருவழியாக தொற்றின் தாக்கம் படிப்படியாகக் குறையத் தொடங்கிய நிலையில், தற்போது கேரளாவில் மீண்டும் தொற்று எண்ணிக்கை அதிகரிக்கத் தொடங்கியிருக்கிறது.

தீவிரத் தொற்றில் கேரளா... தயார்நிலையில் இருக்கிறதா தமிழகம்?

கேரள மாநிலம் கொரோனா தடுப்பு நடவடிக்கைகளை சிறப்பாகக் கையாள்கிறது என்று பல்வேறு தரப்பினராலும் பாராட்டப்பட்டது. ஆனால், கடந்த மாதம் பக்ரீத் பண்டிகைக்கு அங்கு தளர்வுகள் அறிவிக்கப்பட்டதைத் தொடர்ந்து தொற்றின் எண்ணிக்கையும் சற்று அதிகரிக்கத் தொடங்கியது. அடுத்த நான்கு வாரங்களில் வந்தது ஓணம் பண்டிகை. கூட்டம் கூட்டமாகத் திரண்டார்கள் மக்கள். அடுத்தடுத்த நாள்களில், தொற்று பரவலின் விகிதம் மிக வேகமாக அதிகரித்துவிட்டது. ஆகஸ்ட் முதல் வாரத்தில் 12 சதவிகிதமாக இருந்த தொற்றின் விகிதம், தற்போது 19 சதவிகிதமாக அதிகரித்துள்ளது. அதனால், மாநிலம் முழுவதும் பல்வேறு கட்டுப்பாடுகளை அமல்படுத்தியுள்ளது கேரள அரசு.

இந்தியாவில் இரண்டாம் அலை உச்சத்திலிருந்தபோது, கேரளாவில் தொற்று எண்ணிக்கை 22,000 வரை பதிவானது. இப்போது அது உச்சம் தொடுகிறது. கடந்த ஆகஸ்ட் 28-ம் தேதி இந்தியாவில் கொரோனாவால் பாதிக்கப்பட்டோரின் எண்ணிக்கை 46,759. இதில், கேரளாவில் மட்டுமே 32,801 பேர் பாதிக்கப்பட்டிருந்தனர். கேரளாவுக்கு அடுத்தபடியாக மகாராஷ்டிராவில் 4,654 பேரும், அடுத்த இடத்தில் தமிழகத்தில் 1,542 பேரும் பாதிக்கப்பட்டிருந்தனர். ஏப்ரல் மாதத்தில் தொற்று எண்ணிக்கை 28,395 வரை பதிவாகிவந்த டெல்லியில், தற்போது 50-க்கும் குறைவாகவே பதிவாகிவருகிறது. ‘கேரளாவில் பண்டிகைகளுக்கு வழங்கியிருந்த தளர்வுகள்தான், தொற்று எண்ணிக்கை அதிகரிக்கக் காரணம்’ என்கிறார்கள் மருத்துவ நிபுணர்கள்.

தீவிரத் தொற்றில் கேரளா... தயார்நிலையில் இருக்கிறதா தமிழகம்?

தமிழகத்தைப் பொறுத்தவரை, முதல் அலையில் 7,000 வரை உயர்ந்த தொற்றின் எண்ணிக்கை, பின்னர் 300 வரை குறைந்தது. இரண்டாம் அலையில் 36,184 வரை உயர்ந்த தொற்றின் எண்ணிக்கை, தற்போது கிட்டத்தட்ட 1,500 என்ற எண்ணிக்கையிலேயே இருக்கிறது. தமிழகத்தில் ஆகஸ்ட் 28-ம் தேதி நிலவரப்படி 18,069 பேர் தொற்றுக்குச் சிகிச்சை பெற்றுவருகிறார்கள். அதிகபட்சமாக கோவையில் 2,118 பேரும், சென்னையில் 1,975 பேரும், ஈரோட்டில் 1,557 பேரும் தொற்றால் பாதிக்கப் பட்டிருக்கிறார்கள். தமிழகத்தில் இதுவரை தொற்று உறுதிசெய்யப்பட்டவர்கள் 26,07,206 பேர். இவர்களில் 25,54,323 பேர் குணமடைந்திருக்கிறார்கள். மொத்தம் 34,814 பேர் உயிரிழந்துள்ளார்கள்.

இந்தநிலையில், தமிழகத்தில் மேற்கொள்ளப்பட்டுவரும் தடுப்பு நடவடிக்கைகள் குறித்து மருத்துவத்துறை செயலாளர் ராதாகிருஷ்ணனிடம் கேட்டோம். ‘‘தமிழக எல்லைப் பகுதிகளில் தீவிரக் கண்காணிப்புப் பணிகள் மேற்கொள்ளப்படுகின்றன. கேரளாவிலிருந்து வருபவர்கள் இரண்டு தவணை தடுப்பூசி செலுத்தியிருக்க வேண்டும் அல்லது கொரோனா பரிசோதனை செய்த சான்றிதழ்களைச் சமர்ப்பிக்க வேண்டும். இல்லையென்றால் அவர்களுக்குத் தமிழகத்துக்குள் அனுமதி இல்லை. அடுத்து வரும் பத்து நாள்கள் மிகுந்த பாதுகாப்புடன் இருக்க, தமிழகத்தின் அனைத்து மாவட்ட ஆட்சியர்களுக்கும், துறைசார்ந்த அதிகாரிகளுக்கும் அறிவுறுத்தப்பட்டுள்ளது. கல்வி நிலையங்கள் திறப்பதற்கான நிலையான வழிகாட்டு நெறிமுறைகள் வழங்கப்பட்டுள்ளன.

தமிழகத்தில் 58,271 ஆக்சிஜன் படுக்கைகள், 10,011 ஐ.சி.யூ படுக்கைகள், 7,017 வென்டிலேட்டர் படுக்கைகள் உட்பட கொரோனா சிகிச்சைக்கு மட்டும் ஒரு லட்சத்துக்கும் அதிகமான படுக்கைகள் தயார்நிலையில் உள்ளன. குழந்தைகளுக்காக கொரோனா சிகிச்சை படுக்கைகள் பிரத்யேகமாக உருவாக்கப்பட்டுள்ளன. தமிழகத்தில் 230 மெட்ரிக் டன்னாக இருந்த ஆக்சிஜன் கையிருப்பு, தற்போது 1,000 மெட்ரிக் டன்னாக உயர்த்தப்பட்டுள்ளது.

ராதாகிருஷ்ணன்
ராதாகிருஷ்ணன்

தமிழகத்தில் பண்டிகைகள் அடுத்தடுத்து வரவிருப்பதால், மக்கள் மிகுந்த பாதுகாப்புடனும் கவனத்துடனும் இருக்க வேண்டும். அண்டை மாநிலங்களில் பண்டிகை நாள்களில்தான் தொற்று மீண்டும் கூடியிருப்பதை நாம் கருத்தில்கொள்ள வேண்டும். சிறிதளவு அலட்சியம்கூட பெரும் ஆபத்தை ஏற்படுத்திவிடலாம்’’ என்றார் விளக்கமாக.

தமிழகத்தில் தளர்வுகள் அறிவிக்கப்பட்ட நிலையில், பொது இடங்களில் முகக்கவசம் அணியாத நபர்களையும், சமூக இடைவெளியைக் கடைப்பிடிக்காத நபர்களையும் அதிகம் பார்க்க முடிகிறது. முன்னெச்சரிக்கை மற்றும் அரசு அறிவித்துள்ள பாதுகாப்பு நடைமுறைகளைப் பின்பற்றுவது மட்டுமே கொரோனாவைக் கட்டுப்படுத்த நம் முன் இருக்கும் ஒரே வழி!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism