Published:Updated:

பணியிடத்தில் வெற்றியைக் குவிக்க உதவும் உத்திகள்!

நாணயம் புக் செல்ஃப்

பிரீமியம் ஸ்டோரி

ணிபுரியும் இடத்தில் நீங்கள் உயர் பதவிகளை எட்டிப்பிடிக்க வேண்டுமா..? அப்படியானால், நீங்கள் அதற்காக சில உத்திகளைக் கடைப்பிடித்தாக வேண்டும். அந்த உத்திகளைப் பற்றிச் சொல்லித் தருகிறது ‘சூஸ் வாட் வொர்க்ஸ்’ என்னும் புத்தகம். ஹோவர்ட் கோல்டுமென் என்பவர் எழுதிய இந்தப் புத்தகம் பணியிடத்தில் பெறவேண்டிய புரஃபஷனல் வெற்றியை எப்படித் திட்டமிட்டு அடைவது என்பதை விரிவாக எடுத்துச் சொல்கிறது.

வெற்றிக்கான உங்கள் பாதையில் நீங்கள் வேகமாகப் பயணிப்ப தற்கான வாகனமாக இந்தப் புத்தகம் இருக்கும் என்று சொல்லும் ஆசிரியர், பணியிடத்தில் நீங்கள் எங்கே இருந்தீர்கள், இப்போது எங்கே இருக்கிறீர்கள், அடுத்து எங்கே செல்ல விரும்புகிறீர்கள் என்ற மூன்றையுமே கண்டறிய இந்தப் புத்தகத்தில் சொல்லப் பட்டிருக்கும் வழிமுறைகள் உதவும் என்கிறார்.

பணியிடத்தில் வெற்றியைக் குவிக்க உதவும் உத்திகள்!

‘‘கணினிகளுக்கு ஆபரேடிங் சிஸ்டம்போல, மனிதனுக்கு ஆபரேட்டிங் சிஸ்டம் என்பது எவற்றை உள்ளடக்கியது தெரியுமா? எண்ணங்கள், எமோஷன்கள் மற்றும் அவர்கள் செய்யும் எதிர்வினைகள் என்ற மூன்றை உள்ளடக்கியதேயாகும். இந்த மூன்று விஷயங்களும் மூளையுடன் வெளியே தெரியாததொரு தொடர் உரையாடலை நிகழ்த்திக்கொண்டே இருக்கின்றன. இதை நம்மால் தொடர்ந்து கண்காணித்துக்கொண்டேயிருக்க முடியாது. இந்த ஆபரேட்டிங் சிஸ்டமே நம்முடைய செயல் திறனைத் தீர்மானிக்கிறது. இல்லையில்லை, நம்மைச் செயல்பட விடாமல் தடைபோடுகிறது. வெற்றிகரமாகச் செயல்பட முதலில் நீங்கள் உங்களுடைய ஆபரேட்டிங் சிஸ்டம் குறித்து தெளிவாகப் புரிந்துகொள்ளவேண்டும். உங்களுடைய கேரியர் ரீதியான ஆசைகளைப் பூர்த்தி செய்யும்படி உங்களுடைய ஆபரேட்டிங் சிஸ்டம் இருக்கிறதா என்பதை நீங்கள் முதலில் சரிபார்த்துக்கொள்ளவேண்டும்’’ என்கிறார் ஆசிரியர்.

சரி, நம்முடைய ஆபரேட்டிங் சிஸ்டத்தைப் புரிந்துகொண்டாகிவிட்டது. அடுத்தது என்ன?

‘‘நம்முடைய டிஃபால்ட் செட்டிங்குகள் என்னென்ன என்பதைத் தெரிந்துகொள்வதுதான்! சாதாரணமாக நாம் எந்தமாதிரியான சிந்தனையில் இருக்கிறோம், எப்படிப் பேசுகிறோம், மற்றவர் சொல்வதை எப்படிக் கேட்கிறோம், எவையெவை நம்மை எப்படிப் பாதிக்கிறது, வெளியே இருக்கும் சூழல் எப்படி நம்முடைய செயல்பாட்டை நிர்ணயிக்கிறது என்பதெல்லாமே இந்த டிஃபால்ட் செட்டிங்குகள் ஆகும்’’ என்கிறார் ஆசிரியர்.

அடுத்து, நீங்கள் எதை உருவாக்குகிறீர்கள் என்பது குறித்துப் பேசுகிறார் ஆசிரியர். அதென்ன உருவாக்குதல்..?

‘‘வேலைக்குப் போகிறேன்; வேலை பார்க் கிறேன். சம்பளம் வாங்குகிறேன்; புரமோஷன் தந்தால் சந்தோஷம் என்று அடுக்கிக்கொண்டே போவீர்கள். அதெல்லாம் அந்தக்காலம். இன்றைக்கு பணியாளர்களுக்கான வாய்ப்புகள் எக்கச்சக்கமாக இருக்கின்றன. கனவு கேரியர் என்ற ஒன்று அனைவருக்குமே இருக்கிறது. உங்கள் கனவு நனவானால், உங்கள் வாழ்க்கை எப்படி இருக்கும் என்ற கேள்விக்கு, உங்களிடம் விடை இருக்கவேண்டும். அல்லது ஊகித்தாவது வைத்திருக்க வேண்டும். நான் நினைக்கும் விஷயங்கள் கைகூடினால், என்னைத் தலைமை அதிகாரியாக மாற்றினால், எந்தமாதிரியான நிறுவனத்தை நான் அமைப்பேன், எந்த மாதிரி யான புரஃபஷனல் உறவுகளை நான் மற்றவர் களிடமிருந்து எதிர்பார்ப்பேன், எனக்கும் என் குடும்பத்தினருக்கும் எந்த மாதிரியான எதிர்காலத்தை நான் அமைக்க விரும்புகிறேன் என்பதற்கெல்லாம் விடையைத் தருவதுதான் நீங்கள் எதை உருவாக்குகிறீர்கள் என்ற கேள்விக்கான விடையாகும்.

பணியிடத்தில் வெற்றியைக் குவிக்க உதவும் உத்திகள்!

இது ஏன் அவசியம் என்றால், எதன்மீது நீங்கள் கவனம் வைக்க வேண்டும் என்பதை இந்த மாதிரியான திட்டங்களே உங்களுக்குச் சுலபத்தில் காட்டிக் கொடுக்கும். இதுவே உங்களுடைய எதிர்காலத்திற் கான ஆரம்பப்புள்ளி. இதை அடைய இதையெல்லாம் செய்ய வேண்டும் என்று தெளிவாகத் திட்டமிட நீங்கள் எதை உருவாக்க விரும்புகிறீர்கள் என்பதற்கான விடையை நீங்கள் பக்காவாகப் புரிந்துவைத்திருக்க வேண்டும்.

பணியிடத்தில் வெற்றியைக் குவிக்க உதவும் உத்திகள்!

நீங்கள் எதை நோக்கிச் செல்ல நினைக்கிறீர்கள். அந்த விஷயத்தை அடைய நினைக்கும் போது / அதை நோக்கிச் செல்லும்போது, அதனால் என்னென்ன பாதிப்புகள் உங்களுக்கு வரும் என்பதை நீங்கள் தெளிவாகப் புரிந்துகொண்டு செயல்படவேண்டும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

உதாரணத்திற்கு, நீங்கள் ஒரு கடன் வாங்கவோ, புது வேலைக்கு மாறவோ அல்லது திருமணம் செய்யவோ திட்டமிடுகிறீர்கள். என்னவெல்லாம் யோசிப்பீர்கள்? கடனைத் திருப்பிக் கட்டமுடியாது போனால் என்ன செய்வேன், புது நிறுவனத்தில் பாஸிற்கு என்னைப் பிடிக்காதுபோனால் என்ன செய்வேன், மனைவி/கணவனுடைய எதிர்பார்ப்புக்குப் பொருத்தமாக இல்லாமல் போனால் என்ன செய்வேன் என்றெல்லாம் நினைத்துப் பார்ப்போம் இல்லையா? அதைப் போன்றதுதான் இது.

இந்த நிலையை அடையவேண்டும் என்று திட்டமிடுகிறோம். இதில் என்னென்ன பிரச்னைகள் வரலாம், என்னென்ன விஷயம் குறித்துக் கவலைப்பட வேண்டியிருக்கும் என்ற கேள்வியையும் அதற்கான விடையையும் அந்த விடை களில் எத்தனை முடியும், முடியாது, ஆனால்... என்ற சூழல்கள் நிலவுகின்றன என்பதையும் தெரிந்து கொண்டு செயல்பட்டால் மட்டுமே வெற்றியை நிச்சய மாக அடைய முடியும்’’ என்கிறார் ஆசிரியர்.

இதை ஏன் இவ்வளவு ஆழமாகச் சிந்திக்க வேண்டும் என்பீர்கள். நம்முடைய ஆபரேட்டிங் சிஸ்டம் என்பது நம்முடைய முயற்சியால் மட்டுமே வடிவமைக்கப்பட்டது அல்ல. நாம் பிறக்கும்போதே மூதாதையர்களின் டி.என்.ஏ வாயிலாகவும் பல பண்புகள் நம்முடைய ஆபரேட்டிங் சிஸ்டத்தில் இருக்கிறது. நம்முடைய மூதாதையர்களிடம் இருந்து நமக்குக் கிடைக்கும் பண்பில் பிரதானமானது ‘தொடர்ந்து வாழ்தல்’ (survival) எனும் பண்பாகும். இந்த ‘சர்வைவல்’ பண்பு நம்மை மாற்றம் என்ற விஷயத்திலிருந்து வெகு தூரம் விலகி ஓடச்செய்ய வல்லது. மாற்றம் என்பது சர்வைவல் என்பதற்கு உகந்ததல்ல என்றே நம்முடைய ஆபரேட்டிங் சிஸ்டத்தின் அடித்தளம் சொல்லும் என்கிறார் ஆசிரியர்.

பணியிடத்தில் வெற்றியைக் குவிக்க உதவும் உத்திகள்!

சரி, என்னவாகவேண்டும் என்று தீர்மானித்தாயிற்று. அதை நோக்கி எப்படிப் பயணிப்பது என்பதே அடுத்து நீங்கள் எடுக்க வேண்டிய முடிவாகும். இதில் மற்றொரு முக்கிய விஷயம் இருக்கிறது. தனியொருவனாக நீங்கள் நினைத்த இடத்தைச் சென்றடைய முடியாது. உங்களுடன் ஆட்கள் வேண்டும். மனதார இதைப் புரிந்துகொண்ட அடுத்த நிமிஷமே நீங்கள் மற்றவர்களை இணைத்துக்கொண்டு செயல்பட ஆரம்பிப்பீர்கள். நிறுவனத்தின் உள்ளேயும் வெளியேயும் உங்களுக்கு ஆதரவாகச் செயல்பட ஆட்கள் வேண்டியிருக்கும். அவர்களுடைய ஆதரவைப் பெற நீங்கள் அதை முதலில் கோர வேண்டியிருக்கும். இணைந்து செயல்பட வாருங்கள் என மனதார அழைக்க வேண்டியிருக்கும் என்கிறார் ஆசிரியர்.

நம்மில் பெரும்பாலானோர் மற்றவர்கள் நம்முடைய காரியங்களில் ஈடுபாட்டுடன் செயல் படவேண்டும் என்று எதிர்பார்ப்போம். அதைப் பெற முதலில் நாம் முழுமனதான ஈடுபாட்டுடன் செயல்படவேண்டியிருக்கும் என்பதை மறந்து விடக்கூடாது என்கிறார் ஆசிரியர்.

அடுத்தது, நாம் நினைத்ததைச் செய்ய சரியான டூல்களைத் தேர்ந்தெடுப்பதாகும். எதிர்கொள்ளும் பிரச்னையின் அடிநாதத்தைப் புரிந்துகொண்டு சீர்தூக்கிப் பார்த்து, அதற்கான தீர்வுகளைத் தரும் வழிமுறைகளைக் கடைப்பிடிக்க நாம் முயன்றால் மட்டுமே வெற்றி நம் அருகில் வரும். சிறுவயது முதலே நாம் கேள்விகளை வைத்துக்கொண்டே திரிந்துகொண்டிருக்கிறோம். யாராவது விடை சொல்லவேண்டும். பதவிக்கு வந்தபின்னால் கேள்விகளை ஒழித்துவிட்டு, விடையை (சொல்யூஷன்) நாம் சொல்லவேண்டும் என்றால், அது உடனடியாகச் சாத்தியப்படாதுதான். இதை எப்படி மாற்றுவது?

உதாரணத்திற்கு, ‘ஏன் காலதாமதமாக வருகிறீர்கள் என்பதற்குப் பதிலாக, ‘சரியான நேரத்தில் வரவேண்டும்’ என்று சொல்லலாம். ‘உங்களிடம் மாற்றுத்தீர்வு ஏதும் இருக்கிறதா’ என்பதற்குப் பதிலாக, ‘நான் ஒப்புக்கொள்கிறமாதிரி ஏதும் இருந்தால் சொல்லுங்கள்’ என்கிற வகையில் பேசலாம் என்கிற மாற்றுவழிகளை நாம் கடைப்பிடிக்க வேண்டும்’’ என்கிறார் ஆசிரியர்.

நீங்கள் எங்கே இருக்கிறீர்கள், எங்கே செல்ல விரும்புகிறீர்கள், எந்த வழியாக அந்த எல்லையைச் சென்றடைவீர்கள் என்பதைத் தெளிவாக உங்களால் இந்தப் புத்தகத்தைப் படித்தபின்னால் நிச்சயமாகச் சொல்ல முடியும். அவ்வாறு சொல்ல முடிந்த அந்தக் கணமே நீங்கள் வெற்றிப்பாதையில் பயணிக்க ஆரம்பித்துவிட்டீர்கள் என்று சொல்லி முடிக்கிறார் ஆசிரியர்.

பணியிடத்தில் வெற்றியைக் குவிக்க நினைப்பவர்கள் அனைவரும் கட்டாயம் ஒருமுறை இந்தப் புத்தகத்தைப் படிக்கலாம்!

- நாணயம் விகடன் டீம்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு