நாணயம் லைப்ரரி : கடின உழைப்பு மட்டுமே வெற்றி தராது! - ஸ்மார்ட் வொர்க் சூட்சுமங்கள்!

க டின உழைப்புதான் வெற்றியைத் தரும் எனக் காலம் காலமாகச் சொல்கிறோம். ஆனால், உத்கர்கஷ் அமிதாப் என்பவர் எழுதியிருக்கும் ‘தி செடக்டிவ் இல்யூஷன் ஆஃப் ஹார்டு வொர்க்’ என்ற புத்தகம், கடின உழைப்பு மட்டுமே என்பது ஒரு பெரிய அளவிலான மாயை என்பதை விளக்கமாக எடுத்துச் சொல்கிறது. . ‘‘மனித சமூகம் கடின உழைப்புக்கு எக்கச்சக்கமான முக்கியத்துவத்தை அளிக்கிறது. அதுவே வெற்றிக்கும் வித்திடும் என்பதை நம் மனதில் ஆணித்தரமாகப் பதியவும் வைத்துவிடுகிறது. நிஜத்தில் வெற்றிக்கான சூழல் என்பது சரியான தேர்வுகள் மற்றும் வழிகாட்டிகளால்தான் (Mentors) உருவாக்கப்படுகிறது என்பதை நமக்கு இந்தச் சமூகம் உணர்த்துவதே இல்லை. இதனாலேயே பெரும்பாலான இளைஞர்கள், இளம் வயது புரொஃபஷனல்கள் கடுமையான உழைப்பைக் கொடுத்தும், குறைந்த அளவிலான பலனைப் பெறும் சூழலிலேயே இருந்து வருகின்றனர்’’ என்று சொல்லி ஆரம்பிக்கிறார் இந்தப் புத்தகத்தின் ஆசிரியர். இந்தப் புத்தகம் ஆறு பெரும் பிரிவாகப் பிரிக்கப்பட்டுள்ளது.

. பிடித்ததைச் செய்யுங்கள்..!

நீங்கள் பேரார்வம் கொண்ட விஷயத்தைச் செய்யுங்கள் என்ற பொதுவானதொரு அறிவுரை 1990-களின் ஆரம்பத்திலிருந்து பெருமளவில் இந்த உலகத்தில் வழங்கப்பட்டு வருகிறது. பிடித்ததைச் செய்தால் வெற்றி பெறலாம் என்ற விஷயம் பல இளைஞர்களுக்கு மிகவும் பிடித்துப்போய்விடுகிறது. ஆனால், வாழ்வில் ஒருசிலரே சிறு பிராயத்திலேயே அவர்களுக்குப் பிடித்த விஷயத்தை உணர்ந்து (அவை நிறுவன, சமூக ரீதியான ஆதரவைப் பெறும் வகையில் இருப்பவையாக இருக்கும் வகையில்) செயல்படும் பாக்கியத்தைப் பெற்றவர்களாக இருக்கின்றனர். பெரும்பாலான வர்களுக்கு இந்த விஷயம் என்பது எள்ளளவும் நடப்பதேயில்லை. எனவே, இந்தப் பிடித்ததைச் செய்கிற விஷயத்தைக் கைவிடுவதே நல்லது.

நமக்கு பிடித்தது என்பதை நாம் கண்டறியக் கூடாது. நடப்பில் உள்ள ஒரு விஷயத்தில் (உலக நடப்பில் ஜெயிக்கக்கூடிய வகையிலான) நம்முடைய பிடித்தத்தை வளர்த்தெடுப்பது எப்படி என்பதை நாம் அறிந்துகொள்ள வேண்டும். அப்போதுதான் அந்த விஷயத்தில் நாம் வெற்றி பெற முடியும். புதிதாகப் பலவற்றையும் தெரிந்துகொள்வதில் ஆர்வத்தை (curiosity) நாம் வளர்த்துக்கொண்டோம் எனில், அதில் ஒன்று நமக்கு பிடிக்க வாய்ப்புள்ளது.

பிடித்துப் போதல் என்பது நீண்ட நாள்கள் அடிப்படையில் உருவெடுக்கும் ஒரு விஷயமாகும். உங்களுக்குப் பிடித்த விஷயத்தில் நீங்கள் ஒரு ஒற்றை ஆளாகச் செயல்பட்டு வெற்றி காண முடியாது. பிடித்த விஷயங்களைக் கற்றுக் கொள்வதற்கான ஒரு சமூகத்தை (community) உருவாக்க முயலுங்கள். அல்லது ஏற்கெனவே அப்படி ஒன்று இருந்தால் அதனுடன் இணைந்து செயல்படுங்கள்’’ என்கிறார் ஆசிரியர்.

. நீ நீயாக இரு..!

அடுத்தபடியாக, ‘நீ நீயாக இரு’ என்பது இன்றைய இளைஞர்களுக்குச் சொல்லப்படும் ஓர் அறிவுரை. இதற்கு என்ன அர்த்தம்? ‘உன்னுள் ஒரு நிலையான குணாதிசயம் இருக்கிறது. அந்தக் குணாதிசயத்தை எப்போதும் வெளிப்படுத்திக் கொண்டேயிரு. அந்த அடிப்படைக் குணாதிசயத்தை மறைத்து முகமூடி போட்டுக்கொண்டு திரியாதே’ என்ற அறிவுரையை இன்றைக்குப் பலரும் சொல்லக் கேட்டிருக்கிறோம்.

. ஆனால், நமக்குள் நிரந்தரமான ஒரு குணம் என்ற ஒன்று கிடையவே கிடையாது என்று ஆணித்தரமாக அடித்துச் சொல்லும் ஆசிரியர், சின்னச் சின்ன பரிசோதனைகளின் மூலம் நமக்குள் பல்வேறு விதமான குணங்கள் குடிகொண்டுள்ளது என்பதை நம்மால் புரிந்துகொள்ள முடியும் என்கிறார். இந்தவித பரிசோதனைகள் ‘நீ யார்’ என்பதை உணர்ந்துகொள் என்பதில் இருக்கும் பொய்யை வெட்டவெளிச்சமாக்கிவிடும்.

நீங்கள் உங்களை அடுத்தவர்களிடத்தில் எப்படிக் காண்பித்துக் கொள்கிறீர்கள் என்பதைக் கூர்ந்து கவனியுங்கள். எந்த அளவுக்கு பாசாங்கு செய்கிறீர்கள் (Hypocirisy) என்பதைக் கவனித்து அதை நம்முடைய குணத்துக்குப் பொருந்துவதற்கு ஏதுவாகப் பின்னோக்கிய வகையில் (பாசாங்கை குறைக்காமல் உண்மையில் குணத்தை மாற்றிக்கொள்ளும் வகையில்) சரிசெய்துகொள்ள முயலுங்கள்’’ என்கிறார் ஆசிரியர்.

‘‘நீங்கள் என்ன செய்கிறீர்களோ அதுதான் நீங்களே தவிர, உங்களின் உள்ளே ஒரு குணம் ஒன்றும் ஒளிந்துகொண்டு இருப்பதில்லை என்பதைப் புரிந்துகொள்ளுங்கள்’’ என்கிறார் ஆசிரியர்.

. திறமை ஒரு நீர்க்குமிழி..!

நம் திறமை என்பது ஒரு நீர்க்குமிழி போன்றது. திறமை (புத்திசாலித்தனம்/அறிவுக்கூர்மை போன்ற அர்த்தங்களில்) என்பது நீர்க்குமிழியைப் போன்றதாக இருப்பதாலேயேதான் ஒரு விஷயத்தில் பெரும் திறமை கொண்டிருக்கும் நபர் மற்றொன்றில் அறிவிலியாக இருந்துவிடுகிறார்.

. ஐன்ஸ்டீன், எடிசன் போன்ற வர்கள் ஒரு விஷயத்தில் பெரும் திறமைசாலியாக இருந்த நபர்களுமே எப்படித் தெரிந்தே பல தவறுகளைத் தொடர்ந்து செய்தார்கள் என்பதை மேற்கோள்காட்டி திறமை என்பது ஒரு குமிழி போன்றதே என்பதைத் தெளிவாக விளக்குகிறார் ஆசிரியர்.

‘‘ஒருவர் வாழ்நாள் முழுவதும் உலகில் உள்ள அனைத்து விஷயங்களிலும் திறமையானவராக இருப்பதில்லை. தன்னம்பிக்கைக்கும் தகுதித்திறனுக்கும் இடையேயுள்ள உறவு என்பது கடும் குழப்பமான ஒன்று. மனிதர்களை முட்டாள்கள், புத்திசாலிகள் என இரு பெரும் பிரிவாகப் பிரிக்கிறோம்.

ஆனால், நிஜத்தில் இப்படிப்பட்ட பிறவி புத்திசாலியோ, பிறவி முட்டாளோ இருப்பதேயில்லை. ஒரு விஷயத்தில் அதிபுத்திசாலி இன்னொரு விஷயத்தில் அடிமுட்டாளாக இருக்க வாய்ப்புள்ளது என்பதை நாம் கண்கூடாகப் பார்க்கிறோம். இதனாலேயேதான் புத்திசாலித்தனம் என்பது ஒரு நீர்க்குமிழி போன்றது என்கிறேன்’’ என்று சொல்கிறார் ஆசிரியர்.

. அதிர்ஷ்டம் என்பது...

அதிர்ஷ்டம் என்பதன் மேற்பரப்புக்கான (surface area) சூத்திரத்தை ஜேசன் ராபர்ட்ஸ் என்பவர் இப்படிச் சொன்னார். அதிர்ஷ்டம் = முயலும் காரியத்தைச் செய்தல் x செய்யும் காரியத்தைப் பலருக்கும் சொல்தல். (Luck = Doing x Telling). முழுமூச்சாக இறங்கி ஒரு காரியத்தைச் செய்யும்போது நம்முடைய உழைப்புக்கான அதிக பலன் கிடைக்க வாய்ப்பிருந்தாலும், அதை முழுமூச்சாகச் செய்வதாகப் பலரிடமும் கூறும்போது, அவர்களுடன் தொடர்பில் இருப்பவர்களிடம் சொல்ல, நமக்கு புதிய வாய்ப்புகள் வருவதற்கான வாய்ப்புகள் அதிகரிக்கும். அப்படிப் பல நெட்வொர்க்குகளுக்கு நம்முடைய செயல் தெரியும்போதுதான் பிரமாண்டமானதொரு வாய்ப்பு நம்மை நோக்கிவரும். எனவேதான், அதிர்ஷ்டம் என்பதின் மேற்பரப்பு இந்த இரண்டையும் கொண்டது என்கிறார் அவர்.

. இறுதியாக, பால் கிரஹாமில் ஆரம்பித்து சார்லி மங்கர் வரையிலான வெற்றிபெற்ற மனிதர்கள் 11 பேரிடமிருந்து நாம் கற்றுக்கொள்ள வேண்டிய விஷயங்கள் என்ன என்பதைத் தனித்தனி அத்தியாயமாகத் தந்து இந்தப் புத்தகத்தை நிறைவு செய்துள்ளார் ஆசிரியர்.

கடின உழைப்பும் வெற்றியும் ஒன்றுக்கொன்று தொடர்புடையது என்றாலும், கடின உழைப்பு மட்டுமே வெற்றிக்கான ஒரு விஷயம் இல்லை என்று பல்வேறு ஆராய்ச்சி முடிவுகளின் மூலமும் தர்க்கங்களின் மூலமும் தெள்ளத் தெளிவாகப் புரியவைக்க முயல்கிற இந்தப் புத்தகத்தை அனைவரும் ஒரு முறை கட்டாயம் படித்துப் பலன் பெறலாம்.

- நாணயம் விகடன் டீம்