Published:Updated:

கேள்வி - பதில் : வங்கி ஆப்பில் பணப்பரிமாற்றம் செய்தால்...

சிக்கல் இல்லாமல் இருக்குமா?

பிரீமியம் ஸ்டோரி

நான் பொதுத்துறை வங்கி ஒன்றில் கணக்கு வைத்திருக்கிறேன். என்னுடைய வங்கிக்கென ஆன்லைன் ஆப் இருக்கிறது. கூகுள் பே ஆப்பையும் ஆன்லைன் பணப்பரிமாற்றத்துக்காக வைத்திருக்கிறேன். என்னுடைய ஆன்லைன் பணப் பரிமாற்றத்துக்கு இந்த இரண்டில் எதைப் பயன்படுத்துவது சிறந்தது?

நந்தகுமார், முகநூல் வழியாக...

ஜி.டி.கோபாலகிருஷ்ணன், வங்கி மேலாளர், இந்தியன் வங்கி

“உங்கள் வங்கி ஆப் வழியாக ஆன்லைன் பணப்பரிமாற்றம் செய்யும்போது, அது வங்கியுடன் நேரடித் தொடர்பில் இருக்கும். அதனால் பணப்பரிமாற்றம் விரைவாக நடைபெறும். இதில் ஏதாவது தவறு நேர்ந்தால், விரைவாகத் தீர்வுகாண முடியும். கூகுள் பே பணப்பரிமாற்றத்தில் தவறு நேர்ந்தால், தீர்வு கிடைக்க சற்றுக் கூடுதல் காலஅவகாசம் தேவைப்படும். அதே நேரத்தில் கூகுள் பே மட்டுமே பயன்படுத்துபவர்களுடன் பணப்பரிமாற்றம் செய்ய, நீங்களும் கூகுள் பே பயன்படுத்துவது சிறந்தது. உங்களின் வங்கியின் ஆப்பை எப்போதும் பயன்படுத்துவதோடு, தேவைப்படும்போது கூகுள் பே ஆப்-ஐயும் பயன்படுத்தலாம்.”

என் வயது 27. திருமணமாகவில்லை. மாத வருமானம் 30,000 ரூபாய். தனியார் நிறுவனத்தில் பணியாற்றும் நான் மாதந்தோறும் எவ்வளவு சேமிக்கலாம்?

சஞ்சய் குமார், முகநூல் வழியாக...

என்.விஜயகுமார், நிதி ஆலோசகர்

“உங்களுக்குத் திருமணமாகாததால், செலவு குறைவாகத்தான் இருக்கும். எனவே, உங்கள் வருமானத்தில் பெரும்பகுதியைச் சேமிப்பது நல்லது. குறைந்தபட்சம் 30% என்ற கணக்கில் உங்கள் மாத வருமானத்தில் 9,000 ரூபாய் வரை சேமிக்கலாம். அடுத்ததாக, சேமித்த தொகையை முதலீடாக மாற்ற வேண்டும். முதலில், மியூச்சுவல் ஃபண்டில் நீண்டகால இலக்குகளை நிர்ணயித்துக்கொண்டு, மூன்று எஸ்.ஐ.பி முதலீடுகளைத் தொடங்குங்கள். இவை போக, அவசரத் தேவைகளுக்காக எமர்ஜென்ஸி ஃபண்ட் ஒன்றை வைப்பு நிதியாகப் போட்டு வைத்துக்கொள்வது நல்லது.”

ஜி.டி.கோபாலகிருஷ்ணன், என்.விஜயகுமார், எஸ்.ஸ்ரீதரன்
ஜி.டி.கோபாலகிருஷ்ணன், என்.விஜயகுமார், எஸ்.ஸ்ரீதரன்

என் வயது 35. நான்கு வயது மகன் இருக்கிறான். 80 லட்சம் ரூபாய்க்கு டேர்ம் பிளான் எடுத்திருக்கிறேன். ஆனால், அதில் கிரிட்டிக்கல் இல்னெஸ் கவரேஜ் கிடையாது. தற்போது தனியாக கிரிட்டிக்கல் இல்னெஸ் பாலிசி எடுக்கலாமா அல்லது கிரிட்டிக்கல் இல்னெஸ் கவரேஜ் உள்ள டேர்ம் பிளான் எடுக்கலாமா?

ஆர்.ராமகிருஷ்ணன், சென்னை-33

எஸ்.ஸ்ரீதரன், நிதி ஆலோசகர்

“நீங்கள் டேர்ம் இன்ஷூரன்ஸ் 80 லட்ச ரூபாய்க்கு எடுத்திருப்பதாகக் குறிப்பிட்டிருக்கிறீர்கள். கிரிட்டிக்கல் இல்னெஸ் கவரேஜ் என்பது ஒரு ரைடராக மட்டுமே டேர்ம் இன்ஷூரன்ஸ் பாலிசிகளில் இருக்கும். ரைடர் பாலிசிகளில் 7-10 வகையான சிக்கலான நோய்கள் மட்டுமே கவராகும். எனவே, கிரிட்டிக்கல் இல்னெஸ் கவரேஜுக்காக பிரத்யேக பாலிசி எடுத்துக்கொள்வது நல்லது.”

நான் புதிதாக கார் வாங்கியிருக்கிறேன். கார் விற்பனை ஷோரூமில் நான் கேட்ட நிறுவனத்தின் இன்ஷூரன்ஸை செய்து கொடுக்காமல், இன்னொரு நிறுவனத்தின் இன்ஷூரன்ஸ் நிறுவனத்தின் பாலிசியைத் தந்திருக்கிறார்கள். ஆனால், அந்த இன்ஷூரன்ஸ் நிறுவனம் சரியில்லை என என் நண்பர்கள் கூறுகிறார்கள். நான் என்ன செய்வது?

பிரகாஷ், முகநூல் வழியாக...

வி.எஸ்.சுரேஷ், வழக்கறிஞர்

“குறிப்பிட்ட நிறுவனத்தின் வாகனக் காப்பீட்டை வாங்கும்படி வாடிக்கையாளர்களை யாரும் வற்புறுத்த முடியாது. ஆனால், சில வாகன விற்பனையகங்கள் குறிப்பிட்ட ஒரு காப்பீட்டு நிறுவனத்துடன் ஒப்பந்தம் செய்துகொண்டிருக்கும். பொதுத்துறை காப்பீட்டு நிறுவனங்களைவிடக் கூடுதல் கமிஷன் தொகையை தனியார் நிறுவனங்கள் வழங்குவதால், அந்த நிறுவனங்களின் பாலிசியை கார் விற்பனையகங்கள் தரலாம். வாடிக்கையாளர்கள் விழிப்புணர்வுடன் இருக்க வேண்டும். ஒருமுறை காப்பீடு எடுத்துவிட்டால், அதை கேன்சல் செய்ய இயலாது.”

வி.எஸ்.சுரேஷ், எஸ்.ராமலிங்கம்
வி.எஸ்.சுரேஷ், எஸ்.ராமலிங்கம்

தனியார் நிறுவனத்தில் பணியாற்றிவரும் நான் (வயது 38) கடந்த ஆறு ஆண்டுகளாக பி.பி.எஃப் கணக்கில் முதலீடு செய்துவருகிறேன். தற்போது, ஐந்து ஆண்டுகாலப் பணி ஒப்பந்தத்தில் கத்தாருக்குச் செல்கிறேன். என்னுடைய பி.பி.எஃப் அக்கவுன்ட்டை முடித்துக்கொள்ள வேண்டுமா... அப்படி முடித்துவிட்டால் அதை வேறு எதில் பாதுகாப்பாக முதலீடு செய்வது?

சுதீப், கோயம்புத்தூர்-2

எஸ்.ராமலிங்கம், நிதி ஆலோசகர்

“நீங்கள் வேலைக்காக கத்தாருக்குச் சென்றாலும், உங்களுடைய பி.பி.எஃப் அக்கவுன்ட்டை இந்தியாவில் தொடரலாம். பி.பி.எஃப் முதலீட்டின் லாக் இன் பீரியடு 15 வருடங்கள். பி.பி.எஃப் முதலீட்டில் ஐந்து வருடங்களைக் கடந்துவிட்டால், தீவிர நோய், உயர்கல்விக்கான உடனடித் தேவை ஆகிய காரணங்களுக்காக உரிய ஆவணங்களைச் சமர்ப்பித்து, பி.பி.எஃப் கணக்கை முடித்து பணத்தைப் பெற்றுக்கொள்ள வாய்ப்புள்ளது. பி.பி.எஃப் என்பது கணக்குத் தொடங்கும்போது, முதலீடு வளரும்போது, வருமானத்தை எடுக்கும்போது என மூன்று காலகட்டத்திலும் வரிச்சேமிப்பு வசதிகொண்டது. இதுதான் பாதுகாப்பான முதலீடு. எனவே, இந்தக் கணக்கை முடித்துக் கொள்ளாமல் லாக் இன் பீரியடு முழுமைக்கும் தொடருங்கள். பி.பி.எஃப் கணக்கை முடித்துக் கொள்வதாக இருந்தால், கத்தாருக்குச் சென்று ஆறு மாதங்களுக்குப்பிறகு ஒரு என்.ஆர்.ஐ கணக்கைத் தொடங்கி, உங்கள் பி.பி.எஃப் வருமானத்தை நீண்டகால இலக்கில் பங்கு சார்ந்த மியூச்சுவல் ஃபண்டில் முதலீடு செய்து பலன் பெறுங்கள்.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

வெளிநாடுகளுக்குப் பொருளை ஏற்றுமதி செய்வதற்குத் தேவையான முதன்மையான ஆவணங்கள் என்னென்ன?

ரஞ்சித், சென்னை-47

கே.எஸ்.கமாலுதீன், இயக்குநர், புளூபாரத் எக்ஸிம் பிரைவேட் லிமிடெட்

‘‘வெளிநாடுகளுக்குப் பொருள்களை ஏற்றுமதி செய்யும்போது நிறைய ஆவணங்கள் பயன்படுத்தப்படும். அவற்றில் முதன்மை யானவையாக மூன்று ஆவணங்களைச் சொல்லலாம். அவை, கமர்ஷியல் இன்வாய்ஸ், பேக்கிங் லிஸ்ட், எஸ்.டி.ஃபார்ம் (Statutory Declaration Form - S.D.F).

கமர்ஷியல் இன்வாய்ஸ் என்பது ஏற்றுமதி செய்யப்பட்ட பொருள்கள் குறித்த விவரங்கள் அடங்கிய ஏற்றுமதியாளருக்கும், வாடிக்கையாளருக்கும் இடைப்பட்ட ஆவணம்.

எக்ஸ்போர்ட் பேக்கிங் லிஸ்ட்டில் ஏற்றுமதி செய்யப்படும் பொருள்களின் நிகர எடை, மொத்த எடை, பொருள்களின் எண்ணிக்கை உள்ளிட்ட விவரங்கள் இருக்கும்.

ஏற்றுமதிக்கான தொகையை எவ்வளவு நாள்களுக்குள் செலுத்துவது என்று ரிசர்வ் வங்கிக்குத் தெரிவித்த விவரம் எஸ்.டி ஃபார்மில் அடங்கி இருக்கும்.’’

கே.எஸ்.கமாலுதீன், ஆர்.கணேசன்
கே.எஸ்.கமாலுதீன், ஆர்.கணேசன்

என் மகன் அமெரிக்காவில் கல்லூரிப் படிப்பு படிப்பதற்காக வங்கிக் கடன் பெற முடியுமா?

செந்தில்வேலன், சென்னை-15

ஆர்.கணேசன், உதவிப் பொதுமேலாளர் (ஓய்வு), பஞ்சாப் நேஷனல் பேங்க்

“வெளிநாட்டிலுள்ள கல்வி நிலையங்களில் படிப்பதற்கு அனைத்து வங்கிகளிலும் கல்விக் கடன் கிடைக்கும். அந்தக் கல்வி நிலையங்களின் நம்பகத்தன்மை, மாணவனின் கல்வித்தரம், குடும்பச்சூழல் குறித்தெல்லாம் கே.ஒய்.சி பார்ப்பார்கள்.

இவை தவிர, பெற்றோர் தரப்பில் தனிநபர் உத்தரவாதம், கொலேட்டரல் செக்யூரிட்டியாக வீடு அல்லது நிலத்தை வங்கிக்கு அடமானமாகத் தர வேண்டியிருக்கும்.”

கேள்விகளை அனுப்புபவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி: கேள்வி-பதில் பகுதி, நாணயம் விகடன், 757, அண்ணாசாலை, சென்னை-2. nav@vikatan.com

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு