Published:Updated:

வெற்றிகரமான வாழ்க்கைக்கு உங்கள் மூளையைத் தயார்படுத்துங்கள்!

நாணயம் புக் செல்ஃப்

பிரீமியம் ஸ்டோரி

டுத்த எடுப்பிலேயே ஒரு நிபந்தனையுடன் இந்தப் புத்தகத்தை ஆரம்பிக்கிறார் ஆசிரியர் ரோஜர் செய்ஃப். ‘‘நீங்கள் சாமான்யரைப் போலவும் உடல்நலம் பேணாமல் மனதளவில் உடைந்துபோயும் வாழத் தயாராக இருந்தீர்கள் (சுருக்கமாக, உருப்படாமல்) என்றால், இந்தப் புத்தகத்தைப் படிக்காதீர்கள்’’ என்பதே அந்த நிபந்தனை. உங்கள் மூளையில் பதியப்பட்டுள்ள பல்வேறு பேட்டர்ன்களே உங்களை முன்னேறவிடாமல் தடுக்கிறது என்பதை ‘ட்ரெய்ன் யுவர் ப்ரெய்ன் ஃபார் சக்சஸ்’ என்கிற இந்தப் புத்தகத்தில் விளக்கமாக எடுத்துச் சொல்லியிருக்கிறார் ஆசிரியர்.

சராசரி வாழ்க்கையிலிருந்து...

‘‘நம்முடைய ஆரம்பப் பாடசாலையில் இருந்தே நாம் எப்படி வார்த்தெடுக்கப்படுகிறோம்? பாதுகாப்பாக இருக்க வேண்டும், நம்மைச் சுற்றியிருப்பவர்களைப்போல் நாமும் இருக்க வேண்டும் என்பதெல்லாம் ஆரம்பத்திலேயே நம் மூளைக்குள் விதைக்கப்பட்ட எண்ணங்கள்தான். இதனாலேயே சராசரியாக வாழ்வதற்கு நாம் ஆழ்மனதளவில் தயாராகிவிடுகிறோம்.

வெற்றிகரமான வாழ்க்கைக்கு உங்கள் மூளையைத் தயார்படுத்துங்கள்!

சராசரி, சராசரி என்கிறீர்களே, அப்படியென்றால்..? உதாரணத்திற்கு, அமெரிக்கர்களை எடுத்துக்கொள்வோம். 2012 நிலவரப்படி, இருபது வயதுக்கு மேற்பட்ட அமெரிக்கர்களில் 80% சதவிகிதத்தினர் அதிக எடை கொண்டவர்களாக இருக்கின்றனர். 34 சதவிகிதத்தினர் மருத்துவ அடிப்படையில் உடல் பருமன் அதிகமாகக் கொண்டவர்கள். இந்தச் சராசரி ஆண்டுக்கு ஆண்டு மோசமான நிலையை அடைந்து கொண்டிருக்கிறது.

அடுத்தபடியாக, உறவுமுறைகளை எடுத்துக்கொள்வோம். அமெரிக்கத் திருமணங்களில் பாதியளவு திருமணங்கள் தோல்வி யடைகின்றன. இந்தச் சராசரி அளவு கிட்டத்தட்ட 25 ஆண்டு காலமாகப் பெரிய அளவிலான மாற்றம் ஏதுமில்லாமல் இருக்கிறது. வேலையைப் பொறுத்தவரை, கிட்டத்தட்ட 75 - 85% அமெரிக்கர்கள் தங்களுடைய வேலையைப் பிடிக்காமல் செய்வதாகத்தான் கூறுகின்றனர். இப்படிப் பல விஷயங்களைச் சொல்லிக்கொண்டே போகலாம்.

இதிலிருந்து என்ன தெரிகிறது? சராசரியாக இருப்பதே செளகர்யமாக இருக்கிறது என்பதால், பெரும்பாலானோர் சராசரியாக இருப்பதற்கான மனநிலையைச் சுலபத்தில் பெற்று விடுகின்றனர். இதிலிருந்து வெளியேவருவது கொஞ்சம் கடினமான காரியமே. அதனால்தான் இந்தப் புத்தகத்தில் சொல்லப்பட்டிருக்கும் சுலபமான பல விஷயங்களைக் கடைப்பிடிக்க ஆரம்பித்தாலே சராசரி வாழ்க்கையிலிருந்து நீங்கள் மாறிவிடலாம்’’ என்கிறார் ஆசிரியர்.

மூன்று மனநிலைகள்...

மூன்று மனநிலைகளை நீங்கள் புரிந்துகொண்டால், மாற்றம் குறித்த நடவடிக்கைகளைச் சுலபமாக எடுக்க ஆரம்பிக்கலாம் என்கிறார் ஆசிரியர். ‘‘உங்களுக்கு ஒரு விஷயத்தில் கிடைக்கும் வெற்றி எதனால் கிடைக்கிறது என்பது குறித்துப் புரிந்துகொள்ளுங்கள். வெற்றி என்பது அதிர்ஷ்டத்தினாலோ அல்லது சூழ்நிலையினாலோ உங்களை வந்தடைவதில்லை என்பதை முதலில் புரிந்துகொள்ளுங்கள். நீங்கள் என்ன நினைக்கிறீர்கள் மற்றும் என்ன செய்கிறீர்கள் என்பதனாலேயே வெற்றி உங்களுக்குக் கிடைக்கிறது. நீங்கள் எதிர்கொள்ளும் சூழ்நிலைகளை எவ்வாறு கையாள்கிறீர்கள் என்பதிலிருந்தே வெற்றி என்பது உங்களுக்குக் கிடைக்கிறது. உங்களைச் சுற்றியிருக்கும் வெற்றி பெற்ற மனிதர்களை சற்று உற்று நோக்கினால், உங்களுக்கு இது தெளிவாகப் புரியும். அவர்கள் செய்யும் விஷயங்களே அவர்களுக்கு வெற்றியைக் கொண்டுவந்து சேர்த்திருக்கும்.

வெற்றிகரமான வாழ்க்கைக்கு உங்கள் மூளையைத் தயார்படுத்துங்கள்!

இரண்டாவதாக, நீங்கள் எதிர்பார்ப்பதே உங்களுக்குப் பெரும்பாலும் கிடைக்கிறது. நீங்கள் உங்கள் மூளையில் எதை உருவகப்படுத்துகிறீர்களோ, அதுவே உங்களுக்குக் கிடைக்கிறது என்பதை நினைவில்கொண்டு செயல்படுங்கள். தடகள விளையாட்டு வீரர்கள் பலரும் இதையே செய்கின்றனர். என்ன நடக்க வேண்டும் என்பதை அவர்கள் தங்கள் மனதில் உருவகப்படுத்துவதனாலேயே, அவர்களுடைய வெற்றி அவர்களுக்குக் கைகூடுகிறது.

மூன்றாவது விஷயம் மிக முக்கியமானது. பொதுவாக, நீங்கள் எதை மிகவும் எதிர்பார்ப்பீர்கள்? உங்களைச் சுற்றி இருக்கிறவற்றில் நீங்கள் எதைத் தொடர்ந்து பார்க்கிறீர்களோ (வெற்றி/தோல்வி, மகிழ்ச்சி/வருத்தம் என), அதையே நீங்கள் எதிர்பார்ப்பீர்கள். மனித மூளையின் சக்தி அது. உங்களுடைய மூளை உங்களுக்கு ஆதரவாகவும் எதிராகவும் செயல்படவல்லது.

பாதுகாப்பு வளையம் வளர்ச்சிக்கும் வெற்றிக்கும் வழிவகை செய்யாது. பாதுகாக்க மட்டுமே செய்யும். வெற்றி என்னும் மேஜிக்கிற்கான வேலைகள் சுகமான சூழலைத் தாண்டிய இடத்திலேயே நடக்கும்!

உதாரணமாக, நீங்கள் ஒரு கார் வாங்க நினைக்கிறீர்கள். தயாரிப்பு நிறுவனம், மாடல், வேரியன்ட் என எல்லாவற்றை யும் முடிவு செய்துவிடுகிறீர்கள். புக்கிங் செய்வதுதான் பாக்கி என்று வைத்துக்கொள்வோம். அந்தச் சூழ்நிலையில், நீங்கள் சாலையில் பயணிக்கும்போது உங்கள் கண்ணில் நீங்கள் முடிவு செய்துவைத்திருக்கும் கார்கள் மட்டுமே கண்ணில்படும். இந்த முடிவைச் செய்வதற்கு முன்னாலும் நீங்கள் சாலையில் பயணித்தி ருப்பீர்கள். அப்போதும் அந்த ரக கார்கள் சாலை யில் சென்றுகொண்டிருந்திருக்கும். ஆனால், உங்கள் கண்ணில்பட்டிருக்காது. என்றைக்கு அதை வாங்கலாம் என்று முடிவு செய்தீர்களோ, அந்த நொடியிலிருந்து அதைத் தவிர வேறொன்றும் உங்கள் கண்ணுக்குப் புலப்படாது. இதுதான் மனித மூளையின் அற்புதம்.

வெற்றிகரமான வாழ்க்கைக்கு உங்கள் மூளையைத் தயார்படுத்துங்கள்!

இதில் வேடிக்கையான விஷயம், நம்முடைய மூளையின் ‘டிஃபால்ட் செட்டிங்’ நமக்கு எதிராக வேலை செய்யும் வண்ணம் இருப்பது’’ என்கிறார் ஆசிரியர். அது எப்படி நம்முடைய மூளை நமக்கு எதிராக வேலை செய்யும் என்று நீங்கள் கேட்கலாம். நம்முடைய மூளை நம்மைத் தொடர்ந்து வாழ வழிவகை செய்யும் வண்ணம் (survival) வழிநடத்தவே வடிவமைக்கப் பட்டுள்ளது. இதனாலேயே நம்முடைய மூளை நம்மைப் பாதுகாப்பு வளையத்துக்குள் கொண்டு சென்றுவிடுகிறது.

பாதுகாப்பு வளையம் வளர்ச்சிக்கும் வெற்றிக்கும் வழிவகை செய்யாது. பாதுகாக்க மட்டுமே செய்யும். வளர்ச்சி மற்றும் வெற்றி எனும் மேஜிக் பாதுகாப்பான (சுகமான) ஒரு சூழலில் நடைபெறுவதே இல்லை. வெற்றி என்னும் மேஜிக்கிற்கான வேலைகள் சுகமான சூழலைத் தாண்டிய இடத்திலேயே நடக்கும்’’ என்கிற முக்கியமான விஷயத்தைச் சொல்கிறார் ஆசிரியர்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

நினைவுப் பயிற்சி...

இந்தப் புத்தகத்தின் முதல் பகுதி எப்படி நினைவுத்திறனை மேம்படுத்துவது என்பதைப் பற்றி விரிவாக விளக்குகிறது. நினைவுத் திறனை மேம்படுத்துவதற்கான பல்வேறு பயிற்சிகள் இந்தப் புத்தகத்தில் தரப்பட்டுள்ளன.

வெற்றிகரமான வாழ்க்கைக்கு உங்கள் மூளையைத் தயார்படுத்துங்கள்!

முதலில், இந்தப் பயிற்சிகளை அவசியம் செய்யச் சொல்லி வலியுறுத்துகிறார் ஆசிரியர். ஏனென்றால், ஒரு விஷயத்தைச் செய்ய வேண்டும் என்றால், அது நமக்கு முதலில் நினைவிருக்க வேண்டும். அதன்பின்னால் மூளைக்கான பல்வேறு பயிற்சிகளைச் சொல்லித் தருகிறார். இறுதி அத்தியாயத்தில் இந்தப் பயிற்சிகளின்மூலம் பெற்ற எனர்ஜியை எப்படி நிர்வகிப்பது என்பதையும் ஆசிரியர் கூறியுள்ளார்.

வாய்விட்டுச் சிரித்தல், நன்றியுணர்வுடன் நடந்துகொள்ளுதல், எது நம்முடைய மூளைக்குள் செல்கிறது என்பது குறித்து கவனமாக இருத்தல் (என்ன படிக்கிறோம், எதைப் பார்க்கிறோம், எதைக் கேட்கிறோம், யாருடன் பொழுதைக் கழிக்கிறோம், என்ன பேசுகிறோம் என்பவை), கவனம் சிதறாமல் இருத்தல் மற்றும் தரமான சிறப்பான நடவடிக்கைகளை மேற்கொள்ளுதல் என்பவையே பெற்ற எனர்ஜியை நிர்வகிக்க உதவும் என்கிறார் ஆசிரியர்.

‘‘நீங்கள் இருக்கும் சூழலை முதலில் உங்கள் கையில் எடுத்து அதை வசப்படுத்துங்கள். உங்களுடைய வெற்றிக்கான பாதையை இந்த உலகம் உங்களுக்காகவே அமைத்துக் கொடுக்கும்’’ என்று உற்சாகமாக முடிக்கிறார் ஆசிரியர்.

வெற்றி பெறவேண்டும் என்று ஆசைப்படும் ஒவ்வொருவரும் படிக்க வேண்டிய புத்தகம் இது.

நாணயம் விகடன் டீம்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு