Published:Updated:

கொரோனாவுக்குப் பிறகு பின்பற்ற வேண்டிய புதிய நிதி விதிமுறைகள்! - ஏன் அவசியம்..?

தனிநபர் நிதி நிர்வாகம் தொடர்பாக ஏற்கெனவே இருந்துவந்த விதிமுறைகள் கொரோனாவுக்கு பிறகு மாறியிருக்கிறது!

பிரீமியம் ஸ்டோரி
டந்த எட்டு மாதங்களாக நம்மைப் பாடாதபாடு படுத்திவரும் கோவிட் 19, நம்மவர்களின் வாழ்க்கையை முற்றிலும் மாற்றிப் போட்டிருக்கிறது. பலருக்கு வேலை பறிபோய் இருக்கிறது. இன்னும் பலருக்கு சம்பளம் 10% தொடங்கி 50% வரைக்கும் குறைக்கப்பட்டிருக்கிறது. ஆனால், வெங்காயம், தக்காளி போன்ற அத்தியாவசியமான உணவுப் பொருள்களின் விலை உயர்ந்து, வருகிற வருமானம் அன்றாடச் செலவுகளுக்கே போதாத நிலையை உருவாக்கியுள்ளது.
கொரோனாவுக்குப் பிறகு பின்பற்ற வேண்டிய புதிய நிதி விதிமுறைகள்! - ஏன் அவசியம்..?

புதிய நிதி விதிமுறைகள்...

முன்னெப்போதும் உதாரணம் இல்லாத இந்த கோவிட் பரவலால் போடப்பட்ட வீடங்கு, ஊரடங்கு, தொழில் முடக்கம் ஆகியவற்றால் நாட்டின் பொருளாதார வளர்ச்சி பெரிதும் பாதிக்கப்பட்டிருக்கிறது. கூடவே தனிநபர்களின் நிதிநிலையும் பெரிதும் சிக்கலுக்கு உள்ளாகி இருக்கிறது.

இது போன்ற நிலை எதிர்காலத்தில் ஏற்பட்டால் அதைச் சமாளிக்க நாம் தயாராக இருப்பது அவசியம். அதற்கு நாம் புதிய நிதி விதிமுறைகளை உருவாக்கி, அதன்படி செயல்படுவது முக்கியம். அந்தப் புதிய நிதி விதிமுறைகள் என்ன என்று விரிவாகப் பார்ப்போம்.

1. குறைந்தபட்ச சேமிப்பு 30%

பொதுவாக, சம்பளம் அல்லது வருமானத்தில் 10% கட்டாயம் சேமிக்க வேண்டும் என்பார்கள். ஆனால், இது போதாது என நமக்கு கோவிட் ஊரடங்கு நிரூபித்திருக்கிறது. இனி சம்பளத்தில் குறைந்தபட்சம் 30% சேமிக்க வேண்டும் என்பதைப் பழக்கமாக்கிக் கொண்டால்தான், இதுபோன்ற பேரிடர் காலத்தில் நிலைமையை சமாளித்து நிம்மதியாக இருக்க முடியும்.

கொரோனாவுக்குப் பிறகு பின்பற்ற வேண்டிய புதிய நிதி விதிமுறைகள்! - ஏன் அவசியம்..?

இதற்குத் தேவையில்லா செலவுகளைத் தவிர்க்கலாம். மேலும், அடிக்கடி ஷாப்பிங் போவது, ஹோட்டல்களில் சாப்பிடுவது, சினிமாவுக்குப் போவது போன்றவற்றைக் குறைக்கலாம். இப்படி செய்யும்போது நம்முடைய சேமிப்பானது 30 சதவிகிதத்துக்கு மேல் அதிகரித்துவிடும்.

2. அவசரக் கால நிதித் தேவை 9 மாதச் செலவு...

குடும்பத்தின் மாதச் செலவுகளைப் போல் மூன்று முதல் ஆறு மடங்கு தொகையை அவசரக் கால நிதியாக வைத்திருக்க வேண்டும் என நிதி நிபுணர்கள் காட்டும் வழிகாட்டி. ஆனால், கொரானா பாதிப்பு, இந்த அளவு தொகையைவிட அதிக தொகை இருந்தால்தான் பேரிடர் போன்ற காலத்தில் நிலைமையைச் சமாளிக்க முடியும் என்பதை நமக்கு உணர்த்தி இருக்கிறது. அந்த வகையில், உங்களின் அவசரக் கால நிதியை இனி மாதச் செலவை போல் ஒன்பது மடங்காக அதிகரித்துக் கொள்ளுங்கள்.

கொரோனாவுக்குப் பிறகு பின்பற்ற வேண்டிய புதிய நிதி விதிமுறைகள்! - ஏன் அவசியம்..?

உங்களின் ஒரு மாதச் செலவு என்பதில் குடும்ப மளிகைச் செலவுகள், செல்போன் ரீசார்ஜ், மின்சாரக் கட்டணம், தண்ணீர் கட்டணம் போன்றவற்றுடன் இன்ஷூரன்ஸ் பாலிசிக்கான பிரீமியம், கடனுக்கான மாதத் தவணை (இ.எம்.ஐ), முதலீட்டுத் தொகை (ஆர்.டி, எஸ்.ஐ.பி) ஆகியவற்றையும் சேர்த்துக் கொள்ளுங்கள். அப்போதுதான், பேரிடர் ஏற்படும்போது சமாளிக்க முடியும்.

குடும்பச் செலவுகளைக் குறைப்பது கடினம். தற்போதைய கொரானா பாதிப்பின்போது பலரும், இ.எம்.ஐ கட்ட முடியாமல் அவதிபட்டிருக்கிறார்கள். ஆர்.பி.ஐ ஆறு மாதம் கழித்து தவணையைக் கட்டலாம் என்று சலுகை கொடுத்தாலும், இப்போது அந்த ஆறு மாத காலத்துக்கான வட்டிக்கு வட்டி மட்டும் தள்ளுபடி செய்யப்பட்டிருக்கிறது. ஆறு மாதம் தவணை கட்ட முடியாதவர்கள், கடன் தொகை, பாக்கி இருக்கும் கடன் காலம் ஆகியவற்றைப் பொறுத்து ஆறு மாதத்துக்குப் பதில் சுமார் 10, 15 மாதங்கள் கூடுதலாக கட்ட வேண்டிவரும் நிலைமை உள்ளது. அடுத்து பலரும், ஆர்.டி மற்றும் எஸ்.ஐ.பி முதலீட்டை நிறுத்தியிருக்கிறார்கள். இன்னும் சிலர், ஆயுள் காப்பீடு மற்றும் மருத்துவக் காப்பீட்டுக்கான பிரீமியத்தைக் கட்டுவதைக் கூட நிறுத்தி இருக்கிறார்கள்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பேரிடர் காலத்தில் எந்தச் செலவு அல்லது முதலீட்டை வேண்டுமானாலும் நிறுத்தலாம். ஆனால், இன்ஷூரன்ஸ் பாலிசிக்கான பீரிமியம் கட்டுவதை மட்டும் நிறுத்தக் கூடாது. இன்ஷூரன்ஸ் நிறுவனங்களிடம் கேட்டால், பிரீமியம் கட்டும் கெடுதேதியை ஓரிரு மாதங்களுக்கு வேண்டுமானால் நீட்டித்துத் தரும். ஆனால், பல மாதங்களுக்கு நீட்டித்துத் தரும் எனச் சொல்ல முடியாது. சில மாதங்கள் சலுகை தந்தாலும், பழைய பிரீமியத்தையும் சேர்த்து அடுத்து மொத்தமாக கட்ட வேண்டி வரும். எனவே, சுமார் ஒன்பது மாதச் செலவுகளை அவசரக் கால நிதியாகச் சேமித்து வைப்பது இனி அவசியமாகிறது.

இந்தப் பணத்தை அவசரத்துக்கு எடுத்து செலவு செய்யும் விதமாக வங்கி சேமிப்புக் கணக்கு, ஃபிக்சட் டெபாசிட், மியூச்சுவல் ஃபண்டில் லிக்விட் ஃபண்ட் ஆகியவற்றில் சேமித்து வைத்திருக்கலாம்.

கொரோனாவுக்குப் பிறகு பின்பற்ற வேண்டிய புதிய நிதி விதிமுறைகள்! - ஏன் அவசியம்..?

3. ஆயுள் காப்பீடு ஆண்டு சம்பளத்தைப் போல் 20 மடங்கு...

பொதுவாக, குடும்பத்தில் சம்பாதிக்கும் உறுப்பினரின் பெயரில் அவரின் ஆண்டு சம்பளத்தை சுமார் 15 மடங்கு தொகைக்கு ஆயுள் காப்பீடு (லைஃப் இன்ஷூரன்ஸ்) எடுக்க வேண்டும் என்கிற விதிமுறை கொரோனா வந்த பிறகு காலாவதி ஆகியிருக்கிறது.

இந்த கொரானா பேரிடர் காலம், ஆண்டு சம்பளத்தைப் போல் 15 மடங்குக்கு ஆயுள் காப்பீடு எடுத்திருப்பது போதாது என நிரூபித்துள்ளது. இனி சுமார் 20 மடங்கு எடுத்தால்தான், குடும்பத்தில் வருமானம் ஈட்டும் நபருக்கு ஏதாவது அசம்பாவிதம் நடந்தால், குடும்ப உறுப்பினர்களின் தற்போதையை வாழ்க்கை முறை, பிள்ளைகளின் கல்வி, கல்யாணம் ஆகியவற்றைக் குடும்பத் தலைவர் ஏற்கெனவே திட்டமிட்டிருந்தது போல் நடத்த முடியும்.

அதிக தொகைக்கு வீட்டுக் கடன், கார் கடன் உள்ளிட்ட கடன்கள் வாங்கி இருக்கும்பட்சத்தில், அந்தக் கடன் தொகைக்கு இணையாகக் கூடுதலாக டேர்ம் பிளான் எடுத்திருப்பது அவசியம். அப்போதுதான் வருமானம் ஈட்டும் குடும்பத் தலைவருக்கு ஏதாவது அசம்பாவிதம் நடந்தால், குடும்ப உறுப்பினர்களின் தலையில் கடன் சுமை விழாமல், வீடு, கார் போன்றவை வந்துசேரும்.

இந்த அளவுக்கு அதிக கவரேஜ் என்கிறபோது, குறைந்த பிரீமியத்தில் அதிக ஆயுள் காப்பீடு அளிக்கும் முழுக்க முழுக்க ஆயுள் காப்பீட்டு பாலிசியான டேர்ம் பிளான் எடுப்பதுதான் சரியாக இருக்கும். இனி நீங்கள் ஆயுள் காப்பீட்டு பாலிசி எடுப்பதாக இருந்தால், உங்கள் ஆண்டு வருமானத்தைப் போல, 20 மடங்கு இருக்கிறதா என்று பார்த்து வாங்குங்கள்.

4. மருத்துவக் காப்பீடு ரூ.10 லட்சம்...

பொதுவாக, குடும்ப உறுப்பினர்கள் அனைவருக்கும் சேர்த்து ரூ.3 லட்சம் முதல் ரூ.5 லட்சத்துக்கு மருத்துவக் காப்பீடு (ஹெல்த் இன்ஷூரன்ஸ்) எடுக்கச் சொல்வோம். இந்த கொரானா பரவலால் ஏற்பட்ட நிதிச் சிக்கல் மற்றும் உடல்நலப் பாதிப்பு, அதற்கான மருத்துவச் செலவுகளை எல்லாம் பார்த்தால், இனி குடும்பத்திலுள்ள உறுப்பினர்களுக்கு ரூ.8 லட்சம் முதல் ரூ.10 லட்சம் ரூபாய் வரை இழப்பீடு கிடைக்கிற மாதிரி மருத்துவக் காப்பீடு எடுப்பது அவசியம் என்கிற சூழ்நிலையை ஏற்படுத்தியிருக்கிறது.

ஒருவர் தனியே ரூ.10 லட்சத்துக்கு மருத்துவக் காப்பீட்டு பாலிசி எடுத்தால் பிரீமியம் அதிகமாகக் கட்ட வேண்டி இருக்கும். அதற்குப் பதில், அடிப்படை பாலிசி ரூ.3 லட்சம் அல்லது ரூ.5 லட்சத்துக்குள் இருக்கும் பட்சத்தில், டாப் அப் பாலிசி ரூ.5 லட்சத்துக்கு எடுத்துக் கொள்ளலாம். இந்த டாப் அப் பாலிசிக்கான பிரீமியம், அடிப்படை பாலிசி யோடு ஒப்பிடும்போது மிகக் குறைவாகும் என்பதை நீங்கள் கவனித்தாக வேண்டும்.

இந்த நான்கு புதிய நிதி விதிமுறைகளைப் பின்பற்றி நடந்தால், கொரோனா இரண்டாம் அலை பற்றிய கவலையேபடத் தேவையில்லை!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு