ஃப்ளெக்ஸ் போர்டே இல்லாத நாகர்கோவில் மாநகராட்சி!

தமிழகத்தையே உலுக்குகிறது ஃப்ளெக்ஸ் பேனர் விவகாரம். ஆனால், நகரம் முழுவதுமே ஃப்ளெக்ஸ் பேனர்களைத் தவிர்த்து, விதிமுறைகளை தொடர்ந்து கடைப்பிடித்துவருகிறது நாகர்கோவில் மாநகராட்சி! காரணம், மாநகராட்சி ஆணையர் சரவணகுமார்.

. சேலத்தைச் சேர்ந்த ராதாகிருஷ்ணன் என்பவர், ‘கொடிக்கம்பங்களை அகற்ற வேண்டும்’ என்று தொடுத்த வழக்கில், ‘பொதுமக்களுக்கு இடையூறாக இருக்கும் கொடிக்கம்பங்களை அகற்ற வேண்டும்’ என்று தீர்ப்பளித்தது உயர் நீதிமன்றம். உடனடியாக நாகர்கோவில் மாநகராட்சியில் அனைத்து கொடிக்கம்பங்களையும் அவற்றின் பீடங்களையும் அகற்ற உத்தரவிட்டார் சரவணகுமார். அதைத் தொடர்ந்து கன்னியாகுமரி மாவட்டம் முழுவதுமே கொடிக்கம்பங்கள் அகற்றப்பட்டன.

. இதுகுறித்து நம்மிடம் பேசிய கன்னியாகுமரி ஜில்லா நுகர்வோர் பாதுகாப்புச் சங்கத் தலைவர் எம்.தாமஸ், “நாகர்கோவில் மாநகராட்சிப் பகுதியில் போக்குவரத்து நிறைந்த வேப்பமூடு ஜங்ஷன், மணிமேடை ஜங்ஷன், தபால் அலுவலகம், ஆட்சியர் அலுவலகம் உள்ளிட்ட பகுதிகளில் அதிகளவில் ஃப்ளெக்ஸ் போர்டுகள் வைப்பார்கள். ஆணையர் சரவணகுமாரின் நடவடிக்கையால், தற்போது யாருமே ஃப்ளெக்ஸ் போர்டுகளை வைப்பதில்லை. பல்வேறு அரசியல் கட்சியினரின் எதிர்ப்புகளையும் மீறி கொடிக்கம்பங்களையும் அகற்றி முன்மாதிரியாகத் திகழ்கிறார்” என்றார்.

. நாகர்கோவில் மாநகராட்சி ஆணையர் சரவணகுமார், “பொது இடங்களில் ஃப்ளெக்ஸ் போர்டுகள் வைக்கக் கூடாது என்ற தீர்ப்பும், கொடிக்கம்பங்களை அகற்ற வேண்டும் என்ற தீர்ப்பும் மக்களுக்கு நன்மைபயப்பவை என்பதால் உடனடியாகச் செயல்படுத்தினோம். நீதிமன்றத் தீர்ப்புகளையும், அரசின் உத்தரவுகளையும் நாகர்கோவில் மாநகராட்சியில் உடனடியாகச் செயல்படுத்துகிறோம். ஆரம்பத்தில் அரசியல் கட்சியினர் எதிர்ப்பு தெரிவித்தாலும், மக்கள் நலனை உணர்ந்து ஒத்துழைக்கிறார்கள். அதனால்தான் ஃப்ளெக்ஸ் போர்டு மற்றும் கொடிக்கம்பங்கள் அமைக்க அனுமதி கேட்டுக் கடிதங்கள் வருவதில்லை” என்றார்.

. அதிகாரிகள் நினைத்தால் மாற்றத்தைக் கொண்டுவர முடியும் என்பதற்கு நாகர்கோவில் மாநகராட்சி ஓர் எடுத்துக்காட்டு!