Published:Updated:

“அப்பா அப்பான்னு கதறுற சத்தம் மட்டுமே கேட்டுச்சு!” மகாராஷ்டிரா வெள்ளத்தின் துயர சாட்சிகள்...

மகாராஷ்டிரா வெள்ளம்
பிரீமியம் ஸ்டோரி
மகாராஷ்டிரா வெள்ளம்

ராத்திரி 8 மணியிருக்கும்... திடீர்னு பெரிய பெரிய பாறைங்க `டம் டம்’னு என் வீட்டு மேல வந்து விழுந்துச்சு. அப்ப நான் வீட்டோட முன்பக்கமா நின்னுட்டு இருந்தேன்.

“அப்பா அப்பான்னு கதறுற சத்தம் மட்டுமே கேட்டுச்சு!” மகாராஷ்டிரா வெள்ளத்தின் துயர சாட்சிகள்...

ராத்திரி 8 மணியிருக்கும்... திடீர்னு பெரிய பெரிய பாறைங்க `டம் டம்’னு என் வீட்டு மேல வந்து விழுந்துச்சு. அப்ப நான் வீட்டோட முன்பக்கமா நின்னுட்டு இருந்தேன்.

Published:Updated:
மகாராஷ்டிரா வெள்ளம்
பிரீமியம் ஸ்டோரி
மகாராஷ்டிரா வெள்ளம்

தெற்கு மும்பையிலிருக்கும் ஜெ.ஜெ.மாநகராட்சி மருத்துவமனையில் சிகிச்சையிலிருக்கும் நிதேஷின் கதறல் கடும் மழைச் சத்தத்தையும் மீறி எதிரொலிக்கிறது. ராய்கட் மாவட்டம், சுதர்வாடி கிராமத்தைச் சேர்ந்த இவரின் இரு பெண் குழந்தைகளும் இவர் கண்முன்னாலேயே இடிபாடுகளில் சிக்கி உயிரிழந்திருக்கிறார்கள். காலுடைந்த நிலையிலும் போராடி, தன் மனைவி மற்றும் ஒரு மகனை மட்டுமே காப்பாற்ற முடிந்தவரால், கடைசிவரை இரு குழந்தைகளைக் காப்பாற்றவே முடியாமல்போனது பெரும் துரதிர்ஷ்டம். மகாராஷ்டிர மாநிலத்தில் ஏற்பட்ட வெள்ளப் பேரிடர் சோகத்தின் ஒரு துளி உதாரணம் மட்டுமே இது!

 “அப்பா அப்பான்னு கதறுற சத்தம் மட்டுமே கேட்டுச்சு!” மகாராஷ்டிரா வெள்ளத்தின் துயர சாட்சிகள்...

“ராத்திரி 8 மணியிருக்கும்... திடீர்னு பெரிய பெரிய பாறைங்க `டம் டம்’னு என் வீட்டு மேல வந்து விழுந்துச்சு. அப்ப நான் வீட்டோட முன்பக்கமா நின்னுட்டு இருந்தேன். மேல்தளம் உடைஞ்சு பெரிய கான்கிரீட் என் கால் மேல விழுந்ததுல நான் கீழே விழுந்துட்டேன். வீட்டுக்குள்ள இருந்து என் மனைவி உதவி கேட்டு கதறுறாங்க. கால்மேல கிடந்த கான்கிரீட் பாறையைத் தூக்கிப் போட்டுட்டு உள்ளே போனேன். அங்கே இடிபாடுல சிக்கியிருந்த என் மனைவியையும், நாலு வயசு மகனையும் போராடிக் காப்பாத்தி வெளியே கொண்டுவந்து விட்டுட்டேன். உள் ரூம்ல எங்களோட அஞ்சு வயசு, ஆறு வயசு மகள்கள் படுத்திருந்தாங்க... அந்தப் பக்கமே போக முடியாதபடி பாறைகள் அடைச்சிருந்துச்சு... உள்ளேயிருந்து அவங்க ‘அப்பா... அப்பா’னு கதறுற சத்தம் மட்டுமே கேட்டுச்சு... நான் என்ன பண்ணியும் உள்ளே போக முடியலை. அரை மணி நேரத்துல அவங்களோட சத்தமும் அடங்கிடுச்சு... ரெண்டு மணி நேரம் கழிச்சு மீட்புப் படையினர் வந்த பிறகு என் ரெண்டு குழந்தைகளையும் பொணமாத்தான் பார்க்க முடிஞ்சுது” தலையில் அடித்துக்கொண்டு அழுகிறார் நிதேஷ்.

மகாராஷ்டிராவின் கொங்கன் பகுதியிலிருக்கும் ரத்னகிரி, ராய்கட், சாங்கிலி, சதாரா மாவட்டங்களில் மரண ஓலங்கள் நிற்காமல் கேட்கின்றன. இதுவரை 200 பேர் உடல்கள் மீட்கப்பட்டுள்ளன. மும்பையில் மட்டுமே ஜூலை 26-ம் தேதி காலை வரை 40 பேர் உடல்கள் மீட்கப்பட்டுள்ளன. இன்னும் ஏராளமானோரின் உடல்கள் மழை வெள்ளத்தில் ஆங்காங்கே சிக்கியிருக்கலாம் என்று அஞ்சப்படுகிறது.

 “அப்பா அப்பான்னு கதறுற சத்தம் மட்டுமே கேட்டுச்சு!” மகாராஷ்டிரா வெள்ளத்தின் துயர சாட்சிகள்...

கொங்கன் பகுதியிலுள்ள ரத்னகிரி, ராய்கட், சாங்கிலி, சதாரா மாவட்டங்களில் ஜூலை 19-ம் தேதியிலிருந்து கடும் மழை தொடர்ந்து பெய்தது. இதில் ராய்கட் மாவட்டத்தில் தாலியா, சுதர்வாடி, கவாலே, ரத்னகிரியிலுள்ள தமானந்த் ஆகிய கிராமங்களில் 22-ம் தேதி மாலை ஏற்பட்ட நிலச்சரிவுகளால் சாலைகள் அடித்துச் செல்லப்பட்டு, அந்தக் கிராமங்கள் தனித்தீவுகள் போலாகின. உள்ளே யாராலும் செல்ல முடியவில்லை. ஒருவழியாக போராடி சுமார் 24 மணி நேரத்துக்கு பிறகே மீட்புக்குழுவினர் கிராமங்களுக்குள் செல்ல முடிந்தது. தொடர்ந்து கடற்படை, விமானப்படை, ராணுவம் ஆகியவை மீட்புப் பணிகளில் இறங்கின. ஆனாலும், கிராமங்கள் வெள்ளக்காடாகக் காட்சியளித்ததால் ஹெலிகாப்டர்களைத் தரையிறக்க முடியவில்லை.

 “அப்பா அப்பான்னு கதறுற சத்தம் மட்டுமே கேட்டுச்சு!” மகாராஷ்டிரா வெள்ளத்தின் துயர சாட்சிகள்...

நிலச்சரிவால் மிகவும் மோசமாக பாதிக்கப்பட்ட தாலியா கிராமத்தில் மட்டும் 49 பேரின் உடல்கள் மீட்கப்பட்டன. 47 பேரைக் காணவில்லை. தாலியா கிராமத்தைச் சேர்ந்த மிலிந்த் கங்காவானே “இந்த அளவுக்கு மழை பெய்யும்னு எங்களுக்கு எந்த எச்சரிக்கையும் தரப்படலை. முன்கூட்டியே தெரிஞ்சுருந்தா நாங்க கிராமத்தைவிட்டு வெளியேறியிருப்போம். திடீர்னு மலை உச்சியிலிருந்து பெரிய பெரிய பாறைங்க எங்க வீடுங்க மேல விழுந்ததுல 90 பேருக்கு மேல சிக்கியிருக்காங்க. கடவுள் புண்ணியத்துல நான் தப்பிச்சுட்டாலும் உள்ளே எத்தனை பேரு உயிரோட இருக்காங்கன்னு தெரியலை...” என்கிறார் கண்ணீர் வழிய.

கவாலே கிராமத்தில் வசிக்கும் லட்சுமண் சொல்வதைக் கேட்டால் பதைபதைக்கிறது... ‘‘தெரு முழுக்க வரிசையா வீடுங்க சரிஞ்சு விழுந்துட்டு வருது. நான் என் வீட்டுக்குள்ள இருந்து வெளியே வந்து பக்கத்து வீட்டுல இருந்தவங்ககிட்ட ‘வெளியே வாங்க... வெளியே வாங்க’னு கத்தினேன். ஆனா, அவங்க அப்பதான் சாப்பிட உட்கார்ந்திருந்தாங்க. சாப்பிட உட்கார்ந்துட்டா, சாப்பிடாம எழக் கூடாதுங்கிற ஐதிகத்தால அவங்க எந்திரிக்கவே இல்லை... என் கண் முன்னாடியே அவங்க வீட்டை மண் மூடிடுச்சு” என்றார் பயம் விலகாமல்!

 “அப்பா அப்பான்னு கதறுற சத்தம் மட்டுமே கேட்டுச்சு!” மகாராஷ்டிரா வெள்ளத்தின் துயர சாட்சிகள்...

கொங்கன் பகுதியில் கனமழையால் பாதிக்கப்பட்ட ஐந்துக்கும் மேற்பட்ட மாவட்டங்களில் மக்கள் தங்கள் இரு சக்கர வாகனங்கள், கார்கள், டிராக்டர்கள், கால்நடைகள் உட்பட அனைத்தையும் இழந்து தவிக்கிறார்கள். 80,000-க்கும் மேற்பட்ட மின்கம்பங்கள் சரிந்து, மின் விநியோகம் அடியோடு பாதிக்கப்பட்டுள்ளது. கர்நாடகாவிலிருந்து வரும் கிருஷ்ணா ஆற்றில் வெள்ளப்பெருக்கு ஏற்பட்டதால் மும்பை - பெங்களூரு மற்றும் கோவா செல்லும் சாலைகள் சேதமடைந்து ஆயிரக்கணக்கான லாரிகள் நகர முடியாமல் நிறுத்திவைக்கப்பட்டுள்ளன. இதனால், போக்குவரத்தும் துண்டிக்கப்பட்டுள்ளது. இன்னொரு பக்கம் இடிபாடுகளில் சிக்கியவர்களின் உறவினர்கள், தங்களின் உறவுகளைத் தேடி அலைந்துகொண்டிருக்கும் காட்சிகளும், சிலர் தங்கள் உறவுகளின் உடல்களை மடியில் ஏந்திக் கதறும் காட்சிகளும் மனதை ரணமாக அறுக்கின்றன.

நிலச்சரிவு ஏற்பட்ட கிராமங்களிலிருந்து ஒரு லட்சத்துக்கும் அதிகமான மக்கள் பாதுகாப்பான இடங்களில் தங்கவைக்கப்பட்டுள்ளனர். அவர்கள் தங்களது ஊருக்குத் திரும்பினாலும் இறந்துபோன உறவுகள், சிதைந்துபோன இருப்பிடம் உட்பட பழைய வாழ்க்கையை மீட்டெடுக்க அதிக நாள்கள் பிடிக்கும் என்பதில் சந்தேகம் இல்லை. ஆனாலும், இந்தத் துயரத்திலிருந்து விரைவில் மீண்டெழ வேண்டும் மகாராஷ்டிரா!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism